Read Bilaspuri लूका 18 Bible Online

लूका 18 - Bilaspuri bible

लूका 18

¹यीशुये अपणे चेलयां जो इस बारे च दस्या भई अहांजो हर बगत प्राथना करने री जरूरत इ कने निराशा च पैईने हिम्मत नीं हारनी चाहिन्दी, फेरी तिन्हांजो ये उदाहरण गलाया :

²“किसी नगरा च इक न्यायी हुआं था, सै नांत परमेशरा ते डराँ था कने नांई किसी माहणुये री परवाह कराँ था।

³तिस नगरा च इक विधवा बी रैयां थी, सै जे तिसले आईने बार-बार तिसजो बोलदी रैयां थी, भई मेरा दुश्मण तिने जे मेरने बेन्याई करीने मेरा नुक्शान कित्या, तिस माहणुये जो सजा देईने तिसते मिन्जो बचा!

⁴तिने न्यायिये बौहत दिनां तक तिसा विधवा रिया गल्ला री परवाह नीं किति, पर बाद बिच तिने मना च बिचार कित्या, हलांकि हऊँ नांत परमेशरा ते डराँ, कने नांई माहणुआं री कोई परवाह कराँ।

⁵तां बी ये विधवा मिन्जो परेशान कराँ इ, इस खातर मांह तिसारा न्याय करी देणा किति येढ़ा नीं ओ भई सै बार-बार आईने मेरा जीणा हराम करी दो।”

⁶प्रभु यीशुये बोल्या, “इस पर बचार करा भई आमतौर पर सै न्यायी अन्याई था, पर विधवा रे खातर तिने सै जे फैसला कित्या तिस पर ध्यान देआ।

⁷तां क्या तुहांजो लगां भई परमेशरा अपणे चुणीरे लोकां रा ठीक न्याय नीं करना, सै जे दिन रात परमेशरा ते विनती करदे रैं? क्या तिस तिन्हारे बारे च देर करनी?

⁸हऊँ तुहांजो बोलां; तिस इकदम तिन्हारा न्याय करना! पर हऊँ जाणाँ भई ताहली जे मैं, माहणुये रे पुत्रा वापस धरतिया पर औंणा, तां मांह तिन्हां लोकां जो बी देखणा सै जे माह पर विश्वास नीं रखदे?”

⁹फेरी यीशुये तिन्हां किछ लोकां जो, सै जे सोच्चां ये भई अहें धर्मी ये, कने होरसी जो घटिया समझां थे, ये उदाहरण सुणाया:

¹⁰भई “इक बार दो माहणु मन्दरा च प्राथना करने खातर गये। इक फरीसी था कने दुज्जा चुंगी लेणे औल़ा था।

¹¹फरीसी कल्हा खड़ा हुईने अपणे मना च इयां प्राथना करने लगया, भई परमेशर, हऊँ तेरा धन्यवाद कराँ, काँह्भई हऊँ दुज्जेयां लोकां साई अन्धेर करने औल़ा चोर, ठग कने पापी, निआं, खास कर इस चुंगी लेणे औल़े साई, सै जे ऊत्थी खढ़िरा! मैं कदीं किसी जो धोखा नीं दित्या, हऊँ पाप नीं करदा, कने नां हऊँ ब्याभिचार कराँ,

¹²हऊँ हफ्ते च दो बार उपवास रखां, कने अपणी सारी औंदणिया रा दसवां हिस्सा बी देआं।”

¹³पर तिने चुंगी लेणे औल़े माहणुये दूर खड़ा हुईने, स्वर्गा खौ देखणा बी नीं चाहया बजाय इसरे, सै अपणी छात्तिया पिटदे-पिटदे बड़ा दुखी हुईने बोलणे लगया, “हे परमेशर, माह पर दया कर, काँह्भई हऊँ पापी आ।

¹⁴हऊँ तुहांजो बोल्लां, भई सै दुज्जा नीं; पर येई पापी माहणु परमेशरा रे सामणे धर्मी ठैहरया, कने अपणे घरा जो वापस गया; पर फरीसिये सौगी येढ़ा नीं हुया, काँह्भई सै जे कोई अप्पूँजो महान समझगा, तिसजो परमेशरा नम्र बनाणा, पर सै जे कोई अप्पूँजो नम्र बणांगा, तिस्सो परमेशरा आदर देणा।”

¹⁵फेरी लोक अपणे बच्चयां जो बी यीशुये ले ल्यौणे लगे, भई सै तिन्हां पर हत्थ रखीने शीष देओ; पर चेलयां देखीने तिन्हाजो डांटया।

¹⁶यीशुये गलाया, “बालकां जो मेरले औणे देआ तिन्हौं नां नीं करा, काँह्भई बच्चयां साई गुण रखणे औल़े माहणुआं पर इ परमेशरा राज करने रे खातर त्यार हूणा।

¹⁷हऊँ तुहांजो सच्च बोलां, सै जे कोई परमेशरा जो राजे रे रुपा च बच्चयां साई ग्रहण नीं करगा, तां परमेशरा तिन्हां पर राज करने जो सैहमत नीं हूणा।”

¹⁸किसी सरदारे तिसते पुच्छया, “हे अव्वल गुरू, अनन्त जीवना रा बारस हुणे रे खातर हऊँ क्या करूँ?”

¹⁹यीशुये तिसते पुच्छया, “तू मिन्जो अव्वल काँह बोलां? कोई अव्वल नींआ, सिर्फ इक इ हाया, यनिके परमेशर।

²⁰पर तित्थी तक जे तेरे स्वाला री गल्ल इ, तां तू परमेशरा री आज्ञां जो त जाणाँ : भई व्याभिचार नीं करना, खून नीं करना, चोरी नीं करनी, झूट्ठी गवाही नीं देणी कने अपणे माता पिता रा आदर करना।”

²¹तिने बोल्या, “हऊँ त छोट्टिया जेईया उम्रा ते इन्हां सब्बीं जो मन्नदा आया।”

²²यीशुये तिसने गलाया, “इक काम्म तैं हूणा तक नीं कित्या, तेरले जितणी बी धन दौलत इ तू तिसाजो बेच्चीने सारा पैसा गरीबां च बंडी दे, कने मेरा चेला बणी जा, तां तिज्जो स्वर्गा च धन मिलणा।”

²³पर ताहली जे तिने माहणुये ये गल्लां सुणियां, तां सै बड़ा दव्वास हुईग्या काँह्भई सै बड़ा अमीर था।

²⁴यीशुये तिस्सो देखीने बोल्या, “अमीराँ रा परमेशरा रे राज्जा च दाखल हूणा कितना मुश्कल आ?

²⁵तियां जे ऊँटा रा सुईया रे छेद्दा ते निकल़णा मुश्कल आ, तियां इ अमीर माहणुये रा स्वर्गा रे राज्जा च दाखल हूणा बी उतणा इ मुश्कल आ।”

²⁶कने सुणने औल़यां बोल्या, तिन्हे जबाब दित्या, “तां त किसी रा बी छुटकारा नीं हुई सकदा।”

²⁷यीशुये जवाब दित्या; “सै जे माहणुआं ते नीं हुई सकदा, सै परमेशरा ते हुई सक्कां।”

²⁸पतरसे गलाया; “देख, अहें त अपणा सब किछ छड्डिने तेरे पिच्छे आई गरे।”

²⁹यीशुये तिन्हाने गलाया, “पतरस तैं ठीक गलाया; पर हऊँ तुहांजो सच्च बोलां, भई येढ़ा कोई नींआ तिने जे परमेशरा रे राज्जा खातर अपणा घर, जनाना, भाईयां, माता-पिता, बच्चयां, जो छडित्या ओ।

³⁰कने तिन्हां इस जुगा च छड्डीरे ते कई गुणा जादा पाणा; पर औणे औल़े युगा च तिन्हां परमेशरा ने सौगी अनन्त काल रा जीवन पाणा।”

³¹फेरी यीशुये अपणे बारा चेलयां जो सौगी लेईने तिन्हाजो गलाया, “अहें यरूशलेम जाई रायें, कने जितणियां गल्लां जे माहणुये रे पुत्रा रे खातर भविष्यवक्तयां रे जरिये लिखी रियां सै सब पूरी हुणियां।

³²तिस्सो रोमियां रे हत्था च पकड़वाया जाणा। तिन्हां तिसरा मजाक डवाणा, कने तिसरी बेज्जति करीने तिस पर थुकणा।

³³तिन्हां तिस्सो कोड़े मारी कने जानी ते खत्म करी देणा। पर तिस मरने ते बाद तिज्जे दिन फेरी भीं ते ज्यून्दे हुई जाणा।”

³⁴पर यीशु सै जे किछ बोलीराँ था, चेले तिसरियां गल्लां रा मतलब नीं समझी पाये : कने ये गल्ल तिन्हाते छुपीरी रैई, कने तिने जो किछ गलाया था सै तिन्हां रिया समझा च नीं बैट्ठया।

³⁵जिस मौके जे यीशु यरीहो नगरा रे नेड़े पुज्जे, तित्थी इक अन्हा बाटा रे कण्डे बैट्ठीने भिख मंगीराँ था।

³⁶तिने मते लोकां जो अपणे नेड़े ते जान्दयां जो सुणीने, लोकां ते पुच्छया भई ये क्या हुईराँ?

³⁷तिन्हें तिस्सो दस्या भई नासरत गाँवां रा यीशु जाईराँ।

³⁸येढ़ा सुणीने सै रड़ाणे लगया, “हे यीशु, दाऊद रे पुत्र, माह पर दया कर!”

³⁹सै लोक जे अग्गे-अग्गे चलीरे थे, सै तिस्सो थिड़कणे लगे, चुप रै; पर सै होर बी जादा रड़ाणे लगया, “हे दाऊद रे पुत्र, माह पर दया कर!”

⁴⁰ताहली जे यीशुये तिसरी अवाज़ सुणी, तां सै रुकिग्या, कने तिस अन्हे जो अपणे सामणे लौणे रा हुक्म दित्या। ताहली जे सै नेड़े आया, फेरी यीशुये तिस माहणुये ते पुच्छया,

⁴¹“तू क्या चाँह? भई हऊँ तेरे खातर करूँ?” तिने गलाया, “प्रभु, येढ़ा भई हऊँ देखणे लगुं!”

⁴²यीशुये तिसने बोल्या, “देखणे लग, तैं माह पर विश्वास कित्या इस खातर तू ठीक हुईग्या।”

⁴³कने सै तिस इ पल देखणे लगीग्या; कने परमेशरा री जय-जयकार करदा हुआ तिसरे पिच्छे चलीप्या, कने सारयां लोकें देखीने परमेशरा रा गुणगान कित्या।