Read Bilaspuri लूका 17 Bible Online

लूका 17 - Bilaspuri bible

लूका 17

¹फेरी इक दिन यीशुये अपणे चेलयां जो बोल्या, “ये गल्ल पक्की भई परीक्षां हरेक माहणुये रे सामणे जरूर औणियां सै जे तिसरे पाप करने री वजह बणनी, पर तिस माहणुये खातर कितना भयानक हूणा तिसरिया वजह ते जे ये औणियां।

²सै जे कोई माह पर विश्वास करने औल़यां चते इक्की जो बी पाप करने पर मजबूर करो, तां तिसरे खातर ये बौहत सजा हुई सक्कां इ भई इक घराटा रा बाट्ट तिसरे गल़े ने बन्हीने समुद्रा च सट्टि दो पर परमेशरा तिसजो इसते बी बौहत भयानक सजा देणी।

³हऊँ तुहांजो खबरदार कराँ; जे माह पर विश्वास करने औल़ा पाप करो, तां तिस्सो समझा; कने जे सै अपणे पापां ते मन फिराओ तां तिस्सो माफ करा।

⁴जे दिना च सै सात्त बार तेरे खलाफ पाप करो कने सात्त बार इ आईने तेरते माफी मंग्गो, तां तिस्सो माफ करी दे।”

⁵प्रेरितें प्रभु यीशुये ने गलाया, “परमेशरा पर अहांरा विश्वास मजबूत करने जो अहांरी मदद कर”

⁶यीशुये जबाब दित्या, “अगर तुहांरा विश्वास राईया रे दाणे जितना बी हुन्दा, तां तुहें इस तूत्ता रे डाल़ा जो बोलदे, तू जड़ां ते पटोईने समुद्रा च लगी जा, तां सै बी तुहांरा हुक्म मन्नी लेंदा!”

⁷पर मन्नया ताहली जे कोई दास खेता ते हल बाही ने या भेड्डां जो चराई ने औआं, तां क्या तिसरा मालक तिसजो गलांगा भई छोड़चा ने आईने रोटी खाणे बैठ?

⁸क्या सै तिन्हांने येढ़ा नीं बोलगा, भई पैहले मेरे खातर रोटी त्यार कर कने तदुआं तक जे हऊँ रज्जीने नीं खाऊं-पीऊं तदुआं तक त्यार हुईने मेरी सेवा कर, इसते बाद तू बी खाई पी लै?

⁹क्या सै तिस दास्सा रा एहसान मनगा, भई तिने सैई काम्म कित्या तिसरा जे हुक्म दित्या गया था?

¹⁰इस तरिके ने, ताहली जे तुहें मेरे हुक्मा रा पालन कराँ ये, तां तुहें येढ़ा बोल्यों, अहें इस लायक नींये भई परमेशर अहांरा धन्यवाद करो, अहें त सिर्फ परमेशरा रे दास ये कने सै जे तिने बोल्या अहें सैई कित्या।

¹¹यीशु अपणे चेलयां सौगी यरूशलेम नगरा जो जान्दे हुये, सामरिया कने गलील प्रदेशा रे बन्ने चींये जाया राँ था।

¹²तियां जे सै गाँवां च पुजणे औल़े थे, तां दस कोढ़ी मिले,

¹³कने तिन्हें दूर खड़े हुईने यीशुये जो ऊच्चिया अवाज़ा च बोल्या, “यीशु, अहांरे मालक! मेहरवानी करीने अहां पर दया कर!”

¹⁴यीशुये तिन्हां खा देख्या कने गलाया, “यरूशलेम मन्दरा च जावा; कने अप्पूँजो याजकां ले दस्सा।” जान्दे-जान्दे इकदम बाटा ची सै अपणे कोढ़ा ते विल्कुल ठीक हुईगे!

¹⁵ताहली जे तिन्हां चा ते इक्की कोढ़िये देख्या भई सै चंगा हुईग्या, तां सै मुड़ीने जोरा रिया अवाज़ा च ये बोलदे हुये यीशुये ले आया, “हऊँ ठीक हुईग्या! परमेशरा री बडयाई ओ!”

¹⁶सै मुँआं रे भार यीशुये रे पैराँ पर पैईने तिसरा धन्यवाद करने लगया; कने सै इक सामरी माहणु था।

¹⁷फेरी यीशुये तिसते पुच्छया, “क्या मैं दस माहणुआं जो नीं ठीक कीतिरा? बाकी नौ माहणु किति ये?

¹⁸क्या परमेशरा जो धन्यवाद देणे खातर सिर्फ तूई परदेशी[2] मुड़ीने आया?

¹⁹यीशुये तिस माहणुये जो गलाया, येब्बां उट्ठ, कने चली जा, काँह्भई तू विश्वास कराँ, इस खातर तू बमारिया ते ठीक हुईग्या!”

²⁰इक बार ताहली जे फरीसियें यीशुये ते पुच्छया भई परमेशरा रा राज कदीं औणा, तां तिने तिन्हांजो जबाब दित्या, “परमेशरा रा राज इस रुपा च नीं औन्दा भई सै तुहांजो दिखी जाओ।

²¹कने लोकां येढ़ा नीं बोलणा, देक्खा, सै येत्थी आ! या देक्खा सै ऊथी आ! काँह्भई परमेशरे तुहांरे बिच राज करना शुरु करित्या।”

²²इस बारे च तिन्हे अपणे चेलयां ने गल्ल बात किति, कने तिन्हांजो गलाया, “इक बगत येढ़ा औणा ताहली जे तुहां माहणुये रे पुत्रा रे दिनां चा ते इक दिना जो देखणे खातर तरसणा, पर तिस्सो देक्खी नीं पाणा।

²³फेरी लोकां तुहांजो गलाणा, भई माहणुआ रा पुत्र वापस आईग्या! देक्खा, मसीहा ऊथी आ! या देक्खा, मसीहा येत्थी आ। तुहां येढ़ियां गल्लां पर विश्वास नीं करना, कने नांई तिस्सो टोल़णे रे खातर तिसरे पिच्छे जाणा।

²⁴काँह्भई तियां जे बिज्जल़ चमकीने इक कोणे ते दुज्जे कोणे तक अम्बरा जो चमकाई देईं, तियां इ ताहली जे माहणुये रे पुत्रा यनि मांह वापस औणा, सब्बीं मिन्जो देखणा।

²⁵पर इसते पहले माहणुये रे पुत्रा यनि मिन्जो जो बौहत जुल्म सैहणे पौणा, कने इसा पीढ़ियां रे लोकां मिन्जो अपराधी बनाणा।

²⁶ताहली जे माहणुये रे पुत्रा वापस औणा, तां लोकां रा जीवन तेढ़ा इ हूणा तेढ़ा जे अहांरे पूर्वज नूँह रे जमाने च हुया था।

²⁷तिन्हां दिनां च, जलप्रलय औणे ते पैहले, नूँह रे जहाजा च बैठणे तक, लोक खां-पीं थे, कने तिन्हां च ब्याह-शादियां हुआं थी; फेरी बड़ा भारी जलप्रलय हुया तिसते जे सारी माहणु जातिया रा खात्मा हुईग्या।

²⁸कने तियां जे अहांरे पूर्वज लूत रे जमाने च हुया था सै जे सदोम नगरा च रैआं था, भई लोक खान्दे पीन्दे, लेण देण करदे, खेती करदे कने घर बणांदे थे;

²⁹पर तिस दिन जे लूत सदोम नगरा जो छड्डिने चलीप्या तिस इ दिन अम्बरा ते आग्ग कने गन्धका री बरखा बरही, तिसते जे तिस नगरा रे सारे लोकां रा खात्मा हुईग्या।

³⁰तियां इ तिस बगत जे माहणुये रे पुत्रा यनि मांह वापस औणा, तिस वगत बी इयां इ हूणा कने लोकां जो अपणे कम्मां ते बेहल नीं हूणी।”

³¹तिस दिन जे कोई माहणु घरा रिया छत्ता पर ओ; कने तिसरा समान कमरे च ओ, सै तिसजो लेणे जो नीं उतरो, कने तियां इ सै जे कोई खेता च ओ सै हटिने वापस नीं आओ।

³²याद करा भई अहांरे पूर्वज लूता री जनाना सौगी क्या हुआ था, तिसे परमेशरा रा हुक्म नीं मन्नीने पिछे मुड़ीने देख्या था कने सै लूणा रा खम्भा बणीगी थी।

³³सै जे कोई अपणे प्राणा जो अपणे खातर बचाये रखणा चांह, तिस अनन्त जीवना रा अधिकार गवाई देणा, कने सै जे कोई अपणा प्राण मेरे खातर गवांगा, तिस अनन्त जीवन पाणा।

³⁴हऊँ तुहांजो बोलां, तिसा राति दो लोक सै जे इक्की मंजे पर सुतीरे हुणे, तिन्हां चा ते इक परमेशरा लेई जाणा कने दुज्जा ऊत्थी छडी दित्या जाणा।

³⁵दो जनानां कट्ठियां चकोड़ुये पर किछ पिसणे लगी रियां हूणी, इक ऊथी रैई जाणी कने दुज्जी परमेशरा लेई जाणी।

³⁶तियां इ दो माहणु खेतां च कम्मां लगीरे हुणे तिन्हां चाते इक परमेशरा लेई जाणा कने दुज्जा छड्डी जाणा।

³⁷येढ़ा सुणी ने चेलयां तिसते पुच्छया, “प्रभु जी, ये सब किति हूणा?” तिने तिन्हाजो जबाब दित्या, “सब्बीं जो पता चलना भई ये किति हुया राँ तियां जे हर कोई जाणाँ भई तित्थीजे जानबरा री लाश हूणी, ईल्लां बी ऊत्थी कट्ठी हुई रियां हुणीं।”