Read Bilaspuri लूका 8 Bible Online

लूका 8 - Bilaspuri bible

लूका 8

¹इन्हां गल्लां ते बाद यीशु कने तिसरे बारा चेले नगर-नगर कने गाँवां-गाँवां जाईने लोकां जो परमेशरा रे राज्जा री खुशखबरिया रा प्रचार करदे रै।

²किछ जनानां, तिन्हाजो जे तिने बुरीआत्मां कने बमारियां ते छडवाया था, तिन्हां च मरियम सै जे मगदल गाँवां ते थी कने तिसा चते जे यीशुये सात्त बुरी आत्मायें नकाल़ी थीं;

³योअन्ना राजा हेरोदेस रे भण्डारीये खुज़ा री जनाना थी कने सुसन्ना कने होर बौहत जनानां बी इन्हां सौगी थिआं। ये सब जनानां अपणी कमाईया रे पैसयां ने यीशु कने तिसरे चेलयां री सेवा कराँ थिआं।

⁴ताहली जे इक दिन यीशुये इस कहाणिया जो लोकां रिया बड्डिया भीड़ा जो सुणाया सै जे तिसजो सुणने खातर कई नगराँ ते आईने कट्ठे हुईरे थे:

⁵“इक बार इक करसाण ब्यू बाहणे निकल़या, जिस बगत सै ब्यू बाहणे लगया, तिन्हां चते किछ ब्यू बाटा रे कण्डे पै, कने पैराँ हेठ जगल़ोये, कने अम्बरा रे पंछियें आईने चुगी ले।”

⁶कने किछ ब्यू पत्थरीली धरतिया पर पै, कने सै ब्यू उगया, पर पाणिये री कमी हुणे ते सै सुक्कीने मरीगे।

⁷किछ ब्यू बराड़ियां च पै, कने बराड़ियां ने सौगी-सौगी बधे, पर बराड़ियें तिन्हाजो ढक्कील्या।

⁸“कने किछ ब्यू खरिया धरतिया पर पै, सै ब्यू उगे, जितना बाहीरा था फसल तिसते सौ गुणा पज्जी।” इतणियां गल्लां बोलणे ते बाद, यीशुये ऊच्चिया अवाज़ा च गलाया, “जो बी मेरी गल्ल सुणां, सै ध्यान देईने सुणो कने समझो।”

⁹तिसरे चेलयां तिसते पुच्छया, भई “इस कहाणिया रा क्या मतलब आ?”

¹⁰तिने जवाब दित्या, “तुहांजो परमेशरा रे राज्जा री छुपी रियां गल्लां जो समझणे री अक्कल दितिरी। पर हऊँ इन्हां कहाणियां रा इस्तेमाल बाहरल्यां लोकां ते इस बारे च सब किछ छिपाणे खातर करया राँ, ताकि पवित्र शात्रा रा लिखिरा पूरा हुई सक्को: ‘सै देखां ये भई हऊँ क्या कराँ, पर सै हकीकता च नीं देखदे; सै सुणां ये भई हऊँ क्या बोलां, पर सै तिन्हां रिया समझा च नीं औन्दा।’

¹¹“कहाणियां रा मतलब येआ : ब्यूआ त परमेशरा रा बचन आ।

¹²किछ लोक येढ़े तिन्हांरी बराबरी जे तिस ब्यूआ ते कित्ती जाई सक्कां इ सै जे बाट्टा च पैईरा। सै परमेशरा रा वचन जरूर सुणां ये, पर शैतान छोड़चा ने जां कने तिन्हांरे मनां ते तिस वचना जो मटाई देआं सै जे तिन्हें सुणया था। भई किति ये नीं हो भई सै विश्वास करीने छुटकारा पाईलो।

¹³किछ लोक येढ़े तिन्हांरी बराबरी तिन्हां ब्यूआं ते कित्ती जाई सक्कां इ सै जे पत्थरीली जमीन्ना पर पैया। ये सैए सै जे परमेशरा रा बचन खुशिया ने सुणां ये कने इकदम ग्रहण बी कराँ ये। पर वचन तिन्हांरे दिलां री गहराईया तक नीं जान्दा, काँह्भई सै सिर्फ थोड़े इ वगता तक विश्वास कराँ ये; सै तिन्हां पौध्यां साई ये तिन्हांरियां जड़ां जे डुग्गियां नीं हुन्दियां। ताहली जे परमेशरा रे सन्देशा पर विश्वास करने रिया वजह ने तिन्हां पर दुख कने तकलीफां औईयां, तां सै विश्वासा ते भटकीने पाप कराँ ये।

¹⁴किछ लोक येढ़े तिन्हांरी बराबरी अहें झाड़ियां औल़िया धरतिया ने करी सक्कां ए, सै जे बचनां जो सुणी ने ग्रहण त कराँ ये, पर जियां जे अग्गे बचनां च बधणे लगां ये तियां इ सै जिन्दगिया रे फिक्राँ च, धन-दौलत कने सुख सुबिदा रिया लालसा च फस्सी जायें तिसते जे तिन्हां रिया आत्मा रा बिकास नीं हुन्दा येढ़यां लोकां री फसल कदीं नीं पकदी।

¹⁵पर उपजाऊ जमीन, तिस पर जे ब्यू पौआं, सै भले मना रे, ईमानदार लोकां जो दस्सां सै जे परमेशरा रा बचन सुणां ये, कने तिस्सो अपणे जीवना च लागू करी लें, सै लगातार खरी फसल लेईने औयें।

¹⁶“कोई दिऊआ बाल़ीने बर्तणा ने नीं ढकदा, कने न मंजे रे हेठ रखदा, पर ऊच्चिया ठारी रखां, भई अन्दर औणे औल़े लोक तिसा लोई च चिज़ां जो देक्खी सक्को।

¹⁷सै जे किछ हूणा तक छुपीरा, सै इक दिन सामणे ल्याया जाणा, कने जो बी भेत आ सै सबनीं रे सामणे प्रगट कित्या जाणा।

¹⁸इस खातर, सै जे मेरिया गल्ला जो ध्याना ने सुणां कने समझां, परमेशर तिसजो होर जादा समझणे रे लायक बणां; पर सै जे मेरिया गल्ला जो ध्याना ने नीं सुणदा कने समझदा तिस सै बी भुल्ली जाणा तिसजो जे सै पैहले ते जाणदा हो।”

¹⁹इक दिन यीशुये री माता कने तिसरे भाई तिसने मिलणे आये। भीड़ा रिया वजह ने सै तिस तक पुज्जी नीं पाये।

²⁰फेरी किन्हिये यीशुये ने गलाया, “तुहांरी माता कने तुहांरे भाई लोक बाहर खढ़िरे; सै तुहांजो मिलणा चाँये।”

²¹यीशुये तिस्सो जबाब दित्या, “मेरी माता कने मेरे भाई सै सब लोक ये सै जे परमेशरा रा बचन सुणां ये कने तिसरा पालन कराँ ये।”

²²इक दिन यीशु अपणे चेलयां ने बोलां यें, “औआ, अहें नदिया रे उस पार चलिये।” ताहली सै किश्तिया पर चढ़े कने चलीपे।

²³पर ताहली जे किश्ती चलीरी थी, तां सै सैईगरा था; कने नदिया च तूफान आया, कने किश्ती पाणिये ने भरने लगी कने सै खतरे च थे।

²⁴फेरी तिन्हें नेड़े आईने तिस्सो जगाया कने बोलणे लगे, “गुरू जी! गुरू जी! अहें डुबी रायें!” यीशुये उट्ठीने तूफाना जो, कने पाणिये च उठदी लैहराँ जो फटकारया। तिसते बाद तूफान रुकिग्या, कने सब किछ शाँत हुईग्या!

²⁵फेरी यीशुये तिन्हाते पुच्छया, “तुहांरा विश्वास किति आ?” सै डरिये कने हैरान हुईने अप्पूँ चियें बोलणे लगे, “ये माहणु हाया कुण आ? इसरा हुक्म तूफान कने पाणी बी मन्नां ये।”

²⁶फेरी यीशु कने तिसरे चेले गलील रे सामणे, गिरासेनियों रे इलाके च पुज्जे,

²⁷यीशु जिस बगत किश्तिया ते उतरी कराँ था, तिस बगत तिस नगरा रा इक माहणु तिन्हाजो मिलया सै जे बुरीआत्मां रे बशा च था। सै किसी घरा च नीं रैंहदा था, कने नंगा घुमदा फिरदा रैयां था। सै मतयां दिनां ते कब्रिस्तान च रेआं था।

²⁸जियां जे तिने यीशुये जो देख्या, सै रड़ाया कने तिन्हारे सामणे धरतिया पर पैईने ऊच्चिया अवाज़ा च बोलणे लगया, “हे यीशु, परमप्रधान परमेशरा रे पुत्र, तू मिन्जो कष्ट कजो देआं? हऊँ तुहांते बिनती कराँ भई मिन्जो सजा नीं दे!”

²⁹काँह्भई यीशु पैहले तेई तिन्हां बुरीआत्मा जो तिस माहणुआ ते बाहर निकल़णे रा हुक्म देई कराँ था। ये बुरीआत्मा तिस माहणुये जो बार-बार अपणे वशा च कराँ थी। येत्थी तक भई, लोक तिस्सो संगल़ां ने बन्हीने कने बेड़ियां पाईने पैहरे च रखां थे पर सै संगल़ां कने बेड़ियां जो तोड़ी देआं था कने सै बुरीआत्मा री ताकत तिसजो सुनसान जगह च दौड़ाई रखां थी।

³⁰यीशुये तिसते पुच्छया, “तेरा नौं क्या?” तिने जबाब दित्या, “मेरा नौं आ सेना” काँह्भई बौहत सारी बुरीआत्मायें तिसच बड़ी गरियां थी।

³¹सै बुरीआत्मायें यीशुये ते बिनती करदी रैईयां भई “अहांजो नरका च जाणे रा हुक्म नीं दे।”

³²तित्थी पहाड़िया पर मते सारे सूर चरने लगीरे थे, कने तिन्हें तिसने बिनती कित्ती, भई “अहांजो इन्हां सूराँ च जाणे दे।” तिने तिन्हाजो जाणे दित्या।

³³फेरी बुरीआत्मां तिस माहणुये ते निकल़ीने सूराँ च बड़ी गियां कने सै सारे सूर पहाड़िया परा ते दरयावा च पैईगै, कने डुब्बी मरे।

³⁴चरवाहे ये जो किछ हुया था देखीने नट्ठे, कने नगरा च, कने गाँवां च जाईने तिसरी खबर सुणाई।

³⁵कने लोक ये जे हुया था तिसजो देखणे निकल़े, कने यीशुये ले आईने तिस माहणुये ते जे बुरीआत्मां निकल़ियां थीं, तिस्सो यीशुये रे पैराँ ले कपड़े पैहनीरा कने होशा च बैठिरा देखीने डरीगे।

³⁶कने देखणे औल़यां तिन्हांजो दस्या, भई बुरीआत्मा ते सताईरा ये माहणु किस तरिके ने ठीक हुया।

³⁷फेरी गिरासेनियों रे अक्खा-बक्खा रे सारेयां लोकें यीशुये ने बिनती किति, भई अहांरे इलाके ते चली जा; काँह्भई सै बड़े भरी डरी गरे थे। इस करीने सै किश्तिया पर चढ़ीने वापस चलिग्या।

³⁸फेरी तिस माहणुये चते जे बुरीआत्मायें निकाल़ी रियां थी, सै तिसते बिनती करने लगया भई मिन्जो अप्पूँ कने रैहणे दे, पर यीशुये तिस्सो भेज्जीने गलाया,

³⁹“अपणे घरा जो बापस जा कने लोकां जो दस्स भई कियां परमेशरे तेरे खातर बड्डे काम्म कित्ते।” सै जाईने सारे नगरा च प्रचार करने लगया, भई यीशुये मेरे खातर केढ़े बड्डे-बड्डे काम्म कित्ते।

⁴⁰यीशु कने तिसरे चेले जिस बगत नदिया रे दुज्जे कण्डे पुज्जे, तिस बगत लोकां री भीड़े तिन्हारा बड़िया खुशिया ने स्वागत कित्या, काँह्भई सै तिन्हाजो निहाल़ी राँ थे।

⁴¹इतणे च याईर नौआं रा इक माहणु आया, सै जे यहूदी सभा घरा रा मुखिया था, सै आया कने आईने यीशुये रे पैराँ पैईया, कने तिन्हाते विनती करने लगया भई मेरे घरा जो चल,

⁴²काँह्भई तिसरी सै जे बाराँ साल्लां री इको-इक कुड़ी थी, सै मरने औल़ी थी। ताहली जे यीशु तिस सौगी गया, तां लोक तिस पर पैईराँ थे।

⁴³तिसा भीड़ा च येढ़ि जनाना थी तिसाजो जे बारा साल्लां ते खून बैहणे री बमारी थी। तिसा जनाना ले सै जे किछ था सै सारा तिसे बैदां ले जाईने खर्ची दितिरा था, तां बी किसी ते ठीक नीं हुई थी।

⁴⁴सै पिच्छे ते आई कने यीशुये रे कपड़े रिया इक कनारिया ने छोई। तिसते बाद इकदम तिसारा खून बैहणा बंद हुईग्या।

⁴⁵इस पर यीशुये पुच्छया, “मेरने कुण छोया?” तां जे सारे मुकरने लगे, तां पतरस कने तिसरे साथियें गलाया, “स्वामी तिज्जो त सारिये भीड़े ढकी लरा, कने पले-पले तेरे ऊपर रुढ़ि कराँ इ।”

⁴⁶पर यीशुये तिसने गलाया, “नां, किन्हिये जाणी बुझी ने हऊँ छुया, काँह्भई मेरे चते सामर्थ निकल़ी, कने मैं इसजो महसूस बी कित्या।”

⁴⁷जिस बगत सै जनाना समझीगी भई यीशु जाणिग्या, फेरी सै कम्बदी हुई आई कने तिसरे पैराँ पैईगी। सारी भीड़े तिसारी गल्लां जो सुणया भई सै यीशुये ने कजो छोई थी, कने कियां सै इकदम चंगी हुईगी।

⁴⁸यीशुये तिसाजो गलाया, “बेटी, तेरे इ विश्वासे तिज्जो ठीक कित्या, बेफिक्र हुईने चली जा।”

⁴⁹जिस बगत सै तिसा जनाना ने गल्ल इ करी कराँ था भई यहूदी सभा घरा रे सरदार याईर रे घरा ते कोई ब्योरा लेईने आया, “तुहांरी बेटी मरीगी, हुण गुरुये जो दुख देणे री जरूरत नीं।”

⁵⁰पर ताहली जे यीशुये येढ़ा सुणया भई क्या हुया, तिन्हे याईर ने गलाया, “मत डरदा, सिर्फ मेरे ऊपर विश्वास रख, कने तेरी बेटी ठीक हुई जाणी।”

⁵¹जिस बगत सै याईर रे घरें पुज्जे, तिस बगत यीशुये पतरस, याकूब, यूहन्ना कने कुड़िया रे माता-पिता रे इलावा किसी होरी जो अपणिया सौगी घरा रे अंदर नीं औणे दित्या।

⁵²रोंदे कने बिलाप करदे लोकां ने सै घर भरीगरा था, पर यीशुये गलाया, “रोणा बंद करा! सै मरीरी नीं; सुतिरी।”

⁵³पर सै भीड़ तिन्हां पर हसणे लगी काँह्भई सै सारे जाणाँ थे भई सै मरी चुक्कीरी।

⁵⁴पर यीशुये तिसा कुड़िया रा हत्थ पकड़या, कने हाक पाईने गलाया, “बेटी, उट्ठ!”

⁵⁵तिस इ पल तिसारे प्राण वापस तिसा च आईगे कने सै इकदम उट्ठीने बैठिगी! फेरी यीशुये तिसा कुड़िया रे माता-पिता जो गलाया भई इसाजो किछ खाणे जो दित्या जाओ।

⁵⁶इस पर कुड़िया रे माता-पिता येढ़ा देखीने हैरान हुईगे, पर यीशुये तिन्हाजो हुक्म दित्या भई सै जे किछ बी तुहें देख्या सै किसी ने नीं गलाणा।