Read Bilaspuri प्रेरितां 10 Bible Online

प्रेरितां 10 - Bilaspuri bible

प्रेरितां 10

¹कैसरिया नगरा च कुरनेलियुस नौआं रा इक माहणु था, सै जे इतालियानी नौआं रिया पलटना रा सुबेदार था।

²सै परमेशरा ते डरने औल़ा माहणु था, कने अपणे सारे घराने समेत परमेशरा ते डराँ था, सै गरीब यहूदी लोकां जो बौहत दान देआं था कने परमेशरा ने बौहत प्राथना कराँ था।

³तिने तकरीवन दोपैहरके तिन्न बजे दर्शणा च साफ-साफ देख्या भई परमेशरा रा इक स्वर्गदूत अन्दरा आया कने गलाया, “कुरनेलियुस!”

⁴तिने बड़िया गौरा ने स्वर्गदूता जो देख्या कने डरदे हुये गलाया, “प्रभु जी,” तुहें क्या चाँये “तेरी प्राथना कने तेरे दान यादगारा रे तौरा पर परमेशरा रे सामणे पुज्जी गरे;

⁵कने हुण याफा नगरा च माहणु भेज्जीने शमौना जो, तिसरा नौं जे पतरस आ, सद्दी ले।

⁶सै शमौन, चमड़े रा काम्म करने औल़े रे घरें परौणा, तिसरा घर समुद्रा रे कण्डे आ।”

⁷ताहली जे सै स्वर्गदूत तिने जे कुरनेलियुस ने गल्लां कीतियां थिआं चलिग्या, तां तिसरे दो सेवक, कने सै जे सिपाही तिसरे सामणे मौजूद रैं थे तिन्हां चते इक परमेशरा ते डरने औल़े सिपाहिये जो सदया,

⁸कने तिन्हांजो सब गल्लां दस्सीने पतरसा जो ल्यौणे खातर याफा नगरा जो भेज्या।

⁹दुजे दिन ताहली जे सै तिन्न माहणु चलदे-चलदे नगरा रे नेड़े पुज्जे, तां दपैहर रे बगता पतरस छत्ता पर प्राथना करने जो गया।

¹⁰तिस्सो भुख लगी कने किछ खाणा चाँह् था, ताहली जे सै रोटी त्यार करया राँ थे, तां सै बेसुध हुई गया;

¹¹कने तिने देख्या, भई अम्बर खुली गया कने इक बड्डी चादर चऊँ पासयां ते बझीरी, धरतिया पर उतरया राईं।

¹²तिसच जे धरतिया रे सब्बीं प्रकाराँ रे चऊँ पैराँ औल़े कने रेंगणे औल़े जन्तु कने अम्बरा रे पंछी थे।

¹³तिस्सो इक येढ़ि अवाज़ सुणी, “हे पतरस उट्ठ, मार कने खा।”

¹⁴पर पतरसे गलाया, “नां प्रभु, येढ़ा नीं हुई सकदा; काँह्भई मैं कदीं बी कोई अपवित्र या अशुद्ध चीज़ नीं खाद्दि री।”

¹⁵फेरी दुज्जी बारी तिस्सो तेढ़ा इ सुणया, “जो किछ परमेशरे शुद्ध बणाईरा, तिस्सो तू अशुद्ध मत बोलदा।”

¹⁶तिन्न बार येढ़ा इ हुआ; तां ताहलूं इ सै बड्डी चादर अम्बरा जो वापस हुईगी।

¹⁷तां पतरस अपणे मना च परेशान था, भई इस दर्शणा जो सै जे मैं देखीरा क्या मतलब हुई सक्कां तां देखो, सै माहणु तिन्हांजो जे कुरनेलियुसे भेजीरा था, शमौना रे घरा रा पता लाईने दरवाजे पर आईने खड़ीगे,

¹⁸कने हाक पाईने पुछणे लगे, “क्या शमौन तिस्सो जे पतरस बोलां ये, येत्थी मैहमान आ?”

¹⁹पतरस सै जे तिस दर्शणा रे बारे च सोचया राँ था, भई पवित्र आत्मे तिस्सो गलाया “देख, तिन्न माहणु तिज्जो टोलया रायें।

²⁰हुण उट्ठीने थल्ले जा हलाँकि सै होरीं जातियां रे लोक ये फेरी भीं तिन्हां सौगी निधड़क हुईने जा, काँह्भई मैंई तिन्हांजो भेजीरा।”

²¹तां पतरसे थल्ले उतरी ने तिन्हां माहणुआं ने गलाया, “देक्खा, तिस्सो जे तुहें टोलया रायें, सै हऊँ इ हाया। तुहांरे औणे रा क्या मकसद आ?”

²²तिने गलाया, “कुरनेलियुस सुबेदार सै जे धर्मी कने परमेशरा ते डरने औल़ा कने जितने यहूदी लोक तिसरे बारे च जाणाँ ये सै बोलां ये भई सै बौहत भला माहणु आ। इक पवित्र स्वर्गदूते तिसजो गलाया, भई शम्मौन, पतरसा जो मिलणे खातर किसी जो जोप्पा जाणे जो बोल कने तिन्हांजो येत्थी ल्याव भई जो किछ सै बोलणा चाँह तिस्सो तू सुणी पाओ।”

²³तां तिने तिन्हांजो अन्दरा जो सद्दीने तिन्हांरी सेवा किति। दुज्जे दिन तां जे सै तिन्हां सौगी गया, याफा नगरा रे विश्वासी भाईयां चते बी कई तिसने सौगी चलीगे।

²⁴कने अगले दिन सै कैसरिया नगरा च पुज्जे कने कुरनेलियुस अपणे रिस्तेदाराँ जो कने प्यारे मित्रा जो कट्ठा करीने तिन्हांरा इन्तजार करया राँ था।

²⁵तां जे पतरस अन्दरा जो आया रां था, तां कुरनेलियुस तिसने मिलया, कने तिसरे पैराँ पर पईने मत्था टेक्कया;

²⁶पर पतरसे तिस्सो ऊठाईने गलाया, “खड़ा हो, मिन्जो मत्था टेकणा नीं कर हऊँ बी त इक माहणु आ।”

²⁷कने तिसने सौगी गल्ल बात करदा अन्दरा जो चली गया, कने मत्यां लोकां जो कट्ठेयां देखीने

²⁸पतरसे तिन्हांने गलाया, “तुहें जाणाँ यें भई अन्यजातियां री संगती करना या तिन्हां ला जाणा अहां यहूदियां खातर नियमा रे खलाफ आ, पर परमेशरे मिन्जो दस्या भई किसी माहणुये जो अपवित्र या अशुद्ध नीं बोलूं।

²⁹इस खातर तां जे तुहें मिन्जो सदया तां बिणा किछ गलाये औणे री किति। हुण हऊँ पुच्छां भई मिन्जो किस कम्मां खातर सद्दीरा?”

³⁰कुरनेलियुसे गलाया, “चार दिनां ते पैहले इस वगत, हऊँ अपणे घरा च तकरीवन तिन्न बजे प्राथना करया राँ था; तां देखो, इक माहणु चमकीले कपड़े पैहनीने, मेरे सामणे आईने खड़ा हुआ

³¹कने बोलणे लगया, ‘कुरनेलियुस, तेरी प्राथना सुणीलरी कने तेरे दान परमेशरा रे सामणे याद कित्ते गईरे।

³²इस खातर किसी जो याफा नगर भेज्जीने शमौन्ना जो सद्दीलै, तिस्सो जे पतरस बी बोलां ये। सै समुद्रा रे कनारे, चमड़े रा काम्म करने औल़े शमौन रे घरें मैहमान आ।’

³³तां मैं तेरे ला झट-पट लोक भेजे, कने तैं भला कित्या भई आई गया। हुण येत्थी अहें सब परमेशरा रे सामणे, भई जो किछ परमेशरे तेरने बोलीरा तिस्सो सुणीये।”

³⁴तां पतरसे गलाया हुण हऊँ पक्का जाणी गया भई परमेशर किसी ने भेद-भाव नीं करदा,

³⁵पर हर जातिया चते सै जे परमेशरा ते डराँ ये कने धर्मा रे काम्म कराँ ये, तिन्हांजो परमेशर ग्रहण कराँ।

³⁶सै जे वचन तिने इस्राएलियां ला भेज्या, ताहली जे तिने यीशु मसीह रे जरिये सै जे सब्बीं रा प्रभु आ शान्तिया री खुशखबरी सुणाई,

³⁷सै वचन तिस्सो जे तुहें जाणाँ ये, सै जे यूहन्ना रे बपतिस्मे रे प्रचारा ते बाद गलील प्रदेशा ते शुरु हुईने यहूदिया प्रदेशा रे बौहत सारे लाकयां च फैलीग्या;

³⁸परमेशरे कियां-कियां नासरत नगरा रे यीशुये जो पवित्र आत्मा कने सामर्था ते अभिषेक कित्या; सै भलाई करदा कने जितने लोक सै जे शैताने सताईरे थे, ठीक करदा फिरया, काँह्भई परमेशर तिसने सौगी था।

³⁹“अहें तिन्हां कम्मां रे गवाह ये; सै जे तिन्हें यहूदिया रे प्रदेशा कने यरूशलेम नगरा च बी कित्ते, कने यहूदी अगुवेयां यीशुये जो लकड़िया रे क्रूसा पर लटकाईने मारीत्या।

⁴⁰पर तिस्सो परमेशरे तिज्जे दिन ज्यूंदा कित्या, कने प्रगट बी करी तरा;

⁴¹सब्बीं लोकां पर नीं पर तिन्हां गवाहां पर तिन्हांजो जे परमेशरे पैहले ते चुणीलरा था, मतलब अहां पर तिने जे तिसने मूईरेयां चते जी उठणे ते बाद खादया-पित्या;

⁴²कने तिने अहांजो हुक्म दित्या भई सारयां लोकां च प्रचार करा कने गवाही देआ भई ये सैई आ तिस्सो जे परमेशरे जिऊंदेयां रा कने मूईरयां रा न्यायी बणाईरा।

⁴³तिसरे सब भविष्यवक्ता गवाही देआंये भई जो कोई तिस पर विश्वास करगा, तिस्सो तिसरे नौआं रे जरिये पापां री माफी मिलणी।”

⁴⁴पतरस ये गल्लां गलाया इ कराँ था भई पवित्र आत्मा वचना रे सब सुणने औल़यां परा उतरी गया।

⁴⁵कने जितने यहूदी विश्वासी पतरसा ने सौगी आईरे थे, सै सब हैरान हुये भई अन्यजातियां परा बी पवित्र आत्मा रा दान मिलया राँ।

⁴⁶काँह्भई तिन्हें तिन्हांजो लग-लग भाषा बोलदे कने परमेशरा री बडयाई करदे सुणया। इस पर पतरसे गलाया,

⁴⁷“क्या कोई इन्हां लोकां जो पाणिये ते बपतिस्मा लेणे ते रोकी सक्कां, तिन्हेंजे परमेशरा ते अहां साई पवित्र आत्मा पाईरा?”

⁴⁸कने पतरसे हुक्म दित्या भई तिन्हांजो यीशु मसीह रे नौआं ते बपतिस्मा देओ। तां तिन्हें पतरसा ने विनती किति भई सै किछ दिन होर अहां सौगी रौ।