Read Bilaspuri मत्ती 25 Bible Online

मत्ती 25 - Bilaspuri bible

मत्ती 25

¹फेरी यीशुये अपणयां चेलयां ने बोल्या, ताहली जे माहणुये रे पुत्रा यनि मांह वापस औणा ताहली स्वर्गा रा राज तिन्हां दस कन्यां साई हूणा सै जे मशालां लेईने लाड़े ने मिलणे जो आईयां।

²तिन्हां चा ते पांज्ज लापरवाह थिआं कने पांज्ज समझदार थिआं।

³पंज्जें लापरवाह कन्यां अपणियां मशालां त लेई लियां, पर तिन्हां सौगी जादा तेल नीं लेआ;

⁴पर समझदार कन्यां अपणी मशालां सौगी कुप्पियां च तेल बी भरील्या।

⁵ताहली जे लाड़े जो औणे च देर हुईगी, तां सारी कन्यां जो झमाईयां लगियां कने तिन्हांजो निंद पैईगी।

⁶पर अधिया राति जो बाजयां-गाजयां रा शोर हुया: देक्खा लाड़ा आया! तिसने मिलणे बाहरा चला।

⁷फेरी सै सारी कन्यां उट्ठीने अपणियां मशालां ठीक करने लगियां।

⁸लापरवाह कन्यां समझदार कन्यां ने गलाया, अपणे तेला चते थोड़ा जेआ तेल अहांजो देई दवा, काँह्भई अहां रियां मशालां बुझणे लगी रियां।

⁹पर समझदारें जबाब दित्या, नां, अहें नीं देई सकदियां काँह्भई ये न त अहांरे खातर पूरा हूणा नई तुहांरे खातर, इस खातर तुहें तेल बेचणे औल़े ले जाईने अपणे खातर खरीदी ने ली औआ।

¹⁰ताहली जे सै खरीदी ने लौणे जो जाणे लगियां तां लाड़ा आई पुज्जया, कने सै कन्यां जे त्यार थिआं, सै तिस सौगी ब्याह रे घरा च चलीगियां कने दरवाजा बन्द करित्या।

¹¹इसते बाद सै दुज्जी कन्यां बी वापस आईने बोलणे लगियां, हे स्वामी, हे स्वामी, अहांरे खातर दरवाजा खोली दे।

¹²तिने जबाब दित्या, हऊँ तुहांजो सच्च-सच्च बोलां, हऊँ तुहांजो नीं जाणदा।

¹³इस खातर त्यार रौआ, काँह्भई तुहें न माहणुये रे पुत्रा जो यनि मेरे वापस औणे रे दिना जो जाणाँ ये, नां तिस वगता जो जाणाँ ये।

¹⁴फेरी ताहली जे मांह वापस औणा, स्वर्गा रा राज तिस माहणुये साई हूणा तिने जे परदेश जान्दे हुये अपणे सेबकां जो सद्दीने अपणी जायदात तिन्हांले सौंपीती।

¹⁵तिने इक्की जो सोने रे सिक्कयां ने भरी रियां पांज्ज थैलियां दित्ति, तिन्हां चते इक थैली (पन्द्रह साल्लां रिया मजदूरिया ते जादा), दुज्जे जो दो, कने तिज्जे जो इक; सै हर इक्की जो तिन्हांरी काबलियता रे मुतावक कमाई करने जो देईने खुद परदेशा जो चलिग्या।

¹⁶तिस्सो जे सोने रे सिक्कयां ने भरीरी पांज्ज थैलियां मिली थी, तिने इकदम तिस पैसे जो कम्मां च लाईत्या कने पांज्ज थैलियां होर कमाई लियां।

¹⁷इयां इ तिस्सो जे दो थैलियां मिली थी, तिने बी तिस पैसे ने दो होर कमाई लियां।

¹⁸पर तिस्सो जे इक मिलीरी थी तिने जाईने धरतिया च खड्डा खुणया कने तित्थी अपणे मालका रा सै पैसा दब्बीत्या।

¹⁹कई दिन बीतणे ते बाद तिन्हां सेबकां रा मालक बापस आया कने हर इक्की ने हिसाब-कताब करने लगया।

²⁰तिस्सो जे सोने रे सिक्कयां रियां पांज्ज थैलियां मिलियां थी, तिने सोने रे सिक्कयां री पांज्ज थैलियां होर लेईने बोल्या, मालिक, तुहें मिन्जो पांज्ज थैलियां सोने रे सिक्कयां री दित्ति थी, देक्खा, मैं पांज्ज थैलियां सोने रे सिक्कयां रियां होर कमाईयां।

²¹तिसरे मालके तिसने गलाया, शाबाश! तू भरोसे रे लायक खरा सेबक आ, तैं थोड़िया जेईया रकमा च मेरा विश्वास जित्तिल्या; माह तिज्जो मतियां चिज़ां रा अधिकार देणा। औ कने मेरने खुशी मना।

²²“कने अगला सै सेवक आया तिने जे सोने रे सिक्कयां रियां दो थैलियां पाईयां थीं, तिने बी आईने बोल्या, ‘मालिक, तुहें मिन्जो निवेश करने रे खातर दो सोने रे सिक्कयां रियां दो थैलियां दित्तियां थिआं कने मैं ये दुगणियां करी तियां।’

²³तिसरे मालके तिसने गलाया, ‘शाबाश! तू भरोसे रे लायक खरा सेबक आ, तैं थोड़िया जेईया रकमा च मेरा विश्वास जित्तिल्या; माह तिज्जो मतियां चिज़ां रा अधिकार देणा। औ कने मेरने खुशी मना।’

²⁴“फेरी सै तिस्सो जे चान्दिया रे सिक्कयां री इक थैली मिलीरी थी अपणे मालका ले आया कने बोलां, मालक, हऊँ जाणाँ भई तू बड़ा शख्त माहणु आ, तू येढ़े इक्की माहणुये साई आ सै जे किसी होरीं माहणुयें बाहीरा हुआं, तिसा फसला जो बटोरना चांह।

²⁵इस खातर हऊँ डरिग्या कने मैं जाईने चान्दिया रे सिक्कयां री थैली धरतिया च दब्बीती। देख, सै जे तेरा, सै ये रैया।

²⁶“तिसरे मालके तिस्सो जबाब दित्या, तू इक बुरा कने आलसी सेबक आ, तां जे तू जाणाँ भई हऊँ येढ़े इक्की माहणुये साई आ सै जे किसी होरीं माहणुयें बाहीरा हुआं, तिसा फसला जो बटोरना चांह;

²⁷तां तिज्जो मेरा पैसा सहूकारा ले जमा करी देणा चाहिन्दा था, फेरी ताहली जे हऊँ औन्दा तां सै जे मेरा था ब्याजा समेत त लेई लेन्दा।

²⁸“इस खातर मालके दुज्जे दास्सा जो ये बोल्या, इसते चान्दिया रे सिक्कयां री ये थैली लेई लो कने तिसले जे चान्दिया रे सिक्कयां री दस थैलियां इ, इसा तिसजो देई दो।

²⁹काँह्भई सै जे मेरिया गल्ला जो ध्याना ने सुणा कने समझां, परमेशर तिसजो होर जादा समझणे रे लायक बणां; पर सै जे मेरिया गल्ला जो ध्याना ने नीं सुणदा कने समझदा तिस सै बी भुल्ली जाणा तिसजो जे सै पैहले ते जाणदा हो।

³⁰इस खातर तिस बेकार सेवका जो बाहर अन्धेरे च पाई दवा, तित्थी जे रोणा कने दन्द किरड़ना हूणा।

³¹“ताहली जे माहणुये रे पुत्रा यनि मांह वापस अपणिया महिमा च औणा कने सारे स्वर्गदूत मेरे सौगी औणे, तां मांह सब्बी लोकां पर राज करने खातर अपणे राजकीय संघासणा पर बैठणा।

³²तां सारी जातियां रे लोक मेरे सामणे कट्ठे कित्ते जाणे कने मांह इक्की जो दूये ते तियां लग करना, तियां जे इक चरवाहा अपणियां बकरियां जो भेड्डां ते लग कराँ।

³³मांह धर्मी लोक अपणे सज्जे पासे रखणे कने अधर्मी खब्बे पासे, तियां जे इक चरवाहा इक पासे भेड्डां जो कने दुज्जे पासे बकरियां जो रक्खां।

³⁴फेरी राजे यनि मांह अपणे सज्जे पासे औल़यां ने बोलणा, मेरे पिता ते आशीष पाईरे लोको औआ! कने सै राज जे तुहांरे खातर संसारा जो बनाणे ते पैहले त्यार कित्तिरा तिसजो ग्रहण करा।

³⁵ये राज तुहांरा ईनाम आ काँह्भई हऊँ ताहली जे भुक्खा था कने तुहें मिन्जो किछ खाणे जो दित्या, ताहली जे हऊँ त्याह्या था कने तुहें मिन्जो किछ पीणे जो दित्या। ताहली जे हऊँ तुहांरे नेड़े ते जाणे औल़ा कोई अंजाण था, कने तुहें मेरा अपणे घरें स्वागत कित्या।

³⁶ताहली जे हऊँ नंगा था, तुहें मिन्जो कपड़े पैहनाये। ताहली जे हऊँ बमार था, कने तुहें मेरी सेवा टहल किति, ताहली जे हऊँ बन्दी था, कने तुहें मेरने मिलणे आये।

³⁷“फेरी जबाबा च धर्मी लोकां तिसते पुछणा, प्रभु, अहें तुहांजो कदीं भुक्खा देख्या कने ख्वाया या प्यासा देख्या कने पीणे जो दित्या?

³⁸तुहांजो अहें कदीं अपणे नेड़े ते जान्दा हुआ कोई अंजाण देख्या कने अन्दरा जो लेईये या बिणा कपड़यां ते देखीने तुहांजो कपड़े पैहनाये?

³⁹कने अहें कदीं तुहांजो बमार या बन्दी देख्या कने तेरले आये?

⁴⁰फेरी राजे यनि मांह तिन्हाजो जबाब देणा, हऊँ तुहांजो सच्च बोलीराँ ताहली जे कदीं तुहें मांह पर विश्वास करने औल़े तिन्हांजो जे लोक खास नीं समझदे तिन्हां किसी इक्की खातर बी किछ कित्या हुंगा तां सै तुहें मेरे खातर बी कित्या।

⁴¹“फेरी तिस अपणे सज्जे पासे औल़यां ने बोलणा, शापित लोको, मेरला ते चली जावा, कने सै आग्ग जे परमेशरे शैतान कने तिसरे दूतां खातर त्यार कित्तिरी, तिसा अनन्त अग्गी च जाईने पौआ।

⁴²येई तुहांरी सजा इ काँह्भई ताहली जे हऊँ भुक्खा था, तुहें मिन्जो खाणे जो किछ नीं दित्या, कने ताहली जे हऊँ प्यासा था तुहें मिन्जो पाणी नीं प्याया;

⁴³ताहली जे हऊँ अंजाण था तुहें मेरा अपणे घरा च स्वागत नीं कित्या। ताहली जे मिन्जो कपड़यां री जरूरत थी, तुहें मिन्जो पैहनणे जो कपड़े नीं दित्ते। ताहली जे हऊँ बमार था कने बन्दी था, तुहें मेरा ध्यान नीं रखया।

⁴⁴“फेरी तिन्हां जबाब देणा, प्रभु, अहें तुहांजो भुक्खा या प्यासा या अंजाण या बिणा कपड़यां ते या बमार या बन्दी कदीं देख्या कने तेरा ध्यान नीं रखया।

⁴⁵फेरी मांह तिन्हांजो जबाब देणा, हऊँ तुहांजो सच्च बोलीराँ ताहली जे तुहें मांह पर विश्वास करने औल़े तिन्हांजो जे लोक खास नीं समझदे तिन्हां किसी इक्की खातर बी किछ नीं कित्या तां सै तुहें मेरे खातर बी नीं कित्या।

⁴⁶फेरी इन्हां बुरयां लोकां अनन्त काल री सजा भुगतणी कने धर्मी लोकां अनन्त काल री जिन्दगी पाणी।”