Read Bilaspuri यूहन्ना 7 Bible Online

यूहन्ना 7 - Bilaspuri bible

यूहन्ना 7

¹इन्हां गल्लां ते बाद यीशु गलील प्रदेशा च घुमदा रैया; काँह्भई यहूदी अगुवे तिस्सो मारने रा जतन करीराँ थे, इस खातर सै यहूदिया प्रदेशा च घुमणा नीं चाहन्दा था।

²यहूदियां रा झोंपड़ियां रा त्योहार नेड़े आईरा था।

³इस खातर यीशुये रे भाईयें तिसजो गलाया, “तुहांजो ये जगह छड्डिने यहूदिया प्रदेशा च चली जाणा चाहिन्दा, ताकि तेरे चेले तेरे चमत्काराँ जो ऊत्थी बी देक्खी सक्को तिन्हांजे तू कराँ।

⁴काँह्भई येढ़ा कोई नीं हूणा सै जे मशहूर हूणा चाओ, कने लुक्खीने काम्म करो। जे तू चमत्कारा रे काम्म कराँ, तां अप्पूँजो सारे संसारा रे सामणे परगट कर।”

⁵काँह्भई यीशुये रे भाई बी तिस पर विश्वास नीं करदे थे।

⁶फेरी तिने तिन्हांने गलाया, “तुहांरे खातर सारा बगत आ, पर हल्तियें तक मेरा सही बगत नीं आईरा।

⁷संसारा रे लोक तुहांजो बैर नीं करी सकदे, पर सै माहने बैर रक्खां काँह्भई हऊँ तिन्हांरे बरोधा च ये गवाही देआं भई तिन्हांरे काम्म बुरे।

⁸तुहें त्योहारा च जावा; हऊँ हल्तियें इस त्योहारा च नीं जाई सकदा, काँह्भई हल्तियां तक मेरा बगत पूरा नीं हुईरा।”

⁹सै येढ़ा गलाणे ते बाद गलील च रुकिग्या।

¹⁰पर ताहली जे तिसरे भाई त्योहारा च चलिये तां सै अप्पूँ बी गया, पर सै सामणे नीं, छुपीने गया था।

¹¹यहूदी अगुवे त्योहारा च तिस्सो ये बोलीने टोल़णे लगे, भई “यीशु किति आ?”

¹²कने लोकां च तिसरे बारे गुप-चुप कई सारी गल्लां हुईयां मते जणे बोलीराँ थे, “सै बड़ा खरा माहणु आ।” कने कई बोल्लां थे, “नां, सै लोकां जो भटकां।”

¹³तां बी यहूदी अगुवेयां रे डरा रे मारे कोई बी माहणु तिसरे बारे च खुल्ही ने नीं बोल्ली पां था।

¹⁴ताहली जे त्योहारा रे अधे दिन बितिगे; तां यीशु मन्दरा च जाईने उपदेश देणे लगया।

¹⁵फेरी यहूदी अगुवे चम्भा करीने गलाणे लगे, “ये माहणु सै जे कदीं स्कूला नीं गया फेरी भीं इतणा किछ कियां जाणाँ?”

¹⁶यीशुये तिन्हांजो जबाब दित्या, “सै उपदेश जे हऊँ देआं सै मेरा अपणा निआं, पर ये परमेशरा रिया तरफा ते आ, तिने जे हऊँ भेज्जिरा।

¹⁷जे कोई परमेशरा रिया मर्जिया पर चलना चाओ, तां सै इस उपदेशा रे बारे च समझी जांगा भई जो उपदेश हऊँ देआं सै परमेशरा रिया तरफा ते आया या हऊँ अपणिया तरफा ते देई कराँ।

¹⁸सै जे अपणिया तरफा ते बोलां, सै अपणी बडयाई करवाणा चाँह; पर सै जे अपणे भेजणे औल़े री बडयाई चांह सैई सच्चा माहणु आ, कने तिसच कोई खोट निआं।

¹⁹मूसे त तुहांजो व्यवस्था दित्तिरी, पर तुहां चाते कोई बी तिस पर अमल नीं करदा। तुहें मिन्जो कजो मारना चांये?”

²⁰लोकें जबाब दित्या, “तू बुरीआत्मा रे वशा चा! तिज्जो कुण मारना चांह?”

²¹यीशुये तिन्हांजो जबाब दित्या, “मैं इक काम्म कित्या कने तुहां सब्बीं जो हैरानी हुईगी।

²²इसा वजह ने मूसे तुहांजो खतने रा हुक्म दित्या (ये नियम मूसे रा नीं था बल्कि तुहांरे पूर्वजां ते चलदा आईराँ), कने तुहें विस्राम रे दिन माहणुये रा खतना कराँ ये।

²³विस्राम दिना च माहणुये रा खतना इस खातर कित्या जां ताकि मूसे री व्यवस्था नीं टुट्टो, तां तुहें माह पर कजो इस खातर गुस्सा कराँ ये भई मैं विस्राम रे दिन इक्की माहणुये जो बिल्कुल ठीक कित्या?

²⁴मुँह देखीने न्याय नीं करा, पर सच्चाईया रे मुतावक ठीक न्याय करा।”

²⁵फेरी यरूशलेम च रैहणे औल़े किछ लोक बोलणे लगे, “क्या ये सैई माहणु निआं, तिस्सो जे यहूदी अगुवे मारने रा जतन करी रायें?

²⁶मगर देक्खा, सै त सारयां लोकां ने निधड़क गलाई बोलीराँ कने कोई तिसजो किछ नीं गलाईरां। क्या यहूदी अगुवेयां सच्चीजो जाणील्या भई येई मसीह आ?

²⁷खैर अहें त इसजो जाणाँ ये भई ये माहणु किति ते आईरा; पर ताहली जे सच्चे मसीह औंणा, तां किसी जो बी पता नीं चलना भई सै कितिते आया।”

²⁸फेरी यीशुये मन्दरा रे अंगणा च उपदेश देन्दे हुये जोरा ने गलाया, “तुहें मिन्जो जाणाँ ये, कने ये बी जाणाँ ये भई हऊँ कित्तिरा। हऊँ त अपणिया मर्जिया ते नीं आईरा, पर मिन्जो भेजणे औल़ा सच्चा, तिस्सो तुहें नीं जाणदे।

²⁹पर हऊँ तिस्सो जाणाँ काँह्भई हऊँ तिसरिया तरफा ते आ कने तिने इ हऊँ भेज्जिरा।”

³⁰तिसरिया इसा गल्ला पर सै यीशुये जो गिरफ्तार करना चाहया, पर कोई बी तिसजो हात्थ नीं पाई सक्कया, काँह्भई तिसरा बगत हल्तियें नीं आईरा था।

³¹फेरी भीं भीड़ा चते बौहत लोकें तिस पर विश्वास कित्या कने बोलणे लगे, “मसीहे ताहली जे औणा तां तिस क्या इसते बी जादा चमत्कारी नशाण दसणे सै जे इने दस्से?”

³²फरीसियें लोकां जो यीशुये रे बारे च हौल़यां-हौल़यां ये गल्लां गलान्दे हुए सुणया; कने मुखियायाजकें कने फरीसियें तिस्सो पकड़ने जो मन्दरा रे पैहरेदार भेज्जे।

³³इस पर यीशुये गलाया, “हऊँ होर थोड़िया देरा तक तुहां सौगी आ, तिसते बाद माह तिसलौ बापस चली जाणा तिने जे हऊँ भेज्जिरा।

³⁴तुहां हऊँ टोल़णा, पर माह तुहांजो नीं मिलणा; कने तित्थी जे हऊँ आ, तित्थी तुहें नीं आई सकदे।”

³⁵फेरी यहूदी अगुवे अप्पूँ बाटियें गलाणे लगे, “इस किति जो जाणा भई तित्थी जे अहें इस्सो टोल़ी नीं पांगे? शायद इस यूनानी नगरा च तितर-बितर हुईने बसीरे यहूदियां ले जाणा, कने यूनानियां जो बी उपदेश देणा?

³⁶ये क्या गल्ल हुई सक्कां इ सै जे तिने गलाई, भई तुहां हऊँ टोल़णा, पर माह तुहांजो नीं मिलणा; कने तित्थी जे माह हूणा, तित्थी तुहें नीं आई सकदे?”

³⁷फेरी त्योहारा रे खत्म हुणे औल़े दिन, सै जे खास दिन आ, यीशु उट्ठया कने जोरा ने गलाया, “जे कोई प्यासा ओ तां मेरले आईने पीओ।

³⁸सै जे माह पर विश्वास करगा, तियां जे पवित्रशास्त्र बोलां तिसरे दिला ते जीवना रे पाणिये री नदियां बैहणे लगी जाणियां।”

³⁹तिने ये बचन पवित्र आत्मा रे बारे च गलाया, तिस्सो जे तिस पर विश्वास करने औल़े पाणे औल़े इ थे; सै आत्मा हल्तियें किसी पर बी उतरी रा नीं था, काँह्भई यीशु हल्तियें अपणिया महिमा च नीं आईरा था।

⁴⁰फेरी भीड़ा चते किछ लोकें ये गल्लां सुणीने गलाया, “सच्चीजो येई सै भविष्यवक्ता तिसरे औणे री जे अहें उम्मीद करी रांये।”

⁴¹होरसी गलाया, “ये मसीह आ।” पर किन्हिये गलाया, “कां? क्या मसीहे गलील प्रदेशा ते औणा?

⁴²क्या पवित्रशास्त्रा च ये नीं लिखिरा भई मसीहा दाऊद रे कुल़ा ते हूणा कने तिस बैतलहम गाँवां ते औणा, तित्थी जे दाऊद रैयां था?”

⁴³इस खातर तिसरिया वजह ने लोकां च फूट पैईगी।

⁴⁴तिन्हां चते कितणे तिस्सो पकड़ना चांह थे, पर किन्हिये तिसजो हात्थ नीं लाया।

⁴⁵इस खातर मन्दरा रे पैहरेदार मुखियायाजकां कने फरीसियां ले बापस आये; तिन्हें पुच्छया, “तुहें तिस्सो काँह नीं ल्याये?”

⁴⁶पैहरेदारें जबाब दित्या, भई “किन्हिये माहणुये कदीं येढ़ियां गल्लां नीं कित्तियां तियां जे सै माहणु बोल्लां।”

⁴⁷फरीसियें तिन्हाजो जबाब दित्या, “क्या तुहें बी तिसरे जाल़ा च त नीं फसीगे?

⁴⁸क्या यहूदी अगुवेयां या फरीसियां चते किन्हिये तिस पर विश्वास कित्या?

⁴⁹पर ये लोक सै जे मूसा री व्यवस्था नीं जाणदे, सै परमेशरा खा ते स्रापित ये।”

⁵⁰निकुदेमुसे (सै जे पैहले राति जो यीशुये ले आया था कने तिन्हां फरीसियां चते इक था) तिन्हाने गलाया,

⁵¹“क्या अहांरी व्यवस्था, किसी माहणुये जो सुणे बगैर भई सै क्या कराँ, गुनहगार समझां इ?”

⁵²तिन्हे तिसजो जबाब दित्या, “क्या तू बी गलीली आ? पवित्रशास्त्रा जो पढ़, तां तिज्जो पता चलना भई गलील प्रदेशा ते कदीं कोई भविष्यवक्ता नीं औणा।”

⁵³फेरी सारे अपणे-अपणे घरा जो चलिये।