Read Bilaspuri मत्ती 11 Bible Online

मत्ती 11 - Bilaspuri bible

मत्ती 11

¹ताहली जे यीशु अपणे बारा चेलयां जो हुक्म देई बैट्ठया, तां सै तिन्हारे नगराँ च उपदेश कने प्रचार करने जो तित्थी ते चलिग्या।

²यूहन्ने ताहली जे जेल्ला च मसीह रे कम्मां री खबर सुणीने अपणे चेलयां जो तिसते ये पुछणे जो भेज्या भई,

³कने तिसने बोल्या, “क्या तूई मसीह आ तिसजो जे परमेशरे भेजणे रा वायदा कित्तिरा, या अहें किसी होरी रा इन्तजार करिये?”

⁴यीशुये जबाब दित्या, “सै जे किछ तुहें सुणया कने देख्या, ये सब जाईने यूहन्ने ने बोल्ला,

⁵भई अन्हे देक्खां ये कने लंगड़े चला फिराँ ये, कोढ़ी ठीक कित्ते जांये कने टौणे सुणां ये, मुड़दे जिऊंदा कित्ते जायें, कने दीन दुखियां जो यीशु मसीह रिया खुशखबरिया रा प्रचार कित्या जां।

⁶कने परमेशर तिन्हांजो आशीष देआं, सै जे माह पर विश्वास करना नीं छडदा।”

⁷ताहली जे यूहन्ने रे चेले तित्थी ते दूर जाया रां थे, तां यीशु यूहन्ने रे बारे च लोकां रिया भीड़ा ने बोलणे लगया, “तुहें इस सुनसान जगह च क्या देखणे गै थे? तुहें तित्थी हवा च हिलदे किसी लम्बे घा जो देखणे तनी गये थे!

⁸तां फेरी तुहें क्या देखणे गईरे? क्या इक माहणु तिने जे बड़े मैंहगे कपड़े पैहनीरे? नां! देक्खा, सै जे मैंहगे कपड़े पैहनां ये, सै त मैहलां ची रैयां ये।

⁹तां तुहें क्या देखणे गए थे? क्या किसी भविष्यवक्ते जो देखणे जो? हाँ, हऊँ तुहांजो दस्सां भई ये सैआ सै जे भविष्यवक्ते ते बी बड्डा।

¹⁰यूहन्ना सैई माहणु आ तिसरे बारे च जे पवित्रशास्त्रा च लिखिरा : ‘देख, हऊँ तेरते पैहले अपणे सनेहा देणे औल़े जो भेज्जी राँ, सै माहणुआं जो तेरे औणे खातर त्यार करो।’

¹¹“हऊँ तुहांजो सच्च बोलां, जितने बी माहणु संसारा च रैईरे तिन्हां चते बपतिस्मा देणे औल़े यूहन्ने ते महान कोई माहणु पैदा नीं हुया; फेरी भीं स्वर्गा रे राज्जा च छोट्टे ते छोट्टा माहणु बी यूहन्ने ते महान आ।

¹²तदुआं ते जे यूहन्ने प्रचार करना शुरु कित्या तिस वगता ते लेईने हुण तक परमेशरा रा राज तेजिया ने बधया राँ कने बलवान लोक तिसजो नाश करना चाँये।

¹³यूहन्ने रे औणे तक सारे भविष्यवक्ते कने मूसा री व्यवस्था परमेशरा रे राज्जा रे बारे च भविष्यवाणी करदे रै।

¹⁴कने चाओ तां मन्ना, यूहन्ना इ एलिय्याह साई आ तिसरे औणे रे बारे च जे भविष्यवाणी हुई थी।

¹⁵जो बी मेरी गल्ल सुणां, सै ध्यान देईने सुणो कने समझो।

¹⁶“आज इसा पीढ़ियां रे तुहां लोकां री बराबरी हऊँ किसने करूँ? सै बज़ाराँ च बैठिरे तिन्हां बच्चयां साई ये सै जे अपणे साथियां जो हाक पाईने बोल्ली रायें :

¹⁷अहें तुहांरे खातर खुशिया रे गीत गाए, पर तुहें नीं नच्चे; अहें दुख भरे गीत गाये, पर तुहें नीं रोये।

¹⁸काँह्भई यूहन्ना होरी लोकां साई न खान्दा आया न पीन्दा आया, पर लोक बोलां थे भई तिसच बुरीआत्मा इ।

¹⁹पर ताहली जे हऊँ यनि माहणुये रा पुत्र आया, सै जे आम लोकां साई खां-पीआं, पर लोक बोलां ये, ‘इस माहणुये जो देक्खा, ये पेटू कने पियक्कड़ आ; ये चुंगी लेणे औल़यां कने पापियां’ रा मित्र आ! पर माहणुये रे कम्मां ये सावित करना भई कुण बुद्धिमान आ।”

²⁰फेरी यीशुये तिन्हां नगराँ रे लोकां जो फटकारया तिन्हां च जे तिने बौहत सारे सामर्था रे काम्म कित्तिरे थे, काँह्भई तित्थी रेआं लोकें पाप करना नीं छडया।

²¹“खुराजीन कने बैतसैदा नगरा रे लोकां जो परमेशरा भयानक सजा देणी! काँह्भई तुहां च सै जे सामर्था रे काम्म कित्ते गये, जे सैई काम्म सूर कने सैदा रे नगराँ च कित्तिरे हुन्दे, तां उत्थीरे लोक बौहत पैहले टाट ओडीने, कने अपणे जिस्मा पर धूड़ मल़ीने, खेद मनान्दे हुये मन फिराई चुक्कीरे हुन्दे।

²²पर हऊँ तुहां लोकां ने बोलां भई न्याय रे दिन सूर कने सैदा नगराँ री हालत तुहां ते जादा सैहणे लायक हूणी।

²³कने तुहें कफरनहूम नगरा रे लोको, क्या तुहें सोच्चां भई तुहांजो स्वर्गा च आदर दित्या जाणा? परमेशरा तुहांजो अधोलोका च सटणा! काँह्भई सै सामर्था रे काम्म जे तू च कित्तिरे, जे सै सदोम नगरा च कित्ते हुन्दे, तां सै नगर अज्जा तक टिक्कीरा हुन्दा।

²⁴पर हऊँ तुहां लोकां ने बोलां, भई न्याय रे दिन परमेशरा तिज्जो सदोम रे निवासियां ते जादा सजा देणी।”

²⁵तिस इ वगत यीशुये गलाया, “पिता, तू स्वर्गा कने धरतिया रा मालक आ, हऊँ तेरा धन्यवाद कराँ भई तैं इन्हां गल्लां जो ज्ञानियां कने समझदार लोकां ते छुपाई ने रखीरा, कने आम लोकां पर प्रगट कित्या।

²⁶हाँ, हे पिता, ये इस खातर हुया काँह्भई तिज्जो येई ठीक लगया।

²⁷“मेरे पिता सारा किछ मिन्जो सौंपीरा; कने हकीकत च पिता ते इलावा कोई बी पुत्रा जो नीं जाणदा; कने कोई बी पुत्रा रे इलावा पिता जो नीं जाणदा; तिसरे खातर जे पुत्रे पिता जो प्रगट करना चाहया।

²⁸“अपणे धर्मगुरुआं रे नियमा रे बोझे हेठ दबोई रे सारे लोको, मेरले औआ, हऊँ तुहांजो सुख चैन देंगा।

²⁹मेरे अधीन हुई जवा तियां जे बैल जुंगड़े रे थल्ले रैयां कने मेरियां शिक्षां ते सीख लौआ, काँह्भई हऊँ आम माहणु आ कने मना रा नम्र आ: तुहांजो बी अपणे मना च सुख-चैन मिलणा।

³⁰काँह्भई सै जुंगड़ा सै जे हऊँ तुहांजो देई कराँ बड़ा सरल आ कने सै बोझ जे हऊँ तुहां पर रखीराँ सै बड़ा हल्का।”