Read Biete 1 SAMUELA 7 Bible Online

1 SAMUELA 7 - Biete bible

1 SAMUELA 7

¹Khanchu, Kiriat Jearim khuaa mihei khah an zu fe a, PUMAPA Thuthlung Bôm kha itlânga Abinadaba inah an chôi inlût a, a naipa Eleazara kha PUMAPA Thuthlung Bôm enkoltu rangin an serinran a.

²PUMAPA Thuthlung Bôm khah Kiriat Jearimah khan zoro sôt tak kum sôminika ten a om a. Kha sungah khan Israel mihei murdi khah PUMAPA ringaiin an ṭap ngai a.

³Khante, Samuela khan Israel mihei ziangah khan, “Nin lungril takka PUMAPA tiang nin ngat tak takin chu, ram dang pathianhei neh Astarothi pathiannu rilimhei khah nin lâi ata pai vang rei. Nin lungril kha PUMAPA ta rangin siam unla, a sin bang tho rei; khanchu, Filistia mihei kut ata hi nangni ai sanisua rang a nit,” a ti a.

⁴Khanchu, Israel mihei khan an Baala mirmilhei neh Astarothi mirmilhei khah an pai vang a, PUMAPA sin bang khah an tho tâk a.

⁵Khanungchu, Samuela khan, “Israel mihei murdi khah Mizpaah koibûm riai unla, PUMAPA ziangah nangni ṭongṭai pêk ki ti,” a ti a.

⁶Khanchu, Mizpaah an ribûm tâk a. Tui an chôi a, PUMAPA zianga thillanin an bun suak a, kha nî-ah khan a sûn itlungin bu an ngei a, “PUMAPA chungah khan kin lei îsual tâk a nit,” an ti a. Mizpa khuaah khan a nit Samuela khah Israel mihei roirêltun ai om a nit.

⁷Filistia mihein Israel mihei Mizpaah khan an ribûm iti an riatin chu Israel mihei idoi rangin Filistia rêng ringakahei khah an hong rithok a. Amakhah Israel mihein an lei riatin chu an ṭi a.

⁸Khanchu, Israel mihei khan Samuela ziangah, “Filistia mihei kut ata nen zôk ranga PUMAPA ei Pathian ne sam pêk khah bâng no roh,” an ti a.

⁹Samuela khan berate rinunêk lâi a lâk a, a that a, hâlrivâm thillanin PUMAPA ziangah a lan tâk a. Khanungchu, Israel mihei ta rangin Samuela khan PUMAPA chu â sam a; PUMAPA khan a sâm a.

¹⁰Samuela khan hâlrivâm thillan a lan lâi takah khan Filistia mihei khan Israel mihei idoi rangah khan an hong nâi a; khannisela, kha nî-ah khan PUMAPA khan Filistia mihei chungah khuarî natinsat tak ân ṭhông dur dur a. Anni chu ibuai lunginzîngin lâizâm an tho tâk a.

¹¹Israel mihei kha Mizpaa rithokah khan an suak a, Filistia mihei khah Bethkar idênin an rizûl a, an that thiai a.

¹²Khanungchu, Samuela khan lung a lâk a, Mizpa neh Sen kârah khan a phun a, “Hi ten hih PUMAPA khan a ne iṭangpui a nit,” itin armingah khan Ebenezer[4] a be a.

¹³Khanchu, Filistia mihei khah an tlôm tâk a, Israelhei ram kha hong rûn nôk khâi mak a. Samuela damsung kârkah chu PUMAPA kut khan Filistia miheia rithokin Israel mihei khah a rung mai tâk a.

¹⁴Filistia mihein Israel mihei khua an ilâkhei kha Ekrona rithoka Gath idênin Israel mihei an pêk kîr nôk a, khangkan Israel mihei khan an ram murdi chu an idong nôk tâk a nit. Israel mihei neh Amor mihei khom ringei irkan an iom tâk a nit.

¹⁵Samuela khan a dam sung kârkah chu Israel mihei roi a rêl a.

¹⁶Kum tin Bethel neh Gilgal neh Mizpa hi â thlo kual ngai a; kha munheiah khan Israel mihei thubuai khah ai rêl pêk ngai a nit.

¹⁷Khanungchu, ama omna Rama khuaah khan a kîr nôk ngai a; amakhan khom Israel mihei roi ai rêl ngai a nit. Rama khuaah khan PUMAPA ta rang mâichâm a siam a.