Read Bilaspuri मत्ती 21 Bible Online

मत्ती 21 - Bilaspuri bible

मत्ती 21

¹यीशु कने तिसरे चेले ताहली जे यरूशलेम नगरा रे नेड़े पुज्जे कने जैतून पहाड़ा पर बैतफगे गाँवां च पुज्जे, तां यीशुये अपणे दुईं चेलयां जो ये हुक्म देईने भेज्या, भई

²“अपणे ठीक सामणे रे गाँवां च जावा कने तित्थी जान्दे इ तुहांजो इक गधी बझीरी मिलणी, कने तिसा सौगी तुहांजो तिसारा बच्चा बी मिलणा। तिन्हाजो खोल्ली ने मेरले ली औआ।

³जे कोई तुहांजो किछ बोल्लो तां तिसने गलायों भई प्रभुये जो इन्हांरी जरूरत इ, तिस छोड़े इ ये वापस भेजी देणे।”

⁴येढ़ा इस खातर हुया भई भविष्यवक्ते रा ये बचन पूरा ओ :

⁵“यरूशलेम रे लोकां ने बोल्ला, ‘देख! तेरा राजा तेरले आई कराँ; सै नम्र आ, कने गधे पर स्वार आ; हाँ गधिया रे बच्चे पर सै जे इक मजदूरा रे पशुये रा बच्चा।’ ”

⁶इस खातर तिसरे चेले चलीगे कने तेढ़ा इ कित्या तेढ़ा जे तिन्हांजो यीशुये करने जो बोल्या था।

⁷सै गधिया कने तिसारे बच्चे जो ली आये, कने तिन्हां पर अपणे कपड़े रखीते, काँह्भई यीशुये तिस पर बैठणा था।

⁸भीड़ा चा ते मतयां लोकें अपणे कपड़े बाटा च बछाईते, कने कई लोक पेड़ा री डाल़ियां बड्डीने ली आये कने बाटा च बछाई तियां।

⁹सै लोक जे तिन्हारे अग्गे पिच्छे चलीरे थे सै सब जणे जोरा-जोरा ने बोलणे लगे, “राजा दाऊद रे तिस वंशजा री जय हो! परमेशर तिसजो आशीष देओ, सै जे प्रभुये रे नौआं पर औआं, जय हो परमेशरा री सै जे स्वर्गा च बराजा।”

¹⁰ताहली जे सै यरूशलेम च दाखल हुया, तां सारे नगरा च हलचल मचीगी, कने लोक पुछणे लगे, “ये कुण आ?”

¹¹लोकें गलाया, “ये गलील रे नासरत नगरा रा भविष्यवक्ता यीशु आ।”

¹²फेरी यीशुये परमेशरा रे मन्दरा च जाईने तिन्हां सारयां जो, सै जे तित्थी लेण-देण करी रां थे, बाहर कड्डित्या, कने पैसयां जो बदलने औल़यां री चौकियां मुन्धियां करी ती कने कबूतर बेचणे औल़यां रे आसण पलटीते;

¹³कने तिन्हाने गलाया, “पवित्र शास्त्रा च लिखिरा, मेरा घर प्राथना रा घर हूणा; पर तुहें इसजो चोराँ रा अड्डा बणाईत्या।”

¹⁴फेरी अन्हे कने लंगड़े, मन्दरा च तिसले आये, कने तिन्हाजो तिने ठीक कित्या।

¹⁵पर ताहली जे मुखियायाजकां कने यहूदी शास्त्रियें सै चमत्कारा रे काम्म देक्खे, सै जे तिने कित्ते थे, कने परमेशरा रे मन्दरा च बच्चयां जो ऊच्चिया अवाज़ा च दाऊद रे पुत्रा री जय हो, बोलदे हुये सुणया, तां सै बड़े भरी गुस्सा हुईगे,

¹⁶कने तिसते पुच्छया, “तू सुणीराँ ये क्या बोल्ली राँये?” यीशुये तिन्हाने गलाया, “हाँ; सुणीराँ, क्या तुहें लोकें ये कदीं नीं पढ़या : ‘तैं बालकां कने दुध पीन्दे बच्चयां रे मुँआं ते स्तुति कराई?’ ”

¹⁷फेरी सै तिन्हाजो छड्डिने यरूशलेम नगरा ते बाहर बैतनिय्याह गाँवां जो गया कने तित्थी तिने रात बताई।

¹⁸अगले दिन तड़के इ ताहली जे यीशु नगरा जो वापस आईराँ था तां तिस्सो भूक्ख लगी।

¹⁹बाट्टा रे कण्डे तिने अंजीरा रा इक डाल़ देख्या, सै तिसरे नेड़े गया, पर तिस डाल़ा पर पत्तयां ते इलावा किछ नीं मिलया, इस खातर तिने डाल़ा ने गलाया, “हुण ते तिज्जो कदीं फल़ नीं लगो।” कने सै अंजीरा रा डाल़ इकदम सुक्कीग्या।

²⁰येढ़ा देखीने चेलयां जो बड़ा चम्भा हुया कने तिन्हें गलाया, “ये अंजीरा रा डाल़ इकदम कियां सुक्कीग्या?”

²¹यीशुये तिन्हांजो जबाब दित्या, “हऊँ तुहांजो सच्च बोलां, जे तुहां च विश्वास ओ कने तुहें शक नीं करो, तां न सिर्फ ये करना सै जे मैं अंजीरा रे डाल़ा रा कित्या, पर जे तुहें इस पहाड़ा ने बोल्लो, ‘उट्ठ, कने समुद्रा च जाईने पैईजा,’ तां तेढ़ा इ हुई जाणा।

²²कने जो किछ तुहें प्राथना च विश्वासा ने मंगगे, सै सब तुहांजो मिलणा।”

²³ताहली जे सै मन्दरा च जाईने उपदेश देईराँ था, तां मुखियायाजकें कने यहूदी बजुर्गें नेड़े जाईने तिसते पुच्छया, “ये काम्म तू किस अधिकारा ने कराँ? कने ये अधिकार तिज्जो किने दित्या?”

²⁴यीशुये तिन्हाजो जबाब दित्या, “हऊँ तुहांते इक स्वाल पुच्छां, जे तिसरा जबाब तुहें मिन्जो देई दो तां माह तुहांजो दस्सी देणा भई हऊँ ये काम्म किस अधिकारा ने कराँ।

²⁵दस्सा यूहन्ने जो बपतिस्मा किति ते मिलया? परमेशरा ते या माहणुये ते?” सै अप्पूँ चियें गल्ल बात करदे हुये गलाणे लगे, “जे अहें बोलां ये ‘परमेशरा ते’ तां इस अहांते पुछणा ‘फेरी तुहें तिस पर विश्वास काँह नीं करदे?’

²⁶पर जे अहें गलाया, ‘माहणुये ते’ तां अहांजो लोकां रा डर आ, काँह्भई सै यूहन्ने जो इक भविष्यवक्ता मन्नां ये।”

²⁷फेरी तिन्हे यीशुये जो जबाब दित्या, “अहें नीं जाणदे।” तिने बी तिन्हाने गलाया, “अच्छा तां फेरी हऊँ बी तुहांजो नीं दसदा भई ये काम्म हऊँ किस अधिकारा ने कराँ।

²⁸“अच्छा दस्सा तुहें लोक इसरे बारे च क्या सोच्चां ये? इक्की माहणुये रे दो पुत्र थे; सै बड्डे ले गया कने गलाया, ‘बेटा आज्ज मेरे अंगूरां रे बगीचे च जा कने काम्म कर।’

²⁹पुत्रे जबाब दित्या, ‘माह नीं जाणा’, पर बाद बिच तिने अपणा बिचार बदलित्या कने सै चलिग्या।

³⁰फेरी सै पिता दुज्जे पुत्रा ले गया कने तिसने बी तेढ़ा इ गलाया, पुत्रे जबाब दित्या, ‘हाँ पिता जी हऊँ जां’, मगर सै नीं गया।

³¹दस्सा इन्हां दुईं चते किने पिता री इच्छा पूरी किति?” तिन्हे गलाया, “बड्डे।” यीशुये तिन्हाने गलाया, “हऊँ तुहांजो सच्च बोलां भई कर बसूलणे औल़े कने वेश्यां परमेशरा रे राज्जा च तुहांते पैहले जाणा।

³²ये हऊँ इस खातर बोलीराँ काँह्भई बपतिस्मा देणे औल़ा यूहन्ना परमेशर तियां जे अपणयां लोकां ते जीवन जीणे री आशा रक्खां तियां तुहांजो जीणा सखाणे रे खातर आया, कने तुहें तिस पर विश्वास नीं कित्या; पर कर लेणे औल़यां कने बेश्यां तिस पर विश्वास कित्या : तुहें ताहली जे ये देख्या भई यूहन्ने क्या कित्या, तां बी अपणे पापां ते मन नीं फिराया कने नांई तिसरे सन्देशा पर विश्वास कित्या।

³³“इक होर उदाहरण सुणा: इक जमीनदार था, तिने अंगूरां रा इक बगीचा लगाया, कने तिसरे चऊँ पासयां बाड़ लाईती, फेरी अंगूरां रा रस नकाल़णे जो इक खड्डा खुणया कने तिसरिया रखवाल़िया रे खातर इक ऊच्ची दवाल बणाई, फेरी बगीचा ठेकेदाराँ जो ठेके पर देईने अप्पूँ दूर प्रदेशा जो चलिग्या।

³⁴ताहली जे अँगूर तोड़ने रा बगत आया तां बगीचे रे मालके ठेकेदाराँ ले अपणा दास भेज्या ताकि तिन्हाते सै अपणे हिस्से रे अँगूर ली आओ।

³⁵पर ठेकेदारें तिसरे दास्सां जो पकड़ील्या, किसी जो मारया कुटया, किसी पर पत्थर मारे कने कोई त जानी तेई मारीत्या।

³⁶फेरी मालके होर दास भेज्जे, कने तिन्हें तिन्हाने बी तेढ़ा इ बर्ताव कित्या।

³⁷बाद बिच तिने मालके तिन्हाले अपणा पुत्र, ये सोच्चीने भेज्या भई सै मेरे पुत्रा रा आदर करगे।

³⁸पर तिन्हे ठेकेदारें ताहली जे मालका रे बेटे जो देख्या तां सै अप्पूँ चियें गलाणे लगे, ‘येत इसरा बारस आ, औआ इस्सो मारी दें कने इसरा सब किछ अहांरा हुई जाणा।’

³⁹फेरी सै तिस्सो पकड़ीने बगीचे ते बाहरा लेईये कने जानी ते खत्म करित्या।

⁴⁰इस खातर ताहली जे अंगूरां रे बगीचे रे मालका औणा, तां सै तिन्हां ठेकेदाराँ सौगी क्या करगा?”

⁴¹तिन्हें तिसने गलाया, “काँह्भई सै निर्दयी थे इस खातर तिस सै बड़िया बेरैहमिया ने मारने कने अंगूरां रे बगीचे रा ठेका दुज्जे ठेकेदारा ले देई देणा, सै जे फसला रे औणे पर तिस्सो तिसरा हिस्सा देंगे।”

⁴²यीशुये तिन्हाने गलाया, “क्या तुहें पवित्रशास्त्रा रा ये बचन नीं पढ़या: ‘राजमिस्त्रियें इक्की पत्थरा जो बेकार समझीने सटाईत्या था, पर वगत औणे पर पता लगया भई सैई पत्थर कुणे रा सबनीं ते खास पत्थर बणीग्या? येढ़ा परमेशरा रिया तरफा ते हुया, सै जे अहां रियां नज़राँ च त नोखा।’

⁴³“इस खातर हऊँ तुहांजो बोलां परमेशरा रा राज तुहांते खोया जाणा कने सै तिन्हां लोकां जो देई दित्या जाणा सै जे तिसरे राज्जा रे मुतावक बर्ताव करगे।

⁴⁴सै जे कोई इस खास पत्थरा पर पौंगा, सै टुकड़े-टुकड़े हुईने बिखरी जाणा कने जे ये पत्थर किसी पर पौंगा, तां तिस चकनाचूर हुई जाणा।”

⁴⁵मुखियायाजकें कने फरीसियें यीशुये रे इस उदाहरणा जो सुणया कने समझीगे भई सै तिन्हारे बारे ची बोलीराँ।

⁴⁶कने तिन्हे तिस्सो पकड़ने रा जत्न कित्या, पर सै लोकां ते डराँ थे काँह्भई लोक यीशुये जो भविष्यवक्ता मन्नां थे।