Read Bilaspuri लूका 23 Bible Online

लूका 23 - Bilaspuri bible

लूका 23

¹फेरी तिन्हारी सारी पंचायत उट्ठीने खढ़ी हुई कने सै तिस्सो पिलातुस राजपाल्ला रे सामणे लेईगे।

²सै यीशुये पर इल्जाम लगाणे लगे, “ये माहणु अहांरे लोकां जो बहकाणे लगीरा, ये तिन्हारे राजे कैसरा जो कर देणे ते मना कराँ! कने ये येढ़ा दावा कराँ भई हऊँ मसीह आ, कने अप्पूँजो इक राजा बोलदे हुये सुणया।”

³इस पर पिलातुसे यीशुये ते पुच्छया, “क्या तू यहूदियां रा राजा?” यीशुये जबाब दित्या, “हाँ, तूंई त बोलीराँ हऊँ सैई हाया।”

⁴फेरी पिलातुस मुखियायाजकां कने लोकां खा मुड़ीने गलाया, “मिन्जो इस माहणुये च कोई बी दोष नीं दिखदा।”

⁵पर सै इकदम बोलणे लगे, भई “इने सारे यहूदिया प्रदेशा च लोकां जो अपणे उपदेशां ने भड़काया। ये इने गलील प्रदेशा च शुरु कित्या था कने हुण येत्थी आईग्या।”

⁶येढ़ा सुणीने पिलातुसे पुच्छया, “क्या ये माहणु गलील प्रदेशा रा?”

⁷ताहली जे तिन्हे तिस्सो हाँ करदे हुये सुणया, फेरी पिलातुसे तिन्हाजो हेरोदेस अन्तिपास ले भेज्या। काँह्भई गलील प्रदेशा रा राजा हेरोदेसा रे अधिकारा च था, कने तिन्हे दिनें सै बी यरूशलेम ची था।

⁸हेरोदेस राजे ताहली जे यीशुये जो देख्या तां सै बड़ा खुश हुया, काँह्भई कईयां साल्लां ते सै तिस्सो देखणा चाहन्दा था। तिने यीशुये रे बारे च सुणीरा था; कने मतयां दिनां ते सै इसा आशा च था भई यीशुये जो कोई चमत्कार करदे हुये देक्खूं।

⁹तिने यीशुये ते कई तरह रे स्वाल पुछे, पर यीशुये तिसरे किसी स्वाला रा बी जबाब नीं दित्या।

¹⁰इस पर मुखियायाजक कने धर्म शास्त्री ऊथी खड़े हुईने जोरा-जोरा ने हल्ला पाईने यीशुये पर दोष लगाणे लगे।

¹¹हेरोदेस बी अपणे सपाईयां समेत तिसने बुरा बरताव कित्या कने तिसरा मजाक चक्कया। फेरी तिन्हे तिस्सो इक शाही बस्त्र पैहनाईने वापस पिलातुस ले भेजित्या।

¹²राजा हेरोदेस कने पिलातुस राजपाल सै जे पैहले इक दुज्जे रे दुश्मण थे, तिस दिन सै दोन्नों मित्र बणिगे।

¹³पिलातुस राजपाले मुखियायाजकां, यहूदी नेतयां कने लोकां जो बी सद्दीने कट्ठा कित्या कने तिन्हांने गलाया,

¹⁴“तुहें इस माहणुये जो मेरले ल्याये भई ये लोकां जो बहकाया राँ, कने देक्खा, मैं तुहांरे सामणे तिसरी जाँच कित्ती, पर तिन्हां गल्लां रा जे तुहें तिस पर इल्जाम लाया रायें, तिन्हां गल्लां रे बारे च मैं तिसच कोई बी दोष नीं पाया;

¹⁵कने राजा हेरोदेस बी, काँह्भई तिने इस माहणुये जो वापस अहांले भेजीत्या: इने माहणुये येढ़ा किछ बी नीं कित्तिरा, तिसा वजह ने जे इस्सो मौता री सजा दित्ति जाई सक्को।

¹⁶इस खातर माह सिर्फ इसजो कोड़े लगवाणे, कने ये छडी देणा।”

¹⁷पिलातुसा जो फसह रे इस त्योहारा रे मौके पर हर साल इक्की कैदिये जो लोकां रे खातर छडणे पौआं था।

¹⁸फेरी लोकें बड़ा हल्ला मचाया, सारे इक्की अवाज़ा च चिल्लाणे लगे, “इस्सो मारी देआ, कने बरअब्बा जो अहांरे खातर छडी देआ!”

¹⁹बरअब्बा जो नगरा च मार कुट करने कने खून करने रे जुरमा च जेल्ला च बन्द कीतिरा था।

²⁰पर पिलातुस यीशुये जो छडी देणा चाँह था, इस खातर तिने लोकां जो फेरी भीं समझाया।

²¹पर सै येई नारा लान्दे रैये, “इस्सो क्रूसा पर चढ़ाओ, इस्सो क्रूसा पर चढ़ावा।”

²²पिलातुसे तिज्जी दफा तिन्हाते पुच्छया, कांह? “इने माहणुये क्या जुरम कीतिरा? इस्सो मौता री सजा देणे लायक मिन्जो इसच येढ़ि कोई गल्ल नीं मिली। इस खातर माह इसजो सिर्फ कोड़े लवाई ने छडी देणा।”

²³पर लोक ऊच्चिया अवाज़ा च नारे लगाई-लगाईने मांग करी रां थे भई इस्सो क्रूसा पर चढ़ाई दित्या जाओ। पर तिन्हारे नारेयां रा शोर इतणा बधीग्या भई

²⁴पिलातुसे लोकां री मांगा रे मुतावक फैसला देईत्या भई इन्हांरी मंग मन्नी ली जाओ।

²⁵पिलातुसे तिस माहणुये जो छडित्या सै जे मार कुट करने कने खून्ना रे जुरमा च जेल्ला च बन्द कीतिरा था, कने यीशुये जो तिन्हारे हवाले करित्या भई सै तेढ़ा जे चांयें, करा।

²⁶ताहली जे यीशुये जो ले जाईराँ थे, ताहली इक माहणु तिसरा नौं जे शमौन था, सै कुरेनी रा रैहणे औल़ा था, तिस बगत गाँवां ते आईराँ था। सपाहियें सै पकड़या कने तिस पर क्रूस लद्दीत्या, कने यीशुये रे पिच्छे चलने पर मजबूर करित्या।

²⁷लोकां री इक बड्डी भीड़ तिसरे पिच्छे चलीरी थी, तिन्हां च मतियां जनानां बी रोन्दी कने बलाप करदियां चली रियां थी।

²⁸पर यीशुये मुड़ीने तिन्हाने गलाया, “यरूशलेम री औरतो, मेरिया दशा पर मता रोन्दियां; पर तुहांजो कने तुहांरयां बच्चयां ने सै जे हुणे औल़ा तिस पर रोआ।

²⁹काँह्भई सै पीड़ा रे दिन आई रायें ताहली जे लोकां बोलणा, कितणा भला हूणा तिन्हां जनानां रे खातर सै जे बांझ इयां, कने सै गर्भ तिन्हें जे बच्चे नीं जणे, कने तिन्हें जे दुध नीं प्याया।

³⁰तिस बगत तिन्हां लोकां पर्वतां जो बोलणा भई अहां पर पईजो, कने पहाड़ियां ने बोलणा भई अहांजो दब्बी देआ।

³¹काँह्भई जे धर्मी माहणुये ने येढ़ा हुआं, तां कल्पना करा भई सजा पाणे रे लायक माहणुये सौगी क्या हूणा।”

³²यीशुये सौगी दो होर माहणुआं जो सै जे अपराधी थे लेई जाया राँ थे, काँह्भई तिन्हाजो बी मौता री सजा दित्ति जाणी थी।

³³ताहली जे सै तिसा जगह पुज्जे तिसाजो जे खोपड़ी बोलां थे। तित्थी जे सपाईयें तिन्हां तिन्नां जो क्रूसां पर लटकाया, यीशु बिच्चले क्रूसा पर था, कने तिसरे आजु बाजू रे क्रूसा पर सै दोन्नों अपराधी थे।

³⁴यीशुये गलाया, “पिता जी, इन्हांजो माफ कर, काँह्भई ये नीं जाणदे भई ये क्या करी रायें।” फेरी सपाईयें पर्चियां पाईने अप्पूँ चियें तिसरे कपड़यां रा बन्डवारा कित्या।

³⁵तित्थी लोक खढ़ी ने ये सरा किछ देखदे रैये। मुखिये यीशुये रा मजाक चक्की ने बोलीराँ थे, “इने होरीं जो त बचाया। जे ये परमेशरा रा मसीह आ कने तिसरा चुणीरा, तां अप्पूँजो बचाओ।”

³⁶सपाईयें बी यीशुये रा मजाक बणाया कने तिस्सो पीणे खातर पाणिये रिया जगह सिरका दित्या।

³⁷तिन्हे यीशुये जो हाक पाईने गलाया, “जे तू यहूदियां रा राजा, तां अप्पूँजो बचा।”

³⁸यीशुये रे क्रूसा पर इक पट्टी लगाई तिस पर जे येढ़ा लिखिरा था, “येआ यहूदियां रा राजा।”

³⁹सै अपराधी जे तिसरे अखा बखा रे क्रूसां पर लटकाई रे थे, तिन्हां चा ते इक्की यीशुये री निंध्या करदे हुये गलाया, “तां तूई मसीह आ, हाया नां? तां अप्पूँजो बी बचा कने सौगी अहांजो बी बचा!”

⁴⁰पर दुज्जे, पैहले अपराधिये रा बरोध करदे हुये गलाया, “क्या तू परमेशरा ते नीं डरदा? तिज्जो बी सैई सजा मिली राईं।

⁴¹मिन्जो कने तिज्जो त अहांरे कित्तिरे जुरमां री सजा मिली राईं, पर इने माहणुये त कोई बी जुरम नीं कित्तिरा।”

⁴²फेरी तिने गलाया, “यीशु, ताहली जे तू राजा बणीने राज करने आओ, ताहली मिन्जो याद रखयों।”

⁴³यीशुये तिसने गलाया, “हऊँ चाँह भई तू जाणी लो, आज्ज तू मेरे सौगी स्वर्ग लोका च हूणा।”

⁴⁴दुपैहरा रा बगत था, बारा बजे ते लेईने तिन्न बजे तक सारे देशा च अन्धेरा छाईरा रैया।

⁴⁵सूरजा री रोशनी जान्दी रैई, कने मन्दरा रा पड़दा बिच्चा ते फटिग्या।

⁴⁶फेरी यीशुये जोरा ने गलाया, “हे पिता, हऊँ अपणिया आत्मा जो तेरे हत्था च देआं!” इतणा बोलीने तिन्हे अपणे प्राण छड्डीते।

⁴⁷सुबेदारे, सै जे तिस कम्मां री निगरानी करी रां था, तिने ये सब किछ हुन्दे हुये देख्या, तां तिने परमेशरा री बडयाई करदे हुये गलाया, “सच्चमुच ये माहणु बेकसूर था।”

⁴⁸लोकां री भीड़ सै जे क्रूसा रिया सजा जो देखणे खातर कट्ठा हुईरी थी, सै तिसा सारिया घटना जो देखीने बौहत दुखी हुये कने घरा जो वापस चलिये।

⁴⁹कने तिसरे सारे जाणने औल़े, कने सै जनानां जे गलील प्रदेशा ते तिस सौगी आईयां थिआं, थोड़ा दूर जे खढ़ी ने इन्हां सारियां गल्लां जो देखीरां थिआं।

⁵⁰ऊथी यूसुफ नौआं रा इक भला कने धर्मी माहणु था, सै जे यहूदी पंचैती रा इक सदस्य था।

⁵¹सै तिन्हारे फैसले कने कार्यवाईया ते सहमत नीं था, सै यहूदियां रे इक नगर अरिमतियाह रा निवासी था कने परमेशरा रे राज्जा रे औणे रा इन्तजार करीराँ था।

⁵²सै माहणु पिलातुस ले गया कने तिसते यीशुये री लाश मंगी।

⁵³कने तिसरे शवा जो क्रूसा ते त्वारीने सणा रे बधिया कपड़े ने लपेटया कने इक नौंईयां कब्रा च रखया, सै जे सपड़ा जो खुणीने बणाईरी थी।

⁵⁴ये शुक्रवारा रे दिन दपैहरा रे बादा रा बगत था, कने विस्राम रे खातर त्यारिया रा दिन था।

⁵⁵कने तिन्हें जनानें सै जे तिसने गलील ते आईयां थिआं, पिच्छे-पिच्छे, जाईने तिसा कब्रा जो देख्या कने ये बी भई तिसरा शव किसा रितिया ने रखया गया।

⁵⁶सै अपणे घरौ गईयां कने यीशुये रे शरीरा पर मल़णे खातर खुशबुदार चिज़ां त्यार कित्या। पर तिस समाना जो त्यार करदे-करदे विस्राम रा दिन आईग्या, कने मूसा रिया व्यवस्था रे मुतावक तिन्हे सारा दिन विस्राम कित्या।