Read Bilaspuri प्रेरितां 2 Bible Online

प्रेरितां 2 - Bilaspuri bible

प्रेरितां 2

¹तां जे पिन्तेकुस्त त्योहारा रा दिन आया तां सै सब यरूशलेम च इक्की जगह कट्ठे थे।

²इकदम अम्बरा ते बड़े तूफाना साई सणसणाहट री अवाज़ हुई, कने सारा घर तित्थी जे सै बैठिरे थे, तिसा अवाजा ते गुंजीग्या।

³कने तिन्हौं अग्गी साई जीभां फटदियां नज़र आईयां कने तिन्हां चते हर इक्की पर आईने रुकीगियां।

⁴सै सब पवित्र आत्मा ने भरीगे, कने तियां जे आत्मा तिन्हांजो बोलणे री सामर्थ देयां था, सै लग-लग भाषा बोलणे लगे।

⁵अम्बरा रे थल्ले रे बौहत सारे भगत यहूदी सै जे लग-लग देशां ते आईने यरूशलेम च रैयां राँ थे।

⁶तां जे ये अवाज़ हुई तां भीड़ कट्ठी हुईगी कने लोक घबराईगे, काँह्भई हर इक्की जो येई सुणां था भई मेरिया इ भाषा च गलाया रायें।

⁷सै सब हैरान-परेशान हुईने बोलणे लगे, “देक्खा, ये जे बोल्या रायें क्या सब गलीली नींये?

⁸तां फेरी अहां चते हर माहणु अपणी-अपणी देशी भाषा कियां सुणया राँये?

⁹अहें सै जे पारथी कने मेदी कने एलामी कने मेसोपोटामिया कने यहूदिया कने कप्पदूकिया कने पुन्तुस कने आसिया,

¹⁰कने फ्रूगिया कने पंफूलिया कने मिस्र कने लीबिया देश सै जे कुरेने रे अखा-बखा, इन्हां देशां रे रैहणे औल़े कने रोमी प्रवासी,

¹¹मतलब यहूदी कने यहूदी मत धारण करने औल़े, क्रेती कने अरबी बी ये, पर अपणिया-अपणिया भाषा च तिन्हांते परमेशरा रे बडे-बडे कम्मां रे बारे च सुणया रायें।”

¹²कने “सै सब हैरान हुये कने घबराई ने इक्की दुज्जे ने बोलणे लगे ये क्या हुया राँ?”

¹³पर दुज्जेयां हासी डुआईने गलाया, “येत नौंईंया शराबा रे नशे चे।”

¹⁴तां पतरस तिन्हां ग्याराँ ने सौगी खड़ा हुया कने ऊच्चिया अवाज़ा च बोलणे लगया, “हे यहूदियो कने यरूशलेम च सब रैहणे औल़यो ये जाणी लवा, कने ध्यान देईने मेरियां गल्लां सुणा।

¹⁵तेढ़ा जे तुहें समझया रायें ये लोक नशे च नींये, काँह्भई अजें तका त सबेरके नौ बजी रे!

¹⁶पर ये सै गल्लां इयां, सै जे योयेल भविष्यवक्ते बोल्ली रियां:

¹⁷“ ‘परमेशर बोलां, भई आखिरी दिना च येढ़ा हूणा भई मांह अपणा आत्मा सब माहणुआं पर भेजणा, कने तुहांरे मुण्डुआं कने कुड़ियां भविष्यवाणियां करनियां, कने तुहांरे जवानां दर्शण देखणे कने तुहांरे पुरनिये सुखने देखणे।

¹⁸पर मांह अपणे दास कने दासियां पर बी तिन्हां दिना च अपणे आत्मा चते भेजणा, कने तिन्हां भविष्यवाणी करनी।

¹⁹कने मांह ऊपर अम्बरा च नोखे काम्म कने थल्ले धरतिया पर चमत्कार, मतलब खून कने आग्ग कने धुयें रा बद्दल़ दसणा।

²⁰प्रभुये रे महान कने तेजस्वी दिना रे औणे ते पैहले सूरज अन्धेरा कने चन्द्रमा खून्ना साई हुई जाणा।

²¹कने सै जे कोई प्रभुये रा नौं लेंगा, तिसरा इ छुटकारा हूणा।’

²²“हे इस्राएलियो, ये गल्लां सुणा: यीशु नासरी इक माहणु था तिसरा परमेशरा खा ते हुणे रा सबूत तिन्हां सामर्था रे कम्मा कने हैरानिया रे कम्मां कने चमत्काराँ ते परगट आ, सै जे परमेशरे तुहांरे बिच तिसरे जरिये करीने दस्से तिस्सो जे तुहें अप्पूँ इ जाणाँ ये।

²³तिस यीशुये जो, सै जे परमेशरा री बणाई रिया योजना कने पैहले रे ज्ञाना रे मुतावक पकड़वाया गया, तुहें अर्धमियां रे हत्था ते तिस्सो क्रूसा पर चढ़वाई ने मारी दित्या।

²⁴पर तिस्सो इ परमेशरे मौता रे बन्धना ते छुड़ाईने ज्यूंदा कित्या; काँह्भई ये कदीं मनी हुई सकदा था भई सै तिसरे बशा च रैहंदा।

²⁵काँह्भई दाऊद तिसरे बारे च बोलां, “ ‘मैं प्रभुये जो सदा अपणे सामणे देखदा रैया काँह्भई सै मेरे सज्जे पासे आ, इस खातर भई किति हऊँ रुढ़ि नीं जाऊँ।

²⁶इस वजह ते मेरा मन खुश हुआ, कने मेरी जीभ मगन हुईरी; पर मेरा शरीर बी आशा ची बणीरा रैहणा।

²⁷काँह्भई तू मेरे प्राणा जो अधोलोका च नीं छडणा; कने नां अपणे पवित्र माहणुये जो सड़ने देणा।

²⁸तैं मिन्जो जीवना रा रस्ता दस्सीरा; तू मिन्जो अपणे दर्शणा री खुशिया ने भरी देणा।’

²⁹“हे भाईयो, हऊँ कुलपति दाऊद रे बारे च तुहांजो हिम्मता ने बोल्ली सक्कां भई सै त मरी गया कने गड्डी बी दित्तिरा कने तिसरी कब्र अज्जो आज्ज अहांले येत्थी इ हई।

³⁰सै भविष्यवक्ता था, सै जाणा था भई परमेशरे मेरने वायदा कित्तिरा भई माह तेरे वंशा चते इक्की माहणुये जो तेरे संघासणा पर बठाणा;

³¹दाऊद राजे हुणे औल़ियां गल्लां जो पैहले तेई देखीने मसीह रे जिऊंदा हुणे रे बारे च भविष्यवाणी कित्ती भई नांत तिसरा प्राण अधोलोका च छडया गया कने नां तिसरी देह सड़ने पाई।

³²इस इ यीशुये जो परमेशरे जिऊंदा कित्या, तिसरे जे अहें सारे गवाह ये।

³³इयां इ परमेशरा रे सज्जे हत्था ते सब्बींते ऊच्ची जगह पाईने, कने पिता ते सै पवित्र आत्मा पाईने तिसरी प्रतिज्ञा जे कित्तिरी थी, तिने ये भेज्जी दित्तिरा सै जे तुहें देख्या कने सुणया रायें।

³⁴काँह्भई दाऊद त स्वर्गा परा हनी चढ़या; पर सै अप्पूँ बोलां, “ ‘परमेशरे मेरे प्रभुये ने गलाया, मेरे सज्जे पासे बैठ,

³⁵तदुआं तका जे माह तेरे बैरियां जो तेरे पैराँ थल्ले री चौकी नीं करी दूँ।’

³⁶“इस खातर हुण इस्राएल रे सारे माहणु पक्के तरिके ने जाणी लो भई परमेशरे तिस इ यीशुये जो तिस्सो जे तुहें क्रूसा पर चढ़ाया, प्रभु बी ठहराया कने मसीह बी।”

³⁷तां सुणने औल़यां लोकां जो ये विश्वास हुईग्या था भई तिन्हें कोई गल़त काम्म कित्या, कने सै पतरस कने प्रेरितां ते पुछणे लगे, “हे भाईयो, अहें क्या करिये?”

³⁸पतरसे तिन्हांने गलाया, “मन फिरावा, कने तुहां चते सब अपणे-अपणे पापां री माफिया खातर यीशु मसीह रे नौआं ते बपतिस्मा लौ; तां तुहां पवित्र आत्मा रा दान पाणा।

³⁹काँह्भई ये वादा तुहां, कने तुहांरियां औल़ादां, कने तिन्हां सबनी दूरा-दूरा रे लोकां खातर बी हया तिन्हांजो जे प्रभु अहांरा परमेशर अप्पूँ ला सदगा।”

⁴⁰पतरसे होर बौहत गल्लां ते बी गवाही देई-देईने समझाया भई “अप्पूँजो इसा टेढिया जातिया ते बचाओ।”

⁴¹इस खातर तिन्हें लोकें जे पतरसा रा वचन सुणीने ग्रहण कित्या तिने बपतिस्मा लेआ; कने तिस दिन लगभग तिन्न हज़ार माहणु विश्वासियां रे समूहा च शामिल हुईगे।

⁴²कने सै प्रेरितां ते शिक्षा पाणे, कने संगती रखणे, प्रभु भोज, कने प्राथना करने च लगीरे रै।

⁴³कने यरूशलेम नगरा रे सारे लोक डरीगे, कने मते सारे हैरान करने औल़े काम्म कने चमत्कार प्रेरितां ते परगट हुणे लगे।

⁴⁴कने सब विश्वास करने औल़े कट्ठे रैं थे कने तिन्हांरियां सब चीज़ा कट्ठियां थिआं।

⁴⁵सै अपणिया-अपणिया जायदात्ता कने समाना जो बेची-बेच्चीने तेढ़ी जे किसी री जरूरत हुआं थी बंडी देआं थे।

⁴⁶पैहलके दिनां च सारे विश्वासी लोक हर रोज़ इक मन हुईने मन्दरा च कट्ठे हुआं थे, कने घरा-घरा रोटी तोड़दे हुये खुशिया ने कने साफ मना ने रोटी खां थे,

⁴⁷कने परमेशरा री स्तुति कराँ थे, कने सब लोक तिन्हांते खुश थे : कने सै जे छुटकारा पां थे, तिन्हांजो प्रभु हर रोज़ तिन्हां च मलाई देआं था।