Read Bilaspuri मत्ती 2 Bible Online

मत्ती 2 - Bilaspuri bible

मत्ती 2

¹ताहली जे राजा हेरोदेस यहूदिया प्रदेशा पर राज़ करीराँ था, तां यीशुये रा जन्म तिस प्रदेशा रे बैतलहम नगरा च हुया, कने पूर्व देशा ते कई जोतषी (बुद्धिमान लोक सै जे तारयां रे जाणकार थे) यरूशलेम च आईने पुछणे लगे,

²“सै जे यहूदियां रा राजा हूणा तिसरा जे जन्म हुईरा, सै किति आ? काँह्भई पूर्व दिशा च तारा सै जे तिसरे जन्मा रे बारे च परगट कराँ तिसजो अहें अम्बरा च देख्या, इस खातर तिसजो मत्था टेकणे आईरे।”

³ताहली जे हेरोदेस राजे ये सुणया तां सै बड़ा बेचैन हुया कने तिस सौगी यरूशलेम रे कई सारे लोक बी चिन्ता करने लगे;

⁴फेरी तिने यहूदी समाजा रे सारे मुखियायाजकां कने यहूदी शास्त्रियां जो कट्ठा करीने तिन्हाते पुच्छया, भई “मसीह रा जन्म किति हूणा चाहिन्दा?”

⁵तिन्हे तिस्सो दस्या, “यहूदिया प्रदेशा रे बैतलहम नगरा च हूणा, काँह्भई परमेशरे मीका भविष्यवक्ते रे जरिये बोल्या भई :

⁶“अरे यहूदा प्रदेशा रे बैतलहम नगरा रे लोको, तू यहूदा रे राज करने औल़यां चते किस बी तरिके ने छोट्टा निआं; काँह्भई तुहां चाते इक अगुवा (राजा) निकल़णा, तिस इस्राएल देशा च रैहणे औल़े मेरे लोकां रा मार्गदर्शन करना।”

⁷फेरी हेरोदेस राजे जोतषियां जो चुपचाप सद्दीने तिन्हाते पुच्छया, भई तारा किस बगत दिख्या था ताकि सै जाणी पाओ भई बच्चे री उम्र कितणी।

⁸फेरी तिने जोतषियां जो बैतलहम भेज्या कने बोल्या, भई “जाओ, तिस बच्चे रे बारे च सही ढंगा ने पता लगावा, कने ताहली जे सै मिली जो तां मिन्जो खबर देयों ताकि हऊँ बी आईने तिस्सो मत्था टेक्की सक्कूं।”

⁹फेरी सै राजे री गल्ल सुणीने चलीगे, कने सै तारा बी तिस्सो जे तिन्हें पूर्वा च देख्या था, सै तिन्हांरे अग्गे-अग्गे चलया; फेरी ताहली जे सै घरें आया तित्थी जे सै बच्चा था, तां तारा तिसरे ऊपर रुकिग्या।

¹⁰ताहली जे तिन्हें ये देख्या तां सै बड़े खुश हुये।

¹¹सै घरा रे अन्दर गये कने तिन्हे तिसरी माता मरियमा सौगी बच्चे रे दर्शण कित्ते; तिन्हे बच्चे रे अग्गे मत्था टेक्कीने अराधना कित्ती, कने अपणा-अपणा झोल़ा खोल्ली ने कीमती तोहफे तियां जे सोना, लोबान, कने गन्धरसा (मुर्र) री भेन्ट चढ़ाई।

¹²पर परमेशरे सुफने च तिन्हांजो सावधान करित्या, भई तुहें हटिने हेरोदेस राजे ला देक्खां जान्दे, इस खातर सै किसी दुज्जे रस्ते अपणे देशा जो मुड़ीने चलीगे।

¹³ताहली जे जोतषी चलीगे, तां यूसुफा जो सुफने च परमेशरा रे इक्की दूते दर्शण देईने बोल्या, “उट्ठ बच्चे जो कने तिसरिया मौआ जो लेईने चुपचाप मिस्र देशा जो चली जा; कने तदुआं तक जे हऊँ तिज्जो नीं बोलूं, तू ऊत्थी रुकयां; काँह्भई हेरोदेस राजा इस बच्चे जो मरवाणे खातर टोल़ी कराँ।”

¹⁴इस खातर यूसुफ उट्ठया कने बच्चे कने तिसरिया माता जो लेईने तिसा राति मिस्र देशा जो चलीप्या,

¹⁵फेरी हेरोदेस रे मरने तक सै ऊत्थी रुकिरा रैया। ये इस खातर हुया भई परमेशरे होशे भविष्यवक्ते रे जरिये सै जे गलाईरा था, पूरा हुई सक्को : “मैं अपणे पुत्रा जो मिस्र देशा ते बाहर औणे जो बोल्या।”

¹⁶ताहली जे राजा हेरोदेस ये जाणिग्या, भई जोतषियें तिसने चाल खेल्ही, तां सै गुस्से च लाल पील़ा हुईग्या, तिने अपणे सिपाईयां जो हुक्म दित्या भई बैतलहम कने तिसरे अक्खा-बक्खा रे इलाके रे दुईं साल्लां रे या इसते छोट्टयां बच्चयां री, हत्या करी दित्ति जाओ। (जोतषियां रे दस्सीरे बगता जो आधार बणाईने)

¹⁷फेरी भविष्यवक्ता यिर्मयाह रे जरिये बोल्ली री गल्ल पूरी हुई :

¹⁸“रामाह नगरा च दुखा ने भरीरी इक अवाज़ सुणही, ये रोणे री कने बिलखणे री अवाज़ थी; मौआं अपणे बच्चयां रे खातर रोआं थिआं, कने नीं चाहन्दियां थी भई कोई तिन्हाजो हिम्मत देईने चुप करो, काँह्भई तिन्हांरे त सारे बच्चे मरी चुक्कीरे थे।”

¹⁹यूसुफ, मरियम कने बालक यीशु हुण तक मिस्र ची थे, फेरी हेरोदेस राजे रे मरने ते बाद, मिस्र देशा च परमेशरा रे दूते यूसुफा जो सुखने च आईने गलाया,

²⁰“उट्ठ, बच्चे जो कने तिसरिया मौआ जो लेईने इस्राएल देशा च चली जा, काँह्भई सै जे बच्चे री हत्या करना चाँह थे, सै मरी मुकीगे।”

²¹सै उट्ठया, कने बच्चे जो कने तिसरिया माता जो सौगी लेईने इस्राएल देशा च आईग्या।

²²पर ताहली जे यूसुफे ये सुणया भई यहूदिया प्रदेशा च अपणे पिता हेरोदेस रिया मौती ते बाद तिसरिया जगह पर अरखिलाउस राज करीराँ, तां सै ऊत्थी जाणे ते डरिग्या। पर सुखने च सै परमेशरा ते चेतावनी पाईने गलील प्रदेशा जो चलिग्या,

²³कने नासरत नौआं रे नगरा च जाईने बसीग्या, ताकि सै बचन पूरा ओ, सै जे भविष्यवक्तयां यीशुये रे बारे च दस्या था : भई “तिस्सो लोकां जाणना भई सै नासरत नगरा ते आ।”