Read Bilaspuri लूका 3 Bible Online

लूका 3 - Bilaspuri bible

लूका 3

¹रोम देशा रे बादशाह तिबिरियुस रे राज्जा रे पन्द्रहवे साल्ला च ताहली जे पुन्तियुस पिलातुस यहूदिया प्रदेशा रा राजपाल था, कने तिस देशा रे चौथे हिस्से रे राजयां च हेरोदेस गलील इलाके रा कने तिसरा भाई फिलिप्पुस इतुरैया कने त्रखोनीतिस जिले रा, कने लिसानियास अबिलेने प्रदेशा रे चौथे हिस्से बिच राज कराँ था।

²तिन्हां दिनां च मुखियायाजक त हन्ना कने कैफा थे, तां तिस वगत परमेशरा रा सन्देश सुनसान जगह बिच जकर्याह रे पुत्र यूहन्ना ले पुज्जया।

³कने सै यरदन रे आसे पासे रे सारे प्रदेशा च आईने, अपणे पापां रिया माफिया रे खातर मन फिरावा रे बपतिस्मे रा प्रचार करने लगया।

⁴यशायाह भविष्यवक्ते यूहन्ना रे बारे च बड़े पैहले ये सब गलाई रखीरा था भई, “सुनसान जगह च इक माहणुये रे हाक पाणे री अवाज़ सुणी कराँ इ भई प्रभुये जो ग्रहण करने खातर अपणे मना जो त्यार करा, तियां जे लोक किसी खास माहणुये रे खातर सड़कां सिधियां बणायें।

⁵हरेक खड्डा खोल़ा भरया जाओ, हरेक पहाड़ कने ऊच्ची जगह पधरी किति जाओ, कने सै जे टेढा-मेढा सै सिधा कित्या जाणा कने सै जे ऊच्चा नीहठा रस्ता सै पधरा बणना।

⁶कने हर माहणुये परमेशरा रे दित्तिरे छुटकारे जो देखणा।”

⁷सै जे बौहत लोकां री भीड़ा री भीड़ यूहन्ने ते बपतिस्मा लेणे जो निकल़ीने औआं थी सै तिन्हाजो गल्लां था, “जहरीले सर्पा साई बुरे लोको तुहांजो परमेशरा ते औणे औल़िया सजा ते किने खबरदार कित्या?

⁸जे तू तिसा सजा ते बचणा चांह तां अपणिया जिन्दगिया च ये साबित कर भई तैं अपणयां पापां ते मन फिराया कने परमेशरा खौ मुड़ीरा। कने अपणे-अपणे मना च ये नीं सोच्चा भई अब्राहम अहांरा पूर्वज आ; ताकि परमेशरा अहांजो सजा नीं देणी, पर हऊँ तुहांजो बोलां भई ‘परमेशर अब्राहमा रे खातर इन्हां पत्थराँ ते बी बच्चा पैदा करी सक्कां!’

⁹कने तियां जे इक माहणु अपणिया कुहाड़िया ने सै डाल़ जे बुरा फल़ ल्यावां तिसजो बड्डी टुक्की ने अग्गी च जल़ाणे जो त्यार आ, तियां इ परमेशर तुहौं तुहांरे पापां खातर सजा देणे जो त्यार आ।”

¹⁰तां लोकां री भीड़ तिसते पुछणे लगी, “अहांजो परमेशरा रिया इसा सजा ते बचणे खातर क्या करने पौणा?”

¹¹यूहन्ने तिन्हाजो जवाब दित्या, “जे तुहांले दो कुरते ओ, तां तिन्हां चते इक कुरता तिसले जे निआं तिस ज़रुरतमन्द माहणुये जो देई दो, कने जे तुहांले रोटी ओ, तां तिसाजो तिन्हां सौगी बन्डी लो सै जे भुक्खे ओ।”

¹²चुंगी लेणे औल़े बेईमान लोक बी तिसले बपतिस्मा लेणे आये कने पुछणे लगे, “गुरू जी, अहें क्या करिये?”

¹³तिने तिन्हाजो गलाया, “अपणे कम्मां च ईमानदार रौ। रोमी सरकारा रे मुतावक जितना कर लेणे रा हुक्म हो, उतणा इ लेणा चाहिन्दा, इसते मता नीं।”

¹⁴किछ सपाईयें बी पुच्छया, “अहांजो क्या करना चाहिन्दा?” यूहन्ने तिन्हाजो जवाब दित्या, “किसी ते तिसरे पैसयां जो नीं खोयां, कने जाणदे हुए बी किसी पर झूट्ठा इल्जाम नीं लगायों, कने तुहांजो जितणी मजदूरी मिलांई तिसच इ सन्तोख रखयों।”

¹⁵सारे लोक उम्मीद करी रां थे भई मसीहे बड़े छोड़ औणा, सै येढ़ा जाणने जो बड़े इच्छुक थे भई क्या यूहन्ना इ सै मसीहा त निआं?

¹⁶तां यूहन्ने येढ़ा बोलीने तिन्हारे सवाला रा जवाब दित्या, “हऊँ त तुहांजो पाणिये च बपतिस्मा देआं, पर सै औणे औल़ा सै जे मेरते बी सामर्थी आ; हऊँ तिसरे मुकावले किछ बी नींआ, हऊँ इक्की सेवका रा सब्बीं ते छोट्टा काम्म तिस खातर करना चाओ, तां बी लायक नींआ। तिस तुहांजो पवित्र आत्मा कने अग्गी च बपतिस्मा देणा।

¹⁷सै माहणु जाति रा न्याय करने आई कराँ, ठीक तियां इ जियां जे करसाण कणका जो छन्डी ने भूआ ते लग कराँ। फेरी तिस अपणे ख्वाड़े री साफ-सफाई खरे तरिके ने करनी कने कणका जो अपणे पेड़ुये च कट्ठा करीने रखणा, पर भूआ जो तिस अग्गी च फुकणा सै जे कदीं बुझदी नीं हो।”

¹⁸यूहन्ना इस तरिके ने लोकां जो कई गल्लां ते चत्तन्न करदा रैया, कने मसीह रे औणे री खुशखबरिया रा प्रचार करदा रैआं था।

¹⁹पर तिने चौथाई देशा रे राजा हेरोदेस जो तिसरे भाई फिलिप्पुस रिया जनाना हेरोदियासा रे बारे च, कने सारे बुरयां कम्मां च सै जे तिने कित्तिरे थे, लुहामा दित्या।

²⁰इस खातर हेरोदेस राजे तिन्हां सब्बींते बधीने ये बुरा काम्म बी कित्या, भई यूहन्ने जो जेल्ला च पाईत्या।

²¹पर यूहन्ने जो जेल्ला च पाणे ते पैहले ताहली जे बौहत सारे लोक बपतिस्मा लैईराँ थे तां यीशुये बी बपतिस्मा लैया। इसते बाद ताहली जे सै प्राथना करी रां था, तां स्वर्ग खुलीग्या।

²²कने पवित्र आत्मा शरीर रे रुपा च कबूतरा साई तिस पर उतरया, कने स्वर्गा ते ये अवाज़ आई : भई, “तू मेरा प्यारा पुत्र आ, हऊँ तेरते बड़ा खुश आ।”

²³जिस बगत यीशुये लोकां च अपणी सेवा शुरु किति, तिस बगत सै लगभग तिआं साल्लां रा था। कने लोक तिस्सो यूसुफा रा पुत्र समझां थे, भई यूसुफ त एली रा पुत्र था।

²⁴एली मत्तात रा पुत्र था, कने मत्तात लेवी रा पुत्र था। लेवी मलकी रा पुत्र था, कने मलकी यन्ना रा पुत्र था। कने यन्ना यूसुफ रा पुत्र था।

²⁵यूसुफ मत्तित्याह रा पुत्र था, कने मत्तित्याह आमोस रा पुत्र था। आमोस नहूम रा पुत्र था, कने नहूम असल्याह रा पुत्र था। असल्याह नोगह रा पुत्र था।

²⁶नोगह मात रा पुत्र था, कने मात मत्तित्याह रा पुत्र था। मत्तित्याह शिमी रा पुत्र था, कने शिमी योसेख रा पुत्र था। कने योसेख योदाह रा पुत्र था।

²⁷योदाह यूहन्ना रा पुत्र था, कने यूहन्ना रेसा रा पुत्र था। रेसा जरुब्बाबिल रा पुत्र था, कने जरुब्बाबिल शालतियेल रा पुत्र था। शालतियेल नेरी रा पुत्र था।

²⁸नेरी मलकी रा पुत्र था, कने मलकी अद्दी रा पुत्र था। अद्दी कोसाम रा पुत्र था, कने कोसाम इलमोदाम रा पुत्र था। कने इलमोदाम एर रा पुत्र था।

²⁹एर यहोशू रा पुत्र था, कने यहोशू इलाजार रा पुत्र था। इलाजार योरीम रा पुत्र था, कने योरीम मत्तात रा पुत्र था। मत्तात लेवी रा पुत्र था।

³⁰लेवी शमौन रा पुत्र था, कने शमौन यहूदा रा पुत्र था। यहूदा यूसुफ रा पुत्र था, कने यूसुफ योनान रा पुत्र था। योनान इल्याकीम रा पुत्र था।

³¹इल्याकीम मलेआह रा पुत्र था, कने मलेआह मिन्नाह रा पुत्र था। मिन्नाह मत्तता रा पुत्र था, कने मत्तता नातान रा पुत्र था। नातान दाऊद रा पुत्र था।

³²दाऊद यिशै रा पुत्र था, कने यिशै ओबेद रा पुत्र था। ओबेद बोअज रा पुत्र था, कने बोअज सलमोन रा पुत्र था। सलमोन नहशोन रा पुत्र था।

³³नहशोन अम्मीनादाब रा पुत्र था, कने अम्मीनादाब अरनी रा पुत्र था। अरनी हिस्रोन रा पुत्र था, कने हिस्रोन फिरिस रा पुत्र था। फिरिस यहूदा रा पुत्र था।

³⁴यहूदा याकूब रा पुत्र था, कने याकूब इसहाक रा पुत्र था। इसहाक अब्राहम रा पुत्र था, कने अब्राहम तिरह रा पुत्र था। तिरह नाहोर रा पुत्र था।

³⁵नाहोर सरुग रा पुत्र था, कने सरुग रऊ रा पुत्र था। रऊ फिलिग रा पुत्र था, कने फिलिग एबिर रा पुत्र था। एबिर शेलाह रा पुत्र था।

³⁶शेलाह केनान रा पुत्र था, कने केनान अरफक्षद रा पुत्र था। अरफक्षद शेम रा पुत्र था, कने शेम नूँह रा पुत्र था। नूँह लेमेक रा पुत्र था।

³⁷लिमिक मथूशिलह रा पुत्र था, कने मथूशिलह हनोक रा पुत्र था। हनोक यिरिद रा पुत्र था, कने यिरिद महललेल रा पुत्र था। महललेल केनान रा पुत्र था।

³⁸केनान इनोश रा पुत्र था, कने इनोश शेत रा पुत्र था। शेत आदम रा पुत्र था, कने आदम परमेशरा रा पुत्र था (काँह्भई आदम जो परमेशरे अपणे रुपा च बणाया था)।