Read Bilaspuri लूका 21 Bible Online

लूका 21 - Bilaspuri bible

लूका 21

¹जिस बगत यीशु मन्दरा च था, तिन्हे अमीराँ जो दान पेट्टिया च दान पान्दे देख्या।

²कने तिने इक गरीब विधवा जो बी तिसच ताँबे रे छोट्टे दो सिक्के (दमड़ी) पान्दे देख्या।

³फेरी तिन्हें गलाया; “हऊँ तुहांजो सच्च बोलां भई इस गरीब विधवा रे दान्ना री कीमत अमीर लोकां रे बड्डे दान्ना ते जादा इ।

⁴काँह्भई तिन्हें सारयां अपणी जादा कमाईया चा ते थोड़ा जेआ दान दित्या, पर इस गरीब विधवा ले बड़ा थोड़ा इ था कने तिसे सै सब पाईत्या।”

⁵ताहली जे तिसरयां किछ चेलयां मन्दरा रे बांकयां पत्थराँ रे काम्म कने दीवारा पर यादगार सजावटा रे बारे च गल करना शुरु करित्या, पर यीशुये बोल्या;

⁶“इक वगत येढ़ा औणा, सै किछ जे तुहें येत्थी देख्या रायें, ये सारियां दीवाराँ कने इमारतां नष्ट हुई जाणियां।”

⁷तिन्हे यीशुये ते पुच्छया, “गुरू जी, ये सब गल्लां कदीं हूणी? कने ताहली जे ये गल्लां पूरी हुणे औल़ी हूणी तां तिसरे क्या संकेत हुणे?”

⁸तिने गलाया, “चौकन्ने रौआ, भई झूट्ठा पर विश्वास नीं करो, काँह्भई मतयां लोकां मेरा हुणे रा दावा करना कने बोलणा भई हऊँ मसीह आ कने सौगी जो येढ़ा बी बोल़णा, संसारा रा अन्त नजदीक आ। पर तुहें तिन्हांरे पिच्छे देक्खां चली जान्दे।

⁹कने ताहली जे तुहें लड़ाईयां कने दंगयां री चर्चा सुणो, तां डरी नीं जायों; काँह्भई इन्हां गल्लां रा पैहले हूणा जरूरी आ; पर तिस बगत इकदम अंत नीं हूणा।”

¹⁰फेरी तिने तिन्हाने गलाया, “भई इक्की जातिया दुज्जिया जातिया पर, कने इक राजे दुज्जे राजे पर हमला करना,

¹¹मतियां जगहां पर हिल्लण हुणे, कने जगह-जगह नकाल़ पौणे, महामारी फैलणी, कने अम्बरा च येढ़ियां घटनां घटणियां भई माहणुआं डरीने कम्बी जाणा कने बड्डे-बड्डे निशाण परगट हुणे।

¹²पर इन्हां सारियां गल्लां ते पैहले, तिन्हां माह पर विश्वास करने रिया वजह ने तुहें पकड़ने, कने सताणे, कने यहूदी सभा घराँ च सौंपणे, कने जेल्लां च पाये जाणे, कने राजयां कने राजपालां रे सामणे लैई जाणे।

¹³पर ये तुहांरे खातर गवाही देणे रा मौका हुई जाणा।

¹⁴इस खातर अपणे-अपणे मना च ठाणी रखा भई अहां पैहले तेई जबाब देणे री चिन्ता नीं करनी।

¹⁵काँह्भई मांह तुहांजो अपणे बचावा खातर विचार कने बुद्धि देणी, भई तुहांरे सारे बरोधी तुहांरा सामना करीने येढ़ा नीं बोल्ली सक्को भई तुहें गल़त ये।

¹⁶कने तुहांरे माता-पिता, भाई-भैणां, रिश्तेदारां, मित्राँ बी तुहांजो धोखा देणा; येत्थी तक भई तुहां चते किछ लोकां री त हत्या बी करी देणी।

¹⁷मांह पर विश्वास करने रिया वजह ते सारयां लोकां तुहांजो बैर करना।

¹⁸पर तुहांरी कोई हानि नीं हूणी।

¹⁹जे तुहें सब्र रखीने विश्वासा च बणीरे रैहन्गे तां तुहां सदा जीवित रैहणा।

²⁰“ताहली जे यरूशलेम तुहांजो दुश्मणां री सेना ने घिरीरा दिखणा, तां जाणी लेओं भई तिसरे नाश हुणे रा दिन नेड़े आई पुज्जीरा।

²¹फेरी सै जे यहूदिया प्रदेशा च ओ, सै पहाड़ां पर नट्ठी जायों, कने सै जे यरूशलेम नगरा बिच हुणे सै तित्थी ते बाहर चली जायों, कने सै जे नगरा ते बाहर हुणे सै नगरा च नीं जायों।

²²काँह्भई सै दिन परमेशरा रे बदला लेणे रे येढ़े दिन हुणे, तिन्हां च जे पवित्रशास्त्रा री लिखी रियां सारी गल्लां पूरी हुई जाणियां।

²³तिन्हां जनानां खातर ये कितणी बुरी गल्ल हूणी सै जे तिन्हां दिनां च भारहत्थी कने दुध प्यान्दी हुणियां, काँह्भई देश वासियां पर बौहत बड्डी विपत्ति औणी कने परमेशरा इन्हां लोकां जो सजा देणी।

²⁴सै तलवारा ने मारे जाणे कने तिन्हारे बैरियां तिन्हांजो बन्दी बणाईने होरीं बौहत देशां च लेई जाणा; कने यरूशलेम पर अन्यजातियां रे लोकां तदुआं तक राज करना तदुआं तक जे तिन्हारा बगत पूरा नीं हुई लो, तिन्हां यरूशलेम रे निवासियां जो नष्ट करी देणा।

²⁵“अम्बरा च हैरान करने औल़ी गल्लां हूणी; सूरज चान्द कने तारयां च चिन्ह सुझणे, कने थल्ले धरतिया री सारी जातियां रे लोकां पर विपत्ति औणी कने समुद्रा री उथल-पुथला जो देखीने लोकां डरी जाणा।

²⁶डरा रिया वजह ने संसारा पर औणे औल़ी मुशीवतां जो देखीने, बौहत लोकां री हिम्मत टुटी जाणी, काँह्भई अम्बरा री शक्तिशाली आत्मां घबराई जाणियां।

²⁷फेरी सारयां लोकां मिन्जो यनि माहणुये रे पुत्रा जो अपणी सामर्थ कने चमकदे हुये तेज्जा सौगी बद्दल़ां पर औंदे देखणा।

²⁸ताहली जे ये गल्लां हुणे लग गियां, तां आत्म विश्वासा ने खड़े हुईने ऊपर खा देख्यां, काँह्भई तुहांजो तुरन्त बचाया जाणा।”

²⁹फेरी यीशुये तिन्हाजो इक उदाहरण गलाया, “अंजीरा रे डाल़ा कने वाकी होरी डाल़ां जो देक्खा।

³⁰जिस मौके तिन्हाते कुम्मल़ निकल़ां ये, तां तुहें खुद इ समझी जायें भई गर्मिया रा मौसम औणे औल़ा।

³¹तियां इ ताहली जे तुहें इन्हां गल्लां जो हुन्दे देखो, तां जाणी लेओं भई परमेशरा रा राज औणे औल़ा।

³²हऊँ तुहांजो सच्च बोलां, भई तदुआं तक जे ये सारी गल्लां पूरी नीं हुई जान्दी, इसा पीढ़ियां रे लोकां रा खात्मा नीं हूणा।

³³अकाश कने धरतिया री हरेक चीज़ खत्म हुई जाणी, पर मेरा गलाणा पूरा हुईने रैहणा।

³⁴“इस खातर अपणे बारे च सावधान हुई जावा! किति येढ़ा नीं हो भई मौज मस्ती, नशा कने इस संसारा रे फिक्रां ते तुहांरा मन व्यस्त हुईजो, कने माहणुये रे पुत्रा रा दिन अचानक तुहां पर इयां आईजो ताहली जे तुहौं तिसरी आशा नीं हो, तियां जे फन्दा इकदम पशुये जो फसाई लेआं।

³⁵तिस दिना रा असर धरतिया रे हर इक माहणुये पर पौणा।

³⁶इस खातर हर पल चुश्त रौआ कने प्राथना करदे रौआ भई तुहें इन्हां सारियां गल्लां ते, सै जे हुणे औल़ियां, बचणे री ताकत पाई सक्को, कने अपणे आत्म विश्वासा सौगी माहणुये रे पुत्रा रे सामणे खड़े हुणे लायक बणी सक्को।”

³⁷हर रोज यीशु मन्दरा च जाईने उपदेश देआं था, कने संजके जुन्ना ऊत्थीते निकल़ीने जैतून नौआं रे पहाड़ा पर रात विताँ था।

³⁸हर रोज तड़के उट्ठीने मते लोक तिन्हाजो सुणने खातर मन्दरा च कट्ठे हुआं थे।