Read Bilaspuri लूका 19 Bible Online

लूका 19 - Bilaspuri bible

लूका 19

¹कने फेरी यीशु यरीहो नगरा च प्रवेश करीने ताहली जे ऊत्थीते जाई कराँ था।

²तां तित्थी जक्कई नौआं रा इक माहणु था, सै जे रोमी सरकारा रे खातर चुंगी लेणे औल़यां रा सरदार कने खूब पैसे औल़ा था।

³सै देखणा चाँह था भई यीशु कुण आ; पर लोकां री भीड़ा रिया वजह ने सै तिन्हाजो देक्खी नीं सक्कया, काँह्भई सै कदा रा छोट्टा था।

⁴फेरी तिस्सो देखणे खातर सै दौड़ीने सबनीं ते अग्गे गया कने गुलरा रे डाल़ा पर जाईने कोहीग्या काँह्भई यीशु तिसा इ बाटे जाणे औल़ा था।

⁵ताहली जे यीशु तिसरे नेड़े आया, तां तिने डाल़ा रे ऊपर जक्कईये जो बैठिरा देख्या कने तिसरा नौं लेईने हाक पाई, “जक्कई! छोड़चा ने थल्ले औ! काँह्भई आज्ज ये जरूरी आ भई हऊँ तेरे घरें रऊँ।”

⁶जक्कई इकदम थल्ले उतरया कने बड़िया खुशिया ने यीशुये जो अपणे घरें लैईग्या।

⁷पर मतयां लोकां जो तिसरी ये गल्ल खरी नीं लगी। सै बुड़बुड़ करने लगे, भई “येत इक पापी ये रे घरें मेहमान बणीने चलीरा!”

⁸जक्कई रोटी खान्दे वगत खड़ा हुईने प्रभु यीशुये ने बोलणे लगया; प्रभु जी, देक्खा हऊँ अपणिया धन-दौलता रा अधा हिस्सा गरीबां च बंडी देआं, कने जिस किसी रा जे मैं धोखा करीने लैईरा तिन्हांजो मांह चार गुणा वापस करीने देणा।

⁹यीशुये तिस्सो गलाया, “आज्ज परमेशरे इस परिवारा रा छुटकारा कित्या, काँह्भई तैं बी परमेशरा पर विश्वास कित्या तियां जे तुहांरे पूर्वज अब्राहमे कित्या था।

¹⁰काँह्भई, माहणुये रा पुत्र यनि हऊँ परमेशरा ते दूर हुईगरे लोकां जो अनन्त सजा ते बचाणे, कने तिन्हारा छुटकारा करने आईरा।”

¹¹यीशु सै जे किछ बोलीराँ था, तिस्सो लोकां री भीड़ सुणी कराँ थी, तां तिने इक्की कहाणिया च गल्ल किति, सै यरूशलेम रे नेड़े थे, काँह्भई लोकां री सोच थी भई यीशुये इस इ वगत परमेशरा रे राज्जा पर राज करना,

¹²यीशुये फेरी इक कहाणिया च गलाया, “इक अमीर माहणु किति दूर देशा जो चलया ताकि राजे री पदवी पाईने वापस अपणे देशा च आई जाओ।

¹³कने ऊत्थी जाणे ते पैहले, तिने अपणे दस सेबकां जो अप्पूँ ले सद्दीने गलाया, ताहलुआं तक जे हऊँ तुहांजो सौगी निआं, तदुआं तक तिने सेवकां जो लेण-देण करने खातर दस सोने रे सिक्के दित्ते सै जे तिन्न साल्ला री मजदूरिया रे बराबर थे।

¹⁴पर तिसरे नगरा च रैहणे औल़े लोक तिसते नफरत कराँ थे, इस खातर तिन्हे तिसरे पिच्छे दूतां ले सनेहा भेज्या भई अहें नीं चाहन्दे सै अहांरा राजा बणो।

¹⁵“ताहली जे सै राजे री पदवी पाईने वापस आया, तां येढ़ा हुया भई राजे अपणयां दास्सां जो तिन्हाजो जे तिने सोने रे सिक्के दित्तिरे थे अप्पूँ ले इस खातर सद्दया, ताकि सै जाणी सक्को भई तिन्हें लेण-देण करीने क्या-क्या कमाया।

¹⁶फेरी पैहले सेबके आईने अपणे जादा फायदे री गल्ल दस्सी मालिक, तुहांरे दित्तिरे सोने रे सिक्के ते मैं दस होर सोने रे सिक्के कमाये!

¹⁷राजे तिस्सो गलाया, शाबाश, मेरे सच्चे पक्के सेबक, तैं बौहत बधिया काम्म कित्या! तू इक विश्वास लायक सेबक आ। मैं तिज्जो सै जे थोड़ा जेआ दित्तिरा था, तिसच तू विश्वासी निकल़या। हुण तिज्जो ईनामा च दस्सां नगराँ रा अधिकारी बणाया जां।

¹⁸अगले सेवके आईने बोल्या, ‘मालिक, मैं बी मूल राशिया ते पांज गुणा खरी कमाई कित्ती।’

¹⁹राजे तिस्सो गलाया, शाबाश, तिज्जो मेरे सच्चे पक्के सेबक! तिज्जो पंज्जां नगराँ रा अधिकारी बणाया जां।

²⁰पर तिज्जा सेबक उतणे इ सिक्के वापस लेईने औआं जितने जे तिस्सो दित्तिरे थे कने बोलां, ‘मालक, मैं इस्सो सम्भाल़ी ने रखणे खातर रुमाला च बन्हीने लकोईतरा था।

²¹काँह्भई हऊँ तेरते डराँ था। तू इक निर्दयी माहणु आ: कने सै चीज़ जे तेरी नीं, तिसाजो बी तू लेई लेआं, या सै जे तेरा बाहीरा निआं, तिस्सो बी तूं लुणि लेआं।

²²सै राजा तिस पर टुट्टीने पैईग्या, ओ बुरे माहणुआ! क्या हऊँ निर्दयी आ? जे तूं मेरे बारे च इतणा किछ जाणाँ था भई हऊँ कितना निर्दयी आ, कने सै जे मैं नीं बाहीरा हुआं, हऊँ तिस्सो बी कठेराँ,

²³तैं मेरा सै सिक्का किसी सहूकारा ले ब्याजा पर काँह नीं दित्या ताकि मेरे वापस औणे पर मिन्जो तिसरा किछ ब्याज त मिलदा?’

²⁴सै सेबक जे नेड़े खढ़िरे थे, राजे तिन्हाजो हुक्म दित्या, इस सेवका ते सिक्का वापस लैई लो, कने सबनीं ते जादा फैदा तिस राजे हुईरा, तिस्सो देई दवा।

²⁵तिन्हे राजे ने गलाया, मालक, तिस सेवका ले त पैहले तेई दस सोने रे सिक्के!

²⁶इस पर राजे गलाया, तुहें ठीक गलाया, पर तिन्हाजो सै जे मेरिया गल्ला जो ध्याना ने सुणा कने समझां, परमेशर तिसजो होर जादा समझणे रे लायक बणां; पर सै जे मेरिया गल्ला जो ध्याना ने नीं सुणदा कने समझदा तिस सै बी भुल्ली जाणा तिसजो जे सै पैहले ते जाणदा हो।

²⁷कने सै जे नीं चाहन्दे भई हऊँ तिन्हां पर राज करूँ, तिन्हां बैरियां जो, मेरले ल्याईने मेरे सामणे खत्म करी दवा।”

²⁸इस कहाणिया जो दसणे ते बाद, यीशु यरूशलेम नगरा खौ गया। सै अपणे चेलयां ते मूहरे-मूहरे चलया।

²⁹जिस मौके सै जैतून नौआं रे पहाड़ा पर बसीरे बैतफगे कने बैतनिय्याह नगरा च पुज्जे, ताहली तिन्हें अपणे दुईं चेलयां जो अग्गे भेज्या।

³⁰यीशुये तिन्हां चेलयां जो गलाया, “सामणे रे गाँवां च जावा, कने गाँवां च दाखल हुंदे इ, तुहांजो इक गधिया रा बच्चा खुण्डा बझीरा मिलणा तिस पर जे हल्तिये तक किन्हिये बी स्वारी नीं कीतिरा हूणी। तिसजो खोल्ली ने येत्थी ली औआ।

³¹जे कोई तुहांते पुछो भई कजो खोल्ली रायें, तां सिर्फ इतणा बोल्यों, प्रभुये जो इसरी जरूरत इ।”

³²फेरी सै चेले ऊथी गये कने तियां जे यीशुये दस्सीरा था, तियां इ गधिया रा बच्चा बझीरा मिलया।

³³कने जिस मौके जे सै तिस्सो खोल्ली राँ थे, ताहली तिसरे मालके आईने तिन्हाते पुच्छया, “तुहें इस गधिया रे बच्चे जो कजो खोल्ली रायें?”

³⁴इस पर चेलयां तिसरियां गल्लां रा इतणा इ जबाब दित्या, “प्रभुये जो इसरी जरूरत इ।”

³⁵फेरी सै तिस गधिया रे बच्चे जो यीशुये ले ली आये कने अपणे कपड़े तिस बच्चे पर रखे कने यीशुये तिसरी स्वारी किति।

³⁶जिस मौके यीशु यरूशलेम री तरफ जाईराँ था, तां लोक अपणे कपड़े यीशुये रिया बाटा च बछांदे जायादे थे।

³⁷नेड़े औन्दे हुये ताहली जे सै जैतून नौआं रे पहाड़ा री तरवाईया ले पुज्जे, तां चेलयां री सारी मण्डली तिसरे कित्तिरे तिन्हां महान चमत्काराँ जो देखीने बड़े खुश हुये कने ऊच्चिया अवाज़ा च परमेशरा रा गुणगान करने लगे।

³⁸“भला हो तिस राजे रा, सै जे प्रभुये रे नौआं ते औआं!” “स्वर्गा च सुख शान्ति, कने परमप्रधान परमेशरा री जय-जयकार ओ!”

³⁹लोकां रे तिस भीड़ा च मौजूद किछ फरीसी गलाणे लगे, “गुरू जी, इस तरिके री गल्लां बोलणे खातर अपणे चेलयां जो थिड़क!”

⁴⁰यीशुये तिन्हाजो जवाब दित्या, “हऊँ तुहांजो बोलां, जे ये लोक चुप हुईगे तां पत्थराँ जय-जयकार करने लगी जाणा”

⁴¹पर जिस मौके यीशु यरूशलेम नगरा रे नेड़े आईग्या कने ताहली जे तिने तिस नगरा जो देख्या तां सै रोन्दे हुये गलाणे लगया,

⁴²यरूशलेम नगरा रे लोको, “जे तुहें समझी जान्दे तां परमेशर आज्ज तुहांजो शान्ति देन्दा हुन्दा; पर हुण तुहें इन्हां गल्लां जो देक्खी नीं सकदे।

⁴³काँह्भई औणे औल़े वगता च तुहां सौगी येढ़ा हूणा, तिस वगत तुहांरयां दुश्मणां तुहांजो मोर्चा बणाईने घेरी लेणा, कने तुहां पर चऊँ पासयां ते हमला करना।

⁴⁴तिन्हां यरूशलेम कने नगरा च रैहणे औल़े सारयां लोकां जो पूरे तरिके ने नाश करना, इसा वजह ने तुहांरियां दीवाराँ कने इमारतां नष्ट हुई जाणियां, ये सब इस खातर हूणा काँह्भई ताहली जे परमेशर तुहांजो छुटकारा देणे खातर आया, तां तुहें समझी नीं पाये।”

⁴⁵फेरी यीशु परमेशरा रे मन्दरा च जाईने, तित्थी मौजूद दुकानदारां जो बाहर खदेड़ने लगया।

⁴⁶तिने गलाया, “पवित्रशास्त्रा च लिखिरा, मेरा मन्दर प्राथना रा घर हूणा, पर तुहें ये चोराँ रा अड्डा बणाईत्या।”

⁴⁷इसते बाद सै हर रोज मन्दरा च उपदेश करने लगया। पर मुखियायाजक, शास्त्री कने लोकां रे खास अगुवे, यीशुये जो मारने री तरकीब सोचणे लगे।

⁴⁸पर कोई बी तरकीब नीं नकाल़ी सक्के; काँह्भई प्रभु सै जे किछ गल्लां था, लोक तिन्हारी इक्की-इक्की गल्ला जो बड़िया गौरा ने सुणां थे।