Read Bilaspuri प्रेरितां 4 Bible Online

प्रेरितां 4 - Bilaspuri bible

प्रेरितां 4

¹ताहली जे पतरस कने यूहन्ना लोकां ने येढ़ा गलाया राँ थे, तां याजक कने मन्दरा रे सरदार कने सदूकियें तिन्हां परा जो हमला करित्या।

²काँह्भई सै बौहत गुस्सा हुये भई पतरस कने यूहन्ना लोकां जो ये प्रचार कराँ थे भई तियां जे परमेशरे यीशुये जो मूईरेयां चते जिऊंदा कित्या, तियां इ मूईरयां लोकां जो परमेशरा जिऊंदा करना।

³तिन्हें पतरस कने यूहन्ने जो पकड़ीने पूरी रात जेल्ला च रखया काँह्भई सांझ हुईगरी थी।

⁴पर वचना रे सुणने औल़यां चते बौहतीं यीशुये पर विश्वास कित्या, कने तिन्हांरी गिणती तकरीवन पांज्ज हज़ार माहणुआं च हुईगी।

⁵अगले दिन येढ़ा हुआ भई तिन्हांरे सरदार कने बजुर्ग कने शास्त्री यरूशलेम च कट्ठे हुये

⁶कने महायाजक हन्ना कने कैफा कने यूहन्ना कने सिकन्दर कने जितने महायाजका रे घराने रे थे।

⁷सै पतरस कने यूहन्ने जो सब्बीं रे बिच खड़ा करीने पुछणे लगे भई तिस माहणुये जो ठीक करने री सामर्थ कने अधिकार तुहांजो किने दित्या?

⁸फेरी पतरसे पवित्र आत्मा ते भरी ने तिन्हांने गलाया, “लोकां रे सरदार कने बजुर्गें!

⁹इस लंगड़े माहणुये ने सै जे भलाई किति गईरी, जे आज्ज अहांते इस बारे च पूछताछ किति जाया राईं भई सै कियां ठीक हुईग्या।

¹⁰तां तुहें सब होर सारे इस्राएली लोक जाणी लो भई नासरत रा रैहणे औल़े यीशु मसीह रे नौआं ते कित्या गैईरा। तिस यीशुये जो जे तुहें क्रूसा पर चढ़ाया था, पर परमेशरे तिसजो मूईरेयां चते ज्यूंदा कित्या। आज तिसरे इ नौआं रे जरिये ये माहणु तुहांरे सामणे भला-चंगा खढ़िरा।

¹¹मसीह यीशु इ सै पत्थर आ तिस्सो जे तुहें राजमिस्त्रियें नकम्मा जाणया कने सै कुणे रे सिरे रा पत्थर हुईग्या।

¹²कने किसी दुज्जे ते छुटकारा निआं; काँह्भई सारे संसारा च यीशुये ते इलावा होर कोई दुज्जा नौं नीं दित्तिरा, भई तिसते जे अहांजो छुटकारा मिली सक्को।”

¹³ताहली जे तिन्हें पतरस कने यूहन्ना रा हौंसला देख्या, तां सै तिन्हांजो अनपढ़ कने सिधे-साधे माहणु समझीने हैरान हुये; फेरी तिन्हें पछयाणया भई ये यीशुये सौगी रईरे।

¹⁴तिस माहणुये जो सै जे ठीक हुईरा था, पतरस कने यूहन्ने सौगी खढ़िरे देखीने, यहूदी तिन्हांरे विरोधा च किछ नीं बोल्ली सक्के।

¹⁵पर सै तिन्हांजो सभा ते बाहर जाणे रा हुक्म देईने, सै अप्पूँ-चियें सोच-समझ करने लगे,

¹⁶“क्या अहें इन्हां दुईं माहणुआं जो सजा देणे रे खातर किछ बी करी सक्कां ये? यरूशलेम च जितने लोक रैं सै जाणाँ ये भई पतरस कने यूहन्ने चम्भा करने औल़े चमत्कार कित्तिरे; कने अहें तिसते मुकरी नीं सकदे।

¹⁷पर इस खातर भई ये गल्ल लोकां च होर जादा नीं फैल्ली जाओ, अहां तिन्हांजो धमकाणा, भई सै इस नौवां ते फेरी किसी माहणुये ने गल्लां नीं करो।”

¹⁸तां तिन्हांजो सदया कने खबरदार करीने गलाया, “यीशुये रे नौआं ते किछ बी देखां बोलदे कने देखां सखांदे।”

¹⁹पर पतरस कने यूहन्ने तिन्हांजो जवाब दित्या, “तुहें इ फैसला करा; क्या ये परमेशरा रे नेड़े भला भई अहें परमेशरा रियां गल्लां ते बधीने तुहांरियां गल्लां मन्निये।

²⁰काँह्भई येढ़ा त अहांते नीं हुई सकदा भई सै जे अहें देख्या कने सुणीरा, तिस्सो नीं बोलिये।”

²¹फेरी तिन्हें पतरस कने यूहन्ने जो धमकाई ने छडित्या, काँह्भई लोकां रिया वजह ते तिन्हांजो सजा देणे रा कोई दाव नीं मिलया, इस खातर भई सै जे घटना हुईरी थी तिसरिया वजह ते सब लोक परमेशरा री बडयाई करया राँ थे।

²²सै माहणु, तिस पर जे ठीक करने रा चमत्कारी नशाण दस्या था, चाल़ियां साल्लां ते जादा उम्रा रा था।

²³सै छुट्टीने अपणे साथियां ला आये, कने जो किछ मुखियायाजकें कने बजुर्गें तिन्हांने बोलीरा था, तिन्हांजो सुणाईत्या।

²⁴येढ़ा सुणीने तिन्हें इक मन हुईने ऊच्चिया अवाज़ा च परमेशरा ने प्राथना किति, “हे प्रभु, तू सैई आ तिने जे अकाश कने धरती कने समुद्र कने जो किछ तिस चा, सै सारा किछ बणाया।

²⁵तैं पवित्र आत्मा रे जरिये अपणे सेवक कने अहांरे पूर्वज दाऊद रे मुँआं ते बुलवाया, ‘होरीं जातियें हुल्लड़ काँह मचाया कने देशा-देशा रे लोकें काँह बेकार गल्लां सोचियां?

²⁶प्रभु कने तिसरे मसीह रे बरोधा च धरतिया रे राजे खड़े हुये, कने हाकम सौगी कट्ठे हुईगे।’

²⁷“काँह्भई सचमुच तेरे सेवक यीशुये रे बरोधा च, तिस राजे तैं अभिषेक कित्या, हेरोदेस कने पुन्तियुस पिलातुस बी अन्यजातियां कने इस्राएलियां ने सौगी इस नगरा च कट्ठे हुये,

²⁸भई जो किछ पैहले ते तेरिया सामर्था कने बुद्धिया ते ठहराईरा सैई करो।

²⁹हुण हे प्रभु तिन्हांरियां धमकियां जो सुण; कने अपणे दास्सा जो ये वरदान दे भई तेरा वचन बड़े हौंसले ने सुणाईये।

³⁰चंगा करने खातर तू अपणा हाथ अग्गे कर भई चमत्कारी नशाण कने हैरान करने औल़े काम्म तेरे पवित्र दास यीशुये रे नौआं ते कित्ते जाओ।”

³¹तां जे सै प्राथना करी चुक्के, तां जगह तित्थी जे सै कट्ठे थे हिल्लीगी, कने सै सब पवित्र आत्मा ते भरीगे, कने परमेशरा रा वचन हिम्मता ने सुणांदे रै।

³²विश्वास करने औल़यां री मण्डली इक चित कने इक्की मना री थी, येत्थी तका भई कोई बी अपणी धन सम्पतिया जो अपणा नीं बोलदा था, पर सब किछ सांझा था।

³³प्रेरित बड्डिया सामर्था ने प्रभु यीशुये री मूईरयां चते जिऊंदा हुणे री गवाही देन्दे रै, कने तिन्हां सब्बीं पर मता अनुग्रह था।

³⁴तिन्हां चते कोई बी गरीब नीं था; काँह्भई तिन्हांले जे जमीन या घर थे, सै तिन्हांजो बेचणे ते मिलीरा पैसा ल्यौवां थे,

³⁵कने प्रेरितां जो देआं थे; कने तेढ़ी जे किसी जो बी जरूरत हुआं थी, तितना इ सब बन्डी लेआं थे।

³⁶यूसुफ साइप्रस नौआं रे टापुये च रैहणे औल़ा इक लेवी था तिसरा नौं प्रेरितें बरनबास रखया था; तिसरा मतलब जे दुज्जेयां जो हिम्मत देणे औल़ा माहणु आ।

³⁷तिसरी थोड़ी जमीन थी, तिसजो जे तिने बेच्चया, कने पैसे ल्याईने प्रेरितां जो देईते थे।