Read Bilaspuri मत्ती 22 Bible Online

मत्ती 22 - Bilaspuri bible

मत्ती 22

¹यीशु फेरी भीं तिन्हांने उदाहरणां च गलाणे लगया,

²“परमेशरा रा राज इक राजे साई आ तिने जे अपणे बेटे रे ब्याह च धाम दित्ति।

³राजे अपणे दास्सां जो भेज्या भई सै तिन्हां लोकां जो सद्दीने ल्याओ तिन्हांजो जे ब्याह री धाम्मा च औणे रा नियून्दा दित्तिरा; पर सै लोक नीं आये।

⁴तिने अपणे सेबक फेरी भीं भेज्जे, तिने गलाया भई सै लोक जे ब्याह रिया धाम च सद्दीरे तिन्हांजो बोल्ला, ‘देक्खा ब्याह री धाम बणीने त्यार हुईगरी, मेरे पाल़े हुये मोटे ताजे बकरे बड्डी तरे, कने सारा किछ बणीने त्यार आ; ब्याह री धाम खाणे जो औआ।’

⁵पर तिन्हें लोकें तिस पर कोई ध्यान नीं दित्या कने सै चलीगे : कोई अपणे खेता च काम्म करने जो चलिग्या, तां कोई अपणे काम्म धन्दे पर चलिग्या।

⁶कने किछ लोकें त राजे रे सेवका जो पकड़ीने तिसने मार-कुट किति कने जानी ते मारीते।

⁷ताहली जे राजे ये सुणया, तां तिने गुस्से च आईने अपणे सैनिक भेज्जे, तिन्हे तिन्हां खूनियां जो मारीत्या कने तिन्हारे नगरा च आग्ग लाईती।

⁸फेरी राजे सेबकां ने गलाया, ‘ब्याह री धाम त त्यार इ पर सै लोक जे न्यून्दा देईने सद्दीरे थे सै लोक इसा ईज्जता रे लायक नीं हुये।

⁹इस खातर तुहें गलियां कने चौकां पर जावा, तित्थी तुहांजो जितने बी लोक मिलो, सब्बीं जो ब्याह रिया धाम्मा च सद्दीने ली औआ।’

¹⁰सै दास फेरी गलियां कने चौकां च गये कने सै जे खरे बुरे लोक तिन्हाजो मिले तिन्हां सबनीं जो सै कट्ठा करीने ली आये, कने ब्याह रा घर मेहमान्नां ने भरीग्या।

¹¹“पर ताहली जे राजा मेहमान्नां जो देखणे अन्दर आया, तां तित्थी तिने इक येढ़े माहणुये जो देख्या, तिने जे ब्याह रे कपड़े नीं पैहनीरे थे।

¹²राजे तिसते पुच्छया, ‘दोस्त, तू बिणा ब्याह रे कपड़े पैहने येत्थी अन्दर कियां आईग्या?’ पर सै माहणु चुप रैया।

¹³फेरी राजे अपणे सेबकां जो गलाया, ‘इसरे हात्थ-पैर बन्हीने बाहर अन्धेरे च सट्टि दवा, तित्थी लोक रोन्दे कने दन्द किरड़दे हो।’

¹⁴काँह्भई सद्दीरे त मते पर चुणी रे त थोड़े इ हाये।”

¹⁵फेरी फरीसियें जाईने इक सभा किति, तिसा च तिन्हे ये विचार कित्या भई कियां यीशुये जो तिसरिया गलाई रियां गल्लां च फसाई सक्कां ये।

¹⁶तिन्हे अपणे चेले हेरोद राजे रे समर्थकां सौगी यीशुये ले भेज्जे, तिन्हें यीशुये जो गलाया, “गुरू जी, अहें जाणाँ ये भई तू सच्चा, कने तू परमेशरा रा रस्ता सच्चाईया ने सखां, कने कोई क्या सोच्चां तू किसी री परवाह नीं करदा, काँह्भई तू माहणुआं रिया हैसियता पर नीं जान्दा।

¹⁷इस खातर अहांजो दस्स तू क्या सोच्चां? रोमी बादशाह जो कर देणा ठीक आ कि नीं?”

¹⁸यीशु तिन्हारे बुरे इरादे जाणीने गलाया, “कपटियो, तुहें मिन्जो कजो परखणा चाँये?

¹⁹मिन्जो कोई सिक्का दस्सा तिसने जे तुहें कर चुकायें।” फेरी सै तिसले इक रोमी सिक्का ली आये।

²⁰तिने तिन्हाते पुच्छया, “इस पर किसरी मूरत कने नौं लिखिरा?”

²¹तिन्हे तिसने गलाया, “रोम रे बादशाह रा।” फेरी यीशुये तिन्हाजो गलाया, “अच्छा तां फेरी सै जे बादशाह रा, तिस्सो बादशाह जो देआ, कने सै जे परमेशरा रा, तिस्सो परमेशरा जो देआ।”

²²ये सुणी ने सै चम्भे च पैईये कने तिस्सो छड्डिने चलीगे।

²³तिस दिन किछ सदूकी सै जे मरने ते बाद जिऊंदा हुणे जो नीं मनदे, तिसले आये कने तिसते पुच्छया,

²⁴“गुरू जी, मूसे गलाया था भई जे कोई माहणु बिणा सन्तान मरी जाओ, तां तिसरा भाई तिसरिया बिधवा ने ब्याह करीने अपणे भाईये रा बंश बढ़ाणे खातर सन्तान पैदा करी सक्कां।

²⁵हुण मन्ना अहें सात्त भाई ये; पैहले रा ब्याह हुया कने बाद च तिसरी मौत हुईगी, फेरी काँह्भई तिसरे कोई सन्तान नीं हुई, इस खातर तिसरे भाईये तिसरिया बिधवा जो अपणाईल्या।

²⁶तदुआं तक जे भई सातों भाई मरी नीं गये, दुज्जे कने तिज्जे भाईये ने बी तेढ़ा इ हुया।

²⁷सारयां ते बाद सै जनाना बी मरीगी।

²⁸हुण अहांरे पुछणे रा मतलब येआ भई जिऊंदा हुणे पर तिन्हां सत्तां चते सै किसरी जनाना हूणी? काँह्भई सै सारयां री जनाना बणी चुक्कीरी थी।”

²⁹यीशुये तिन्हाजो जबाब दित्या, “तुहें पवित्रशास्त्रा कने परमेशरा रिया सामर्था जो नीं जाणदे; इसा वजह ने तुहें भूला च पैईरे।

³⁰तुहांजो समझणा चाहिन्दा भई जिऊंदा हुणे पर लोकां न त ब्याह करने कने नांई कोई ब्याह च दित्या जाणा, पर स्वर्गा च परमेशरा रे स्वर्गदूतां साई हुणे।

³¹पर मूईरयां चते जिऊंदा हुणे रे बारे च क्या तुहें ये बचन नीं पढ़या सै जे परमेशरे तुहांजो गलाया :

³²हऊँ अब्राहम रा परमेशर, इसहाक रा परमेशर, कने याकूब रा परमेशर आ? सै मूईरयां रा नीं, पर जिऊंदेयां रा परमेशर आ।”

³³ताहली जे लोकें ये सुणया तां तिसरे उपदेशा पर सै बड़े हैरान हुये।

³⁴जिस बगत फरीसियें सुणया भई यीशुये सदूकियां रा मुँह बन्द करित्या, तां सै सब कट्ठे हुईगे।

³⁵तिन्हां चते इक व्यवस्थापके तिस्सो परखणे खातर तिसते पुच्छया,

³⁶“गुरू जी, व्यवस्था च सबनीं ते बड्डी आज्ञा क्या इ?”

³⁷यीशुये तिसने गलाया, “तू प्रभु अपणे परमेशरा ने अपणे सारे मन कने सारे प्राण कने अपणी सारिया समझा ने प्यार कर।

³⁸बड्डी कने खास आज्ञा त येई हाई।

³⁹फेरी येढ़ि इ दुज्जी आज्ञा येई भई अपणे पड़ेसिये ने तियां इ प्यार कर जिआं जे तू अप्पूँ ने प्यार कराँ।

⁴⁰सारी व्यवस्था कने भविष्यवक्तयां रे ग्रन्थ इन्हां दुईं हुक्मां पर टिकिरे।”

⁴¹ताहली जे फरीसी हल्तियें कट्ठे इ थे, भई यीशुये तिन्हांते इक स्वाल पुच्छया,

⁴²“मसीह रे बारे च तुहें क्या सोच्चां ये भई सै किसरा पुत्र आ?” तिन्हे तिसने गलाया, “दाऊद रा वंशज।”

⁴³यीशुये तिन्हांते पुच्छया, “तां दाऊद आत्मा च हुईने तिस्सो प्रभु कजो बोलां?

⁴⁴‘प्रभुये मेरे प्रभुये ने गलाया, मेरे सज्जे पासे बैठीने राज कर, तदुआं तक जे हऊँ तेरे सारयां दुश्मणां जो नीं हराई दूँ।’

⁴⁵भला, तां जे दाऊद मसीह जो अपणा प्रभु बोलां, तां सै तिसरा पुत्र कियां हुया?”

⁴⁶इसरे जबाबा च कोई बी तिसने किछ नीं बोल्ली सक्कया। कने नांई तिस दिना ते बाद किसी जो तिसते किछ होर पुछणे री हिम्मत हुई।