Read Bilaspuri मरकुस 6 Bible Online

मरकुस 6 - Bilaspuri bible

मरकुस 6

¹फेरी यीशु ऊत्थी ते निकल़ीने कफरनहूम नगरा जो छड्डिने अपणे गाँव नासरत च गया, कने तिसरे चेले बी तिसरे पिछे गये।

²विस्रामा रे दिन सै यहूदी सभा घरा च उपदेश देणे लगया; कने बौहत लोक सुणीने हैरान हुये कने तिन्हांते पुच्छया, “इने माह्णुये ये गल्लां कितिते सिक्खियां? इस्सो ये सारा ज्ञान कने इस तरिके रे चमत्कार करने री शक्ति कित्तिते मिली?

³तिन्हें ये बोल्लीने तिसरा अपमान कित्या, क्या ये सिर्फ इक लकड़िया रा मिस्त्री निआं? सै जे मरियम रा पुत्र, याकूब, योसेस, यहूदा कने शमौना रा भाई आ। क्या इस रियां बैहणीं येत्थी अहांरे बिच नीं रैहन्दियां?” इस खातर तिन्हें तिसजो ग्रहण नीं कित्या।

⁴यीशुये तिन्हांने गलाया, “ये सच्च आ भई लोक मिन्जो कने भविष्यवक्तयां जो दुज्जियां जगहां च आदर कराँ ये, पर अपणे नगरा च नीं! अपणे टबरा कने अपणे घरा रे लोक बी तिन्हांरा आदर नीं करदे!”

⁵तिन्हे तिस पर विश्वास नीं कित्या इस खातर तिने अपणे हात्थ रक्खीने सिर्फ किछ इ लोकां जो ठीक कित्या; इसते इलावा सै ऊत्थी होर कोई चमत्कार नीं करी सक्कया।

⁶कने तिस्सो तिन्हांरे अविश्वासा पर हैरानी हुई। इसते बाद यीशु नेड़े-तेड़े रे गाँवां च गया कने लोकां जो परमेशरा रा सन्देश सखाया।

⁷फेरी यीशुये बाराँ चेलयां जो अप्पूँ ले सद्दया कने तिन्हांजो बुरीआत्मां जो निकाल़णे रा अधिकार दित्या। इसते बाद तिने तिन्हांजो दो-दो रा जोड़ा बणाईने लग-लग गाँवां च भेज्या।

⁸तिने तिन्हांजो बोल्या, “यात्रा करदे वगत सोठुये छड्डिने होर किछ बी नीं लौआ; नांत रोटी, नां झोला, नां बटुये च पैसे।

⁹तिने बोल्या जुट्टे पैहन्नी लै, पर होर कुरता लेणे री जरूरत नीं।”

¹⁰कने तिने तिन्हांने गलाया, “जे कोई तुहांजो अपणे घरा च रैहणे खातर सद्दो, तां तदुआं तक जे तुहें तिस नगरा च रैयां ये, तदुआं तक तिसरे मेहमान बणी रौआ।

¹¹तिसा जगह रे लोक जे तुहांरा स्वागत नीं करो कने तुहांरी नीं सुणो, तां तिसा जगह ते निकल़दे इ अपणे जोड़यां री मिट्टी बी झाड़ी देओं, ये तिस नगरा रे लोकां रे खातर चेतावनी हूणी भई परमेशरा तिन्हांरा न्याय करना।”

¹²इस खातर फेरी चेले लग-लग नगरा च गये कने तिन्हें लोकां च ये प्रचार कित्या भई तुहांजो अपणे पाप छडणे चाहिन्दे कने परमेशरा खा मुड़ना चाहिन्दा।

¹³सै बौहत सारी बुरीआत्मां जो लोकां चते कड्डया राँ थे, कने बौहत बमार लोकां पर जैतून रा तेल मल़ीने तिन्हांजो ठीक कित्या।

¹⁴हुण राजा हेरोदेस अन्तिपासे बी तिन्हां कम्मां री चरचा सुणी सै जे यीशु करया रां था, काँह्भई बौहत सारे लोक तिसरे बारे च जाणां थे कने तिसरे बारे च चरचा करया राँ थे, भई “ये यूहन्ना बपतिस्मा देणे औल़ा हूणा चाहिन्दा! सै मूईरयां चते जिऊंदा हुईगरा! तिसले परमेशरा री शक्ति तिसा वजह ने जे सै सामर्था रे काम्म करया राँ।”

¹⁵कने लोकें यीशुये रे बारे च गलाया, “ये एलिय्याह भविष्यवक्ता, तिसजो जे परमेशरे भीं ते भेजणे रा वायदा कित्तिरा था!” पर होर किछ लोकें गलाया, “ये भविष्यवक्तयां चते इक्की साई आ।”

¹⁶हेरोदेस राजे ये सुणीने गलाया, “ये यूहन्ना वपतिस्मा देणे औल़ा! मैं खुद इसरा सिर कटवाया था, पर सै मूईरेयां चते जिऊंदा हुईग्या!”

¹⁷हेरोदेस राजे खुद यूहन्ने जो पकड़ीने जेल्ला च पाणे रा हुक्म दित्या था। राजे ये काम्म हेरोदियासा रिया वजह ने कित्या था तिसाने जे तिने ब्याह कित्या था, हलांकि सै राजे रे भाई फिलिप्पुस री जनाना थी।

¹⁸इस खातर यूहन्ना वपतिस्‍मा देणे औल़े राजा हेरोदेस ने बोल्या था, भई “मूसा रे नियमा रे मुताबक अपणे भाईये रे जिऊंदा रैहन्दे हुये तिसरिया जनाना ने ब्याह करना तेरे खातर ठीक निआं।”

¹⁹इस खातर हेरोदियास यूहन्ने ने बैर रखां थी कने तिस्सो मरवाई देणे चाँह थी; पर येढ़ा नीं हुई सक्कया,

²⁰काँह्भई हेरोदेस यूहन्ना जो धर्मी कने पवित्र माहणु जाणीने तिसते डराँ था, कने तिस्सो बचाई रखां था, हर बार ताहली जे हेरोदेस यूहन्ने जो बोलदे हुये सुणां, सै बौहत घबराई जां, पर फेरी भीं तिस्सो सुणना पसन्द करां था।

²¹पर इक दिन ताहली जे हेरोदेस राजे अपणे जन्म दिना पर अपणे प्रधानां, सेनापतियां कने गलील जिले रे बडयां लोकां जो धाम खाणे सद्दया।

²²तां हेरोदियासा री कुड़ी अन्दर आई, कने नच्ची ने हेरोदेस जो कने धाम्मा च आईरे मेहमान्नां जो खुश कित्या। फेरी राजे कुड़िया जो गलाया, “तू सै जे चाँह इ मेरते मांग माह तिज्जो देणा।”

²³कने तिसाने कसम खाद्दि, “हऊँ अपणे अधे राज तकौ जो किछ तू मेरते मंगगी माह तिज्जो देणा।”

²⁴तिसे बाहर जाईने अपणिया मौआ ते पुच्छया, “हऊँ क्या मँगूं?” तिसे गलाया, “यूहन्ना बपतिस्मा देणे औल़े रा सिर।”

²⁵सै इकदम राजे ले अन्दर आई कने तिसने अरज कित्ती, “हऊँ चाँई भई तू हुण इ यूहन्ना बपतिस्मा देणे औल़े रा सिर येत्थी इक्की थाल़ा च मेरे खातर मंगवाई दे।”

²⁶फेरी राजा बौहत उदास हुआ, सै अपणी कसम कने मेहमान्नां रिया वजह ते इसा गल्ला जो टालणा नीं चाहन्दा था।

²⁷इस खातर राजे ताहलूं इ इक्की सपाईये जो हुक्म देईने यूहन्ने ले जेल्ला च भेज्या भई तिसरा सिर कट्टीने ल्याओ।

²⁸तिने जेल्ला अन्दर जाईने तिसरा सिर कट्टया, कने इक्की थाल़ा च रखीने ली अंदया कने लड़किया जो दईत्या, कने लड़किये अपणिया मौआ जो दित्या।

²⁹येढ़ा सुणीने यूहन्ना रे चेले आये, कने तिसरिया लाशा जो लईने कब्रा च रखीत्या।

³⁰ताहली जे सै बारा प्रेरित तिन्हांजो जे यीशुये भेज्या था वापस आये कने आईने तिसरे चऊँ पासयां कट्ठे हुईगै, जो किछ तिन्हें कित्या कने सखाया था, सब किछ तिस्सो दस्या।

³¹यीशुये चेलेयां जो गलाया, “औआ इक येढ़िया जगह पर चलिये तित्थी जे अहें कल्हे रैई सक्को कने होर किछ देर आराम करी सक्को।” काँह्भई बौहत लोक औवां-जां थे, इस खातर यीशु कने तिसरे चेलयां जो रोटी खाणे रा वगत बी नीं मिलदा था।

³²इस खातर यीशु अपणे चेलयां सौगी किश्तिया पर चढ़ीने सुनसान जगह जो लग चलीगे।

³³पर बौहत लोकें यीशुये जो जान्दे हुए देख्या कने जाणीगै भई सै किति जाया रां, इस खातर लोकें सब्बीं नगराँ ते कट्ठयां हुईने तित्थी जो पैदल इ दौड़ीगे कने यीशु कने तिसरे चेलेयां ते पैहले पुज्जीगे।

³⁴ताहली जे यीशु किश्तिया ते उतरया, तिने इक बौहत बड्डी भीड़ देक्खी, कने तिन्हां पर तिस्सो तरस आया, काँह्भई सै तिन्हां भेड्डां साई थे, तिन्हांरा जे कोई रखवाल़ा नीं हो; सै तिन्हांजो परमेशरा रे राज्जा री बौहत सारी गल्लां सिखाणे लगया।

³⁵तंजे दिन बौहत घरीग्या, तां यीशुये रे चेले तिसले आईने बोलणे लगे, “ये सुनसान जगह इ, कने दिन बौहत घरी गरा।

³⁶तिन्हाजो विदा कर भई सै आसे-पासे रे गाँवां कने नगराँ च जाईने, किछ अपणे खातर खाणे जो खरीदी लो।”

³⁷पर तिने जवाब दित्या, “तुहें इ तिन्हांजो खाणे जो देआ।” तिन्हें यीशुये ने गलाया, “इसच इक माहणुये री आट्ठ महीने री मजदूरी लगणी! क्या अहें जाईने इतणा पैसा रोटिया रे खातर खरच करिये कने तिन्हांजो खाणे रे खातर देईये?”

³⁸यीशुये तिन्हांजो गलाया, “जाईने देक्खा तुहांले कितणी रोटियां हईयां?” तिने पता लाईने गलाया, “पांज्ज रोटियां कने दो मच्छियां।”

³⁹तां यीशुये चेलयां जो हुक्म दित्या भई सब्बीं जो घा पर बैंठी च बठाल़ी दवा।

⁴⁰सै सौ-सौ कने पंजाह-पंजाह री बैंठ लाईने बैठीगे।

⁴¹यीशुये तिन्हां पंज्जाँ रोटियां जो कने दूँईं मच्छियां जो लया, कने स्वर्गा खौ देखीने परमेशरा जो धन्यवाद दित्या, कने रोटियां रे दो-दो टुकड़े करीने चेलयां जो देन्दा गया भई सै लोकां जो खाणे जो देओ, कने सै दो मच्छियां बी तिन्हां सबनी च बन्डी तियां।

⁴²कने सब खाईने रज्जीगे,

⁴³ताहली जे सारे खाई बैट्ठे, तां चेलयां बचीरे टुकड़यां रे बारा टोकरु भरीने चक्के, कने किछ मच्छियां बी।

⁴⁴तिन्हेंजे रोटियां खादियां, सै पांज्ज हज़ार माहणु थे।

⁴⁵फेरी यीशुये इकदम अपणयां चेलयां जो किश्तिया पर चढ़ाया भई सै तिसते पैहले इ बैतसैदा नगरा रे दुज्जे कनारे जो चली जाओ, तदुआं तकौ जे सै पिछे रुकीने लोकां जो विदा करां।

⁴⁶लोकां जो भेजणे ते बाद सै पहाड़ा पर प्राथना करने जो गया।

⁴⁷सांझके तकरीवन सात्त बजे किशती गलील दरयावा रे बिच थी, कने यीशु कल्हा धरतिया पर था।

⁴⁸कने ताहली जे यीशुये देख्या भई सै किश्तिया जो चप्पु मारदे-मारदे घबराई गरे, काँह्भई हवा तिन्हांरे उल्टिया दिशा च बैया कराँ थी, तां सबेरके तकरीवन तिन्न बजे सै दरयावा पर चलदे-चलदे तिन्हांले आया;

⁴⁹पर ताहली जे चेलयां यीशुये जो दरयावा पर चलदे हुए देख्या, तां तिन्हें रड़ाणा शुरु करित्या, काँह्भई तिन्हें सोच्या भई सै इक भूत आ;

⁵⁰कने सै ये देखीने घबराईगे। पर यीशुये इकदम तिन्हांने गल्लां कित्ती कने बोल्या, “हौंसला रखा : हऊँ आ; डरदे मता।”

⁵¹फेरी सै तिन्हां सौगी किश्तिया पर चढ़ीग्या, कने हवा बैहणा बन्द हुईगी: कने सै बौहत हैरान हुये।

⁵²तिन्हें यीशुये जो तिन्हां रोटियां कने मच्छियां जो कई गुणा बढ़ान्दे हुये देख्या, फेरी बी यीशु कितना सामर्थी था सै जे तिन्हौं समझणा चाहिन्दा था, पर वो समझी नीं पाये।

⁵³ताहली जे यीशु कने तिसरे चेले इक्की किश्तिया पर गलील दरयावा च होर अग्गे बधे, तां सै पार उतरीने गन्नेसरत च पुज्जे, कने किश्ती किनारे पर लाई।

⁵⁴तंजे सै किश्तिया परा ते उतरे, तां लोकें तिस्सो इकदम पछयाणी लया,

⁵⁵सै नेड़े-तेड़े रे सारयां लाकयां च दौड़ीने गए कने सै बमाराँ जो मंजोलिया पर रखीने तिसा जगह पर लेईगै तित्थी जे तिन्हें लोकां जो बोलदे सुणया भई यीशु ऊत्थी गया था।

⁵⁶कने तित्थी किति जे सै गाँवां, नगराँ, बस्तियां च जां था, लोक बमाराँ जो बज़ाराँ च बी रखीने तिसले अरज कराँ थे भई सै तिन्हांजो अपणे कपड़े जोई छूणे देओ : कने सै जे तिस्सो छुआं थे, सारे ठीक हुई जां थे।