Read Bilaspuri लूका 14 Bible Online

लूका 14 - Bilaspuri bible

लूका 14

¹फेरी सै विस्राम रे दिन इक्की फरीसियां रे सरदाराँ चते किसी रे घरें रोटी खाणे गया; सारयां लोकें यीशुये च कोई गल़ती टोलणे खातर तिन्हां पर नज़र रखीरी थी।

²तिसा जगह इक येढ़ा माहणु था तिसरे जे हाथ पैर सूजीरे थे।

³यीशुये फरीसियां कने व्यवस्थापकां ते पुच्छया, “क्या व्यवस्था इसरी इजाजत देईं, भई विस्राम रे दिन लोकां जो ठीक करना चाहिन्दा या नीं?”

⁴पर किन्हिये किछ नीं गलाया, फेरी यीशुये तिस बमार माहणुये जो छुईने ठीक कित्या, कने भेजित्या।

⁵कने तिन्हांने बोल्या, “तुहां चते येढ़ा कुण आ, तिसरा पुत्र या बैल खूआ च पैईजो कने सै विस्राम रे दिन तिस्सो इकदम बाहर नीं कड्डो?”

⁶इस स्वाला रा तिन्हाले कोई जबाब नीं था।

⁷ताहली जे यीशुये देख्या भई सै मैहमान जे धाम्मा च शामल हुणे औयें, सै कियां खास-खास जगह सम्भाल़ी लें सै जे आदरा री जगह हुआंईं। फेरी यीशुये तिन्हाजो ये सच्चाई इक उदाहरण देईने दस्सी :

⁸“जे तुहें किसी ब्याह रिया धाम्मा च न्यून्दा देईने सद्दीरे ओ, तां हर बगत खास-खास जगह पर बैठणे री कोशिश नीं करयों। लोकां रिया नज़राँ च तित्थी जे तुहांते बी जादा खास माहणुये जो सद्दीरा ओ, तां फेरी क्या हूणा?

⁹तां तिने जे तुहांजो नियून्दा देईने सद्दीरा जे सै बोलगा, इसा जगह पर इन्हांजो बैठणे दे। फेरी तुहांजो शर्मिन्दा हुईने ऊत्थीते उठणे पौणा, कने तिसा जगह पर जाईने बैठणे पौणा सै जे खास नीं।

¹⁰इसरे बजाये तुहें येढ़ा करा भई पैहले तेई तिसा जगह पर जाईने बैट्ठा सै जे खास नीं। ताहली जे तुहांजो नियून्दा देणे औल़े देखणा, फेरी तिस तुहांले आईने गलाणा, मेरे दोस्त, अहांले तेरे खातर इसते बी खास जगह इ! तिस बगत तेरे सौगी बैठणे औल़े मेहमान्नां रे सामणे तुहांरी ईज्जत हूणी।

¹¹काँह्भई सै जे कोई अप्पूँजो महान समझगा, तिसजो परमेशरा नम्र बनाणा, पर सै जे कोई अप्पूँजो नम्र बणांगा, तिस्सो परमेशरा आदर देणा।”

¹²फेरी यीशुये नियून्दा देणे औल़े जो गलाया, “ताहली जे तू दिना जो या राति जो कोई धाम रखो, तां अपणे मित्राँ, भाईयां, रिस्तेदाराँ या फेरी अमीर पड़ेसियां जो नीं सदयां, काँह्भई बदले च तिन्हां तिज्जो धाम्मा पर सद्दणा कने तेरा उधार बदला हुई जाणा।

¹³तां जे तूं धाम करगा तां तू गरीबां, लंगड़यां, टुण्डयां कने अन्हेयां जो सदयां।

¹⁴फेरी तिज्जो आशीष मिलणी भई तैं येढ़े लोकां जो सद्दया सै जे तेरा उधार बदला नीं करी सकदे। धर्मियां रे जिऊंदा हुणे पर तिज्जो इसरा फल़ मिलणा।”

¹⁵येढ़ा सुणीने धाम्मा च यीशुये सौगी बैठिरे इक माहणुये गलाया, “आशीषित आ सै माहणु सै जे परमेशरा रे राज्जा रिया धाम्मा च रोटी खांगा।”

¹⁶तिने तिसने बोल्या, “किन्हिये माहणुये बड्डी धाम दित्ति, कने मतयां लोकां जो सद्दया।

¹⁷ताहली जे खाणा बणीने त्यार हुईग्या, तां तिने अपणे दास्सा रे हात्थ मेहमान्नां जो ब्योरा भेज्या, ‘भई हुण खाणा त्यार आ।’

¹⁸पर सारे लोक बहान्ना बनाणे लगे, तिन्हां चते इक्की गलाया भाई, ‘मैं इक खेत खरीदया कने हऊँ तिस्सो देखणे खातर जाया राँ; हऊँ तेरते विनती कराँ, मिन्जो माफ करी देआं।’ इस खातर मेरते नीं आई हूणा।

¹⁹दुज्जे गलाया, ‘मैं हुण पांज्ज जोड़ियां बैलां री खरीदी, कने हऊँ तिन्हाजो परखणे जाया राँ; हऊँ तेरने विनती कराँ, मेरिया तरफा ते माफी मंग्गी लेआं।’

²⁰इक्की होरी गलाया, मेरा नया-नया ब्याह हुईरा इस खातर हऊँ नीं आई सकदा।

²¹सै नोकर मुड़ीने अपणे मालका ले आया कने सै जे किछ लोकें गलाया था सै सारी गल्लां तिसजो दस्सी। तिने मालके गुस्से च आई ने गलाया, ‘नगरा रे बज़ाराँ कने गल़ियां च इकदम जाईने गरीबां, टुण्डयां, लंगड़यां कने अन्हेयां जो सद्दीने लीऔ।’

²²तिसते बाद तिसरे नोकरे तियां इ कित्या। फेरी तिने आईने ‘मालका, ने गलाया, अहांले होर बी लोकां रे खातर जगह इ।’

²³तां मालके तिस्सो गलाया, ‘नगरा रे बाहरा रे लोकां जो एत्थी औणे रे खातर मजबूर करा, तिसते जे मेरा घर भरी जाओ।

²⁴काँह्भई हऊँ तुहांजो बोलां भई तिन्हांजो जे मैं पैहले नियून्दा देईने सद्दीरा था, तिन्हारे खातर इस खाणे चते किछ बी चखणे जो नीं मिलणा, सै जे मैं बणाईरा’।”

²⁵यीशुये सौगी लोकां री बौहत भीड़ चलीरी थी, सै तिन्हारी तरफ मुड़या कने गलाया,

²⁶“जे कोई मेरा चेला बणीने मेरे पिच्छे औणा चाओ, तां तिस्सो अपणे माता-पिता, जनाना कने बच्चयां, भाई कने बैहणां, कने अपणे प्राणा ते बी जादा माहने प्यार करने पौणा। नैईता, तुहें मेरे चेले नीं बणी सकदे।

²⁷जे कोई मेरा चेला हुणे रे नाते दुख सैहणे कने मरने रे खातर बी त्यार नींआ, तां सै मेरा चेला बणने रे लायक नींआ।

²⁸“पर तदुआं तक जे तुहें इसरा मुल नीं जाणी लो, ताहलियां तक मेरे पिच्छे नीं औणा। काँह्भई येढ़ा कुण आ सै जे खर्चे रा अन्दाजा लगाये बगैर मकान बनाणा शुरु करी दो, कने बाद बिच देखणे लगगा भई खर्च करने खातर इतणा पैसा हाया की नीं?

²⁹नैत सिर्फ निऊँआं रे भरने तक इ तुहांरा सारा पैसा खत्म हुई जाणा। फेरी तंजे मकाना रा काम्म पूरा नीं हूणा तां देखीने सारयां लोकां तुहांरा मजाक बनाणा,

³⁰तिन्हां बोलणा, ‘ये माहणु मकान त लगया था बनाणे, पर पूरा नीं करी सक्क्या।’

³¹येढ़ा कोई राजा हाया, सै जे अपणे सलाहकाराँ ने गल्ल बात कित्ते बगैर लड़ाईया पर जाणे रे बारे च सोचे? क्या तिसरी दस हजार सपाईयां री सेना, तिन्हां पर हमला करने औल़ी बीह हजार सपाईयां री सेना ते ताकतवर हाई की नीं, इसा गल्ला जो जाणे बगैर सै लड़ाईया पर जांगा क्या?

³²जे सै लड़ाई नीं करी सकदा, तां तदुआं तक जे दुश्मणा री सेना तिसते दूर इ, तिस लड़ाई रोकणे री शर्ता पर बचार करने खातर अपणे शान्ति दूत भेजणे।

³³तियां इ तदुआं तक जे कोई अपणा सब किछ छड्डी नीं देओ, तालुआं तक सै मेरा चेला नीं बणी सकदा।”

³⁴यीशुये ये बी बोल्या, “तुहें तिस लूणा साई ये सै जे खाणे जो स्वादिष्ट बणां, पर जे लूणा रा स्वाद बिगड़ी जाओ, तां सै फेरी भीं ते इस्तेमाल लायक नीं बणाया जाई सकदा।

³⁵सै नांत धरतिया रे कने नां खाद्दि रे खातर कम्मा च औआं : तिस्सो त लोक बाहर सट्टि दें, तियां इ तुहां सौगी बी हूणा जे तुहें परमेशरा रे खातर निकम्मे बणगे। जो बी मेरी गल्ल सुणां, सै ध्यान देईने सुणो कने समझो।”