Read Bilaspuri लूका 16 Bible Online

लूका 16 - Bilaspuri bible

लूका 16

¹यीशुये अपणे चेलयां जो ये कहाणी सुणवाई, “इक्की मालके अपणे कारोबारा री देखभाल़ा खातर इक भण्डारीये जो रखया। पर बड़े इ छोड़े तिस पर ये इल्जाम लगीग्या भई सै अपणे मालका रे सारे पैसयां जो डवाणे लगीरा।

²इस खातर तिसरे मालके सै सद्दया कने तिस्सो गलाया, ‘हऊँ ये क्या सुणी कराँ भई तू मेरे सारे पैसयां जो पाणिये साई बहाया राँ? येढ़ा तू अपणे भण्डारी हुणे रे नाते मेरे पैसे रा हिसाब दे, काँह्भई तिज्जो हुण माह भण्डारी नीं रखणा।’

³भण्डारीये अपणे मना च सोचया: हुण मेरा क्या हूणा? मेरी त इथीते छुट्टी हुईगी। कने माह च इतणी ताकत नीं भई हऊँ खड्डे खुणी सक्कूं। कने भिख मंगणे ते मिन्जो शर्म लगणी।

⁴हुण हऊँ समझीग्या मेरले इक तरकीव इ तिसरे मुतावक जे हऊँ करूँ तां फेरी ताहली जे हऊँ इस भण्डारीपना री नोकरिया ते कड्डी देणा तां लोक मेरी मदद करो।

⁵इस खातर तिने तिस हर इक माहणुये जो सद्दया तिन्हे जे तिसरे मालका ते कर्जा लेईरा था, ताकि तिन्हां सौगी तिस बारे च बचार करी सक्को। भण्डारीये पैहले कर्जदारा ते पुच्छया मालका ते तैं कितना कर्जा लेईरा?

⁶तिने जबाब दित्या, माह पर जैतून रे तेला रा तिन्न हजार सात्त सौ लीटरा रा कर्ज आ। फेरी भण्डारीये तिस्सो गलाया, तिसा पर्चिया जो फाड़ी दे कने तिसरिया जगह अट्ठारा सौ पच्चास लीटरा री पर्ची बणाईले।

⁷फेरी भण्डारीये दुज्जे कर्जदारा ते पुच्छया, तैं मेरे मालका ते कितना कर्ज लेईरा? तिने जबाब दित्या, तकरीवन बीह हजार किलो। फेरी तिने भण्डारीये गलाया, ये ले तेरी पर्ची कने तू इसरे बदले सोलह हजार किलो री पर्ची बणाईले।

⁸“मालके तिस बेईमान भण्डारीये री तारीफ किति काँह्भई तिने चलाकिया ने काम्म कित्त्या। फेरी यीशुये गलाया, ये सच्ची गल्ल इ भई इस संसारा रे लोक सै जे परमेशरा जो नीं मनदे, सै संसारिक गल्लां च धर्मी लोकां ते जादा चलाक ये।

⁹हऊँ तुहांजो बोलां भई इस संसारा रिया धन दौलता रा इस्तेमाल करीने दुज्जेयां जो अपणे मित्र बणावा, तिसते जे सांसारिक धन दौलता रे खत्म हुणे पर तुहांरा स्वर्गा च बड़िया खुशिया ने स्वागत हूणा।

¹⁰ताहली जे तुहां छोट्टी ते छोट्टी गल्लां च विश्वास लायक रैहणा, तांई तुहें बड्डियां गल्लां च बी विश्वास लायक हुई सक्कां ये। जे तुहें छोट्टी गल्लां च धोखेवाजी करगे, तां तुहां बड्डिया जिम्मेवारिया च बी ईमानदार नीं हुई सकदे।

¹¹कने जे तुहें संसारा रिया धन दौलता रे बारे ची विश्वास लायक नीं हुये तां स्वर्गा री सच्ची दौलत तुहांजो किस देणी?

¹²कने जे तुसें पराई धन दौलता च विश्वास लायक नींये, तां सै जे तुहांरा सै तुहौं किस देणा?

¹³“कोई बी माहणु दुईं मालकां री सेवा नीं करी सकदा। काँह्भई तुहां इक्की ने नफरत करनी, कने दुज्जे ने प्यार रखणा, या किसी इक्की ने ईमानदार रैहंगे, कने दुज्जे जो ठुकराँगे। तुहें परमेशरा री कने धना री सेवा इक साथ नीं करी सकदे।”

¹⁴फरीसी, सै जे दौलता ने बड़ा जादा प्यार कराँ थे, ताहली जे तिन्हें यीशुये रियां गल्लां सुणियां तां सै तिसरा मजाक डवाणे लगे।

¹⁵फेरी यीशुये तिन्हाने गलाया, तुहें लोकां रियां नज़राँ च बड़े धर्मी बणां ये, पर परमेशर तुहांरे कपटी स्वभावा जो जाणाँ। माहणुआं रिया समझा च सै जे खास आ, सै परमेशरा रिया नज़राँ च बेकार आ।

¹⁶तदुआं तक जे मूसा री व्यवस्था कने भविष्यवक्तयां रे लिखिरे सन्देश, बपतिस्मा देणे औल़े यूहन्ने रे औणे तक परमेशरा रे राजा रे बारे च प्रचार कित्या। पर हुण परमेशरा रे राज्जा री खुशखबरी सुणाई जाया राँई कने हर कोई तिसच इच्छुक हुईने दाखल हुया राँ।

¹⁷पर अकाश कने धरतिया रा मिटणा परमेशरा रिया व्यवस्था रे इक बिन्दुये रे मिटणे ते सान आ।

¹⁸उदाहरणा खातर “सै जे कोई अपणिया घराऔल़िया जो तलाक देईने दुज्जिया ने ब्याह कराँ, तां सै व्याभिचार कराँ, कने सै जे कोई तलाक दित्ति रिया जनाना ने ब्याह कराँ, सै बी व्याभिचार कराँ।”

¹⁹यीशुये फेरी भीं ते ये उदाहरण दित्या, “इक अमीर माहणु था सै जे बड़े मंहगे कपड़े पैहनां था, कने रोज सब्बीतें स्वादिष्ट रोटी खाईने मौज कराँ था।

²⁰लाजर नौआं रा इक गरीब माहणु तिसरा शरीर जे फोड़यां ने भरीरा हुआं, लोक तिस्सो तिस अमीर माहणुये रे दरवाजे च छड्डी जां थे।

²¹भुक्खा रा मारीरा लाजर चांह था, भई अमीरा रे रोटी खान्दे बगत धरतिया पर पैईरे तिसरे जुट्ठे रोटिया रे किरुआं ने हऊँ अपणा पेट भरूं; येत्थी तक भई कुत्ते बी आईने तिसरे जख्मां जो चट्टी जां थे।

²²बाद बिच, येढ़ा हुआं भई लाजर मरी जां कने स्वर्गदूत तिसरिया आत्मा जो अहांरे पूर्वज अब्राहमा सौगी रैहणे खातर लेई जांये। फेरी इक दिन सै अमीर माहणु बी मरया; कने दबाई दित्या जां।

²³कने तिसरी आत्मा नरका च चलीगी। तित्थी पीड़ा च तड़फदे हुये ताहली जे तिने ऊपर देख्या तां दूरा ते तिस्सो इक्की जगह लाजर अब्राहमा रे नेड़े बैठिरा सुझया।

²⁴तां तिने अमीर माहणुये जोरा ने हाक पाई, पिता अब्राहम, दया करीने लाजरा जो मेरले भेज्जी दे, ताकि सै अपणिया गुट्ठियां जो पाणिये च सेड़ीने मेरिया जीभा जो ठण्डा करी सक्को, काँह्भई हऊँ इन्हां अग्गी रियां लपटां च फुक्खीने तड़फणे लगीरा।”

²⁵पर अब्राहमे तिसजो गलाया, मेरे पुत्र, याद कर, भई तू अपणी पूरी जिन्दगिया च खरी चिज़ां पाई चुक्कीरा, कने तियां इ लाजरे बुरियां चिज़ां पाईयां: पर हुण सै येत्थी सुखी आ कने तू दुख सही कराँ।

²⁶कने इन सारी गल्लां जो छड्ड अहांरे कने तुहांरे बिच इक बड्डी कने डुग्गी खाई बणीरी भई सै जे कोई येत्थीते उस पार तुहांले जाणा चाओ, सै जाई नीं सक्को, कने न कोई ओत्थी ते इस पार अहांले आई सक्को।

²⁷अमीर माहणुये जबाब दित्या, तां पिता अब्राहम, हऊँ तेरते बिनती कराँ, भई मेहरवानी करीने तू लाजरा जो मेरे पिता रे घरें भेज।

²⁸काँह्भई मेरे पांज्ज भाई ये, सै ऊत्थी जाईने तिन्हारे सामणे इन्हां गल्लां री चेतावनी देओ, येढ़ा नीं हो भई सै बी इसा पीड़ा रिया जगह च आओ।

²⁹पर अब्राहमे तिसजो गलाया, तिन्हाले त मूसा कने भविष्यवक्तयां री कताबां इयां, सै तिन्हारी सुणो कने तिन्हांरा पालन करो।

³⁰तिने गलाया, नां; पिता अब्राहम! पर जे कोई मरीरेआं चा ते तिन्हाले जाईने तिन्हांजो चेतावनी देओ, तां तिन्हां अपणयां पापां ते मन फिराणा।

³¹पर अब्राहमे तिसजो गलाया, भई तां जे सै मूसा कने भविष्यवक्तयां रियां गल्लां रा पालन नीं करदे, तां जे मरीरेआं चा ते कोई जिऊंदा हुई जाओ, तां बी तिन्हां तिस पर विश्वास नीं करना।