Read Bilaspuri लूका 13 Bible Online

लूका 13 - Bilaspuri bible

लूका 13

¹तिस वगत किछ लोक, सै जे ऊथी थे तिन्हें यीशुये जो इसा गल्ला रे बारे च दस्या भई ताहली जे गलील प्रदेशा रे किछ लोक यरूशलेम रे मन्दरा च अपणे पाल़ी रे पशुआं री बल़ि देई कराँ थे, ताहली पिलातुस राजपाले पशुआं रिया बल़िया सौगी तिन्हारा बी खून बहाया था।

²ये गल्लां सुणीने यीशुये जबाब दित्या, “क्या तुहें येढ़ा समझां ये भई ये गलीली, बाकी सबनीं गलीलियां ते जादा पापी थे? क्या तांई इस खातर तिन्हां पर येढ़ि आफ़त आई?

³येढ़ा विल्कुल बी निआं! पर जे तुहें बी बुरे कम्मां जो छड्डिने अपणा मन परमेशरा री तरफा जो नीं फिराँगे, तां तुहां सारयां बी येढ़िया इ मौती मरना तियां जे सै मरे थे।

⁴तुहें तिन्हां ठारा माहणुआं रे बारे च क्या सोचां ये, तिन्हां पर जे शीलोह लाके च पथराँ री बणीरी सबनीं ते ऊच्ची दवाल रुढ़ि कने सै तिसा हेठ दबोईने मरीग्ये; तां क्या सै यरूशलेम च रैहणे औल़यां चा ते जादा पापी थे?

⁵नां! पर हऊँ तुहांजो फेरी भीं बोलां भई जे तुहें अपणे पापां ते मन नीं फिराँगे, तां तुहां सारयां बी तियां इ मरना।”

⁶फेरी यीशुये इक उदाहरण देईने तिन्हाजो गलाया, “इक्की माहणुये अपणे अंगूरां रे बगीचे च इक अंजीरा रा डाल़ लगाया; कने तिस पर फल़ लगे कि नीं लगे, येढ़ा देखणे खातर सै बौहत बार तित्थी गया, पर तिस्सो किछ नीं मिल्या।

⁷फेरी तिने बगीचे रे मालीये जो गलाया, ‘देख हऊँ तिन्नां साल्लां ते इस डाल़ा पर फल़ टोलदा आया पर अज्जा तक मिन्जो इस डाल़ा पर इक बी फल़ नीं मिलया! इस खातर इस्सो बड्डी दे। इने फालतू च जगह घेरीरी तिसते जे इसरिया जगह पर होर किछ लगाई सक्कूं।’

⁸तिने मालीये जबाब दित्या, मालक, इस डाल़ा जो इक साल होर मौका देई दे। हऊँ इसरी खास देखभाल रखगा कने इसरी नन्दाई करीने इसजो मैल देंगा।

⁹फेरी जे अगले साल्ला तक इस डाल़ा पर अंजीर लगां ये तां ठीक आ, जे नीं लगदे तां तुहें इस्सो बड्डी सक्कां ये।”

¹⁰इक विस्राम रे दिन यीशु इक यहूदी सभा घर च वचना रा प्रचार करी कराँ थे तिस वगत,

¹¹तिन्हे इक्की जनाना जो देख्या तिसाजो जे बुरीआत्मे बमार करी तरा था। सै जनाना ठारां साल्लां ते कुबड़ी थी, कने सीधी नीं खढ़ी सकदी थी।

¹²यीशुये ताहली जे सै देखी तां तिने तिसाजो अप्पूँ ले सद्दीने गलाया, “पुत्री, तू अपणियां इसा बमारिया ते अजाद हुईगी!”

¹³फेरी यीशुये तिसारे सिरा पर अपणे हाथ रखे, कने सै इकदम सीधी हुईगी कने परमेशरा रा गुणगान कने धन्यवाद करने लगी!

¹⁴इस खातर तिस यहूदी सभा घरा रा सरदार यीशुये जो गुस्से हुईग्या भई यीशुये विस्रामा रे दिन तिसा जनाना जो रोगा ते ठीक कित्या था, सै लोकां जो गलाणे लग्या, “हफते च तुहांजो काम्म करने खातर छे दिन दितिरे, तां इन्हां इ दिनां च ठीक हुणे खातर आई करा, पर विस्राम रे दिन नीं।”

¹⁵पर येढ़ा सुणीने प्रभु यीशुये जबाब दित्या, “कपटियो! क्या तुहां चाते सारे इ विस्राम रे दिन काम्म नीं कराँ ये! क्या तुहें इस दिन अपणे बच्छुआं या गधे जो खुण्डा ते छड्डिने पाणी प्याणे नीं लेई जान्दे?

¹⁶ये जनाना त अब्राहमा रे कुल़ा तेई तिसौ जे शैताने ठारां साल्लां रे लम्बे बगता ते बन्हीने रखीरा था, क्या इसाजो तिसते छडवाणा यहूदियां रे विस्राम रे दिन जरूरी नीं था?”

¹⁷ताहली जे तिने येढ़ा गलाया तां यीशुये रा बरोध करने औल़े सारे लोक शर्मिन्दा हुईगे, कने सारी भीड़ तिसरे महान कम्मां जो देखीने खुशी मनाणे लगी।

¹⁸यीशुये गलाया, “परमेशरा रा राज किस रे बराबर आ? हऊँ इसरी तुलना किसने करूँ?

¹⁹परमेशरा रा राज बगीचे च बाईरे राईया रे इक दाणे रे बराबर आ; सै बधीने डाल़ बणी जां, कने अम्बरा रे पंछी आईने तिसरियां डाल़ियां पर रैहणे लगां यें।”

²⁰तिन्हे फेरी पुच्छया, “परमेशरा रा राज होर किस रे बराबर आ? तिसरी तुलना हऊँ किसने करूँ?

²¹सै तिस मलेड़े साई आ, तिसजो जे किसी जनाने बौहत सारे आट्टे च मेल़या। इयां त आट्टा मलेड़े रे मुकावले कई गुणा जादा था, पर तिने मलेड़े तिस सारे आट्टे रा मलेड़ा इ बणाईत्या।”

²²यीशु जिस वगत अपणयां चेलयां सौगी नगराँ कने गाँवां च हुईने उपदेश देन्दे हुये यरूशलेम नगरा जो जाई कराँ था।

²³तां किन्हिये तिसते पुच्छया, “प्रभु जी, क्या परमेशरा थोड़े जेई लोक बचाणे?”

²⁴“तंग दरवाजे चियें जाणे री कोशिश करा, काँह्भई हऊँ तुहांजो बोलां, भई बौहत सारे लोकां तिस चियें जाणे री इच्छा करनी, पर तिन्हां जाई नीं पाणा।

²⁵ताहली जे घरा रा मालक यनि परमेशर उट्ठीने दरवाजा बन्द करी दो, कने तुहें बाहर खड़ीने दरवाजा खड़काईने विनती करीने बोलणे लगगे, ‘प्रभु जी, अहांरे खातर दरवाज खोल।’ पर तिस तुहांजो जबाब देणा भई, हऊँ तुहांजो नीं जाणदा, तुहें कित्तिते आईरे?

²⁶फेरी तुहां बोलणे लगणा, ‘भई अहें तेरे सौगी खाद्दीरा पित्तीरा, कने तुहें अहां री गलियां च प्रचार कित्तिरा।’

²⁷पर तिस बोलणा, हऊँ तुहांजो बोलां, ‘हऊँ तुहांजो नीं जाणदा तुहें किति रे। ओ कुकर्म करने औल़यो, तुहें सब मेरते दूर हुई जावा।’

²⁸जिस बगत तुहां अपणे पूर्वज अब्राहम, इसहाक, याकूब कने सारे भविष्यवक्तयां जो परमेशरा रे राज्जा च देखणा फेरी तित्थी तुहां रोणा कने दान्द किरड़ने! पर तुहांजो ऊत्थीते बाहर कडी दित्या जाणा।

²⁹कने धरतिया रे चऊँ पासयां ते सारे संसारा रे लोकां आईने परमेशरा रे राज्जा रिया धाम्मा च शामल हूणा।

³⁰ये जाणी लौआ, कितणे सै जे अप्पूँजो खास समझां ये, हुण सै खास नीं रैहणे, कने सै जे खास नीं समझे जायें, सै औणे औल़े वगता च बौहत खास समझे जाणे।”

³¹किछ बगत गुजरने ते बाद फरीसियें आईने यीशुये जो गलाया, “जे तू जीणा चाँह तां इत्थीते किसी सुरक्षित जगह च चली जा, काँह्भई राजा हेरोदेस अन्तिपास तिज्जो मरवाई देणा चाँह!”

³²यीशुये तिन्हाजो गलाया, “जाईने तिस गिदड़ियां साई जालिम माहणुये ने बोल्ली दे भई हऊँ आज्ज कने कल बुरीआत्मा जो नकाल़ां कने बमाराँ जो ठीक कराँ; कने तिज्जे दिन मांह अपणे कम्मा जो पूरा करना।

³³बस आज्ज कल कने परसों मिन्जो अपणे रस्ते चलना जरूरी आ, काँह्भई हुई नीं सकदा भई कोई भविष्यवक्ता यरूशलेम नगरा ते वाहर मारया जाये!

³⁴“अरे यरूशलेम रे लोको तुहें सै जे अपणे इ भविष्यवक्तयां रा खून कराँ, कने परमेशरा रा सन्देशा लौणे औल़यां जो तू पत्थर माराँ! जिस तरिके ने कुकड़ी अपणे बच्चयां जो अपणे फंगां हेठ ढक्कीने हिफाज़त कराँ इ, मैं बी कितणी बार चाहया भई तिस इ तरिके ने तेरे बच्चयां जो बी कट्ठा करूँ, पर तैं मिन्जो येढ़ा करने नीं दित्या।

³⁵देक्खा, तुहांरा मन्दर तुहांरे खातर उजड़ छडया जां, कने हऊँ तुहांजो बोल्लां; तदुआं तक जे तुहां नीं बोलणा, भई परमेशर तिस्सो आशीष दे, सै जे परमेशरा रिया सामर्था ते औंआं, तदुआं तक तुहें मिन्जो फेरी कदीं नीं देखणा।”