Read Bilaspuri मरकुस 11 Bible Online

मरकुस 11 - Bilaspuri bible

मरकुस 11

¹तंजे यीशु कने तिसरे चेले यरूशलेम नगरा रे नेड़े, जैतून पहाड़ा पर बैतफगे कने बैतनिय्याह गाँवां रे नेड़े आये, तां तिने अपणे चेलयां चते दुईं जो ये बोलीने भेज्या,

²“सामणे रे गाँवां च जावा कने तिसच पुजदे इ इक गधिया रा बच्चा, तिस पर जे कोई बी बैठिरा नीं हो, तुहौं बझीरा मिलणा। तिस्सो खोल्ही ने येत्थी ली औआ।

³जे कोई तुहांते पुच्छो, ‘ये क्या करया रायें?’ तां बोल्यों, ‘यीशु अहांरे प्रभुये जो इसरी जरूरत इ,’ कने तिस छोड़े इ इस्सो येत्थी भेजी देणा।”

⁴तां तिन्हें जाईने तिस बच्चे जो बाहर दरवाजे सौगी गल़िया च बझीरा पाया, कने खोलणे लगे।

⁵तिन्हां चते सै जे ओत्थी खढ़ी रे थे, किछ लोक बोलणे लगे, “ये क्या करया रायें गधिया रे बच्चे जो काँह खोल्या रायें?”

⁶तेढ़ा जे यीशुये गलाया था, तेढ़ा इ चेलयां तिन्हांजो जवाब दित्या; तां लोकें गधिया रा बच्चा तिन्हांजो नेणे दित्या।

⁷तिन्हें गधिया रे बच्चे जो यीशुये ले ल्याए कने तिस पर अपणे किछ कपड़े रखे कने सै तिस पर बैठिग्या।

⁸तां बौहत सारे लोकें अपणे किछ कपड़े रस्ते च बछाये कने होरी खेतां चते डाल़ियां कट्टी-कट्टीने यीशुये जो आदर देणे खातर बछाई तियां।

⁹सै जे यीशुये रे अग्गे-अग्गे चलया राँ थे कने पिछे-पिछे ते आया रां थे, हाकां पाई-पाईने गलाया राँ थे, “परमेशरा री जय हो! परमेशर तिसजो आशीष देओ सै जे अपणे अधिकारा सौगी औआं!

¹⁰परमेशर तुहांजो आशीष देओ ताहली जे तुहें अहांरे पूर्वज राजे दाऊद साई राज करना; परमेशरा री जय हो सै जे सब्बीं ते ऊच्चे स्वर्गा चा!”

¹¹कने सै यरूशलेम पुज्जी ने मन्दरा च आया, कने चऊँ पासयां सब्बीं चीज़ा जो देखीने बाराँ चेलयां सौगी बैतनिय्याह गाँवां जो गया, काँह्भई सांझ हुईगरी थी।

¹²दुज्जे दिन ताहली जे यीशु कने तिसरे चेले बैतनिय्याह गाँवां ते निकल़ीने यरूशलेम जाया राँ थे, तां यीशुये जो भूक्ख लगी।

¹³सै दूरा ते अंजीरा रा इक डाल़ देखीने इकदम तिसरे नेड़े गया भई शायद तिसच कोई फल़ मिली जाओ : पर पत्तयां जो छड्डिने किछ नीं मिलया; काँह्भई फल़ा रा मौसम नीं था!

¹⁴फेरी यीशुये तिस डाल़ा ने गलाया, “हूणा ते कोई बी तेरा फल़ दबारा नीं खांगा!” कने तिसरे चेले इसा गल्ला जो सुणयां राँ थे।

¹⁵फेरी यीशु कने तिसरे चेले वापस यरूशलेम नगरा च आये, कने सै मन्दरा रे अंगणा च गया; कने तित्थी सै जे लेण-देण करया राँ थे तिन्हांजो बाहरा कड्डणे लगया, कने बेचणे कने खरीदणे औल़यां रियां चौकियां कने कबूतर बेचणे औल़यां रियां चौकियां पल़टी तियां,

¹⁶कने मन्दरा रे अंगणा चते किसी जो कोई बी समान लईने औणे-जाणे नीं दित्या।

¹⁷कने तिने उपदेश देईने तिन्हांजो गलाया, “क्या ये नीं लिखिरा भई मेरा घर सब्बीं जातियां रे लोकां खातर प्राथना रा घर हूणा? पर तुहें इस्सो चोराँ रे छिपणे री गुफा बणाई तरा।”

¹⁸ये सुणीने मुखियायाजक कने शास्त्री तिस्सो मारने री तरकीब सोचणे लगे; काँह्भई सै यीशुये ते डराँ थे, इस खातर भई सब लोक तिसरे उपदेशा ते हैरान हुआं थे।

¹⁹ताहली जे सांझ हुई यीशु कने तिसरे चेले नगरा ते बाहर चलीगे।

²⁰अगली सुबह ताहली जे यीशु कने तिसरे चेले कट्ठे यरूशलेम जो रस्ते पर जाया राँ थे, तां तिन्हें तिस अंजीरा रे डाल़ा जो जड़ां तकौ सुक्कीरा देख्या।

²¹पतरसा जो सै गल्ल याद आई, कने तिने तिन्हांजो गलाया, “हे गुरू, देख! ये अंजीरा रा डाल़ तिस्सो जे तैं शाप दित्या था, सुकीगरा।”

²²यीशुये तिन्हौं जवाब दित्या, “परमेशरा पर विश्वास रक्खा।

²³हऊँ तुहांजो सच बोलां भई जे कोई इस पहाड़ा जो बोल्लो, ‘तू उखड़ी जा, कने समुद्रा च जाईने पौ,’ कने अपणे मना च भरोसा रक्खो भई तेढ़ा जे सै बोलगा, तियां इ हुईजो, तां तिस खातर सैई हूणा।

²⁴इस खातर तुहांजो बोलां भई जो किछ तुहें प्राथना च मंग्गो, तां विश्वास करीलो भई तुहौं सै मिलीग्या, कने तुहां खातर हुई जाणा।

²⁵कने ताहली जे कदीं तुहें खड़ीने प्राथना कराँ ये तां जे तुहांरे मना च किसी रिया तरफा ते कोई वरोध हो, तां तिस्सो माफ करा : इस खातर भई तुहांरा स्वर्गीय पिता बी तुहांरे पाप माफ करे।

²⁶कने जे तुहें माफ नीं करो तां तुहांरा पिता बी सै जे स्वर्गा च आ, तुहांरे पाप माफ नीं करगा।”

²⁷यीशु कने तिसरे चेले दबारा यरूशलेम नगरा च पुज्जे, तंजे यीशु मन्दरा रे अंगणा च टैहलयां राँ था, तां मुखियायाजक कने यहूदी शास्त्री कने यहूदी बजुर्ग तिसलौ आईने पुछणे लगे,

²⁸“सै काम्म जे तैह कित्ते तिन्हांजो करने खातर तेरले क्या अधिकार आ? ये सब बोलणे कने ये करने रा अधिकार तिज्जो किने दित्या?”

²⁹यीशुये तिन्हांजो जवाब दित्या, “मांह बी तुहांते इक स्वाल पुच्छां; जे तुहें मिन्जो जवाब देईत्या, तां माह बी तुहांजो दसणा भई इन्हां कम्मां जो करने रा अधिकार मिन्जो किने दित्तिरा, तिन्हांजो जे हऊँ करीराँ।

³⁰यूहन्ना रा बपतिस्मा क्या परमेशरा रिया तरफा ते था या माहणुआं रिया तरफा ते था? मिन्जो जवाब देआ।”

³¹तां सै अप्पूँ चियें विचार करने लगे भई जे अहें बोलिये, परमेशरा रिया तरफा ते था, तां इस अहांते पुछणा, फेरी तुहें तिस पर विश्वास काँह नीं कित्या?

³²कने जे अहें बोलिये, माहणुआं रिया तरफा ते तां क्या हूणा, सै डरां थे भई जे तिन्हें येढ़ा बोल्या तां लोकां तिन्हांरे खातर परेशानी खढ़ी करनी, काँह्भई बौहत सारे लोकां जो इसा गल्ला रा यकीन था भई यूहन्ना हकीकत च इक भविष्यवक्ता था।

³³इस खातर तिन्हे यीशुये जो जवाब दित्या, “अहें नीं जाणदे।” यीशुये तिन्हांजो गलाया, “मांह बी तुहांजो नीं दसणा भई हऊँ ये काम्म किस अधिकारा ने कराँ।”