Read Biete 1 SAMUELA 9 Bible Online

1 SAMUELA 9 - Biete bible

1 SAMUELA 9

¹Benjamina richi, mi khatkah, mi rât inthang, richong tak hi a om a, arming chu Kisa a nit a, kha mi khah Afia panama Bakoratha ruia Zerora nai Abiela naipa a nit.

²Ani khan naipa a nei a, arming chu Saula a nit a, tlangvâl mêl iṭha tak neh a vânglâi tak a nit a, Israel mihei lâiah khan ama nêka mêl iṭha rêng rêng omak a; tute a dâr ten iphâk khom omak e.

³Saula pa Kisa sakuartung ṭhenkah kha an rimang a; khanchu, Kisa khan a naipa Saula ziangah khan, “Thoi inla, isom khatkah ṭhui inla, sakuartunghei va zong roh dua,” a ti a.

⁴Khanchu, Efraim tlângramhei khah an rifang a, Salisa ramhei khom an rifang a; nikhomsela, mu mak a; khanchu, Salim ram an rifang nôk a, kha khomah khan sakuartunghei kha omak a. Khanungchu, Benjamin mihei ram an rifang nôk a, kha khomah khan mu ual mak a.

⁵Zufa ram an tlungin chu Saula khan â som ziangah khan, “Tho ta, in tiang lei kîr nôk ta rei; khanonchu, ki pan sakuartung ngaitua khâi loiin eimani kêng a ne ingaitua rang tâk,” a ti a.

⁶Â som khan “Ringai ta, hi khuaah hin Pathian mi a om a, mi marit iom tak a nit a, a îsîr murdi chu a hong itlung ngêt ngai a nit. Tho, amakhan fêng ei ta, sakuartunghei ei mu theina rang mun a ne lei iril duai lôi im,” a ti a.

⁷Saula khan a som ziangah khan, “Fe ta ngân khom ei la, kha mi khah im ei chôi pêk rang? Ei cholam bôma bai lak om khâi mak a, Pathian mi khah loman ei chôi pêk rang îte lak nei khâi mang me a, im ei lan rang o?” a ti a.

⁸Isom khan Saula khah a sâm nôk a; “Tangka iroichekah chu ki la chôi a; amakha pêng ki ta, sakuartunghei ei mu theina rang khah a ne ril duai khom a nit thei,” a ti a.

⁹Khante, Saula khan â som ziangah, “A ṭhat khate, tho fêng ei ti,” a ti a. Khanchu, Pathian mi omna khua panna tung an hang lui lâiah khan, nungâk tui ichôi ranga zuang isuakhei an tong a, an ziangah, “Hin mutheitu a om im?” itin an ridon a. Matona khan chu Israelhei lâiah mîn Pathian isôn an nuamah hin, “Tho mutheitu ziangah fêng ei ti,” an ti ngai a; atûn lâia zânthla an iti ngai hi matona khan chu mutheitu an iti ngai a nit.

¹²Anni khan, “O a om, nin matonah a lei ife a nit. Rimot unla, môk phâk nin ti. Khua nin hang lût kaneh ani chu mu zel nin ti. Vuanah hin khua a zuang itlung a nit. Vuanah hin itlânga mâichâmah mihein ribôlna an ilan a nit. Kha ribôlna khah ṭhatvurtu rang a nit sikin a tlung mâkah chu mipui khan khalai an irkhîl thei ino rang a nit. Ṭhat a vur zoi bangin kêng an mi fialhei khan an lai fâk ngai a nit. Khasikin, nin fe zelin chu itlânga bu ne rang a fe man hang mu zel nin ti,” an ti a.

¹⁴Khanchu, Saula neh â som kha khuaah khan an fe tâk a, khua an hang lûtin chu Samuela khah chubai ûnna munrisâng ipana an tianga hong an mu a.

¹⁵A mizânah khan PUMAPA khan Samuela ziangah,

¹⁶“Naktûk hi tik zoro lâi takah hin Benjamina nama mi khatkah ni ziangah ki hong itir rang a nit; ki mi Israelhei chunga ruaitu ichang rangin riak inrithu roh. Ani khan Filistia mihei kut ata ki mihei inzôk a ti. Ki mihei tuangna khah ki mu tâk a, an ikhêk rôl khan ki ziang a hong itlung tâk a nit,” a ti a.

¹⁷Samuelan Saula khah a mun chu PUMAPA khan a ziangah, “En roh, ni zianga ki îsîr khah ani hi a nit. Ani hin ki mihei chungah roirêl a ti,” a ti a.

¹⁸Khanchu, Saula khan kul kotbâi kôlah Samuela khah a va nâi a, “Mutheitu in taktiang im ai om ne ril ta,” a ti a.

¹⁹Samuela khan Saula khah a sâm a, “Keimah hi mutheitu chu ki nit. Ki matonah hin chubai ûnna munrisâng tiang fe roh, vuanah hin ki ziangah nin ruaikan khalai nin irkhîl rang a nit. Naktûk zîngah nin lungrila ridonna om murdi khom nangni ril riai ki ta; khanchu, nangni infêng ki ti.

²⁰Nin sakuartung, sûn thumka sung rimang tâk khah lunginbuai no rei, an mu tâk. Israel mihein an inang tak chu tûm ai nit? Nangmah neh ni pa insungkuahei hi ni mak im a?” a ti a.

²¹Saula khan a sâm a, “Israel nam lâiah â chîntak, Benjamina nam ki nit a, kin insungkua khom Benjamina chihei murdi lâia â chîntak a nit. Ingka sika hingkana ki ziangah nî ti tâk mani?” a ti a.

²²Khanungchu, Samuela khan Saula neh â som khah a ṭhui a, mikhual chontanah khan a ṭhui inlût a, an mi fial sômithumkahei lâiah khan mun roinpui takah ân ṭhung tâk a.

²³Samuela khan thlâisintu ziangah khan, “Ni zianga, a rana seh rang kî ti sa tlin khah hong chôi roh,” a ti a.

²⁴Khanchu, kha thlâisintu khan sa malpui tak khah a hong chôi a, Saula makungah khan a va sia a. Samuela khan, “En ta, ni ta rang ki lei isia inran chu a nit. Ot inla, fah roh. Ki mi fialhei ruala, hi zoroa ni fâk rang piala ki lei isuang a nit,” a ti a. Khanchu, kha nî-ah khan Saula kha Samuela neh khalai an rikhîl tâk a.

²⁵Chubai ûnna munrisâng ata khuaah an fe nôk tenan chu, inchungah Saula zâlna rang an siam pêk a, a zâl tâk a.

²⁶Atûk zîng kôlrisam kaneh chu Samuela khan inchunga om Saula khah â koi a, “Thoi inla, nang infe tâng ki ti” a ti a. Khangkan Saula khah a thoi a, Samuela neh an ruaikan an suak tâk a.

²⁷Kho kotsua an zu tlungin chu, Samuela khan Saula ziangah, “Isom hi ei matonah infe roh,” a ti a. Isom khah a fe tâk a. Khanchu, Samuela khan, “Nang chu la ding hi roh, Pathian thu nang la hang iril hi ki ti,” a ti a.