Read Bilaspuri प्रेरितां 18 Bible Online

प्रेरितां 18 - Bilaspuri bible

प्रेरितां 18

¹इसते बाद पौलुस एथेंस नगरा जो छड्डिने कुरिन्थुस नगरा च आया।

²तित्थी तिस्सो अक्विला नौआं रा इक यहूदी मिलया, तिसरा जन्म पुन्तुस प्रदेशा च हुईरा था। सै अपणी पत्नी प्रिस्किल्ला ने सौगी इटली प्रदेशा ते नौआं-नौआं आईरा था, काँह्भई बादशाह कलौदियुस सब्बीं यहूदियां जो रोमा ते निकल़णे रा हुक्म दित्तिरा था। इस खातर सै तिन्हां ला गया।

³पौलुस कने अक्विला रा इक जेआ काम्म था, इस खातर सै तिन्हां सौगी रैया कने सै काम्म करने लगे; कने तिन्हांरा तम्बू बनाणे रा काम्म था।

⁴कने पौलुस हर विस्राम रे दिन यहूदी सभा घर च वाद-विवाद करीने यहूदियां कने यूनानियां जो बी यीशु मसीह पर विश्वास करने जो समझां था।

⁵तां जे सीलास कने तिमुथियुस मकिदुनिया प्रदेशा च आये, तां पौलुस वचन सुनाणे रे जोशा च यहूदियां जो गवाही देणे लगया भई यीशु इ मसीह आ।

⁶पर ताहली जे यहूदी पौलुस रे बरोधा च निंध्या करने लगे, तां तिने अपणे कपड़े झाड़ी ने तिन्हांने गलाया, “जे परमेशर तुहांजो सजा देंगा, तां ये तुहांरी अपणी गल़ती हूणी! हऊँ निर्दोष आ। हूणा ते मांह परमेशरा रा वचन सुनाणे जो अन्यजातियां ले जाणा।”

⁷कने यहूदी सभा घरा ते चलीने सै तीतुस युसतुस नौआं रा परमेशरा ते डरने औल़े, अन्यजाति माहणुये रे घरें परमेशरा रा वचन सखाणे गया; तिसरा घर यहूदी सभा घरा सौगी था।

⁸तां यहूदी सभा घरा रे सरदारे क्रिस्पुस अपणे सारे घराने समेत प्रभुये परा विश्वास कित्या। कने मते सारे कुरिन्थ वासियें सुणी ने विश्वास कित्या कने बपतिस्मा लेया।

⁹प्रभुये इक्की राति दर्शण देईने पौलुसा जो गलाया, “मत डर, बोल्ली जा कने चुप मत रै;

¹⁰काँह्भई हऊँ तेरे सौगी आ, कने कोई तेरे परा चढ़ाई करीने तेरा नुक्शान नीं करी सकदा; काँह्भई इस नगरा च बौहत सारे लोक ये तिन्हांजे माह पर विश्वास करना।”

¹¹इस खातर पौलुस तिन्हां च परमेशरा रा वचन सुणांदे-सुणांदे सै इक साल छेआं महीनयां तका रैया।

¹²तां जे गल्लियो अखाया प्रदेशा रा राजपाल था, तां यहूदी लोक येक्का करीने पौलुसा परा लड़ने आईगे। कने तिस्सो न्याय आसणा रे सामणे ल्याईने बोलणे लगे;

¹³“ये लोकां जो समझावां भई परमेशरा री अराधना इयां-इयां करा, सै जे व्यवस्था रे मुतावक निआं।”

¹⁴ताहली जे पौलुस बोलणे जो त्यार इ था, तां गल्लियो येढ़ा यहूदियां ने गलाया, “हे यहूदियो, जे ये किछ अन्याय या दुष्ट गल्ल हुंदी, तां पक्का इ हऊँ तुहांरी सुणदा।

¹⁵पर जे ये गल्ल वाद-विवाद, शब्दां, कने नौआं, कने तुहांरिया अपणिया व्यवस्था रे बारे ची तां तुहें इ जाणो; काँह्भई हऊँ इन्हां गल्लां रा जज नीं बणना चाहन्दा।”

¹⁶कने गल्लियो तिन्हांजो न्याय आसणा रे सामणे ते बाहरौ निकल़वाईत्या।

¹⁷तां बौहत सारे लोकें यहूदी सभा घरा रे सरदार सोस्थिनेसा जो पकड़ीने न्याय आसणा रे सामणे मारया गया। पर गल्लियो इन्हां गल्लां री किछ बी चिन्ता नीं किति।

¹⁸पौलुस बौहतीं दिनां तका कुरिन्थ नगरा च रैया फेरी विश्वासियां ते विदा हुईने किंख्रिया नगरा च चलिग्या तिस नगरा च पौलुसे अपणा सिर मुंडवाया काँह्भई तिने संगल़प लेईरा था, बाद बिच समुद्रा रे रस्ते सीरिया प्रदेशा जो चलिग्या, तिसने सौगी प्रिस्किल्ला कने अक्विला थे।

¹⁹तिन्हें इफिसुस नगरा च पुज्जी ने प्रिस्किल्ला कने अक्विला जो छडया, कने अप्पूँ यहूदी सभा घर च जाईने यहूदियां ने वाद-विवाद करने लगया।

²⁰ताहली जे लोकें तिसने विनती कित्ती, “अहां सौगी होर किछ दिन रै।” तां सै नीं मन्नया;

²¹पर सै येढ़ा बोलीने तिन्हांते विदा हुआ, “जे परमेशरे चाहया तां हऊँ तुहां ला फेरी औंगा।” तां सै इफिसुस ते जहाजा खोली ने चलीप्या;

²²कने कैसरिया नगरा च उतरी ने (यरूशलेम नगरा जो) गया कने कलीसिया रे विश्वासियां जो नमस्कार करीने अन्ताकिया नगरा च आया।

²³फेरी किछ दिन रईने सै अन्ताकिया ते चलिग्या कने इक्की तरफा ते गलातिया रे कने फ्रूगिया परदेशा रे सब चेलयां जो मजबूत करदा रैया।

²⁴अपुल्लोस नौआं रा इक यहूदी माहणु, तिसरा जन्म जे सिकन्दरिया नगरा च हुईरा था, सै जे विद्वान माहणु कने पवित्रशास्त्रा जो खरे ढंगा ने जाणाँ था, इफिसुस च आया।

²⁵तिने प्रभुये रे रस्ते री खरी शिक्षा पाईरी थी, कने मन लगाईने यीशुये रे बारे च ठीक-ठीक सुणावां कने सखांवां था, पर सै सिर्फ यूहन्ना रे बपतिस्मे री गल्ल जाणाँ था।

²⁶सै यहूदी सभा घरा च निधड़क हुईने बोलणे लगया, ताहली जे प्रिस्किल्ला कने अक्विला तिसजो बोलदे हुये सुणया तां सै तिस्सो अपणे घरें ल्याईने होर जादा बारीकिया ने तिस्सो परमेशरा रे रस्ते रे बारे च समझाया।

²⁷कने ताहली जे तिने अखाया प्रदेशा जो जाणा चाया तां विश्वासियें तिसरी हिम्मत बधाई कने उत्थीरे चेलयां जो तिसरा स्वागत करने जो लिखीने भेज्या। कने ताहली जे सै ऊत्थी पुज्या तां तिन्हां लोकां रे खातर बौहत मद्‌दगार साबित हुया तिन्हें जे अनुग्रह ने विश्वास ग्रहण करील्या था।

²⁸काँह्भई सै पवित्रशास्त्रा ते सबूत दई-दईने भई यीशु इ मसीह आ, बड़े जोरा-सोरा ते यहूदियां जो सब्बीं रे सामणे लाजवाब कित्या।