Read Bilaspuri मत्ती 15 Bible Online

मत्ती 15 - Bilaspuri bible

मत्ती 15

¹फेरी किछ फरीसी कने यहूदी शास्त्री यरूशलेम ते यीशुये ले आये कने तिसते पुच्छया,

²“तेरे चेले अहांरे पूर्वजां रे रीति-रिवाजां रा पालन काँह नीं करदे, कने बगैर हात्थ धोये रोटी खांये।”

³यीशुये तिन्हांजो जबाब दित्या, “अपणे रीति-रिवाजां रिया वजह ने तुहें परमेशरा रे हुक्मा जो तोड़ां ये?

⁴काँह्भई परमेशरे त गलाया था, ‘तू अपणे माता-पिता रा आदर कर’, कने ‘सै जे कोई अपणे माता-पिता री बेज्जति कराँ, तिसजो जरूर मारी दित्या जाणा चाहिन्दा।’

⁵पर तुहें लोकां जो बोलां ये, सै जे कोई अपणे पिता या अपणिया माता ने बोल्ले, जो किछ फैदा तुहांजो माह्ते हूणा चाहिन्दा था, सै सब किछ परमेशरा रे अर्पण करी तरा, इस खातर तुहांरी सहायता नीं करी सकदा।

⁶इस तरिके ने तिस्सो अपणे माता-पिता रा आदर करने री जरूरत नीं, इयां तुहें अपणे रीति-रिवाजां जो परमेशरा रे वचना ते बड्डा बणाईत्या।

⁷ओ कपटियो, तुहांरे बारे च यशायाह भविष्यवक्ते ठीक इ भविष्यवाणी कित्तिरी थी, तिने बोल्या था :

⁸“ ‘ये मेरा सिर्फ अपणे मुँआं ते आदर कराँ ये, पर तुहें हकीकत च माहने प्यार नीं करदे।

⁹ये बेकार च मेरी अराधना कराँ ये, काँह्भई ये माहणुआं रे बणाईरे व्यवस्था जो धर्मा रा उपदेश समझीने सखां ये।’ ”

¹⁰फेरी तिने लोकां जो अप्पूँ ले सद्दीने तिन्हांने गलाया, “सुणा, कने समझा।

¹¹सै जे मुँआं रे अन्दर जां, सै माहणुआं जो अपवित्र नीं करदा, पर तिसरे मुँआं ते निकल़ीरा शब्द तिस्सो अपवित्र कराँ।”

¹²फेरी यीशुये रे चेले तिसले आये कने गलाया, “क्या तिज्जो पता भई तेरिया गल्ला रा फरीसियें बड़ा बुरा मन्नया?”

¹³यीशुये जबाब दित्या, “मेरे स्वर्गीय पिता तिन्हां सब्बीं जो लग करी देणा सै जे तिसरियां गल्लां ते बखरी शिक्षा दें।

¹⁴इन्हांजो छड्डा; सै परमेशरा रियां आज्ञां माहणुआं जो नीं सखान्दे, तियां जे भई अन्हा माहणु अन्हे जो रस्ता नीं दस्सी सकदा, काँह्भई तिन्हां गढे च पैई जाणा।”

¹⁵फेरी पतरसे तिसने गलाया, “अहांजो अपवित्रता रे इस उदाहरणा रा मतलब समझा।”

¹⁶तिने बोल्या, “क्या तुहें बी हुण तक नीं समझे?

¹⁷क्या तुहें नीं समझदे भई जो किछ मुँआं च जां, सै पेट्टा च पौआं, कने फेरी शरीरा ते बाहर निकल़ी जां?

¹⁸पर सै जे माहणुये रे मुँआं ते बाहर औआं, सै तिसरी भावना कने विचारा रा परिणाम आ, येई तिसजो अपवित्र कराँ।

¹⁹काँह्भई बुरे बिचार, हत्या, परस्त्रीगमन, व्यभिचार, चोरी, झूट्ठी गवाही कने निंध्या करना, ये सारी बुराईयां मना तेई औआं इयां।

²⁰येई सै गल्लां इयां सै जे माहणुये जो अपवित्र कराँ इयां, पर बिणा हात्थ धोये रोटी खाणे ते कोई अपवित्र नीं हुन्दा।”

²¹फेरी यीशु तिसा जगह जो छड्डिने सूर कने सैदा रे तरफ चलीप्या।

²²तित्थी री इक कनानी जनाना आई कने चिल्लाणे लगी, “हे प्रभु! दाऊद रे वंशज, माह पर दया कर! मेरिया कुड़िया पर बुरीआत्मा बुरे तरिके ने स्वार हुईरा।”

²³पर तिने तिसाजो कोई जबाब नीं दित्या, इस खातर तिसरे चेले तिसले आये कने विनती करने लगे, “ये अहांरे पिच्छे चिल्लान्दी हुई आई राईं इसाजो दूर भेज।”

²⁴तिने जबाब दित्या, “परमेशरे मिन्जो सिर्फ इस्राएलियां च भेज्या काँह्भई सै भटकी रियां भेड्डां साई ये।”

²⁵फेरी सै जनाना आई कने यीशुये जो मत्था टेक्कीने बोलणे लगी, “हे प्रभु, मेरी सहायता कर।”

²⁶तिने जबाब दित्या, भई “घरा रे बच्चयां (सै जे यहूदी ये) तिन्हांरी रोटी लेईने कुत्तयां रे (सै जे होरीं जातियां रे लोक ये) अग्गे पाणा ठीक नींआ।”

²⁷तिसे बोल्या, “ये ठीक आ प्रभु, पर घरा रे कुत्ते बी त अपणे मालका रिया मेज़ा हेठ पैईरे किरुआं जो खांये।”

²⁸फेरी यीशुये तिसाजो जबाब दित्या, “हे औरत तेरा विश्वास बड़ा बड्डा। सै जे तू चाँई, पूरा ओ।” कने तिस इ घड़ी तिसारी कुड़ी ठीक हुईगी।

²⁹फेरी यीशु तित्थी ते चलीप्या कने गलील समुद्रा रे कण्डे पुज्जीग्या। सै इक्की पहाड़ा पर चढ़ीने उपदेश देणे बैठिग्या।

³⁰लोकां रा दंगला रा दंगल तिसले आया। सै अपणिया सौगी लंगड़यां, टुण्डयां, अन्हेयां, गूँगयां कने कई सारे लोकां जो तिसले लेईने आये, कने लोकें तिन्हांजो तिसरे चरणां च सम्भालित्या, कने तिने सब्बीं जो ठीक कित्या।

³¹इसते लोकां जो ये देखीने भई बैहरे गूँगे बोलणे लगीरे, कने टुन्डे ठीक हुईगे, कने लंगड़े चली फिरी कराँ ये कने अन्हे हुण देक्खी पाई रायें, बौहत हैरानी हुई, सै इस्राएल रे परमेशरा री बडयाई करने लगे।

³²फेरी यीशुये अपणे चेले सद्दे कने गलाया, “मिन्जो इन्हां लोकां पर तरस आईराँ, काँह्भई ये लोक तिन्नां दिनां ते मांह सौगी ये कने इन्हांले खाणे जो बी किछ निआं। हऊँ इन्हांजो भुक्खा नीं भेजणा चाँह, काँह्भई हुई सक्कां किति ये रस्ते ची बेहोश हुईने नीं पैईजो।”

³³फेरी तिसरे चेलयां गलाया, “इतणे जादा लोकां खातर इस सुनसान जगह च इतणी रोटी अहांजो किति ते मिलगी?”

³⁴यीशुये तिन्हांते पुच्छया, “तुहांले कितणी रोटियां हाई?” तिन्हे गलाया, “सात्त रोटियां कने थोड़ी जेई मच्छियां।”

³⁵यीशुये लोकां जो धरतिया पर बैठणे रा हुक्म दित्या।

³⁶कने तिन्हां सात्त रोटियां कने मच्छीआं जो लेईने तिने परमेशरा रा धन्यवाद कित्या, कने रोटियां तोड़ीने अपणे चेलयां जो देणे लगया, कने चेले लोकां जो देणे लगे।

³⁷इस तरिके ने सारयां लोकें रज्जीने रोटी खाद्दि कने चेलयां बचीरे टुकड़यां रे सात्त टोकरु भरे।

³⁸खाणे औल़यां च जनानां कने बच्चयां जो छड्डिने चार हजार मर्द थे।

³⁹लोकां जो भेज्जीने यीशु किश्तिया पर बैठीने आईग्या कने मगदन इलाके जो चलिग्या।