Read Bilaspuri प्रेरितां 6 Bible Online

प्रेरितां 6 - Bilaspuri bible

प्रेरितां 6

¹तिन्हां दिना च तां जे चेले गिणतिया च बौहत बधणे लगे, तां यूनानी भाषा बोलणे औल़े यहूदी चेलयां इब्रानी भाषा बोलणे औल़यां यहूदी चेलयां पर कुड़कुड़ाने लगे, भई हर रोज किया सेवा च अहां रियां विधवां री देख-भाल नीं हुंदी।

²तां तिन्हें बारा प्रेरितें, चेलयां रिया मण्डलिया जो अप्पूँ ला सद्दीने गलाया, “ये ठीक निआं भई अहें परमेशरा रे वचना रा प्रचार करना बन्द करी दईये कने ख्वाणे-प्याणे री सेवा च लगीरे रौ।

³इस खातर, मेरे भाईयो, अप्पूँ चते सात्त खरे माहणुआं जो सै जे पवित्र आत्मा कने बुद्धिया ने भरीरे हो, चुणी लवा, भई अहें तिन्हांजो ये काम्म दई-देईये।

⁴पर अहां त प्राथना च कने वचना रे प्रचारा कने सखाणे रिया सेवा च लगी रयां रैहणा।”

⁵ये गल्ल सारिया मण्डलिया जो खरी लगी, कने तिन्हें स्तिफनुस नौंवां रे इक्की माहणुये जो सै विश्वास कने पवित्र आत्मा ने भरीरा था, कने फिलिप्पुस, कने प्रुखुरुस, कने नीकानोर, कने तिमोन, कने परमिनास, कने अन्ताकिया वासी नीकुलाउस जो सै जे यहूदी मता च आईगरा था, चुणील्या।

⁶कने इन्हौं प्रेरितां रे सामणे खड़ा कित्या कने तिन्हें प्राथना करीने इन्हौं सेवकाईया रे कम्मा खातर नियुक्त कित्या।

⁷परमेशरा रा वचन फैलदा गया कने यरूशलेम च चेलयां री गिणती बौहत बधदी गई; कने बौहत सारे यहूदी याजकें यीशु मसीह पर विश्वास कित्या।

⁸स्तिफनुस अनुग्रह कने सामर्था ते भरी ने लोकां च बड्डे-बड्डे काम्म कने चमत्कार दस्सां था।

⁹तां तिस यहूदी सभा घरा चते तिन्हांजो जे अजाद कित्तिरे लोक बोलां थे, कुरेनी, सिकन्दरिया, किलिकिया कने आसिया रे लोकां चते कई आईने स्तिफनुसा ने बैहस करने लगे।

¹⁰पर सै तिसा बुद्धिमानिया ने कने पवित्र आत्मा ने बोलां था, सै तिसरे सामणे नीं टिकि सक्के।

¹¹फेरी तिन्हें किछ लोकां जो लालच देईने बुलवाया, “अहें इस्सो मूसा कने परमेशरा रे बरोधा च निंध्या रियां गल्लां करदे सुणीरा।”

¹²तिन्हें स्तिफनुस रे खलाफ लोकां, बजुर्गां कने शास्त्रियां जो भड़काया कने सै तिस्सो पकड़ीने महासभा रे सामणे ली आये।

¹³कने तित्थी तिन्हें झूट्ठे गवाह खड़े कित्ते, तिन्हें जे ये गलाया, “ये माहणु इस पवित्र जगह कने मूसा रिया व्यवस्था रे बरोधा च बोलणा नीं छड्दा।

¹⁴काँह्भई अहें तिस्सो येढ़ा बोलदे सुणीरा भई नासरत नगरा रे यीशुये इस मन्दरा जो रुढ़ाई देणा, कने तिन्हां रितियां जो बदली देणा सै जे मूसे अहांजो दित्ति रियां।”

¹⁵तां सारे लोक सै जे सभा च बैठिरे थे, तिस परा जो टेक लाईरी थी कने तिसरा मुँह स्वर्गदूतां साई चमकदा हुया दिखया।