Read Bilaspuri प्रेरितां 11 Bible Online

प्रेरितां 11 - Bilaspuri bible

प्रेरितां 11

¹फेरी प्रेरितें कने होर विश्वासी भाईयें सै जे यहूदिया प्रदेशा रे कई लाकयां च रैयां थे ये सुणया, भई अन्यजातियां बी परमेशरा रे वचना पर विश्वास करी लरा।

²इस खातर तां जे पतरस यरूशलेम च आया, तां खतना कित्तिरे लोक तिसने बहस-बाजी करने लगे,

³“तेरा सिर्फ होरीं जातिया रे लोकां ले जाणा ही गल़त नींआ, पर तिन्हां सौगी खाणा बी गल़त आ।”

⁴तां पतरसे तिन्हांजो शुरु ते बारो-बरतिया बोलीने सुणाया:

⁵“हऊँ याफा नगरा च प्राथना करया राँ था, कने बेसुध हुईने इक दर्शण देख्या भई इक बड्डिया चादरा साई चऊँ कुणयां ते लटकाई रा, अम्बरा ते उतरी ने मेरले आया।

⁶तां जे मैं तिस पर ध्यान कित्या, तां तिसच धरतिया रे चऊँ खुराँ औल़े कने जंगला रे पशु कने धरतिया पर रगड़ीने चलने औल़े जन्तु कने अम्बरा रे पंछी देखे;

⁷कने ये अवाज़ सुणी, ‘हे पतरस उट्ठ, मार कने खा।’

⁸मैं गलाया, ‘नां प्रभु, नां; काँह्भई कोई अपवित्र कने अशुद्ध चीज़ मेरे मुँआं च कदीं मनी गईरी।’

⁹इसरे जवाबा च अम्बरा ते दुज्जी बार अवाज़ आई, ‘जो किछ परमेशरे शुद्ध बणाईरा, तिस्सो अशुद्ध मत बोलदा।’

¹⁰तिन्न बार येढ़ा इ हुआ; तां सब किछ अम्बरा परा खंजोईग्या।

¹¹“फेरी ताहलूं इ तिन्न माहणु सै जे कुरनेलियुसे कैसरिया नगरा ते मेरला भेज्जीरे थे, तिस घरा च तिसच जे अहें रुकीरे थे, आईने खड़ीगे।

¹²तां पवित्र आत्मे मिन्जो तिन्हांने बिणा शक कित्ते जाणे जो गलाया, कने छे भाई बी मेरे सौगी-सौगी आये; कने अहें तिस माहणुये रे घरा जो गये।

¹³तिने अहांजो दस्या, भई तिने इक्की स्वर्गदूता जो अपणे घरा च खढ़िरा देख्या तिने जे तिसने गलाया, ‘याफा च माहणु भेज्जीने शमौना जो तिस्सो जे पतरस बोलां ये, सद्दी ले।

¹⁴तिस तुहांजो येढ़ियां गल्लां बोलणियां, तिन्हांते जे तू कने तेरे घरा रे सारे लोक परमेशरा बचाणे।’

¹⁵“ताहली जे हऊँ गल्लां करने लगया, तां पवित्र आत्मा तिन्हां परा तिसा इ रितिया ते तियां इ उतरया तियां जे शुरु च पिन्तेकुस्त रे त्योहारा पर अहां पर उतरया था।

¹⁶तां मिन्जो प्रभुये रा ये वचन याद आया; सै जे तिने गलाया, ‘यूहन्ने त पाणिये ने बपतिस्मा दित्या, पर तुहां पवित्र आत्मा ते बपतिस्मा पाणा।’

¹⁷“इस खातर तां जे परमेशरे तिन्हांजो बी सैई दान दित्या, सै जे अहांजो प्रभु यीशु मसीह पर विश्वास करने ते मिलया था; तां हऊँ कुण था सै जे परमेशरा जो रोकी सकुं?”

¹⁸येढ़ा सुणी ने यहूदी विश्वासी चुप रै, कने परमेशरा री बडयाई करीने बोलणे लगे, “तां परमेशरे अन्यजातियां जो बी अनन्त जीवना खातर मन फराणे रा दान दित्तिरा।”

¹⁹स्तिफनुस रे मारे जाणे ते बाद बौहत सारे विश्वासी लोक यरूशलेम छड्डिने बिखरी गरे थे कने फिरदे-फिरदे फीनीके प्रदेश कने साइप्रस टापुये कने अन्ताकिया नगरा च पुज्जे; पर यहूदियां जो छड्डिने किसी होरी जो परमेशरा रा वचन नीं सुणांदे थे।

²⁰पर तिन्हां चते किछ विश्वासी साइप्रसवासी कने कुरेनी वासी थे, सै अन्ताकिया नगरा च आईने यूनानियां जो बी प्रभु यीशुये रिया खुशखबरिया रियां गल्लां प्रचार करने लगे।

²¹परमेशरा रा सामर्थ तिन्हां पर था, कने बौहत सारे अन्यजातियां रे लोकें तिन्हांरे सन्देशा पर विश्वास कित्या कने प्रभु यीशुये री तरफ फिरे।

²²ताहली जे तिन्हांरी चर्चा यरूशलेम रे विश्वासियें सुणी, तां तिन्हें बरनबास जो अन्ताकिया नगरा च भेजित्या।

²³सै तित्थी पुज्जी ने कने परमेशरा रा अनुग्रह देखीने खुश हुआ, कने सबनीं जो ये उपदेश दित्या भई तन-मन लाईने प्रभुये ने चिपकी रे रौआ।

²⁴सै इक भला माहणु था, कने पवित्र आत्मा कने विश्वासा ते भरीरा था; कने होर बौहत सारे लोक प्रभुये च आईगे।

²⁵फेरी बरनबास अन्ताकिया नगरा जो छड्डिने शाऊला जो टोलणे खातर तरसुसा नगरा जो चलिग्या।

²⁶कने ताहली जे सै तिसने मिलया तां तिस्सो अन्ताकिया नगरा जो लैई आया; कने येढ़ा हुआ भई पौलुस कने बरनबास इक्की साल्ला तका कलीसिया ने सौगी मिलदे कने बौहती लोकां जो प्रभु यीशु मसीह रा उपदेश देन्दे रै; कने सब्बीं ते पैहले अन्ताकिया बिच लोकें चेलेयां जो मसीही बोल्या।

²⁷तिन्हां दिनां च किछ विश्वासी सै जे भविष्यवक्ता थे यरूशलेम ते अन्ताकिया च आये।

²⁸तिन्हां चते अगबुस नौआं रे इक्की भविष्यवक्ते खड़ीने पवित्र आत्मा रिया प्रेरणा ते ये दस्या भई संसारा रे बौहत सारयां देशां च नकाल़ पौणा, कने सै नकाल़ कलौदियुस बादशाह रे बगता च हुया।

²⁹तां चेलयां ये फैसला कित्या भई सब अपणे-अपणे धना रे मुतावक यहूदिया प्रदेशा च रैहणे औल़े मसीह विश्वासिया रे खातर अपणिया सामर्थय रे मुतावक सहायता करें।

³⁰तिने येढ़ा इ कित्या; कने बरनबास कने शाऊला रे हथें प्राचीनां ला किछ पैसा भेजित्या।