Read Biete 1 SAMUELA 8 Bible Online

1 SAMUELA 8 - Biete bible

1 SAMUELA 8

¹Samuela kha a hong tar tenan chu a naipahei kha Israel mihei chunga roirêltu rangin an phun a.

²A nai ulian ual riming kha Joela a nit a, a naipang ual riming kha Abija a nit; Beersebaa roirêltu an nit.

³Khannisela, anni khan an pa om dân khah zui mak a, sum neh puan tiang an kuatinkam a; khasikin, fâkinrûkhei an lâk a, dikino takkan roi an rêl ngai a.

⁴Khanungchu, Israel ruaituhei murdi khah an ribûm a, Rama khuaah Samuela ziangah an fe a;

⁵a ziangah, “En ta, ni hong ûnlian ok tâk a, ni naipahei lak khan ni om dân khah zui khâi mak a. Khasikah khan nam danghei murdi angkana kin chunga roi irêl rangin rêng ne siam pêk roh,” an ti a.

⁶Khannisela, a zianga, “Roi ne rêl pêktu rang rêng ne phun pêk roh,” an iti thu khan Samuela chu inlôm tlak mak a; khanchu, PUMAPA ziangah a ṭongṭai a.

⁷PUMAPA khan Samuela ziangah, “Mipuihein ni zianga an iti murdi ringai roh. Nangmah nang an inuam ino ni mak a, an chunga rêng rangin keimah hih an ne inuam ino a nit.

⁸Aigupta ram ata ki ṭhui suak nî-a rithoka atûn tena an thil tho dân murdi, nung ne song a, pathian dang sinhei an ne itho pêk ngai angkah ngirah hin ni chungah an itho a nit hih.

⁹Khasikin, an thu khah ringai roh; khannisela, riningna khir tak pen la, an chunga roirêltu rêng châng rang dân khah ifel takkan isîr pêk roh,” a ti a.

¹⁰Samuela khan PUMAPA thu murdi kha rêng izongtu mipuihei khah â ril riai a.

¹¹“Nin chunga roirêltu rang rêngin nangni a tho rang dân chu hingka hin nîng a ti. Nin naipahei khah sipaiin siam a ta; a ṭhen chu ridoi tâli enkoltu, a ṭhen chu sakor chungchuang mi rangin mang a ta, a ṭhen chu a sakor tâlihei matona tlân rangin mang a ti.

¹²A ṭhen sipai sângka ruaituhein, sômringaka ruaituhein phun a ta; ṭhenkahei chu a loia rinêng ituk rang hei, a bu ât rang hei, ridoinaa mang rang râlthluk siamtu rang hei, a sakor tâli mangrua siamtu rang hein mang a ti.

¹³Nin nainuhei khah a ta ranga namhoi siamtuhei, thlâisintuhei, ibai siamtuhein mang a ti.

¹⁴Ani khan nin loihei, nin grep rikulhei, nin oliv bilhei, â ṭha ṭhahei khah nangni lah pêk a ta, a milianhei pêng a ti.

¹⁵Nin bu neh nin grep rikula mi sômka khatkah nangni lah pêk a ta, a milianhei neh a ruaituhei pêng a ti.

¹⁶Nin suakhei neh nin sial-ui-ar neh nin sakuartunghei, â ṭha ṭha nangni lah pêk a ta, a sinitho rangin mang a ti.

¹⁷Nin bera lôma mi sômka khatkah nangni lah pêk a ta, nangmani zel khah a bôihei nîng nin ti.

¹⁸Khatenan chu nin la irthlang rang nin rêng sikah khan la rung nin ta; khannisela, kha tikin chu PUMAPA khan nangni sâm khâi no nih,” a ti a.

¹⁹Nikhomsela, mipuihei khan Samuela thu khah ipom nuam mak a, “Ni mak e, rêng kin nei ngêt rang a nit.

²⁰Khanchu, nam dang murdihei angkan hong nîng kin ta; kin rêng khan roi ne rêl pêk a ta, kin irâl doihei ne doipui a ta,” an ti a.

²¹Samuela khan mipuihei thusîr murdi khah arngai a; khanungchu, a fe a, PUMAPA ziangah â thlun nôk a.

²²PUMAPA khan Samuela ziangah, “An thu khah ipom inla, rêng phun pêk roh,” a ti a. Khanungchu, Samuela khan Israel mihei ziangah khan, “Mi tin mahni khuaah fe nôk chit ta rei,” a ti a.