Read Bilaspuri मत्ती 27 Bible Online

मत्ती 27 - Bilaspuri bible

मत्ती 27

¹सबेरके जुन्ना सारे मुखियायाजक कने यहूदी बजुर्ग नेतयां यीशुये जो मरवाणे री योजना बणाई।

²फेरी सै तिस्सो बन्हीने दूर लेईये कने राजपाल पिलातुसा रे हत्थे सौंपीत्या।

³यीशुये जो पकड़वाणे औल़े यहूदे ताहली जे महसूस कित्या भई यीशु मौती रे लायक बणाईत्या तां सै बड़ा पछताया कने तिने मुखियायाजक कने यहूदी बजुर्ग नेतयां जो चान्दिया रे सै तीह सिक्के बापस देईते,

⁴कने गलाया, “मैं इक बेदाग माहणुये रा खून करने खातर पकड़वाई ने पाप कित्या।” तिन्हे लोकें गलाया, “अहांजो क्या? तूई जाण।”

⁵इस पर यहूदे चान्दिया रे तिन्हां सारे सिक्कयां जो मन्दरा रे अंगणा च सट्टीत्या कने चलिग्या, फेरी बाहर जाईने अप्पूँजो फाँसी लाईली।

⁶मुखियायाजकें सै सिक्के चक्की ले कने गलाया, “व्यवस्था रे मुतावक इस पैसे जो मन्दरा रे खजाने च रखणा ठीक निआं, काँह्भई ये माहणुये जो मरवाणे री कीमत इ।”

⁷इस खातर तिन्हे अप्पूँ चियें सहमत हुईने फैसला कित्या भई तिस पैसे ने तिन्हे यरूशलेम च औणे औल़े लोकां रे मरने पर तिन्हाजो दबाणे जो कम्हारा ते खेत मुल्ले खरीदिल्या।

⁸इसा बजह ने सै खेत अज्जा तक खून्ना रे खेता रे नौआं रे जाणया जां।

⁹फेरी सै बचन जे यिर्मयाह भविष्यवक्ते गलाया था सै पूरा हुया: “तिन्हे चान्दिया रे तीह सिक्के लै, सै रकम सै जे इस्राएल रे लोकें तिसरे खातर देणा तैह किति थी,

¹⁰कने तियां जे प्रभुये मिन्जो हुक्म दित्या था तिस हुक्मा रे मुतावक तिस पैसे ने कम्हारा रा खेत खरीदया।”

¹¹इस दौरान यीशु राजपाला रे सामणे पेश हुया तां राजपाले तिसते पुच्छया, “क्या तू यहूदियां रा राजा?” यीशुये तिसने गलाया, “तू खुद बोलीराँ।”

¹²दुजिया खा मुखियायाजक कने बजुर्ग यहूदी नेते तिस पर दोष लगाई राँ थे, तां तिने कोई जबाब नीं दित्या।

¹³इस पर पिलातुस राजपाल्ले तिसते पुच्छया, “क्या तू नीं सुणीराँ भई ये तू पर कितणे इल्जाम लगाई रायें?”

¹⁴पर तिने तिसजो इक्की गल्ला रा बी जबाब नीं दित्या, पिलातुसा जो इस पर बौहत हैरानी हुई।

¹⁵फसह रे त्योहारा रे मौके पर राजपाला रा रिवाज था भई सै किसी बी इक कैदिये जो, तिस्सो जे लोक चाँह थे, तिन्हांरे खातर छडी देआं था।

¹⁶तिस बगत बरअब्बा नौआं रा इक मन्नया हुआ कैदी ऊत्थी था

¹⁷ताहली जे लोक कट्ठे हुये, तां पिलातुस राजपाले तिन्हांते पुच्छया, “तुहें किस्सो चाँये भई हऊँ तुहांरे खातर किस्सो छडूं? बरअब्बा जो, या तिस यीशुये जो सै जे मसीह कहलाया जां?”

¹⁸काँह्भई सै जाणाँ था भई तिन्हे तिस्सो जलण रे कारण पकड़वाया था।

¹⁹पिलातुस ताहली जे न्याय रे आसणा पर बैठिरा था तां तिसरिये जनाने तिसले इक संदेशा भेज्या, “तिस सिधे-साधे कने सच्चे माहणुये सौगी किछ बी देखां करदा, काँह्भई मैं तिसरे बारे च इक सपना देख्या तिसरे कारण आज्ज हऊँ बौहत बेचैन रैई।”

²⁰मुखियायाजकें कने बजुर्ग यहूदी नेतयां लोकां जो बहकाया भई सै पिलातुसा ते बरअब्बा जो छडणे री कने यीशुये जो मारने री मांग करा।

²¹राजपाले तिन्हांते पुच्छया, “इन्हां दुईं कैदियां चते तुहें माहते अपणे खातर किस जो छडवाणा चाँये?” तिन्हे गलाया, “बरअब्बा जो।”

²²तां पिलातुसे तिन्हांते पुच्छया, “फेरी यीशुये जो, सै जे मसीह कहलाया जां, तिसरा क्या करूँ?” सारयां तिसने बोल्या, “इस्सो क्रूसा पर चढ़ाओ।”

²³पिलातुसे गलाया, “कां, तिने क्या अपराध कित्तिरा?” कने सै कने बी जोर-जोरा ने बोलणे लगे, “इसजो क्रूसा पर चढ़ाओ।”

²⁴ताहली जे पिलातुसे देख्या भई हुण कोई फैदा निआं कने दंगा भड़कदा इ चली रा था, तां तिने थोड़ा पाणी लेआ कने भीड़ा रे सामणे अपणे हात्थ धोये कने गलाया, “हऊँ इस धर्मी माहणुये रे खून्ना ते निर्दोष आ, तुहें इ जाणा।”

²⁵सारयां लोकें जबाब दित्या, “इसरे खून्ना री जबाबदेही अहें कने अहांरे बच्चे स्वीकार कराँ ये।”

²⁶ताहली जे पिलातुसे तिन्हारे खातर बरअब्बा जो छड्डीत्या कने यीशुये जो कोड़े लाईने क्रूसा पर चढ़ाणे खातर सौंपीत्या।

²⁷फेरी पिलातुस राजपाला रे सपाई यीशुये जो किले च लेईये कने सपाईयां री सारी पलटन यीशुये रे चऊँ पासयां कट्ठी हुईगी,

²⁸तिन्हे तिसरे कपड़े खोली ते कने चमकदार लाल रंगा रे कपड़े पैहनाये,

²⁹कने कण्डेयां ने बणीरा इक मुकट तिसरे सिरा पर रखीत्या, तिसरे सज्जे हत्था च इक सरकन्डा देईत्या कने तिसरे सामणे गोडयां रे भार बैठीने तिसरा मजाक डवाणे लगे कने गलाया, “यहूदियां रा राजा अमर रौ।”

³⁰फेरी तिन्हे तिसरे मूँहा पर थुक्कया; कने सरकन्डा तिसरे हत्था ते खोईने तिसरे सिरा पर मारने लगे।

³¹ताहली जे सै तिसरा मजाक बणाई बैट्ठे तां तिसरा चोल़ा खोलीत्या कने तिस्सो तिसरे कपड़े पैहनाई ने क्रूसा पर चढ़ाणे खातर लेई चल्ले।

³²बाहर जान्दे हुये तिन्हांजो शमौन नौआं रा इक कुरेनी माहणु मिलया। तिन्हे तिस पर जोर पाया भई सै यीशुये रा क्रूस चक्की ने चलो।

³³फेरी ताहली जे सै गुलगुता यनिके खोपड़ी नौआं रिया जगह पर पुज्जे तां

³⁴तिन्हे यीशुये जो मुर्र नौआं री दवाई अंगूरी रसा च पीणे जो दित्ति, पर ताहली जे यीशुये सै चख्या तां तिने तिस्सो पीणे जो मना करित्या।

³⁵फेरी तिन्हे तिस्सो क्रूसा पर चढ़ाईत्या, कने पर्चियां पाईने तिसरे कपड़े बन्डी ले,

³⁶कने तित्थी बैठीने तिसरा पैहरा देणे लगे।

³⁷तिन्हे तिसरा दोषपत्र लिखीने तिसरे सिरा गास टंगीत्या, भई “ये यहूदियां रा राजा यीशु आ।”

³⁸तिस इ बगत तिस सौगी दो चोर बी क्रूसा पर टंगाये इक तिसरे सज्जे कने इक तिसरे खब्बे हत्था खा।

³⁹औन्दे-जान्दे लोक सिर हलाई-हलाई ने तिसरी निंध्या करी रां थे,

⁴⁰कने बोलीराँ थे, “अरे मन्दरा जो ढाईने तिज्जे दिन भीं ते बनाणे औल़े, अप्पूँजो त बचा! जे तू परमेशरा रा पुत्र आ तां क्रूसा परा ते उतरी ने थल्ले औ।”

⁴¹इयां इ मुखियायाजक, शास्त्री कने बजुर्ग यहूदी नेतयां सौगी तिसजो येढ़ा बोलीने मजाक डवाईराँ थे,

⁴²“इने होरीं जो बचाया, कने खुद अप्पूँजो नीं बचाई सकदा। येत इस्राएल रा राजा आ। ये हुण क्रूसा ते थल्ले उतरी जाओ जे तां अहें इस्सो मन्नी जांगे।

⁴³इने परमेशरा पर भरोसा रखया; जे सै इस्सो चाँह, तां हुण इसजो छडवाई लो, काँह्भई इने गलाया था, हऊँ परमेशरा रा पुत्र आ।”

⁴⁴तिन्हे चोरें बी सै जे तिसने सौगी क्रूसा पर चढ़ाईरे, तिन्हे बी तिसरा येढ़ा मजाक डवाया।

⁴⁵फेरी तिस सारे देशा च दपैहरा ते लेईने तिन्न बजे तक अन्धेरा इ छाईरा रैया।

⁴⁶कोई तिन्न बजे रे आस-पास यीशुये ऊच्चिया अवाज़ा च गलाया, “एली, एली, लमा शबक्तनी?” यनिके “मेरे परमेशर, मेरे परमेशर, तैं मिन्जो कजो छडित्या?”

⁴⁷तित्थी खढ़िरे लोकां चते किछ ये सुणी ने बोलणे लगे भई ये एलिय्याह जो हाक पाईराँ।

⁴⁸फेरी तिन्हां चते इक माहणु छोड़चा ने दौड़ीने सिरके च चोक्कीरा कपड़ा सरकन्डे पर टंगाईने ल्याया कने सै यीशुये जो चुसणे जो दित्या।

⁴⁹पर होरीं लोकें गलाया, “छड्डा देखां ये भई एलिय्याह इस्सो बचाणे औआं कि नीं।”

⁵⁰यीशुये फेरी भीं ते इक बार जोरा ने हाक पाई कने अपणा प्राण परमेशरा जो देईने मरया।

⁵¹कने देक्खा, मन्दरा रा पड़दा उपरा ते लेईने थल्ले तक फटीने दो टुकड़े हुईग्या; धरती कम्बीगी कने चट्टानां फटणे लगी गियां,

⁵²कने कब्राँ खुली गियां कने परमेशरा रे मूईरे पवित्र लोकां रे कई मुर्दे जिस्म जिऊंदा हुईगे,

⁵³सै कब्राँ ते बाहर निकल़ीने आईगे कने यीशुये रे जिऊंदा हुणे ते बाद पवित्र नगरा च जाईने मतयां जो दिस्से।

⁵⁴फेरी सुबेदार कने होर सिपाही सै जे तिस सौगी यीशुये रा पैहरा देई कराँ थे, हिल्लण कने सै जे किछ तित्थी हुया था तिस्सो देखीने बड़े भरी डरिये कने गलाया, “सच्ची जो ये परमेशरा रा पुत्र था।”

⁵⁵तित्थी मती सारी जनानां सै जे यीशुये री सेवा करदियां हुईयां तिस सौगी गलील प्रदेशा ते आईयां थिआं।

⁵⁶तिन्हां च मरियम मगदलिनी, याकूब कने योसेस री माता मरियम, कने जब्दिये रे पुत्राँ री माता थीं।

⁵⁷संजके जुन्ना अरिमतियाह नगरा ते यूसुफ नौआं रा इक सेठ आया, सै खुद इ यीशुये रा चेला बणी गरा था।

⁵⁸तिने पिलातुस ले जाईने यीशुये री लाश मंगी। फेरी पिलातुसे हुक्म दित्या भई लाश तिस्सो देई दित्ति जाओ।

⁵⁹यूसुफे लाश लेई कने तिसाजो इक नौंईयां चादरा च लपेटी ने,

⁶⁰तिस्सो अपणिया नौंईयां कब्रा च रखया, सै कब्र तिने चट्टान कटाई ने बणवाई री थी, कने कब्रा रे दरवाजे पर बड्डे पत्थरा ने ढक्कण देईने चलीया।

⁶¹मगदला गाँवां री मरियम कने दुज्जी जनाना मरियम तित्थी कब्रा रे सामणे बैठी रियां थी।

⁶²अगले दिन ताहली जे शुक्रवार बीतिग्या, तां मुखियायाजक कने फरीसी पिलातुसा ने मिले।

⁶³तिन्हे गलाया, “महांराज, अहांजो याद आ भई तिने झूठे ताहली जे सै जिऊंदा था, गलाया था, माह तिज्जे दिन ज्यून्दे हुई जाणा।

⁶⁴तां हुक्म देआ भई तिज्जे दिना तक कब्रा री रखवाली किति जाओ, येढ़ा नीं ओ भई तिसरे चेले आई ने तिस्सो चोरी ने लेई जाओ कने लोकां ने बोलणे लगो, ‘सै मूईरयां चते जिऊंदा हुईगरा।’ फेरी पिछला झूठ[10] पैहलके झूठा[11] ते बी बुरा हूणा।”

⁶⁵पिलातुसे तिन्हाने गलाया, “तुहें पैहरे खातर सपाई लेई सक्कां ये। जावा अपणिया समझा रे मुतावक रखवाल़ी करा।”

⁶⁶फेरी सै सपाईयां जो सौगी लेईने चलीगे, कने पत्थरा पर मोहर लाईने कब्रा री रखवाल़ी किति।