Read Bilaspuri मरकुस 10 Bible Online

मरकुस 10 - Bilaspuri bible

मरकुस 10

¹फेरी यीशु कफरनहूम नगरा जो छड्डिने यहूदिया रे इलाके री सीमा च कने यरदना नदिया ते पार गया। भीड़ तिसले फेरी कट्ठी हुईगी, फेरी सै अपणे तरिके ने तिन्हौं उपदेश देणे लगया।

²तां फरीसियें तिसले आईने तिस्सो परखणे खातर तिसते पुच्छया, “क्या ये यहूदी व्यवस्था रे मुतावक ठीक आ भई पुरुष अपणी पत्नियां जो छड्डी दो?”

³यीशुये तिन्हांजो जवाब दित्या, “मूसे तुहांजो क्या हुक्म दित्तिरा?”

⁴तिने गलाया, “मूसे त्याग पत्र लिखणे कने छड्डी देणे रा हुक्म दित्तिरा।”

⁵यीशुये तिन्हांने गलाया, “तुहांरे पूर्वजां रिया जिद्दा रिया वजह ते मूसे रिया व्यवस्था च तुहांरे खातर ये हुक्म लिखया।

⁶पर सृष्टिया रे शुरुआता तेई परमेशरे नर कने नारी करीने तिन्हांजो बणाईरा।

⁷येई वजह इ भई परमेशरे बोल्या, ताहली जे कोई मर्द ब्याह कराँ तां तिस अपणे मौ-बुढ़यां जो छड्डिने अपणिया घराऔल़िया सौगी जुड़ी रैहणा।

⁸कने तिन्हां दुईं इक हुईने रैहणा; हलांकि ब्याह ते पैहले सै दो थे, पर परमेशर हुण तिन्हांजो इक देक्खां इस खातर सै चाँह दोन्नों मिलीने रौ।

⁹इस खातर तिस्सो जे परमेशरे जोड़ी रा तिस्सो माहणु लग नीं करो।”

¹⁰कने बाद बिच ताहली जे सै चेलेयां सौगी घरा च कल्हा था, तां तिन्हें तिसते इस बारे पुच्छया।

¹¹यीशुये तिन्हांने गलाया, “सै जे कोई अपणिया घराऔल़िया जो छड्डिने दुज्जिया ने ब्याह करो तां सै तिसा पैहलिया रे बरोधा च व्यभिचार कराँ;

¹²कने जे घरा औल़ी अपणे पतिये जो छड्डिने दुज्जे ने ब्याह करो, तां सै व्यभिचार कराँ इ।”

¹³फेरी लोक बालकां जो यीशुये लौ ल्यौणे लगे भई सै तिन्हां पर हात्थ रक्खीने तिन्हांजो आशीर्वाद देओ, पर चेलयां तिन्हांजो झिड़कया।

¹⁴ताहली जे यीशु देक्खां भई सै गुस्सा हुईगे यीशुये चेलयां जो गलाया, “बालकां जो मेरले औणे देआ तिन्हौं नां नीं करा, काँह्भई सै जे कोई बच्चयां साई भरोसा रक्खां ये तिन्हां पर इ परमेशरा राज करने रे खातर त्यार हूणा।

¹⁵हऊँ तुहांजो सच्च बोलां भई सै जे कोई परमेशरा जो अपणे राजे रे रुपा च बच्चयां साई ग्रहण नीं करो, तां परमेशरा तिन्हां पर राज करने जो सैहमत नीं हूणा।”

¹⁶फेरी यीशुये बच्चे जो अपणिया बाँई च लेआ, कने हर इक्की पर अपणे हात्थ रखीने तिन्हांजो आशीष दित्ति।

¹⁷कने तंजे सै तित्थी ते निकल़ीने रस्ते च जाये रां था, तां इक माहणु तिसलौ दौड़दा-दौड़दा आया, कने तिसरे सामणे गोडे टेक्कीने तिस्सो पुच्छया, “हे अव्वल गुरू, अनन्त जीवन पाणे रे खातर हऊँ क्या करूँ?”

¹⁸यीशुये तिसने गलाया, “तू मिन्जो अव्वल काँह बोलां? कोई अव्वल निआं, सिर्फ इक आ मतलब परमेशर।

¹⁹तू हुक्मां जो त जाणाँ इ हया : हत्या नीं करनी, व्यभिचार नीं करना, चोरी नीं करनी, झूट्ठी गवाही नीं देणी, छल नीं करना, अपणे पिता कने माता रा आदर करना।”

²⁰तिने तिसने गलाया, “हे गुरू, इन्हां सब्बीं जो हऊँ बचपना ते मनदा आये राँ।”

²¹यीशुये तिस खौ देखीने तिसने प्यार कित्या, कने तिस्सो गलाया, “इक गल्ल इ सै जे तैं हुण तक नीं कित्ती; घरा जो जा, जो किछ तेरा तिस्सो बेच्चीने गरीबां जो बंडी दे तिज्जो स्वर्गा च धन मिलणा, कने आईने मेरा चेला बण।”

²²इसा गल्ला ते तिसरे मुँआं पर उदासी छाईगी, कने सै दुखी हुईने चलिग्या, काँह्भई सै बौहत धनी था।

²³यीशुये चऊँ तरफा देखीने अपणयां चेलयां ने गलाया, “अमीर लोकां जो इसा गल्ला रा फैसला करना बड़ा मुश्कल आ भई परमेशर तिन्हांरियां जिन्दगियां पर राज करो!”

²⁴चेले तिसरियां गल्लां ते बड़े हैरान हुये भई तिने क्या गलाया! इस खातर यीशुये फेरी भीं तिन्हांजो जबाब दित्या, “मेरे बच्चयो, सै जे धना पर भरोसा रखां ये, तिन्हां खातर ये फैसला लेणा कितना मुश्कल आ भई परमेशर तिन्हांरियां जिन्दगियां पर राज करो!

²⁵सच्चीजो, तियां जे ऊँटा रा सुईया रे छेदा ते निकल़णा मुश्कल आ तियां इ धनवान माहणुये रा परमेशरा रे राज्जा च प्रवेश करना बी उतणा इ मुश्कल आ!”

²⁶सै बौहत इ हैरान हुईने अप्पूँ चियें बोलणे लगे, “इसरा मतलब येआ भई कोई बी अपणे पापां रिया सजा ते बची नीं सकदा भई सै स्वर्गा च जाई सक्को।”

²⁷यीशुये तिन्हां खौ देखीने गलाया, “माहणुआं ते त ये नीं हुई सकदा, पर परमेशरा ते ये हुई सक्कां, काँह्भई परमेशर सब किछ करी सक्कां।”

²⁸पतरस तिस्सो बोलणे लगया, “देख, अहें त सब किछ छड्डिने तेरे पिछे आई गरे।”

²⁹यीशुये जवाब दित्या, “हऊँ तुहांजो सच बोलां भई तिने जे, मेरा चेला बणने कने मेरिया खुशखबरिया जो सुनाणे रे खातर, अपणा घर बार, भाईयां, बैहणां, माता या पिता, बाल-बच्चयां, या खेतां जो छड्डीत्या हो,

³⁰तिन्हां लोकां इसा जिन्दगिया च तिस छड्डीरे जो सतावा सौगी सौ गुणा पाणा, कने औणे औल़े जुगा च तिन्हां अनन्त जीवन पाणा।

³¹पर हऊँ तुहां सब्बीं जो खबरदार कराँ; तुहां चते सै जे कोई अप्पूँजो बड़ा खास बणांगा, तिस खास नीं समझया जाणा; कने सै जे अप्पूँजो बड़ा खास नीं बणांगा तिसजो खास समझया जाणा।”

³²यीशु कने तिसरे चेले यरूशलेम नगरा जो जाणे औल़े रस्ते च थे, कने यीशु तिन्हांते अग्गे-अग्गे जाया राँ था : चेले हैरान थे कने सै जे तिसरे पिछे-पिछे चलीरे थे सै डरीरे थे, तां यीशुये फेरी तिन्हां बाराँ जो लईने तिन्हांने ये गल्लां बोलणे लगया, सै जे तिसने हुणे औल़ियां थिआं,

³³“देक्खा, अहें यरूशलेम जो जाया रायें, कने माहणुये रा पुत्र यनि हऊँ मुखियायाजकां कने यहूदी शास्त्रियां रे हत्थां पकड़वाया जाणा, कने तिन्हां तिस्सो मारने लायक ठैहराणा, कने अन्यजातियां रे हात्था च देणा।

³⁴तिन्हां मेरा मजाक बनाणा, माह पर थुकणा, मिन्जो कोड़े मारने कने जानी ते मारना, फेरी तिन्नां दिनां ते बाद मांह जिऊंदे हुई जाणा।”

³⁵तां जब्दिये रे पुत्र याकूब कने यूहन्ने तिस लौ आईने गलाया, “गुरू जी, अहें चाँह थे भई जो किछ अहें तेरते मंगीये, सैई तुहें अहां रे खातर करो।”

³⁶यीशुये तिन्हांने गलाया, “तुहें क्या चाँये भई हऊँ तुहांरे खातर करूँ?”

³⁷तिने तिसने गलाया, “ताहली जे तुहें अपणे महिमामय राज्जा च राज करगे, तां अहां चते इक्की जो तेरे सज्जे कने दुज्जे जो तेरे खब्बे पासे बठाये ताकि अहें तुहां सौगी राज करिये।”

³⁸पर यीशुये तिन्हांने बोल्या, “तुहें नीं जाणदे भई क्या मंगया रायें? क्या तुहां सै दुख सैहणा सै जे हऊँ सैहणे जाईराँ?” कने क्या तुहें मौती री सजा स्वीकार करी सक्कां ये तिसजो जे सै मिन्जो देणे औल़े?

³⁹चेलयां तिस्सो गलाया, “अहांते हुई सक्कां।” यीशुये तिन्हौं गलाया, “सै दुख जे हऊँ सैहणे औल़ा; तिसजो तुहें सैई सक्कां ये; कने तिसा मौती जे हऊँ मरने जाईराँ, तिसा मौती तुहें मरी सक्कां ये!

⁴⁰पर तिन्हां खातर जे त्यार कित्तिरा, तिन्हां छड्डिने होर किसी जो अपणे सज्जे कने खब्बे बठाणा मेरा काम्म निआं।”

⁴¹येढ़ा सुणीने दस्सो चेले याकूब, कने यूहन्ना पर गुस्सा हुणे लगे।

⁴²तां यीशुये तिन्हौं अप्पूँ ले सद्दीने तिन्हांजो गलाया, “तुहें जाणाँ ये भई सै जे अन्यजातियां रे हाक्म समझे जांये, सै तिन्हां पर दवाव पाईने राज कराँ ये; कने तिन्हां च सै जे बड्डे अधिकारी ये, तिन्हां पर अधिकार जतांये।

⁴³पर तुहां सौगी येढ़ा नीं हूणा, काँह्भई जो कोई तुहां च महान बणना चाँह सै तुहांरा सेवक बणो;

⁴⁴कने सै जे कोई तुहां च प्रधान हूणा चाओ, सै सबनी रा दास बणो।

⁴⁵काँह्भई माहणुये रा पुत्र यनि हऊँ इस खातर नीं आया भई तिसरी सेवा कित्ती जाओ, पर इस खातर आया, भई अप्पूँ सेवा करो, कने बौहत सारे लोकां जो पापां ते छुड़ाणे खातर अपणा प्राण देओ।”

⁴⁶यीशु कने तिसरे चेले यरूशलेम जान्दे हुये यरीहो नगरा च आये, फेरी ताहली जे सै यरीहो इलाके ते निकल़े, तिन्हां सौगी इक बड्डी भीड़ बी चलीरी थी, तां तिमाई रा पुत्र बरतिमाई, सै जे इक अन्हा भिखारी था, सड़का रे कनारे बैठिरा था।

⁴⁷ये सुणीने भई यीशु नासरी तित्थी ते जाया रां, सै हाक पाईने बोलणे लगया, “दाऊद री सन्तान, यीशु माह पर दया कर।”

⁴⁸तिस्सो मतयां लोकें झिड़कया भई सै चुप रौ, पर सै होर बी जोरा ने हाकां पाणे लगया, “हे दाऊद री सन्तान, माह पर दया कर।”

⁴⁹तां यीशुये रुकीने गलाया, “तिस्सो सद्दा।” कने लोकें तिस अन्हे जो सद्दीने तिस्सो गलाया, “हौंसला रख! उट्ठ यीशु तिज्जो सदया राँ।”

⁵⁰सै अपणा चोल़ा सट्टि ने झट उट्ठया, कने यीशुये लौ आया।

⁵¹तां यीशुये तिसने गलाया, “तू क्या चाँह भई हऊँ तेरे खातर करूँ?” अन्हे तिसने गलाया, “हे गुरू, ये भई हऊँ देखणे लगुं।”

⁵²यीशुये तिसने गलाया, “चलीजा, तेरे विश्वासा रिया वजह ते मैं तिज्जो ठीक कित्या।” कने सै इकदम देखणे लगीग्या, कने रस्ते च तिसरे पिछे-पिछे चलीप्या।