Read Bilaspuri प्रेरितां 9 Bible Online

प्रेरितां 9 - Bilaspuri bible

प्रेरितां 9

¹शाऊल सै जे हुण तक प्रभु यीशुये रे चेलयां जो धमकाणे कने मारने रे जोशा च था, सै महायाजका ले गया

²कने तिसरे दमिश्क नगरा रे यहूदी सभा घराँ रे अगुवेयां जो ये चिट्ठी लिखणे जो विनती कित्ती, तिसते शाऊला जो तित्थी जे कोई मसीह पर विश्वास करने औल़े मिलो, फेरी चाये सै जनाना ओ, या चाये मर्द, तां सै तिन्हांजो बन्दी बणाई सक्को कने फेरी वापस यरूशलेम नगरा च ली आओ।

³पर शाऊल कने तिसरे लोक चलदे-चलदे ताहली जे दमिश्क नगरा रे नेड़े पुज्जे, तां इकदम अम्बरा ते तिसरे चऊँ पासयां लोय चमकी,

⁴कने सै धरतिया पर पईग्या कने प्रभुये री ये अवाज़ सुणी, “शाऊल, तू मिन्जो काँह दखी कराँ?”

⁵तिने पुच्छया, “हे प्रभु, तू कुण आ?” तिने गलाया, “हऊँ यीशु आ, तिस्सो जे तू सतावां।

⁶पर हुण उट्ठीने नगरा च जा, कने जो किछ तू करना सै तिज्जो दस्या जाणा।”

⁷सै माहणु जे तिसने सौगी थे, सै हैरान हुये; काँह्भई अवाज़ त सुणां थे पर किसी जो देखदे नीं थे।

⁸फेरी शाऊल धरतिया ते उट्ठया, पर ताहली जे आक्खीं खोलियां तां तिस्सो किछ बी नीं दुस्या, कने सै तिसरा हाथ पकड़ीने दमिश्क नगरा जो लईगे।

⁹सै तिन्नां दिनां तका नीं देक्खी सकया, कने नां किछ खादया कने नां पित्या।

¹⁰दमिश्क नगरा च हनन्याह नौआं रा इक चेला था तिसने प्रभु यीशुये दर्शण देईने गलाया, “हनन्याह!” तिने गलाया, “हाँ प्रभु।”

¹¹तां प्रभुये तिसने गलाया, “उट्ठीने तिसा गल़िया च जा तिसारा नौं जे सीधी आ, कने तित्थी यहूदा रे घरा च तरसुस नगरा रे रैहणे औल़े शाऊल नौआँ रे इक माहणुये रे बारे च पुछ; काँह्भई देख सै प्राथना करया राँ,

¹²कने तिने इक दर्शणा च देख्या भई हनन्याह नौआं रे इक्की माहणुये घरा च आईने तिस पर हात्थ रखे; ताकि सै फेरी भीं ते देखी सक्को।”

¹³हनन्याह ये जवाब दित्या, “हे प्रभु, मैं इस माहणुये रे बारे च बौहतीं ते सुणीरा भई इने यरूशलेम च तेरे पवित्र लोकां ने सौगी बौहत-बौहत बुराईयां किति रियां;

¹⁴कने येत्थी बी इस्सो मुखियायाजकां रिया तरफा ते अधिकार मिलीरा भई जो लोक तुहां पर विश्वास कराँ यें, तिन्हां सबनी जो बन्ही लो कने यरूशलेम नगरा च लेई जाओ।”

¹⁵पर प्रभु यीशुये हनन्याह ने गलाया, “तू चली जा; काँह्भई सै त अन्यजातियां कने राजयां कने इस्राएलियां रे सामणे मेरे बारे च प्रचार करने रे खातर मैं तिसजो चुणीरा।

¹⁶कने माह तिस्सो दसणा भई मेरे बारे च लोकां जो गलाणे खातर तिस्सो केढ़े-केढ़े दुख सैहणे पौणे।”

¹⁷तां हनन्याह उट्ठीने तिस घरा च गया तित्थी जे शाऊल था कने तिस पर अपणा हात्थ रखीने गलाया, “भाई शाऊल, प्रभु यीशु, सै जे तिस रस्ते च, तिसते जे तू आया तिज्जो दुस्या था, तिने इ मिन्जो भेजीरा भई तू फेरी भीं देखणे लगो कने पवित्र आत्मा ते पूरा भरी जाओ।”

¹⁸कने ताहलूं इ तिसरे आक्खीं ते छिलके जे पै कने सै देखणे लगया, कने उट्ठीने बपतिस्मा लया;

¹⁹फेरी रोटी खाईने ताकत मिली, सै किछ दिनां तका तिन्हां चेलयां ने सौगी रैया सै जे दमिश्क नगरा च थे

²⁰कने सै इकदम यहूदी सभा घराँ च यीशुये रा प्रचार करने लगया भई यीशु इ परमेशरा रा पुत्र आ।

²¹जितणयां लोकें तिसरा प्रचार सुणया, हैरान हुईने तिन्हां चते किछ बोलीराँ थे, “क्या ये सैई माहणु नींआ, सै जे यरूशलेम च मसीह यीशुये रे विश्वासियां जो नष्ट करने री कोशिश करया राँ था। कने क्या ये तिन्हांजो येत्थी पकड़ने कने मुखियायाजकां रे सामणे ले जाणे नीं आईरा था।”

²²पर शाऊल होर बी जादा सामर्था ने प्रचार करदा गया कने दमिश्क नगरा च रैहणे औल़े यहूदियां जो ये प्रमाणित करदे हुये भई येई मसीह आ, तिन्हांजो हराणे लगया।

²³ताहली जे शाऊला जो दमिश्क नगरा च रैहन्दे हुये बौहत दिन बितिगे, तां यहूदियें मिलीने तिस्सो मारने री शाजिश रची।

²⁴पर तिन्हां रिया योजना रा पता शाऊला जो लगीग्या। सै रात-दिन फाटकां पर तिसजो मारने रिया ताक्का च लगीरे रैयाँ थे।

²⁵पर राति जो तिसरे चेलयां तिस्सो टोकरे च बठाल़ीने, कने पत्थराँ री बणीरी बड्डिया ऊच्चिया दीवारा परा ते लटकाईने त्वारीत्या।

²⁶ताहली जे शाऊल यरूशलेम च पुज्जया, तां तिने दुज्जेयां विश्वासियां ने सौगी मिलणे री कोशिश किति, हलांकि तिन्हां चते तकरीवन सारे तिसते डरदे रै, काँह्भई तिन्हांजो ये विश्वास नीं था भई सै इक विश्वासी बणी गरा।

²⁷पर बरनबासे तिस्सो अप्पूँ सौगी प्रेरितां ला नेईने तिन्हांजो दस्या भई इने किस तरिके ने दमिश्क नगरा जो जान्दे वगत रस्ते च प्रभुये जो देख्या, कने तिने इसने गल्लां कित्तियां; फेरी दमिश्क नगरा च शाऊले बेझिझक हुईने यीशुये रे नौआं रा प्रचार कित्या।

²⁸शाऊल प्रेरितां सौगी यरूशलेम नगरा च औन्दा-जान्दा रैया

²⁹कने निधड़क हुईने प्रभु यीशुये रे नौआं रा प्रचार कराँ था; कने यूनानी भाषा बोलणे औल़े यहूदियां सौगी गल्ल-बात कने बाद-बवाद कराँ था; पर सै तिस्सो मारने रा जतन करने लगे।

³⁰ये जाणीने भई तिस्सो कैसरिया नगरा च लैई आये, कने तरसुस नगरा जो भेजित्या।

³¹इयां सारे यहूदिया, गलील, कने सामरिया प्रदेशा री कलीसिया जो चैन मिलीग्या कने तिन्हांरी तरक्की हुईगी; कने सै प्रभु यीशुये रे डरा कने पवित्र आत्मा रे शान्तिया च चलदी कने बधदी गई।

³²फेरी येढ़ा हुआ भई पतरस तिन्हां प्रदेशां च फिरदा हुआ, तिन्हां पवित्र लोकां ले बी पुज्जया सै जे लुद्दा नामक नगरा च रैयां थे।

³³तित्थी तिस्सो एनियास नौआं रा इक माहणु मिलया सै जे लकवे रा रोगी था, कने अट्ठां साल्लां ते मंजे पईरा था।

³⁴पतरसे तिस्सो गलाया, “ओ एनियास! यीशु मसीह तिज्जो ठीक कराँ। उट्ठ, कने अपणे बिस्तरे जो कठेर।” तां सै झटपट उट्ठीने खड़ा हुई गया।

³⁵तां लुद्दा कने शारोन रे सब्बीं रैहणे औल़यां तिस्सो देख्या कने प्रभु यीशुये पर विश्वास कित्या।

³⁶याफा नगरा च तबीता नामक विश्वासी थी। यूनानी भाषा च तिसारा नौं दोरकास[6] था। सै बौहत सारे भले-भले काम्म कने मदद कराँ थी।

³⁷ताहली जे पतरस लुद्दा च था तिस वगत सै बमार हुईने मरीगी; कने तिन्हें तिसाजो नहलाई ने भितरा च रखीत्या।

³⁸लुद्दा नगर याफा नगरा रे नेड़े था, चेलयां येढ़ा सुणीने भई पतरस त तित्थी इ हाया, दो माहणु भेज्जीने तिसने विनती किति, “अहांले औणे खातर देर मत करदा।”

³⁹तां पतरस उट्ठीने तिन्हां सौगी चली गया, कने तां जे तित्थी पुज्जया तां सै तिस्सो तित्थी लईगे। सब विधवें रोन्दियां-रोन्दियां तिसले खढ़ी ने, सै कुरते कने कपड़े जे दोरकास तिन्हांने सौगी रैंहदे बणाईरे थे, दसणे लगियां।

⁴⁰तां पतरसे सब्बीं जो बाहर कड्डी त्या, कने गोडयां टेक्कीने प्राथना किति कने लाशा खौ देखीने गलाया, “हे तबीता, उट्ठ।” तां तिसे अपणिया आक्खीं खोली तियां; कने पतरसा खौ देखीने उट्ठीने बैठिगी।

⁴¹तिने हत्था रे सहारे ने तिसाजो ठुआलया, कने पवित्र लोकें कने विधवां जो सद्दीने तिसाजो ज्यूंदा दस्सीत्या।

⁴²पर ये गल्ल सारे याफा नगरा च फैलीगी; कने बौहतीं प्रभु यीशुये पर विश्वास कित्या।

⁴³कने पतरस याफा नगरा च शमौन नौआं रे किसी चमड़े रे काम्म करने औल़े रे घरें बौहत दिन रैया।