Read Bilaspuri प्रेरितां 12 Bible Online

प्रेरितां 12 - Bilaspuri bible

प्रेरितां 12

¹तिस बगत हेरोदेस राजा कलीसिया रे किछ लोकां जो सताणे खातर तिन्हौं बन्दी बणाईल्या।

²तिने यूहन्ना रे भाई याकूब जो तलवारा ने मरवाईत्या।

³तां जे तिने देख्या भई यहूदी लोक इस कम्मां ते खुश हुआं ये, तां तिने पतरसा जो बी पकड़ील्या। सै दिन अखमीरी रोटिया रा त्योहार था।

⁴हेरोदेस राजे पतरसा जो पकड़ीने जेलखान्ने च पाया, कने चार-चार सपाहियां जो चऊँ बगता ते पैहरे पर रखया; येढ़ा सोच्चीने भई फसहा रे त्योहारा ते बाद तिस्सो लोकां रे सामणे न्याय कित्या जाओ।

⁵पतरस कईयां दिनां ते जेल खाणे च बन्द था; पर कलीसिया तिस खातर पूरा दिल लाईने परमेशरा ने प्राथना करया राँ थी।

⁶तां जे हेरोदेस तिस्सो लोकां रे सामणे न्याय करने जो ल्यौणे इ औल़ा था, तिसा राति पतरस दुईं जंजीराँ ते बन्हीरा दुईं सपाहियां रे बिच सुतीरा था; कने पैहरा देणे औल़े, दरवाजे पर जेल खाणे री रखवाली करया राँ थे।

⁷फेरी अचानक, प्रभुये रा इक स्वर्गदूत तित्थी पतरसा ले आईने खड़ा हुईग्या कने तिसा ओवरिया च जोति चमकी, कने तिने पतरसा रिया बखिया पर हाथ मारीने तिस्सो ठुआली ने गलाया, “उट्ठ, छोड़े कर।” कने तिसरे हत्था ते जंजीराँ खुल्ही ने पई गियां।

⁸तां स्वर्गदूते तिस्सो गलाया, “लक्का बन्ह कने अपणे जुट्टे पैहनी ले।” तिने तेढ़ा इ कित्या। फेरी स्वर्गदूते पतरसा ने गलाया, “अपणा कोट पैहनीने मेरे पिच्छे आई जा।”

⁹सै निकल़ीने तिसरे पिच्छे चलीप्या; पर ये नीं जाणदा था भई जो किछ स्वर्गदूत करया राँ सै सच आ, पर ये समझया राँ था भई हऊँ दर्शण देख्यारा।

¹⁰तां सै पैहले कने दुज्जे पैहरे ते निकल़ीने तिस लोहे रे फाटका पर पुज्जे, सै जे नगरा खौ था। सै तिन्हां खातर अप्पूँ इ खुलीग्या, कने सै निकल़ीने इक्की गलिया चियें गये, कने ताहलूं इ स्वर्गदूत तिस्सो छड्डिने चलिग्या।

¹¹फिर पतरसे होशा च आईने गलाया, “हुण मैं ये जाणील्या भई प्रभुये अपणा स्वर्गदूत भेज्जीने मिन्जो हेरोदेस रे अधिकारा ते छडवाईल्या, कने यहूदी अगुवेयां री सारी आशा तोड़ी तियां।”

¹²ये जाणीने भई परमेशरे पतरसा जो बचाया कने सै यूहन्ना री माता मरियमा रे घरें आया तिस्सो जे मरकुस बोलां ये। तित्थी बौहत सारे विश्वासी लोक कट्ठे हुईने प्राथना करया राँ थे।

¹³तां जे तिने फाटका री खिड़की ठल़काई, तां रूदे नौआं री इक दासी देखणे जो आई।

¹⁴पतरसा री अवाज़ पछयाणी ने तिसे खुशिया री मारीये फाटक नीं खोल्या, पर दौड़ीने अन्दरा जो गई कने दस्या भई पतरस दरवाजे पर खढ़िरा।

¹⁵तिन्हें तिसाने गलाया, “तू पागल तनी हुईगरी।” पर तिसे जोर देईने गलाया भई ये पतरस इ हाया। तां तिन्हें गलाया, “तिसरा स्वर्गदूत हुंगा।”

¹⁶पर पतरस दरवाजा ठल़कांदा इ रैया: इस खातर तिन्हें खिड़की खोल्ली, कने तिस्सो देखीने हैरान हुये।

¹⁷तां तिन्हें तिन्हांजो हत्था रा सहारा कित्या भई चुप रौआ; कने तिन्हांजो दस्या भई प्रभुये कियां-कियां तिस्सो जेल्ला ते कड्डया। फेरी गलाया, “याकूब कने भाईयां जो ये गल्ल दस्सी देयों।” तां निकल़ीने दुज्जिया जगह जो चलिग्या।

¹⁸तड़के इ जेल्ला रे सपाहियां च बौहत अफरा तफरी मचीगी भई पतरसा जो क्या हुआ।

¹⁹ताहली जे हेरोदेस तिस्सो टोल़णे रा हुक्म दित्या कने पतरस नीं मिलया, तां पैहरा देणे औल़यां री जाँच करीने हुक्म दित्या भई सै मारी दित्ते जाओ : कने हैरोदेश यहूदिया प्रदेशा जो छड्डिने कैसरिया नगरा च जाईने किछ वगता तक रैहणे लगया।

²⁰हेरोदेस सूर कने सैदा नगरा रे लोकां ते बौहत नराज था। इस खातर तिस नगरा रे किछ मुखिये इक मन हुईने तिसने मिलणे आये, कने बलास्तुस जो सै जे राजे रा कर्मचारी था, मनाई ने मेल कराणा चाँह थे; काँह्भई राजे रे देशा ते तिन्हांरे देशा री पाल़ हुआं थी।

²¹तैह कित्तिरे दिन हेरोदेस राजे तिस नगरा रे लोकां ने मिलणे री योजना बणाई। हेरोदेस राजे रा पैहरावा पैहनीने संघासणा पर बैट्ठया, कने तिन्हांजो प्रवचन देणे लगया।

²²तां लोक बोल्ली उठे, “येत माहणुआं री नीं परमेशरा री अवाज़ इ।”

²³ताहलूं इ प्रभुये रे इक्की स्वर्गदूते तिस्सो सजा दित्ति कने सै बमार हुईग्या, काँह्भई तिने परमेशरा जो महिमा नीं दित्ति कने तिसजो गुज्जे पै कने सै पीड़ा रे मारे मरीग्या।

²⁴पर परमेशरा रा वचन बधदा कने फैलदा गया कने विश्वासियां री संख्या बधदी गई।

²⁵बरनबास कने शाऊल यरूशलेम नगरा ते यहूदी प्रदेशा रे विश्वासियां री सहायता खातर पैसा देणे ते बाद यरूशलेम ते अन्ताकिया नगरा जो वापस आये। तिन्हां सौगी यूहन्ना बी था तिस्सो जे मरकुस बोल्ला थे।