Read Bilaspuri यूहन्ना 5 Bible Online

यूहन्ना 5 - Bilaspuri bible

यूहन्ना 5

¹इन्हां गल्लां ते बाद यहूदियां रा इक त्योहार हुया, कने यीशु यरूशलेम नगरा जो गया।

²यरूशलेम च भेड-फाटका ले इक कुण्ड आ सै जे इब्रानी भाषा च बैतहसदा नौआं ते जाणया जां; तिसरे कनारे पांज्ज बराण्डे बणीरे।

³इन्हां बराण्डयां च बौहत सारे अन्हे, लंगड़े, बमार कने लकवे रे रोगी (पाणिये रे हिलणे रिया आशा च) पैईरे रैं थे।

⁴काँह्भई इक येढ़ा बगत हुआं था ताहली जे परमेशरा रे स्वर्गदूत कुण्डा च आईने पाणिये जो हिलां थे। पाणिये रे हिल्दे इ पैहले सै जे कोई कुण्डा च उतराँ, सै अपणियां सारियां बमारियां ते ठीक हुई जां था, चाये तिसरी कोई बी बमारी काँह नीं ओ।

⁵इन्हां रोगियां च इक येढ़ा रोगी बी था सै जे ठत्तियां साल्लां ते बमार पैईरा था।

⁶ताहली जे यीशुये तिस्सो देख्या कने तिसरे बारे च सारा हाल जाणीने भई ये कईयां साल्लां ते इसा हालता च पैईरा, तां तिने तिसते पुच्छया, “क्या तू ठीक हूणा चाँह?”

⁷तिने रोगिये तिस्सो जबाब दित्या, “प्रभु जी, मेरले कोई माहणु निआं सै जे पाणिये रे हिलणे पर, मेरी कुण्डा च जाणे च मदद करा; पर ताहली जे हऊँ पाणिये च जाणे री कोशिश करां, तां मेरे जाणे ते पैहले कोई दुज्जा माहणु पाणिये च उतरी जां।”

⁸यीशुये तिसजो गलाया, “उट्ठ, अपणी चट्टाई चक्कीने चल फिर।”

⁹सै माहणु इकदम ठीक हुईग्या, कने अपणी चट्टाईया चक्कीने चलने फिरने लगया।

¹⁰सै विस्राम दिन था। इस खातर यहूदी अगुवे तिस ठीक हुईरे माहणुये जो गलाणे लगे, भई आज्ज त विस्राम दिन आ, “तिज्जो अजके दिन अपणिया चट्टाईया जो चकणे री इजाजत नीं।”

¹¹इस पर तिने जबाब दित्या, भई “तिने जे हऊँ ठीक कित्या, तिने इ मिन्जो गलाया, ‘अपणी चट्टाई चक्क कने चल फिर।’ ”

¹²तिन्हे लोकें तिसते पुच्छया, “सै कुण माहणु आ तिने जे तिज्जो गलाया, ‘चट्टाई चक्क कने चल फिर’?”

¹³पर सै माहणु जे ठीक हुईरा था, सै नीं जाणदा था भई सै कुण आ, काँह्भई तिसा जगह मती भीड़ थी कने यीशु ऊत्थीते चुपचाप चलिग्या।

¹⁴इन्हां गल्लां ते बाद सै माहणु यीशुये जो मन्दरा च मिलया कने तिस्सो गलाया, “देख, हुण तू त ठीक हुईग्या; इस खातर दोबारा पाप देक्खां करदा, नैत किति येढ़ा नीं ओ भई कोई इसते बड्डी मुश्कल तूह पर आई जाओ।”

¹⁵तिने माहणुये जाईने यहूदी अगुवेयां ने बोलित्या भई तिने जे हऊँ ठीक कित्या, सै यीशु आ।

¹⁶इसा बजह ने यहूदी अगुवे यीशुये जो तंग करने लगे, काँह्भई सै येढ़े काम्म विस्राम रे दिन कराँ था।

¹⁷इस पर यीशुये तिन्हाजो गलाया, “मेरा पिता परमेशर कदीं काम्म बन्द नीं करदा, इस खातर हऊँ बी लगातार काम्म कराँ।”

¹⁸इसा बजह ने यहूदी अगुवे तिसजो मारने री होर बी जादा कोशिश करने लगे, काँह्भई सै न सिर्फ विस्राम रे दिना री बिधिया जो तोड़ां, पर परमेशरा जो अपणा पिता बोलीने, अप्पूँजो तिसरे बराबर समझां था।

¹⁹इस पर यीशुये तिन्हांजो गलाया, “हऊँ तुहांजो सच्चाई दस्सां, भई पुत्र यनि हऊँ खुद अपणे आप किछ मनी करी सकदा, सै सिर्फ तियां कराँ तेढ़ा जे सै पिता परमेशरा जो करदे देक्खां; काँह्भई तिन्हां-तिन्हां कम्मां जो जे सै कराँ तिन्हांजो हऊँ पुत्र बी तियां इ कराँ।

²⁰काँह्भई पिता परमेशर पुत्रा ने प्यार कराँ कने जितने काम्म जे सै खुद कराँ तिन्हां सारयां कम्मां जो सै तिस्सो दस्सां, कने पिता इन्हाते बी बड्डे काम्म तिस्सो दसणे, ताकि तुहें हैरान हुईजो।

²¹काँह्भई तियां जे पिता मूईरयां जो ठवाल़ीने तिन्हांजो नौंईं जिन्दगी देआं, तियां इ पुत्र बी तिन्हौं जे चाँह तिन्हौं जिन्दगी देआं।

²²कने पिता किसी रा बी न्याय नीं करदा, पर तिने न्याय करने रा सारा काम्म पुत्रा जो सौंपीतरा,

²³इस खातर भई सारे लोक तियां जे पिता परमेशरा रा आदर कराँ ये तियां इ पुत्रा रा आदर बी करो। सै माहणु जे पुत्रा रा आदर नीं करदा, सै तिस पिता परमेशरा रा आदर बी नीं करदा तिने जे मिन्जो भेज्जिरा।

²⁴हऊँ तुहांजो सच्च बोलां, सै जे मेरा बचन सुणीने मेरे भेजणे औल़े पर विश्वास कराँ, सै अनन्त काल रा जीवन पां; कने तिस पर सजा रा हुक्म नीं हुन्दा, पर सै अनन्त काल रिया मौती ते बचीने पैहले तेई नईया जिन्दगिया च दाखल हुई चुक्कीरा।

²⁵“हऊँ तुहांजो सच्च बोलां भई सै बगत औणे औल़ा बल्कि आई चुक्कीरा, तिसच जे आत्मिक तरिके ने मूईरयां लोकां परमेशरा रे पुत्रा रा यनि मेरा बचन सुणना, कने सै जे सुणगे तिन्हां अनन्त जीवन पाणा।

²⁶काँह्भई जिसा रितिया ने पिता परमेशर अप्पूँ च जीवन रखां, तियां इ तिने पुत्रा जो बी ये अधिकार दित्या भई अप्पूँ च जीवन रक्खूँ;

²⁷बल्कि मिन्जो न्याय करने रा बी अधिकार दित्या, इस खातर भई हऊँ माहणुये रा पुत्र आ।

²⁸इसते चम्भा नीं करा; काँह्भई सै बगत आई कराँ भई जितने मूईरे लोक ये, तिन्हां मेरा बचन सुणीने कब्रां ते बाहर निकल़ी औणा।

²⁹तिन्हेजे खरे काम्म कित्तिरे थे तिन्हां अनन्त जीवन पाणे रे खातर जिऊंदा हुई जाणा, कने तिन्हे जे बुरे काम्म कित्तिरे तिन्हौ बी मूईरयां चा ते उट्ठीने इन्हां बुरयां कम्मां री सजा भुगतणे पौणी।

³⁰“हऊँ खुद अप्पूँ ते किछ मनी करी सकदा; पर हऊँ सै जे किछ परमेशरा ते सुणां, सिर्फ तिसरे इ मुतावक न्याय कराँ; कने मेरा न्याय सच्चा, काँह्भई हऊँ अपणिया इच्छा ते नीं बल्कि तिसरी इच्छा चाँह तिने जे हऊँ भेज्जिरा।

³¹जे हऊँ खुद अपणी गवाही देऊं, तां मेरी गवाही सच्ची नीं।

³²मेरिया तरफा ते गवाही देणे औल़ा इक होर आ, कने हऊँ जाणाँ भई सै जे मेरी गवाही देआं सै सच्ची।

³³तुहें लोकां जो यूहन्ने ले भेज्या कने तिने सच्चाईया री गवाही दित्ति।

³⁴पर हऊँ अपणे बारे च माहणुआ री गवाही नीं चाहन्दा; तां बी ये गल्लां हऊँ इस खातर बोलां भई तुहांरा छुटकारा हुई सक्को।

³⁵यूहन्ना तिस दिऊए साई था सै जे बल़िने रोशनी देआं, कने तुहांजो थोड़िया देरा खातर तिसरिया जोता च मगन हूणा ठीक लगया।

³⁶पर मेरले सै जे गवाही सै यूहन्ने रिया गवाहिया ते बी बड्डी; काँह्भई सै काम्म जे पिता परमेशरे मिन्जो पूरा करने खातर सौंपीरा यनिके हऊँ तिन्हां इ कम्मां जो करी रां कने सैई काम्म मेरे गवाह ये भई पिता परमेशरे मिन्जो भेज्जिरा।

³⁷कने पिता परमेशर तिने जे हऊँ भेज्जिरा, तिने इ मेरी गवाही दित्ति। तुहें लोकें न कदीं तिसरी अवाज सुणिरी, कने न तिस्सो आमणे सामणे देखीरा;

³⁸कने पिता परमेशरा रा बचन अपणे अन्दर नीं रखदे, काँह्भई तिस्सो जे पिता परमेशरे भेज्जिरा तुहें तिस पर विश्वास नीं करदे।

³⁹तुहें पवित्रशास्त्रा च टोल़ां ये, काँह्भई तुहें समझां ये भई तिसच तुहांजो अनन्त जीवन मिलां, पर ये सारे पवित्रशास्त्र मेरी इ गवाही दें;

⁴⁰फेरी भीं तुहें अनन्त जीवन पाणे खातर मेरले नीं औणा चाहन्दे।

⁴¹हऊँ माहणुआं ते आदर नीं चाहन्दा।

⁴²पर हऊँ तुहांजो जाणाँ भई तुहांरे अन्दर परमेशरा रा प्यार निआं।

⁴³हऊँ अपणे पिता परमेशरा रे नौआं ते आईरा, कने तुहें मिन्जो ग्रहण नीं करदे; पर जे कोई होर अपणे इ नौआं ते आओ, तां तिसजो ग्रहण करी लेणा।

⁴⁴तुहें माह पर विश्वास नीं करी सक्कां ये, काँह्भई तुहें त अप्पूँ बाटियें इक दुज्जे ते आदर लेणा पसन्द कराँ ये, कने तुहें इकमात्र परमेशरा ते तारीफ पाणे री कोशिश नीं करदे।

⁴⁵ये नीं सोच्चा भई माह पिता रे सामणे तुहां पर दोष लगाणा; तुहां पर दोष लगाणे औल़ा त मूसा, तिस पर जे तुहें भरोसा रखीरा।

⁴⁶काँह्भई जे सच्चीजो तुहें मूसे पर विश्वास करदे, तां तुहें माह पर बी विश्वास करदे हुन्दे, इस खातर भई तिने मेरे बारे च लिखिरा।

⁴⁷पर जे तुसें तिसरी लिखी रियां गल्लां पर इ विश्वास नीं करदे, तां मेरियां गल्लां पर कियां विश्वास करगे?”