Read Bilaspuri प्रेरितां 21 Bible Online

प्रेरितां 21 - Bilaspuri bible

प्रेरितां 21

¹ताहली जे अहें तिन्हां लाते विदा हुईने समुद्री यात्रा शुरु कित्ती, तां सिधे रस्ते ते कोस नौआं रे टापुये च आये, कने दुज्जे रोज रुदूसा टापुये च कने तित्थी ते पतरा नगरा च आये।

²तित्थी ते इक जहाज फीनीके प्रदेशा जो जान्दा मिलया। कने अहें तिस परा चढ़ीने यात्रा शुरु कित्ती।

³ताहली जे साइप्रस टापु दिस्या, तां अहें तिस्सो खबिया खौ छड्डिने, सीरिया जो चलीने सूर नौआं रे नगरा च उतरे; काँह्भई तित्थी जहाजा रा समान उतारना था।

⁴चेलयां ने मिलीने अहें तित्थी सात्त दिन रै। तिन्हें पवित्र आत्मा रे सखाई रयां पौलुसा ने गलाया भई यरूशलेम च पैर देक्खा रखदा।

⁵ताहली जे सै दिन पूरे हुईगे, तां अहें तित्थी ते चलीपे; कने जनानां कने बालकां समेत तिन्हें अहांजो नगरा ते बाहरा तका पहुँचाया; कने अहें कनारे पर गोडे टेक्कीने प्राथना किति,

⁶तां इक्की दुज्जे ते विदा हुईने, अहें त जहाजा पर चढ़े कने सै अपणे-अपणे घराँ जो हट्टीगे।

⁷ताहली जे अहें सूर नगरा ते समुद्रा रा सफर पूरा करीने पतूलिमयिस नगरा च पुज्जे, कने विश्वासियां जो नमस्कार करीने तिन्हां सौगी इक दिन रै।

⁸दुज्जे रोज अहें तित्थीते चलीने कैसरिया नगरा च आये, कने फिलिप्पुस खुशखबरी प्रचार करने औल़े रे घरा च सै जे सत्तां चते इक था; जाईने तित्थी रै।

⁹तिसरियां चार क्वारियां कुड़ियां थिआं सै जे भविष्यवाणी कराँ थिआं।

¹⁰ताहली जे अहें तित्थी मते दिन रैई चुक्के, तां अगबुस नौआं रा इक भविष्यवक्ता यहूदिया प्रदेशा ते आया।

¹¹तिने अहांले नेड़े आईने पौलुसा रा परना लया, कने अपणे हत्था पैराँ च बन्हीने गलाया, “पवित्र आत्मा ये बोलां भई तिस माहणुये रा जे ये परना, तिस्सो यरूशलेम च यहूदियां इयां इ बन्हणा कने अन्यजातियां रे हत्था च देणा।”

¹²ताहली जे अहें ये गल्लां सुणियां, तां अहें कने तित्थीरे लोकें पौलुसा ने विनती कित्ती भई सै यरूशलेम नगरा जो नीं जाओ।

¹³पर पौलुसे जवाब दित्या, “तुहें रोई-रोई ने मेरा दिल काँह तोड़या रायें? हऊँ बी त यीशुये रे नौआं खातर यरूशलेम च नां सिर्फ बंधोणे, पर मरने खातर बी त्यार आ।”

¹⁴तां जे सै नीं मन्या तां अहें येढ़ा बोलीने चुप हुईगे, “प्रभुये री इच्छा पूरी हुईजो।”

¹⁵किछ दिनां ते बाद अहें त्यारी किति कने यरूशलेम नगरा जो चलीपे।

¹⁶कैसरिया नगरा ते बी किछ चेले अहां सौगी गये कने अहें मनासोम नौआं रे साइप्रस वासिये रे इक पुराणे चेले रे घरौ ली आये, भई अहें तित्थी रूको।

¹⁷ताहली जे अहें यरूशलेम च पुज्जे, तां विश्वासी बड़िया खुशिया ने अहांने मिले।

¹⁸दुज्जे रोज पौलुस अहां जो लईने याकूब ला गया, तित्थी जे सारे प्राचीन कट्ठे थे।

¹⁹तां तिने तिन्हांजो नमस्कार करीने, जो-जो काम्म परमेशरे तिसरिया सेवा रे जरिये अन्यजातियां च कित्तिरे थे, इक-इक करीने सब दस्से।

²⁰तिन्हें ये सुणीने परमेशरा री महिमा कित्ती, फेरी तिसने गलाया, “भाई तू जाणाँ भई यहूदी लोकां चते कई हजारें विश्वास कित्या; कने सब मूसा रिया व्यवस्था जो मनणे खातर जोशा ने भरीरे।

²¹तिन्हांजो तेरे बारे च बोल्ली तरा भई तू अन्यजातियां च रैहणे औल़े यहूदियां जो मूसा री व्यवस्था छडणे जो सखां ये, कने बोलां ये भई नां अपणे बच्चयां रा खतना करावा कने नां यहूदी रीति-रिवाजां परा चला।

²²तां फेरी क्या कित्या जाओ? लोकां सुणना भई तू येत्थी आईरा।

²³इस खातर सै जे अहें तेरने बोलां ये, तेढ़ा कर। अहांले येत्थी चार माहणुये तिन्हें जे मन्नतां मन्नी रियां।

²⁴तिन्हांजो सौगी नेईने अप्पूँजो पवित्र हुणे री विधि पूरा कर; कने तिन्हांजो खर्चा दे भई सै सिर मुंडवाओ। तां सब्बीं जो पता लगी जाणा भई सै जे गल्लां तिन्हें तेरे बारे च सुणी रियां, तिन्हां च किछ बी सच्चाई नीं, पर तू अप्पूँ इ व्यवस्था जो मन्नीने तिसारे मुतावक चलां।

²⁵“पर तिन्हां अन्यजातियां रे बारे च तिन्हें जे विश्वास कित्तिरा, अहें ये फैसला करीने लिखी भेजीरा भई सै मूर्तां पर चढ़ाईरी किसी बी खाणे रिया चीज़ा जो नीं खायां कने व्यभिचारा ते दूर रैयां कने गल़ा घुट्ठीरे जानवरा रा मांस नां खाये कने जानवरा रा खून्न नीं पीये।”

²⁶तां दुज्जे दिन पौलुस तिन्हां माहणुआं सौगी जाईने, अप्पूँजो पवित्र कित्या तां फेरी सै ये दसणे खातर मन्दरा च गया, भई पवित्र हुणे रे दिन कदीं पूरे होणे कने कदीं तिन्हां चते हरेक खातर चढ़ावा चढ़ाया जाये।

²⁷ताहली जे सै सात्त दिन पूरे हुणे पर थे, तां आसिया प्रदेशा रे किछ यहूदी लोकें पौलुसा जो मन्दरा च देखीने सब्बीं लोकां जो भड़काया, कने तिस्सो पकड़ील्या,

²⁸कने रड़ाईने बोल्या “इस्राएल रे लोको, मद्‌द करा; ये सै माहणु आ, सै जे लोकां रे, कने व्यवस्था रे, कने इसा जगह रे बरोधा च हर जगह सब्बीं लोकां जो सखां, येत्थी तका भई यूनानियां जो बी मन्दरा च ल्याईने तिने इस जगह जो अपवित्र कित्तिरा।”

²⁹इस इ खातर तिन्हें ये बोल्या काँह्भई इसते पैहले इफिसुस वासी त्रुफिमुसा जो पौलुसा सौगी नगरा च देख्या था, सै समझे थे भई पौलुस तिस्सो मन्दरा च ल्याया।

³⁰“तां नगरा रे बौहत सारे लोकें सुणया भई मन्दरा रे अंगणा च कोई समस्या इ, कने लोक दौड़ीने तित्थी कट्ठे हुये। फेरी ये लोक पौलुसा जो पकड़ीने मन्दरा ते बाहरा जो घसीटी ने ली आये, कने झटपट दरवाजे बन्द करी ते।

³¹ताहली जे सै तिस्सो मारी देणा चाँह थे, तां पलटना रे सरदारा जो समाचार पुज्या भई यरूशलेम रे बौहत सारे लोक हल्ला मचाईराँ थे।

³²“ताहली सै ताहलु इ सपाईयां कने सुबेदाराँ जो लईने तिन्हां लौ थल्ले दौड़ीने गये; कने लोकें पलटना रे सरदाराँ कने सपाईयां जो देखीने पौलुसा जो मारना-कुटणा छड्डीत्या।

³³फेरी पलटना रे सरदारे पौलुस रे नेड़े आईने तिस्सो पकड़ील्या; कने दुईं जंजीराँ च बन्हणे रा हुक्म देईने पुछणे लगया ये कुण आ कने इने क्या कित्तिरा?”

³⁴पर भीड़ा चते कोई किछ कने कोई किछ गलांदे रै। तां जे हल्ले रे मारे सै ठीक ढंगा ने सच्चाई नीं जाणी सकया, तां तिस्सो गढ़ा च नेणे रा हुक्म दित्या।

³⁵तां जे सै पैड़ियां पर पुज्जया, तां येढ़ा हुआ भई भीड़ा रे दबावा रिया वजह ते सैनिकां जो तिस्सो चक्की ने नेणे पैया।

³⁶काँह्भई लोकां री भीड़ रड़ांदी तिसरे पिच्छे पईरी थी, “इस्सो खत्म करी दवा।”

³⁷तां जे सै पौलुसा जो गढ़ां च लईने जायें राँ थे, तां तिने पलटना रे सरदारा ने गलाया, “क्या मिन्जो हुक्म आ भई हऊँ तेरने किछ बोलूं?” तिने गलाया, “क्या तू यूनानी भाषा जाणाँ?

³⁸क्या तू मिस्र देशा रा निआं, सै जे इन्हां दिनां ते पैहले विद्रोही बणीने, चार हजार कटाराँ औल़यां लोकां जो जंगला च लईग्या था?”

³⁹पौलुसे गलाया, “हऊँ तां तरसुस नगरा रा यहूदी माहणु आ! किलिकिया प्रदेशा रे मन्ने-तन्ने नगरा रा रैहणे औल़ा। हऊँ तेरने विनती कराँ भई मिन्जो लोकां ने गल्लां करने दे।”

⁴⁰तां जे तिने हुक्म दित्या तां पौलुसे पैड़ियां पर खड़ीने लोकां जो चुप होणे खातर हत्था रा ईशारा कित्या। ताहली जे सै चुप हुईगे तां सै इब्रानी भाषा च बोलणे लगया :