Read Bilaspuri यूहन्ना 8 Bible Online

यूहन्ना 8 - Bilaspuri bible

यूहन्ना 8

²कने अगले दिन तड़के इ सै फेरी मन्दरा रे अंगणा च आया; बौहत लोक तिसलौ आये कने सै बैठीने तिन्हौं उपदेश देणे लगया।

³फेरी यहूदी शास्त्री[9] कने फरीसी व्यभिचार करदी हुई इक्की जनानां जो पकड़ीने ली आये, कने तिसाजो लोकां रे बिच खड़ा करीने यीशुये ने गलाया,

⁴“गुरू जी, ये जनाना बुरा काम्म करदी हुई पकड़ोई।

⁵व्यवस्था च मूसे अहां जो ये हुक्म दित्या भई येढ़ियां जनानां जो पत्थराव करो। इस खातर तू इसा जनाना रे बारे च क्या बोलां?”

⁶तिन्हे यीशुये जो परखणे रे खातर ये गल्ल बोल्ली ताकि तिन्हाजो कोई येढ़ा बहान्ना मिली जाओ तिसते जे सै तिस पर कोई दोष लगाई सक्को। पर यीशु थल्ले खौ झुकीने अपणिया गुट्ठिया ने धरतिया पर लिखणे लगया।

⁷काँह्भई सै तिसजो बार-बार पुछदे इ रैये, इस खातर यीशु सिधा हुईने खढ़या कने तिन्हांजो गलाया, “तुहां च सै जे पापी निआं सै सब्बीं ते पैहले इसा जनाना जो पत्थर मारो।”

⁸कने सै फेरी भीं ते थल्ले खौ झुकीने धरतिया पर लिखणे लगया।

⁹ताहली जे लोकें येढ़ा सुणया तां तित्थी ते बड्डयां ते लेईने छोटयां तक, हौल़यां-हौल़यां इक-इक करीने खिसकणे लगे, कने यीशु कल्हा रैहीग्या, कने सै जनाना बी ऊत्थी बिच खढ़ी रैई।

¹⁰यीशु सिधा हुईने खढ़या कने तिसाजो गलाया, “नारी, सै सब जणे कितो गये? क्या तिज्जो किन्हिये सजा देणे रा हुक्म नीं दित्या?”

¹¹तिसे गलाया, “प्रभु जी, नां किन्हिये नीं।” यीशुये गलाया, “हऊँ बी तिज्जो सजा देणे रा हुक्म नीं देन्दा; जा, हुण दोबारा फेरी पाप देक्खां करदी।”

¹²फेरी यीशुये भीं लोकां ने गलाया, “संसारा री जोति हऊँ आ; सै जे मेरे पिच्छे चलगा कदीं अन्धेरे च नीं रैहन्गा, पर तिस सै जोति पाणी सै जे अनन्त जीवन देईं।”

¹³इस पर फरीसियें तिसने गलाया; “तू अपणी गवाही अप्पूँ देआं इस खातर तेरी गवाही ठीक नीं।”

¹⁴यीशुये तिन्हांजो जबाब दित्या, भई “जे हऊँ अपणी गवाही अप्पूँ देआं, तां बी मेरी गवाही ठीक इ, काँह्भई हऊँ जाणाँ भई हऊँ किति ते आईरा कने किति जो जां? पर तुहें लोक ये नीं जाणदे भई हऊँ किति ते आईरा कने किति जो जां।

¹⁵तुहें लोक माहणुआं रे नियमा रे मुतावक न्याय कराँ ये; हऊँ किसी रा न्याय नीं करदा।

¹⁶कने जे हऊँ न्याय करूँ बी, तां मेरा न्याय सच्चा; काँह्भई हऊँ कल्हा निआं, पर हऊँ पिते सौगी आ, तिने जे मिन्जो भेज्जिरा।

¹⁷कने मूसा रिया व्यवस्था च बी लिखिरा भई दुईं जणयां री गवाही मिलीने ठीक हुआं इ;

¹⁸इक त हऊँ अपणी गवाही अप्पूँ देआं, कने दुज्जे पिता मेरी गवाही देआं तिने जे हऊँ भेज्जिरा।”

¹⁹इस पर लोकें तिसजो गलाया, “तेरा पिता किति आ?” यीशुये जबाब दित्या, “न तुहें मिन्जो जाणदे, न त मेरे पिता जो, जे तुहें मिन्जो जाणदे हुन्दे, तां मेरे पिता जो बी जाणी लेन्दे।”

²⁰ये गल्लां तिने मन्दरा रे अंगणा च उपदेश देन्दे हुये भण्डार घरा च बोल्ली, कने किन्हिये बी तिस्सो नीं पकड़या, काँह्भई तिसरे दुख सैहणे कने मरने रा बगत हल्तियें नीं आईरा था।

²¹यीशुये तिन्हांने इक बार भीं गलाया, “हऊँ दूर जाया राँ कने तुहां मिन्जो टोलणा कने लगातार पाप करने ते मरी जाणा; तित्थी जे हऊँ जां, तित्थी तुहें नीं आई सकदे।”

²²इस पर यहूदी अगुवेयां गलाया, “क्या तुहें सोच्चां ये भई सै आत्म हत्या करने औल़ा? काँह्भई तिने गलाया, ‘तित्थी जे हऊँ जाईराँ तुहें तित्थी नीं आई सकदे’?”

²³तिने तिन्हाने गलाया, “तुहें थल्ले रे कने हऊँ स्वर्गा रा; तुहें इस संसारा रे, हऊँ इस संसारा निआं।

²⁴इस खातर मैं तुहांजो गलाया भई तुहां अपणयां पापां च मरना, काँह्भई जे तुहें मांह पर विश्वास नीं करगे भई हऊँ सैई आ, तां तुहां अपणयां पापां च मरी जाणा।”

²⁵यहूदी अगुवेयां तिसते पुच्छया, “तू कुण आ?” यीशुये तिन्हांजो जबाब दित्या, “तदुआं ते जे मैं उपदेश देणा शुरु कित्या, हऊँ तुहांजो दसदा आईरा भई हऊँ कुण आ!

²⁶तुहांरे बारे च गलाणे जो कने तुहांरा न्याय करने जो मेरले बौहत किछ आ; पर मेरा भेजणे औल़ा सच्चा, कने जो किछ हऊँ तिसते सुणां, सैई संसारा ने बोलां।”

²⁷सै ये नीं समझी पाये भई यीशु तिन्हांजो पिता रे बारे च गलाया दा सै जे स्वर्गा चा।

²⁸फेरी यीशुये गलाया, “ताहली जे तुहें लोक माहणुये रे पुत्रा जो यनि मिन्जो ऊच्चिया ठारी चढ़ांगे, तां जाणगे भई हऊँ सैई आ; कने हऊँ अपणिया तरफा ते किछ नीं करदा, पर तियां जे मेरे पिता परमेशरे मिन्जो सखाईरा, हऊँ तियां इ ये गल्लां बोलां।

²⁹कने मेरा भेजणे औल़ा मेरे कन्ने आ; तिने हऊँ सुनसान जगह च नीं छड्डीरा, काँह्भई हऊँ सदा सैई काम्म कराँ तिसते जे मेरा पिता खुश हुआं।”

³⁰ताहली जे सै ये गल्लां गलाई ही कराँ था भई बौहत सारयां लोकें तिस पर विश्वास कित्या।

³¹फेरी यीशु तिन्हां यहूदी अगुवेयां ने गलाणे लगया सै जे तिस पर विश्वास कराँ थे, “जे तुहें लोक मेरी सखाई रियां सारियां गल्लां जो सुणीने अपणयां सारयां कम्मां जो तिसरे मुतावक कराँ ये, तां सच्चीजो तुहें मेरे चेले हुणे।

³²कने जे तुहें सच्चाई जाणगे, तां सच्चाईया तुहें अजाद करने।”

³³इस पर तिन्हे यीशुये जो जबाब दित्या, “अहें त अब्राहमा रे बंशा ते, कने कदीं किसी रे दास नीं हुये। फेरी तू कियां बोलां भई तुहां अजाद हुई जाणा?”

³⁴यीशुये तिन्हाजो जबाब दित्या, “हऊँ तुहांजो सच्च बोलां भई सै जे कोई पाप करदा रैयां, सै पापां रा दास आ।

³⁵कने दास सै जे पापां रे वशा चा सदा घरें नीं रैंहदा; पुत्र सदा रैआं।

³⁶इस खातर जे पुत्र तुहांजो अजाद करो, तां सचमुच तुहां अजाद हूणा।

³⁷हऊँ जाणाँ भई तुहें अब्राहम रे बंशा ते; फेरी बी तुहां मेरियां सखाई रियां गल्लां रा पालन नीं करना, इस खातर तुहें मिन्जो मारी देणा चांये।

³⁸हऊँ सैई बोलां सै जे मैं अपणे पिता ले देख्या; कने तुहें बी सैई करदे रैं सै जे तुहें अपणे पिता ते सुणीरा हुआं।”

³⁹तिन्हे तिसजो जबाब दित्या, “अहांरा पूर्वज त अब्राहम आ।” यीशुये तिन्हाने गलाया, “जे तुहांरा पूर्वज अब्राहम आ, तां तुहें तिन्हां कम्मां जो करदे सै जे अब्राहमे कित्ते थे।

⁴⁰पर इसरे बजाय हुण तुहें मिन्जो मारना चांये, काँह्भई मैं त तुहांजो सच्चाई दस्सी सै जे मैं परमेशरा ते सुणिरी; तुहां साई त अब्राहमे मनीं कित्या हुंणा।

⁴¹नां, ताहली जे तुहें इस तरिके रा काम्म कराँ ये तां तुहें अपणे पिता रे हुक्मा रा पालन करी रांये सै जे परमेशर आ।” तिन्हे यीशुये जो जबाब दित्या, “अहें व्यभिचारा ते नीं जम्मीरे, अहांरा सिर्फ इक इ पिता सै जे परमेशर आ।”

⁴²यीशुये तिन्हाजो जबाब दित्या, “जे परमेशर तुहांरा पिता हुन्दा, तां तुहें मेरने प्यार रखदे; काँह्भई हऊँ तुहांले परमेशरा रिया तरफा ते आईरा; हऊँ येत्थी अपणिया मर्जिया ने नीं आईरा, पर तिने मिन्जो भेज्जिरा।

⁴³तुहें समझी नीं सकदे भई हऊँ क्या बोलीराँ? येढ़ा इस खातर आ काँह्भई तुहें मेरा सन्देश सुणने जो इन्कार कराँ ये।

⁴⁴तुहें अपणे पिता शैतान्ना री सन्तान ये कने अपणे पिता रियां इच्छां जो पूरा करना चाँये। सै त शुरु ते खूनी आ कने तिने कदीं सच्चाईया रा पक्ष नीं लेआ, काँह्भई सच्च तिसच हाया इ निआं। झूट्ठ बोलणा त तिसरे स्वाभावा ची हाया; काँह्भई सै झूट्ठा कने सारयां झूट्ठां जो जन्म देणे औल़ा पिता।

⁴⁵पर हऊँ जे सच्च बोलां, तां इस खातर तुहें मेरा विश्वास नीं करदे।

⁴⁶तुहां चते कुण माह पर पापी हुणे रा लांछन लगाई सक्कां? जे हऊँ सच्च बोल्लां, तां तुहें मेरा विश्वास काँह नीं करदे?

⁴⁷सै जे परमेशरा रा माहणु आ, सै परमेशरा रियां गल्लां सुणां; कने तुहें इस खातर मेरियां गल्लां नीं सुणदे भई तुहें परमेशरा रे लोक नींये।”

⁴⁸ये सुणीने यहूदियें तिसने गलाया, “क्या अहांरा ये बोलणा ठीक नीं था भई तू सामरी आ, कने तूह च इक बुरीआत्मा इ?”

⁴⁹यीशुये जबाब दित्या, “माह पर कोई बुरीआत्मा नीं: पर हऊँ त अपणे पिता रा आदर कराँ, कने तुहें मेरी बेज्जति कराँ ये।

⁵⁰हऊँ अपणे खातर आदर नीं चांह; इक हाया सै जे मिन्जो आदर देणा चांह, कने सै न्यायी बी आ सै जे न्याय कराँ।

⁵¹हऊँ तुहांजो सच्च बोल्लां भई जे कोई माहणु मेरियां सखाई रियां गल्लां रा पालन करगा, तिस कदीं नीं मरना।”

⁵²यहूदियें तिसने गलाया, “हुण अहें जाणीगे भई तूह च बुरीआत्मा समाईरी। अब्राहम मरीग्या, कने भविष्यवक्ते बी मरीये; कने तू बोल्लां, ‘जे कोई मेरियां सखाई रियां गल्लां रा पालन करगा, तिस कदीं नीं मरना।’

⁵³क्या तू अहांरे पूर्वज अब्राहमा ते बड्डा, सै जे मरीगरा? क्या तू भविष्यवक्तयां ते बड्डा सै जे मरीगरे। तिज्जो क्या लगां भई तू हाया?”

⁵⁴यीशुये जबाब दित्या, “जे हऊँ अप्पूँ अपणी प्रशंसा करूँ, तां मेरी सै प्रशंसा किछ मनी; पर मेरी प्रशंसा करने औल़ा मेरा पिता, तिस्सो जे तुहें बोल्लां ये भई सै अहांरा परमेशर आ।

⁵⁵तुहें त तिस्सो कदीं नीं जाणया : पर हऊँ तिस्सो जाणाँ। जे हऊँ बोलूं भई हऊँ तिस्सो नीं जाणदा, तां हऊँ बी तुहां साई झूट्ठा समझया जाणा; पर हऊँ तिस्सो जाणाँ कने तिसरे हुक्मा रा पालन कराँ।

⁵⁶तुहांरे पूर्वज अब्राहमे मेरा दिन देखीने आनन्द मनाया; तिने देख्या कने खुश था।”

⁵⁷यहूदी अगुवेयां तिसने गलाया, “तू हल्तियें तक पंजाह साल्लां रा बी निआं, फेरी तू कियां बोल्ली सक्कां भई मैं अब्राहमा जो देखीरा?”

⁵⁸यीशुये तिन्हाने जबाब दित्या, “हऊँ तुहांजो सच्च बोलां, भई अब्राहम रे पैदा हुणे ते पैहले, हऊँ था कने हऊँ आ।”

⁵⁹फेरी इस पर लोकें यीशुये जो मारने खातर पत्थर चक्के, पर सै तिन्हां वलाते हटया कने मन्दरा ते निकल़ीने दूर चलिग्या।