Read Bilaspuri यूहन्ना 15 Bible Online

यूहन्ना 15 - Bilaspuri bible

यूहन्ना 15

¹यीशुये गलाया, “हऊँ अँगूरा रिया बेली साई आ; कने मेरा पिता तिसरा माली आ।

²सै जे डाल़ी मेरे च हई कने फल़ नीं ल्यान्दी, तिस्सो सै बढी देआं। कने सै डालियां जे फल़ देईयां, तिन्हांजो सै छांगी देआं भई सै होर बौहत फल़ ल्याओ।

³तुहां लोकां जो सै जे उपदेश मैं दित्तिरा, तिसरिया वजह ते तुहें पैहले तेई सुच्चे हुईगरे।

⁴मेरे सौगी जुड़ीरे रौआ कने मांह तुहां सौगी रैहणा। जिस तरीके ने इक डाल़ी फल़ नीं देई सकदी, तदुआं तक जे सै बेली ने जुड़ी नीं जान्दी, इयां इ जे तुहें मांह च नींये, तां किछ अच्छा नीं करी सकदे।

⁵सै बेल हऊँ इ कने तुहें तिसरियां डाल़ियां इ। सै जे मांह च बणीरा रैआं, कने हऊँ तिसच, तां सै बौहत फल़वन्त हुआं, काँह्भई मेरते बिणा तुहें किछ नीं करी सकदे।

⁶जे कोई मांहने जुड़ीरा नीं रैंहदा तां सै टुटी रिया डालिया साई सटी दित्या जां कने सै सुकी जां। फेरी तिन्हां डालियां जो कट्ठयां करीने अग्गी च पाईने फुकी दें।

⁷जे तुहें मेरेने जुड़ीरे रौ कने मेरे उपदेशा रे मुतावक चलदे रौ, तां जो किछ तुहें चाँह यें मंगा, सै तुहांजो मिली जाणा।

⁸इसते मेरे पिता री बौहत बडयाई हुआं इ भई तुहें मेरे चेले बणीने बौहत फल़ पैदा करने औले हुईजो।

⁹तियां जे मेरे पिता परमेशरे मेरने प्यार कित्या, तियां इ मैं बी तुहांजो प्यार कित्या। मेरे प्यारा च बणीरे रौआ।

¹⁰जे तुहें मेरयां हुक्मां जो मनगे तां तुहां मेरे प्यारा च बणीरे रैहणा। तियां जे हऊँ पिता परमेशरा रे हुक्मां रा पालन करीने तिसरे प्यारा च बणीरा रैआं।

¹¹मैं तुहांजो ये गल्लां इस खातर बोलियां भई मेरा आनन्द तुहां च बणीरा रौ कने तुहांरा आनन्द उमड़दा रौ।

¹²“मेरा हुक्म येआ भई तुहें अप्पूँ चियें प्यार रखा, इयां इ तियां जे मैं तुहांजो प्यार कित्या।

¹³बडे ते बडा प्यार येआ भई कोई माहणु अपणे दोस्तां खातर अपणी जान बी दई दो, येढ़ा प्यार करना किसी बी माहणुये रे बशा रा काम्म निआं।

¹⁴जे तुहें मेरिया दस्सी रिया गल्ला पर चलां ये सै जे हऊँ बोलां, तां तुहें मेरे सच्चे दोस्त बणी जांये।

¹⁵हूणा ते बाद हऊँ तुहांजो दास नीं बोलदा; काँह्भई दास नीं जाणदा भई तिन्हांरा मालक क्या-क्या करया राँ, पर हऊँ तुहांजो दोस्त बोलां, काँह्भई मैं तुहांजो सारियां गल्लां बातां दस्सी रियां, सै जे मैं अपणे पिता ते सुणी रियां।

¹⁶तुहें मिन्जो नीं चुणया, पर मैं तुहांजो अपणे खातर चुणीरा; कने नियुक्त कित्तिरा भई तुहें जाओ कने कामयाब हुईने औआ, हऊँ चांह भई तुहांरी कमयाबी बणीरी रौ, काँह्भई ताहलूं जे तुहें पिता ते मेरे चेले हुणे रे नाते जो किछ मंग्गो, तां सै तुहांजो मिली जाओ।

¹⁷इन्हां गल्लां रा हुक्म हऊँ तुहांजो इस खातर दस्यारां भई तुहें इक्की दुजे ने प्यार रखा।

¹⁸“जे ये संसार रे लोक तुहांजो बैर रखां ये तां याद रखा भई तिन्हें तुहांते पैहले मेरने बैर रखया।

¹⁹जे तुहें इस संसारा रे लोकां साई हुंदे, तां संसारा रे लोक तुहांजो अप्पूँ साई प्यार करदे, पर तुहें संसारा रे नींये पर मैं तुहांजो संसारा चते चुणील्या; इस खातर संसार तुहांजो बैर कराँ।

²⁰मेरी गलाई रियां गल्लां जो याद रखा भई ‘इक दास अपणे मालका ते बडा निआं।’ इस खातर जे तिन्हें मिन्जो सताया तां तिन्हां तुहांजो बी सताणा; जे तिन्हें मेरा उपदेश मन्नया, तां तिन्हां तुहांरियां गल्लां बी मनणियां।

²¹मेरा चेला हुणे रिया वजह ते लोकां तुहांजो ये सब किछ करना, काँह्भई सै नीं जाणदे भई मिन्जो किने भेज्जिरा।

²²जे हऊँ नीं औन्दा कने तिन्हांने गल्लां नीं करदा, तां तिन्हां चते किसी बी पापी नीं हूणा था। पर हुण अपणे पापां खातर तिन्हाले कोई बी बहान्ना निआं।

²³सै जे मेरने बैर रखां, सै पिता ने बी बैर रखां।

²⁴जे हऊँ तिन्हां बिच सै चमत्कार नीं करदा सै जे किन्हिये बी नीं कित्ते, तां सै पापां रे दोषी नीं हुंदे; पर हुण तंजे तिन्हें सब किछ देखीने बी मेरने कने मेरे पिता ने बैर रखया।

²⁵पर ये इस खातर हुआ भई सै वचन पूरा ओ सै जे तिन्हां रिया व्यवस्था च लिखिरा, ‘तिन्हें बगैर किसी कारणा ते मेरने बैर रखया।’

²⁶पर तिस बगत जे सहायक औणा, ये सै पवित्र आत्मा सै जे पिता परमेशरा रिया तरफा ते औआं कने सै जे सच्च आ तिस्सो प्रगट करां। ताहली जे तिस औणा, तां तिस तुहांजो मेरे बारे च दसणा।

²⁷कने तुहांजो बी मेरे बारे च दुज्यां जो दसणा चाहिन्दा काँह्भई तुहें शुरु ते ही मेरने सौगी रै।