Read Bilaspuri मत्ती 28 Bible Online

मत्ती 28 - Bilaspuri bible

मत्ती 28

¹विस्राम रे दिना ते बाद हफ्ते रे पैहले दिन भ्याग हुन्दे इ मरियम मगदलिनी कने दुज्जी जनाना मरियम कब्रा जो देखणे आई।

²कने देक्खा, इक बड़ा भूचाल आया, काँह्भई परमेशरा रा इक स्वर्गदूत स्वर्गा ते ऊत्थी उतरया कने कब्रा रा पत्थर कण्डे करीने तिस पर बैठीया।

³तिसरा रुप लोई साई चमकणे लगीरा था कने तिसरे कपड़े बर्फा साई चिट्टे थे।

⁴तिसरे डरा ते सपाई कम्बणे लगे, कने मूईरयां साई हुईगे।

⁵स्वर्गदूते जनानां ने गलाया, “डरदियां मता, हऊँ जाणाँ भई तुहें यीशुये जो टोल़ी राँईयां सै जे क्रूसा पर चढ़ाया गैईरा।

⁶सै येत्थी निआं, पर अपणे वचना रे मुतावक जिऊंदा हुईगरा; औआ, तिसा जगह जो देक्खां, तित्थी जे प्रभु रखीरा था।

⁷कने छोड़चा ने जाईने तिसरे चेलयां ने बोल्ला भई सै मूईरयां चते जिऊंदा हुईगरा, कने हुण सै तुहां ते पैहले गलील जो जाई कराँ, तुहां सै ऊत्थी देखणा! सै जे मैं तुहांजो गलाया तिस्सो आद रखयों।”

⁸सै जनानां डर कने खुशिया ने भरीगियां कने कब्रा ते मुड़ीने तिसरयां चेलयां जो खुशखबरी देणे खातर दौड़ी गियां।

⁹फेरी यीशुये अचानक तिन्हांजो मिलीने “नमस्कार” कित्या। कने तिन्हें तिसरे नेड़े आईयां तिसरे पैर छुईने तिसरी अराधना कित्ती।

¹⁰फेरी यीशुये तिन्हांने बोल्या, “मत डरा; मेरे चेलयां ने जाईने बोल्ला, भई गलील प्रदेशा जो चली जायों तित्थी मिन्जो देख्यां।”

¹¹ताहली जे सै जनानां रस्ते ची थिआं भई किछ सपाई सै जे पैहरेदाराँ च थे, नगरा च गये कने जो किछ ऊत्थी हुया तिसरा सारा हाल मुखियायाजकां जो सुणाईत्या।

¹²फेरी तिन्हे बजुर्ग यहूदी नेतयां ने मिलीने इक योजना बणाई कने सपाईयां जो बौहत सारा चान्दी देईने गलाया,

¹³“सब्बीं जो येढ़ा बोल्यों भई राति ताहली जे अहें सुत्तीरे थे, तां तिसरे चेले आईने तिस्सो चोरी ने लेईये।

¹⁴जे तुहांरी ये गल्ल राजपाला रे कन्नां तक पुज्जी जांगी, तां अहें तिस्सो समझाई लेंगे कने तुहां पर कोई आँच नीं औणे देंगे।”

¹⁵पैहरेदारें पैसा लेईने तेढ़ा इ कित्या, तेढ़ा जे तिन्हांजो दस्सीरा था। ये गल्ल यहूदियां च आज्ज तक इसी रुपा च फैलीरी।

¹⁶फेरी ग्यारा रे ग्यारा चेले गलील री तिसा पहाड़िया पर पुज्जीगे तित्थी जाणे जो जे यीशुये तिन्हाजो बोलीरा था।

¹⁷ताहली जे तिन्हे यीशुये जो देख्या तिन्हे तिसरी अराधना कित्ती, पर किछ चेलयां रे मना च सन्देह था।

¹⁸यीशुये तिन्हांले आईने बोल्या, “स्वर्ग कने धरतिया रा सारा अधिकार मिन्जो देई दित्तिरा।

¹⁹इस खातर तुहें जाईने सारी जातियां रे लोकां जो चेला बणावा; कने तिन्हांजो पिता, पुत्र, कने पवित्र आत्मा रे नौआं ते बपतिस्मा देआ,

²⁰कने तिन्हांजो ये सारी गल्लां सै जे मैं तुहांजो आज्ञा दित्तिरी, मनणा सखाओ; कने याद रखा, हऊँ संसारा रे अन्ता तक सदा तुहांरिया सौगी आ।”