Read Bilaspuri प्रेरितां 19 Bible Online

प्रेरितां 19 - Bilaspuri bible

प्रेरितां 19

¹ताहली जे अपुल्लोस कुरिन्थुस नगरा च था, तां पौलुस तिसा जगह जो छड्डिने फ्रूगिया कने गलातिया प्रदेशां च घुम्मी-फिरीने बाद बिच इफिसुस च आया। तित्थी सै किछ चेलयां ने मिलया तिन्हें बोल्या अहें विश्वासी ये

²पौलुसे तिन्हांते पुच्छया, “क्या तुहौं विश्वास करदे बगत पवित्र आत्मा मिलया?” तिन्हें तिस्सो गलाया, “अहें त पवित्र आत्मा रे बारे च हैनी सुणीरा।”

³पौलुसे तिन्हांने गलाया, “तां फेरी तुहें किस तरिके रा बपतिस्मा लया?” तिन्हें गलाया, “यूहन्ना रा बपतिस्मा।”

⁴पौलुसे गलाया, “यूहन्ने ये बोलीने मन फिराणे रा बपतिस्मा दित्या भई सै जे मेरे बाद औणे औल़ा, तिस पर यनि यीशु मसीह पर विश्वास करयों।”

⁵ये सुणीने तिन्हें प्रभु यीशुये रे नौआं ते बपतिस्मा लया।

⁶ताहली जे पौलुसे तिन्हांरे सिरा पर हाथ रखे, तां पवित्र आत्मा तिन्हां परा उतरया, कने सै होर-होर भाषा बोलणे कने भविष्यवाणी करने लगे।

⁷ये सब तकरीवन बारा माहणु थे।

⁸फेरी पौलुस यहूदी सभा घर च जाईने तिन्नां महीनयां तका निडर हुईने बोलदा रैया, कने परमेशरा रे राज्जा रे बारे च विवाद करदा कने समझांदा रैया।

⁹पर ताहली जे किछ लोकें कठोर हुईने तिस पर विश्वास करने जो मना किया पर लोकां रे सामणे मसीह पर विश्वास करने औल़यां जो बुरा बोलणे लगे, तां तिने तिन्हांजो छड्डीत्या कने चेलयां जो लग करित्या, कने हर रोज तुरन्नुसा रिया पाठशाला च वाद-विवाद करदा रैया।

¹⁰दुईं साल्लां तका येढ़ा इ हुंदा रैया, येत्थी तका भई आसिया प्रदेशा रे रैहणे औल़े क्या यहूदी क्या यूनानी सब्बीं प्रभुये रा वचन सुणी लया।

¹¹परमेशर पौलुसा रे जरिये सामर्था रे नोखे काम्म कित्ते।

¹²येत्थी तका भई रमाल कने पुआरने तिसरे शरीरा ने छुआई ने बमाराँ पर सट्टां थे, कने तिन्हांरियां बमारियां चली जां थिआं; कने बुरीआत्मां तिन्हां चते निकल़ी जां थिआं।

¹³पर किछ यहूदी लोक सै जे झाड़-फूंक कराँ थे, येढ़ा करने लगे भई तिन्हां च जे बुरीआत्मां हुआं थिआं तिन्हां परा प्रभु यीशुये रा नौं येढ़ा बोलीने फूंको, “तिस यीशुये रा प्रचार जे पौलुस कराँ, हऊँ तुहांजो तिसरे नौआं ते बाहर औणे रा हुक्म देआं।”

¹⁴कने स्क्किवा नौआं रे इक यहूदी मुखियायाजका रे सात्त पुत्र थे, सै जे येढ़ा इ कराँ थे।

¹⁵पर बुरीआत्मे तिन्हांजो जवाब दित्या, “यीशुये जो हऊँ जाणाँ इ, कने पौलुसा जो बी जाणाँ इ, पर तुहें कुण ये?”

¹⁶कने तिने माहणुये तिसच जे बुरीआत्मा थिआं तिन्हां पर लमखी ने कने तिन्हांजो अपणे बशा च लयाई ने, तिन्हां परा येढ़ा उपद्रव कित्या भई सै नंगे कने जख्मी हुईने तिस घरा ते नट्ठे।

¹⁷ये गल्लां इफिसुस नगरा रे रैहणे औल़यां सब यहूदी कने यूनानी बी जणीगे, कने सै सब डरीगे; कने प्रभु यीशुये रे नौआं री बड़याई हुई।

¹⁸तिन्हें जे विश्वास कित्तिरा था तिन्हां चते बौहत लोकें आईने अपणे-अपणे बुरयां कम्मां जो मन्नील्या।

¹⁹जादू करने औल़यां चते अपणी-अपणी पोथियां कट्ठियां करीने सब्बीं रे सामणे फुकी तियां, कने तां जे तिन्हांरा मुल जोड़या, तां पंजाह हजार चाँदिये रे सिक्कयां रे बराबर निकल़या।

²⁰इयां प्रभुये रा वचन जोरा-सोराँ ते फैलदा कने परबल हुन्दा गया।

²¹ताहली जे ये गल्लां हुई चुक्कियां तां पवित्र आत्मे पौलुसा जो मकिदुनिया कने अखाया प्रदेशा चियें हुईने यरूशलेम जो अगवाई कित्ती, कने गलाया, “तित्थी जाणे ते बाद मेरा रोम नगरा जो जाणा बी जरूरी आ।”

²²इस खातर अपणी सेवा करने औल़यां चते तिमुथियुस कने इरास्तुस जो मकिदुनिया भेज्जीने अप्पूँजो किछ दिन आसिया प्रदेशा च रैईग्या।

²³तिस बगत यीशु मसीह पर विश्वास करने औल़यां लोकां रे बारे च बड़ा हुल्लड़ हुआ।

²⁴काँह्भई देमेत्रियुस नौआं रा इक सन्यार अरतिमिस देबिया रा चाँदिये रा मन्दर बणवाई ने कारीगराँ जो बौहत काम्म दिलां था।

²⁵तिने तिन्हांजो कने येढ़ियां इ चिज़ां रे कारीगराँ जो कट्ठा करीने गलाया, “लोको, तुहें जाणाँ ये भई इस कम्मां ते अहांजो कितना पैसा मिलां।

²⁶तुहें देखां ये कने सुणया रायें भई नां सिर्फ इफिसुस नगरा च, पर तकरीवन सारे इ आसिया प्रदेशा रिया जगह च इने पौलुसे येढ़ा बोल्ली-बोलीने सब्बीं लोकां जो समझाया कने भरमाईरा बी आ, भई हत्थां री कारीगरी हई, सै ईश्वर नींये।

²⁷इसते हुण सिर्फ इसी गल्ला रा डर निआं भई इस धन्दे च अहांरा नौं बदनाम हुई जाणा, ये डर बी आ, भई महान देबी अरतिमिसा रा मन्दर बेकार समझया जाणा, कने तिस्सो जे आसिया प्रदेशा रे कने संसार रियां बौहत सारियां जगहां च पूजा कराँ तिसरा महत्व बी जान्दा रैहणा।”

²⁸कारीगर ये सुणीने गुस्से च भरीगे कने सारे जोरा ने रड़ाई-रड़ाईने बोलणे लगे, “इफिसुस री अरतिमिस महान इ!”

²⁹कने सारे नगरा च बड़ा हल्ला मचीग्या, कने मकिदुनिया वासी गयुस कने अरिस्तर्खुस जो सै जे पौलुसा सौगी यात्रा करया राँ थे, पकड़ी लया, कने इक्की सौगी रंगमंचा खौ दौड़ीगे।

³⁰ताहली जे पौलुसे लोकां ने सौगी अन्दरा जो जाणा चाया तां चेलयां तिस्सो रोकी लया कने जाणे नीं दित्या।

³¹आसिया रे हाक्मा चते बी तिसरे कईयें मित्रें तिसलौ ये बोल्ली भेज्या कने विनती किति भई नाटकशाला च जाईने जोखम देखां लेन्दा।

³²तित्थी कोई किछ रड़ां था कने कोई किछ, काँह्भई सभा च बौहत गड़बड़ हुईराँ थी, कने मते सारे लोक येढ़ा जाणदे बी नीं थे भई अहें किस खातर कट्ठे हुईरे।

³³फेरी तिन्हें सिकन्दर जो, तिस्सो जे यहूदियें खड़ा कित्तिरा था, भीड़ा चते अग्गे कित्या। सिकन्दरे हत्थां ने चुप रैहणे जो ईशारा कित्या कने लोकां रे सामणे जवाब देणे री कोशिश कित्ती।

³⁴पर तां जे तिन्हांजो पता लगया भई सै यहूदी आ, तां सब कोई इक्की अवाज़ा च दो घण्टयां तका रड़ांदे इ रै, “इफिसुस री अरतिमिस, महान इ।”

³⁵तां नगरा रे मन्त्रियें लोकां जो शान्त करीने गलाया, “इफिसुस रे लोको, कुण नीं जाणदा भई इफिसियां रा नगर महान देबी अरतिमिस रे मन्दरा, कने जीयुस रिया तरफा ते खढ़ी रिया मूर्तिया रा पैहरेदार अम्बरा ते पैईरा।

³⁶इस खातर तां जे भई इन्हां गल्लां रा तोड़ नीं हुई सकदा, तां ठीक आ भई तुहें शान्त रौआ कने बिणा सोचे बचारे किछ नीं करा।

³⁷काँह्भई तुहें इन्हां माहणुआं जो लंदीरा सै जे नांत मन्दरा रे लूटणे औल़े नां अहां रिया देबिया री निंध्या कराँ ये।

³⁸“इस खातर देमेत्रियुस कने तिसरे साथी कारीगराँ रा किसी ने झगड़ा हो तां कचैहरी हाई कने हाक्म बी ये; सै ऊत्थी जाईने इक्की दुज्जे पर इल्जाम लाओ।

³⁹पर जे तुहां किसी होरी गल्ला रे बारे च पुछणा चाँह ये, तां तैह कित्ती री कानूनी सभा च फैसला कित्या जाणा।

⁴⁰काँह्भई अजके दंगे रा दोष अहां पर लगाया जाणे रा डर आ, इस खातर भई इसरी कोई वजह नीं, कने अहांले इसा भीड़ा रे कट्ठे हुणे रा कोई जवाब निआं।”

⁴¹येढ़ा बोलीने तिने सभा जो विदा कित्या।