Read Bilaspuri लूका 7 Bible Online

लूका 7 - Bilaspuri bible

लूका 7

¹ताहली जे सै लोकां जो, अपणी सारियां गल्लां सुणाई बैट्ठया, तां सै अपणयां चेलयां सौगी कफरनहूम नगरा च आया,

²कने किसी सुबेदारा रा इक दास था, सै जे तिसजो बड़ा प्यारा था, बमारिया रिया वजह ने मरने औल़ा था।

³तिने यीशुये री चर्चा सुणीने यहूदियां रे कई बजुर्ग नेतयां जो तिसने ये बिनती करने जो तिसले भेज्या, भई आईने मेरे दास्सा जो ठीक करी दे।

⁴फेरी सै बजुर्ग यीशुये ले जाईने बौहत बिनती करीने बोलणे लगे भई माहराज अहांने सौगी चलीने तिस माहणुये री मदद करा। सै तिसने गलायें, “ये माहणु बिल्कुल तुहांरी दया रे लायक आ,

⁵काँह्भई सै माहणु अहांरे लोकां ने प्रेम भाव रखां, कने तिने इ अहांरे खातर यहूदी सभा घर बणाईरा।”

⁶यीशु तिन्हारे सौगी-सौगी चलया, पर ताहली जे सै घरा रे नजदीक था, तां सुबेदारे तिसले कई मित्राँ ने सनेहा भेज्या, “हे प्रभु, मेरे घरें औणे खातर अप्पूँजो परेशान नीं कर, काँह्भई हऊँ इस आदरा रे लायक निआं,

⁷हऊँ औणे कने तुहांजो मिलणे रे लायक बी नींआ, पर ऊत्थीते वचन इ बोल्ली दे, मेरा दास्सा ठीक हुई जाणा।

⁸हऊँ बी किसी रे अधीन काम्म कराँ; कने सिपाई मेरे हुक्मा रा पालन कराँ ये, कने ताहली जे इक्की जो बोलां, ‘जा,’ तां सै ‘जां,’ कने दुज्जे जो औणे जो बोलां भई ‘औ,’ तां सै औआं; कने अपणे किसी दास्सा जो भई ‘ये कर,’ तां सै तिस्सो कराँ।”

⁹ये सुणीने यीशुये जो चम्भा हुया, कने तिने मुँह फेरीने तिसा भीड़ा ने सै जे तिसरे पिच्छे आई कराँ थी बोल्या, “हऊँ तुहांजो सच्च बोलां भई मैं इस्राएल च बी येढ़ा विश्वास नीं देख्या।”

¹⁰जिस बगत सुबेदारा रे भेज्जीरे मित्र घरें बापस आये, तिन्हें देख्या भई सै सेवक त बिल्कुल ठीक हुईगरा।

¹¹इसते इकदम बाद, यीशु अपणे चेलयां सौगी नाईन नौआं रे इक गाँवां जो गया। तिसने सौगी माहणुआं रा इक बौहत भीड़ बी जाईराँ था।

¹²ताहली जे सै गाँवां रे फाटका पर पुज्जे तां गाँवां रे लोक, इक मुड़दे जो दफनाणे खातर गाँवां ते बाहर लेईने चलीरे थे। सै मरीरा माहणु अपणी मौआ रा इक्को-इक पुत्र था कने तिसरी मौ इक विधवा थी कने गाँवां रे मते लोक तिसा सौगी थे।

¹³तिसा विधवा री हालत देखीने प्रभुये जो तिसा पर बड़ा तरस आया कने गलाया “रोन्दी मत!”

¹⁴सै तिसा अर्थिया रे नेड़े गया कने तिसने छोया, कने तिस्सो चकणे औल़े रुकीये। फेरी यीशुये बोल्या, “नौजवान, हऊँ तिज्जो बोलां उट्ठ जा।”

¹⁵फेरी तिस मुड़दे च जान वापस आईगी, कने सै उट्ठीने बैठिग्या, कने गलाणे बोलणे लग्या! फेरी यीशुये तिस मुण्डुये जो तिसरिया मौआ ले सम्भाल़ित्या।

¹⁶इसा गल्ला जो देखीने लोकां जो बड़ा डर हुईग्या, कने सै येढ़ा बोलीने परमेशरा री स्तुति करने लगे, “अहांरे बिच इक महान भविष्यवक्ता आया कने परमेशरे अपणे लोकां पर मेहरवानी किति।”

¹⁷तिस दिन यीशुये सै जे कित्या इसरी चर्चा सारे यहूदिया प्रदेशा च कने अखा बखा रे सारे लाकयां च बी फैलीगी।

¹⁸कने यूहन्ने जो तिसरे चेलयां इन्हां सारियां गल्लां री खबर दित्ति।

¹⁹फेरी तिने अपणे दो चेलयां जो सद्दीने प्रभु ले ये पुछणे खातर भेज्या भई, “क्या औणे औल़ा तूई हाया, या फेरी अहें किसी दुज्जे री आशा रखिये?”

²⁰तिन्हें दुईं चेलयां यीशुये ले आईने गलाया, “यूहन्ना बपतिस्मा देणे औल़े अहांजो तेरले ये पुछणे जो भेज्या, भई क्या तू सैई हाया सै जे औणे औल़ा, या अहें किसी दुज्जे री आशा रखिये?”

²¹तिस बगत, तिन्हारे सामणे यीशुये मतयां बमाराँ जो ठीक कित्या, कने बुरीआत्मां ते छडुआईने चंगा कित्या कने मते अन्हे लोकां जो देखणे लायक बणाया।

²²यीशुये यूहन्ने रे चेलयां ने बोल्या, “सै जे किछ तुहें देख्या कने सुणया, जाईने यूहन्ने ने बोल्ला; भई अन्हे देक्खां ये, कने लंगड़े हन्डणे फिरने लगे, कोढ़ी शुद्ध कित्ते जायें, टौणे सुणां ये, कने मुड़दे जिऊंदा कित्ते जायें, कने गरीबां जो खुशखबरी सुणाई जाईं।

²³कने परमेशर तिस माहणुये जो आशीष देआं सै जे माह पर विश्वास करना नीं छडदा।”

²⁴जिस बगत यूहन्ना रा सनेहा ल्यौणे औल़े यीशुये लाते चलिये, तां यीशु यूहन्ना रे बारे च लोकां ने बोलणे लगया, “ये माहणु कुण आ तिस्सो जे तुहें सुनसान जगह च देखणे गये थे? क्या तुहें तिन्हां चते इक सरकन्डे साई कमजोर माहणु देख्या, सै जे हवा रे हर लवाटे ने हिल्लां?

²⁵या क्या तुहें महंगे कपड़े पैहनीरे किसी माहणुये जो देखणे री उम्मीद करया राँ थे? नां, काँह्भई सै लोक जे बांके कपड़े पैहनां ये, कने मौज मस्तिया ने जीआं ये, सै सुनसान जगह च नीं, पर मैहलां च रैं।

²⁶क्या तुहें किसी भविष्यवक्ते जो देखणे गये थे? हाँ, हऊँ तुहां कने बोलां, सै भविष्यवक्ते ते बी बड्डा आ।

²⁷यूहन्ना सैई भविष्यवक्ता आ तिसरे बारे च जे पवित्रशास्त्रा च लिखिरा : परमेशर बोलां ‘देख, हऊँ अपणे सनेहा देणे औल़े जो तेरते पैहले भेजीरां, कने तिस तेरते पैहले जाईने तेरा स्वागत करने खातर लोक त्यार करने।’

²⁸“हऊँ तुहांजो बोलां भई हुण तक येढ़ा कोई माहणु नीं जम्मया सै जे यूहन्ने ते बड्डा ओ। पर परमेशरा रे राज्जा च सै जे बड़ा खास नींआ, सै यूहन्ने ते बी बड्डा।”

²⁹जिस बगत सारयां लोकें कने चुंगी लेणे औल़यां ये गल्ल सुणी तां फेरी तिन्हे यूहन्ने ते बपतिस्मा लेईने परमेशरा जो सच्चा मन्नील्या।

³⁰पर फरीसियें कने व्यवस्थापकें यूहन्ना रा बपतिस्मा नां लेणे ते अपणे खातर परमेशरा री योजना जो ठोकर मारीती।

³¹यीशुये फेरी पुच्छया, “हऊँ इस जुगा रा बखान कियां करूँ? कने किस सौगी हऊँ इस जुगा रे लोकां री तुलना करूँ?

³²काँह्भई सै तिन्हां बच्चयां साई ये सै जे किसी खाली जगह च बैठिरे रैंह कने इक्की दूये जो हक्कां पाईने बोलां ये: ‘अहें तुहांरे खातर ब्याह रे गीत गाये, पर तुहें त नच्चे इ नींये, अहें त रोणे रा गीत गाया, पर तुहें त रोये इ नींये।’

³³बपतिस्मा देणे औल़े यूहन्ने कदीं अंगूरां रा रस नीं पित्या, कने तिने हमेशा उपवास कित्या। पर तुहें बोलां ये भई तिसच बुरीआत्मा इ।

³⁴हऊँ माहणुये रा पुत्र खान्दा पीन्दा आईरा; तां तुहें बोलां ये भई ‘हऊँ पेटू कने शराबी आ, कने चुंगी लेणे औल़यां कने पापियां रा मित्र आ।’

³⁵पर सै जे परमेशरा रे ज्ञाना रे मुतावक चलां ये तिन्हां रिया जिन्दगियां च ज्ञान सच्चा ठहराया जां।”

³⁶इक फरीसिये यीशुये जो अपणे घरें रोटी खाणे खातर न्यून्दा दित्या। यीशुये तिसरा नियून्दा स्वीकार कित्या कने तिसरे घरें रोटी खाणे जो बैठिग्या।

³⁷कने देक्खा, तिस नगरा री इक पापी जनाना ये जाणीने भई यीशु फरीसिये रे घरें रोटी खाणे बैठिरा, संगमरमरा रिया शीशिया च बौहत मैंहगा इत्र ल्याई।

³⁸कने तिसरे पैराँ ले, पिच्छे खढ़ी हुईने, रोन्दी हुई तिसरे पैराँ जो आक्खीं रे परौल़यां ने सेड़ने कने सिरा रे बाल़ां ने साफ करने लगी, कने तिसरे पैराँ जो बार-बार चुम्मीने तिन्हां पर इत्र मल़या। तैं मेरे सिरा पर तेल नीं मल़या; पर इसे मेरे पैराँ पर इत्र मल़या।

³⁹येढ़ा देखीने सै फरीसी तिने जे यीशुये जो नियून्दा देईने सद्दीरा था, अपणे मना च सोचणे लगया, “इसते त येढ़ा साबित हुआं भई ये यीशु कोई भविष्यवक्ता निआं। काँह्भई जे सच्ची जो सै परमेशरा री तरफा ते भेजीरा हुन्दा, तां येढ़ा जाणी लेन्दा भई ये केढ़ी जनाना इ सै जे इसने छोइराँ इ कने सै कितणी बड्डी पापिन इ।”

⁴⁰मगर यीशुये तिस फरीसिये रे मना री गल्लां जो जाणीने जबाब दित्या कने गलाया, “शमौन हऊँ तेरने किछ बोलणा चाँह।” इस पर शमौन बोलां, “गुरू जी बोल्ला।”

⁴¹फेरी यीशु तिस्सो ये उदाहरण देआं, “इक साहूकार था तिसरे दो कर्जदार थे, इक्की पर पांज्ज सौ दिनार, कने दुज्जे पर पंजाह दिनाराँ रा कर्जा था।

⁴²पर तिन्हां दुईं चते कोई बी तिस कर्जे जो बापस नीं करी पाया। तां साहूकारे तिन्हां पर दया करीने सारा कर्ज माफ करित्या, तिज्जो क्या लगां, तिन्हां दुईं चते तिसने कुण जेआ कर्जदार मता प्यार करगा?”

⁴³फरीसी शमौन जवाब देआं, “मेरिया समझा च, तिस मता प्यार रखणा, तिसरा जे मता कर्जा माफ हुया।” इसा गल्ला पर यीशुये शमौना ते गलाया, “तैं ठीक सोच्चया।”

⁴⁴फेरी तिसा जनाना खा मुड़ीने यीशुये शमौना जो गलाया, “क्या तू इसा जनाना जो देखीरां? जिस बगत हऊँ तेरे घरें आया, तां तैं रितिया रे मुतावक मेरे पैराँ धोणे जो पाणी नीं दित्या; पर इसे जनाने मेरे पैर अपणे आक्खीं रे परौल़यां ने सेड़े, कने अपणे बाल़ां ने पुंझे!

⁴⁵तैं मेरा स्वागत करने खातर रितिया रे मुतावक मिन्जो पवित्र चुम्बन नीं दित्या; पर ताहलुआं ते जे हऊँ येत्थी आईरा, तिस बगता ते इसे मेरे पैराँ पर चुम्बन करना नीं छडया।

⁴⁶तैं त मेरे सिरा पर तेल मल़ीने मेरा स्वागत तक बी नीं कित्या, पर इसा जनाना जो देख इसे मेरे पैराँ पर इत्र मल़ीने मेरा बड़ा आदर कित्या।

⁴⁷इस खातर तू समझी लै भई इसारे पाप, सै जे बौहत थे, माफ हुईगे, काँह्भई इसे मता प्यार कित्या। पर तिस माहणुये रे जे थोड़े पाप माफ हुए, सै थोड़ा प्यार दस्सां।”

⁴⁸फेरी प्रभु यीशुये तिसा जनाना जो गलाया, “तेरे पाप माफ हुये।”

⁴⁹सै लोक जे तिन्हाने सौगी रोटी खाणे बैठिरे थे, सै अपणे-अपणे मनां च विचार करने लगे, “ये माहणु अपणे आप जो क्या समझां? भई ये लोकां रे पाप माफ करदा फिरो?”

⁵⁰यीशुये तिसा जनाना ने गलाया, “परमेशरे तिज्जो बचाईल्या, काँह्भई तैं माह पर विश्वास कित्या, इस खातर बेफिक्र हुईने जा।”