Read Bilaspuri मत्ती 19 Bible Online

मत्ती 19 - Bilaspuri bible

मत्ती 19

¹ताहली जे यीशु ये गल्लां बोल्ली चुक्कया, तां गलील ते चलिग्या; कने यहूदिया रे प्रेदेशा च यरदन नदिया ते पार आया।

²तिसा जगह लोकां री इक बौहत बड्डी भीड़ तिन्हांरे पिच्छे आईगी कने यीशुये बीमारां जो ठीक कित्या।

³फेरी किछ फरीसी यीशुये जो परखणे रे मकसदा ते तिसले आए कने तिसने स्वाल कित्या, “क्या किसी बी वजह ते अपणिया घराऔल़िया जो छडणा ठीक आ?”

⁴तिने जबाब दित्या, क्या तुहें नीं पढ़या भई संसारा जो रचणे औल़े शुरु च तिन्हांजो इक नर कने नारिया रे रुपा च रचया कने गलाया,

⁵इस बजह ने आदमीये अपणे माता-पिता ते लग हुईने अपणिया घराऔल़िया सौगी इक साथ रैहणा कने तिन्हां च येढ़ा गैहरा सम्बन्ध हूणा भई सै इक इ जिस्म ओ।

⁶इसरा मतलब येआ भई हुण सै दो नी, पर इक जिस्म ये इस खातर तिसजो जे परमेशरे जोड़ीरा, तिस्सो माहणु लग नीं करो।

⁷तिन्हें तिसने गलाया, “फेरी मूसे ये कजो तह कित्या भई कोई माहणु अपणिया घराऔल़िया जो तलाक देईने छड्डी सक्कां?”

⁸यीशुये तिन्हांने गलाया, “मूसे तुहांरे पूर्वजां रिया जिद्दा रिया वजह ते तुहौं अपणिया घराऔल़िया जो छडणे री अनुमति दित्ति, पर शुरु ते येढ़ा नीं था।

⁹कने हऊँ तुहांजो बोलां, भई सै जे कोई व्यभिचारा जो छड्डिने किसी होर वजह ने अपणिया घराऔल़िया जो तलाक देई दो, कने दुज्जिया ने ब्याह करो, सै व्यभिचार कराँ; कने सै जे तिसा छड्डी रिया जो ब्यांह, सै बी व्यभिचार कराँ।”

¹⁰चेलयां तिसने गलाया, “जे इक्की जनाना कने इक्की माहणुये रे बिच येढ़ा सम्बन्ध ओ, तां ब्याह करना ठीक निआं।”

¹¹फेरी यीशुये तिन्हांने गलाया, “हर कोई त इस उपदेशा जो ग्रहण नीं करी सकदा, इसजो सिर्फ सैई ग्रहण करी सक्कां ये तिन्हाजो जे ये दान परमेशरे दित्तिरा।

¹²किछ येढ़े सै जे अपणिया मौआ रे पेट्टा तेई नपुंसक जम्मीरे; किछ येढ़े सै जे लोकें नपुंसक बणाईतरे; पर किछ येढ़े माहणु बी ये, सै जे ब्याह नीं करने रा फैसला कराँ ये भई परमेशर ताहली जे तिन्हां पर राज कराँ, तां सै तिसरी सेवा अव्वल दर्जे ने करी पाओ, सै जे इस उपदेशा जो ग्रहण करी सक्कां, सै ग्रहण करी लो।”

¹³फेरी लोक किछ बच्चयां जो लेईने तिसले आये भई सै तिन्हारे सिरा पर हात्थ रखीने प्राथना करो कने तिन्हांजो आशीरबाद देओ, पर चेलयां सै थिड़के।

¹⁴यीशुये गलाया, “बालकां जो मेरले औणे देआ तिन्हौं नां नीं करा, काँह्भई बच्चयां साई गुण रखणे औल़े माहणुआं पर इ परमेशरा राज करने रे खातर त्यार हूणा।”

¹⁵कने सै तिन्हां पर हात्थ रखीने ऊत्थीते चलिग्या।

¹⁶कने इक्की माहणुये यीशुये ले आईने तिसने गलाया, “गुरू जी, हऊँ अनन्त जीवन पाणे खातर कुण जेआ खरा काम्म करूँ?”

¹⁷यीशुये तिसने गलाया, “तू मिन्जो भलाईया रे बारे च काँह पुच्छां? काँह्भई अच्छा त परमेशर इ हाया; पर जे तू अनन्त जीवना च दाखल हूणा चाँह, तां तू हुक्मां जो मन्नया कर।”

¹⁸तिने यीशुये ते पुच्छया, “कुण जे हुक्म?” तिने गलाया, “ये भई हत्या नीं कर, बुरा बिचार मत कर, चोरी मत कर, झूट्ठी गवाही मत दे,

¹⁹अपणे पिता कने अपणी माता रा आदर करयां, कने लोकां ने अप्पूँ साई प्यार कर।”

²⁰तिने जवाने तिसते पुच्छया, “मैं इन्हां सारियां गल्लां रा पालन त कित्या; हुण मांह च किसा गल्ला री कमी?”

²¹यीशुये तिसने गलाया, “जे तू सिद्ध हूणा चाँह, तां जा, अपणा सब किछ बेच्चीने गरीबां जो बंडी दे; कने तिज्जो स्वर्गा च धन मिलणा; कने आईने मेरा चेला बण।”

²²पर ताहली जे तिने नौजवाने ये गल्ल सुणी तां सै दुखी हुईने चलिग्या काँह्भई सै बड़ा धनवान था।

²³फेरी यीशुये अपणे चेलयां ने गलाया, “हऊँ तुहांजो सच्च बोलां, भई अमीर माहणुये रा स्वर्गा रे राज्जा च दाखल हूणा मुश्कल आ।

²⁴हाँ, हऊँ तूहने बोलां भई तियां जे ऊँटा रा सुईया रे छेदा ते निकल़णा मुश्कल आ, तियां इ अमीर माहणुये रा स्वर्गा रे राज्जा च दाखल हूणा बी उतणा इ मुश्कल आ।”

²⁵ये सुणीने, चेलयां बौहत हैरान हुईने बोल्या, “फेरी किसरा छुटकारा हुई सक्कां?”

²⁶यीशुये तिन्हां खौ देखीने गलाया, “माहणुआं रे खातर त ये मुश्कल आ, पर परमेशरा रे खातर किछ बी मुश्कल निआं।”

²⁷इस पर पतरसे तिस्सो जवाब दित्या, “देख, अहें त अपणा सारा किछ छड्डिने तेरे पिच्छे आई गरे तां अहांजो क्या मिलणा?”

²⁸यीशुये तिन्हांने गलाया, हऊँ तुहां लोकां ने सच्च बोलां भई नौंये जुगा च ताहली जे माहणुये रा पुत्र अपणे प्रतापी संघासणा पर बिराजमान हूणा, तां तुहां बी सै जे मेरे पिच्छे आईरे, बारा संघासणां पर बैठीने इस्राएल रे बारा गोत्राँ रा न्याय करना।

²⁹कने तिन्हे जे मेरे खातर अपणा घर-बार, या भाईयां, या बैहणां, या माता-पिता, या बच्चे, या खेतां जो छड्डीतरा, तिसजो सौ गुणा मिलणा, कने परमेशरा तिसजो अनन्त जीवना रा बारस बनाणा।

³⁰पर बौहत सारे सै जे अप्पूँजो खास समझां ये, हुण सै खास नीं रैहणे; कने सै जे खास नीं समझे जायें, सै औणे औल़े बगता च बौहत खास हुई जाणे।