Read Bilaspuri मरकुस 15 Bible Online

मरकुस 15 - Bilaspuri bible

मरकुस 15

¹भ्याग हुंदे इ ताहलूं मुखियायाजकें, बजुर्ग अगुवेयां, शास्त्रियें कने सारिये महासभे सलाह करीने ये फैसला लेआ भई यीशुये रा न्याय करने खातर तिस्सो पिलातुस राजपाला ले सौंपीत्या।

²पिलातुसे तिसते पुच्छया, “क्या तू यहूदियां रा राजा?” तिने तिस्सो जवाब दित्या, “तू अप्पूँ इ गलाया राँ।”

³मुखियायाजक तिस परा मतियां गल्लां रा दोष लगाये राँ थे।

⁴इस खातर पिलातुस राजपाल्ले तिसते फेरी पुच्छया, “देख, ये तेरे पर कितणियां गल्लां रा दोष लाये रायें, क्या तू किछ जवाब नीं देन्दा?”

⁵यीशुये फेरी भीं किछ जबाब नीं दित्या; इसा वजह ते पिलातुस बौहत हैरान हुया।

⁶हर साल फसह रे त्योहारा रे वगत ये रिवाज था भई तिस दिन राजपाल पिलातुस किसी इक्की कैदिये जो तिस्सो जे लोक चाँह थे, तिस्सो छड्डी देआं था।

⁷तिस वगत बरअब्बा नौआं रा इक माहणु था, सै जे किछ होर लोकां सौगी जेल्ला च था, काँह्भई तिने जे रोमी सरकारा रे बरोधा च दंगा करीने किछ लोकां री हत्या कित्तिरी थी।

⁸कने भीड़ पिलातुस ले जाईने विनती करने लगी, भई तेढ़ा जे तू हमेशा अहां खातर करदा आया तेढ़ा इ कर।

⁹पिलातुसे तिन्हांजो जवाब दित्या, “क्या तुहें चाँये भई हऊँ तुहां खातर यहूदियां रे राजे जो छड्डी दूँ?”

¹⁰काँह्भई यीशु जाणाँ था भई मुखियायाजकें तिसजो जल़ण करीने पकड़वाया था।

¹¹पर मुखियायाजकें लोकां जो भड़काया भई सै पिलातुस ते यीशुये रे बदले बरअब्बा जो छडणे री माँग करो।

¹²ये सुणीने पिलातुसे तिन्हांते फेरी पुच्छया, “तां तिस्सो जे तुहें यहूदियां रा राजा बोलां ये, तिस्सो हऊँ क्या करूँ?”

¹³सै फेरी चिल्लाये, “इस्सो क्रूसा पर चढ़ाओ!”

¹⁴पिलातुसे तिन्हांने गलाया, “कां, यीशुये तुहांरा क्या बुरा कित्तिरा?” पर सै होर जोरा ने रड़ाये, “इस्सो क्रूसा पर चढ़ाओ !”

¹⁵तां पिलातुसे भीड़ा जो खुश करने खातर, बरअब्बा जो तिन्हां खातर छड्डीत्या, कने सपाईयें यीशुये जो कोड़े लगाये; तिसते बाद पिलातुस राजपाले तिन्हांजो बोल्या इसजो ले जाईने क्रूसा पर चढ़ाई दो।

¹⁶फेरी पिलातुस रे सिपाही यीशुये जो मैहला रे अंगणा च (यनि तित्थी जे पिलातुस राजपाला रा मुख्याल्य) लईगे, कने तिन्हें इक सारिया पलटना[19] जो इक साथ सद्दया।

¹⁷तां तिन्हें यीशुये रा मजाक बनाणे खातर इक राजे साई इक बैंगणी कपड़ा पैहनाया कने कण्डयां रा मुकट गुन्दी ने तिसरे सिरा पर रखया,

¹⁸कने येढ़ा बोलीने तिस्सो नमस्कार करने लगे, “यहूदियां रे राजा, तेरी जय हो!”

¹⁹सै तिसरे सिरा पर बैंझा रिया सोट्ठिया ने बार-बार मारां थे, कने तिन्हें तिसरा अपमान करने खातर तिस पर थुक्कया, कने तिसजो आदर देणे रा नाटक करदे हुये तिसरे अग्गे झुकणे लगे।

²⁰तंजे सै तिसरी हासी डुवाई चुक्के, तां तिस परा ते बैंगणी रंगा रा कपड़ा उतारी ने तिसरे कपड़े पैहनाये; कने फेरी सिपाई यीशुये जो क्रूसा पर चढ़ाणे खातर नगरा ते बाहरा जो लईगे।

²¹ताहली जे सै नगरा ते बाहर जाया रां थे, तां शमौन नौवां रा इक माह्णु आस्से-पास्से रे गाँवां ते यरूशलेम नगरा च आया रां था सै कुरेनी नगरा[20] ते था कने सै सिकन्दर कने रुफुस रा पिता था। सपाईयें तिस्सो मजबूर कित्या भई सै क्रूस चक्कीने तिसा जगह तक लेई जाओ तिसा जगह जे यीशुये जो क्रूसा पर चढ़ाया जाणा।

²²सै यीशुये जो गुलगुता नौआं रिया जगह पर ल्याये, तिसजो जे आरामी भाषा च “खोपड़ी री जगह बोलां ए।”

²³फेरी सिपाही यीशुये जो मुर्र नौआं री दवाई अंगूरी रसा च मिलाईने पीणे जो देणे लगे, तिसते जे सै दर्द महसूस नीं करो, पर तिने तिसजो पीणे ते इन्कार करित्या।

²⁴तां तिन्हें तिस्सो क्रूसा पर चढ़ाया कने तिसरे चोल़े रे खातर पर्चियां पाईयां, भई किस जो क्या मिलो, तिस्सो बन्डील्या।

²⁵कने सबेरका तकरीवन नौ बजे रा वगत था, ताहली जे तिन्हें यीशुये जो क्रूसा पर चढ़ाया।

²⁶कने तिसरा आरोप पट्टिया पर लिखीने सिरा ते ऊपर क्रूसा पर लगाया भई “ये यहूदियां रा राजा।”

²⁷तिन्हें तिस सौगी दो डाकू, इक तिसरे सज्जे पासे कने दुज्जी तिसरे खब्बे पासे क्रूसा पर चढ़ाये।

²⁸(इस तरिके ने पवित्रशास्त्रा रा ये वचन पूरा हुया, भई अपराधियां सौगी तिसरी गिणती हुई।)[21]

²⁹कने रस्ते च जाणे औल़यां सिर हिलाए कने तिसरा अपमान कित्या, “वाह! मन्दरा जो तोड़ने औल़े कने तिन्नां दिनां च बनाणे औल़े![22]

³⁰क्रूसा परा ते उतरीने अप्पूँजो बचाई लै।”

³¹इसा रितिया ते मुखियायाजक बी, शास्त्रियां समेत अप्पूँ चियें मजाका च बोल्या राँ थे, “इने होरीं जो बचाया पर अप्पूँजो नीं बचाई सकदा!

³²तिने बोल्या भई हऊँ मसीह आ; हऊँ सै राजा सै जे इस्राएल रे लोकां पर राज कराँ, जे ये गल्ल सच्ची तां तिस्सो हुण क्रूसा ते उतरीने थल्ले औणा चाहिन्दा! फेरी अहां तिस पर विश्वास करना।” दो माहणु तिन्हौं जे तिस सौगी क्रूसां पर चढ़ाया था, तिन्हें बी तिसरी निंध्या कित्ती।

³³दपैहर हुणे पर सारा इलाका अन्धेरे च डुब्बीग्या, कने दोपैहरके तिन्न बजे तक रैया।

³⁴तिन्न बजे ते बाद यीशुये ऊच्चिया अवाज़ा च गलाया, “इलोई, इलोई, लमा शबक्तनी?” तिसरा मतलब आ, “हे मेरे परमेशर, हे मेरे परमेशर, तैं मिन्जो काँह छड्डीत्या?”

³⁵सै जे नेड़े खढ़ी रे थे, तिन्हां चते कईयें ये सुणीने गलाया, “देक्खा, ये एलिय्याह जो सद्दया राँ।”

³⁶कने तिन्हां लोकां चते इक माह्णु दौड़ीने गया कने स्पंज लेईने सिरके [23]च डबोया, कने बैंझा रिया सोट्ठिया पर रखीने तिस्सो चुसाया कने गलाया, “रुकी जाओ, देक्खां ये, एलिय्याह तिस्सो उतारने खातर औआं कि नीं औन्दा।”

³⁷तां यीशुये ऊच्चिया अवाज़ा च रड़ाईने प्राण छड्डीते।

³⁸कने मन्दरा रा पड़दा उपरा ते थल्ले तकौ फटीने दो टुकड़े हुईग्या।

³⁹सै सुबेदार जे तिसरे सामणे खढ़िरा था, तंजे तिस्सो तियां रड़ाईने प्राण छडदे देख्या, तां तिने गलाया, “सचमुच ये माहणु, परमेशरा रा पुत्र था।”

⁴⁰तिसा जगह किछ औरतां बी थिआं सै जे इसा घटना जो थोड़े जे दूरा ते देखीरां थिआं। सै बी यीशुये ने सौगी थिआं ताहली जे सै गलील च था, कने सै तिसरी हर जरूरतां जो पूरा करदियां थिआं। सै यीशुये सौगी यरूशलेम ते आईयां तिन्हांने मगदला जगह री औरत मरियम बी थी, कने याकूब कने योसेस री माता मरियम बी तिन्हां सौगी थी, कने सलमोन बी थी।

⁴¹

⁴²तिस दिन जे यीशुये जो क्रूसा पर चढ़ाया गया सै त्यारिया रा दिन था, तिसरा मतलब था भई विस्राम रे दिना ते पैहले रा दिन, कने यहूदी रीति रिवाजा रे मुताबक तिसा राति रे शुरु हुन्दे इ सै काम्म नीं करी सकदे। इस खातर ताहली जे सूरज तकरीवन घरीग्या,

⁴³तां अरमतिया रा रैहणे औल़ा यूसुफ आया, सै जे महासभा रे ईज्ज़तदार औहदे पर था कने अप्पूँ बी परमेशरा जो तिसरे राज्जा च इक राजे साई देखणे रे इन्तजारा च था। सै हिम्मत करीने पिलातुसा ले गया कने दफनाणे खातर यीशुये री लाश मंगी।

⁴⁴पिलातुसा जो हैरानी हुई भई सै इतणे छोड़े मरीग्या; कने तिने सुबेदारा जो सद्दीने पुच्छया, “क्या यीशु सच्चीजो मरी चुक्कीरा?”

⁴⁵तंजे तिने सुबेदारा ते सारा हाल जाणी लया, तां लाश यूसुफा जो दवाई ती।

⁴⁶फेरी तिने मलमला री इक चादर खरीदी, कने लाशा जो उतारी ने तिसा चादरी च लपेटया, कने इक्की कब्रा च सै जे चट्टाना अन्दर खुणीरी थी रखया, कने कब्रा रे दरवाजे पर इक पत्थर लाईत्या।

⁴⁷मगदल गाँवां री मरियम कने योसेस री माता मरियम देख्या राँ थिआं भई यीशु कित्ती रक्खीरा।