Read Bilaspuri रोमियो 12 Bible Online

रोमियो 12 - Bilaspuri bible

रोमियो 12

¹इस खातर मेरे साथी विश्वासियो, परमेशरा री महान दया रिया वजह ने हऊँ तुहांजो विनती कराँ, भई अप्पूँजो पवित्र, इक जिऊंदा बलिदान्ना रे रुपा च परमेशरा जो खुश करदे हुये अर्पण करा। परमेशरा री अराधना करने रा येई सही तरीका।

²हुण होर अग्गे इस संसारा रिया रीता पर मता चलदे; पर परमेशर तुहांरे मना जो बदलने रे जरिये तुहांजो नया दिल देओ। ताकि तुहें परमेशरा रियां इच्छां जो जाणी सकगे, यानि सै जे भली, सै जे तिस्सो खुश कराँ इ कने सै जे उत्तम इ।

³इस खातर परमेशरा रे अनुग्रह रिया वजह ने सै बरदान जे तिने मिन्जो दित्या, तिस्सो ध्याना च रखदे हुये हऊँ तुहां चते हर इक्की ने बोलां, भई तेढ़ा जे समझणा चाहिन्दा तिसते बधीने कोई खुद अप्पूँजो नीं समझे; यनिके जितना विश्वास परमेशरे तुहांजो दित्या, तिसरे मुतावक अप्पूँजो समझा।

⁴काँह्भई तियां जे अहां चते हर इक्की रे शरीरा च बौहत सारे अंग ये, चाये सारयां अंगाँ रा काम्म इक्को जेआ निआं;

⁵तियां इ हलाँकि अहें बौहत सारे, पर मसीह च अहें इक जिस्मा रे रुपा च हुई जायें, इस तरिके ने अहें सारे मसीह विश्वासी इक दुज्जे सौगी जिस्मा रे अंगा साई जुड़ी जायें।

⁶तां फेरी तिसरे अनुग्रह रे मुतावक अहांजो लग-लग बरदान मिलीरे, अहें तिन्हांरा इस्तेमाल करिये, जे किसी जो भविष्यवाणिया रा बरदान मिलीरा, तां सै अपणे विश्वासा रे मुतावक भविष्यवाणी करे;

⁷जे किसी जो दुज्यां री सेवा करने रा बरदान मिलीरा, तां सै सेवा करो; जे कोई सखाणे औल़ा हो, तां सै सखाणे च लगीरा रौ;

⁸जे तुहांरा बरदान हौंसला देणे औल़ा ओ, तां तिस्सो हौंसला देन्दे रैहणा चाहिन्दा; जे किसी जो दान देणे रा बरदान मिलीरा, तां तिस्सो खुले दिला ने दान देणा चाहिन्दा; जे किसी जो अगुवाई करने रा बरदान मिलां, तां सै जोशा ने अगुवाई करे; सै जे दया करो, सै खुशिया ने करो।

⁹तुहांरा प्यार सच्चा ओ; बुराईया ते नफरत करा; भलाई करदे रौआ।

¹⁰भाईचारे रे प्यारा ने इक्की दुज्जे रे प्रति समर्पित रौआ, कने दुज्यां जो अप्पूँ ते बधीने आदर देआ।

¹¹खूब मेहणत करा कने आलसी मत बणाँ; अप्पूँजो प्रभुये री सेवा करने च पूरी तरह समर्पित करा।

¹²अपणिया आशा च खुश रौआ; परेशानियां च धैर्य रखा; कने हमेशा प्राथना करदे रौआ।

¹³परमेशरा रे लोकां री जरूरतां च मदद करा; मैहमान्नां रे आदर सत्कारा खातर हर वगत त्यार रौआ।

¹⁴अपणे सताणे औल़यां जो आशीष देआ; तिन्हांजो श्राप नीं देआ।

¹⁵खुश रैहणे औल़यां ने खुश रौआ, कने रोणे औल़यां ने रोआ।

¹⁶इक दूये ने मेल-जोल रखा, घमण्डी नीं बणा, पर गरीब लोकां ने बी संगती रक्खा; येढ़ा नीं समझा भई तुहें इ बौहत समझदार ये।

¹⁷बुराईया रा बदला किसी जो बुराईया ने मता देन्दे; सारयां लोकां रिया नज़राँ च सै जे ठीक आ तिसजो इ करने री सोच्चा।

¹⁸जे हुई सक्को, तां सारयां ने शान्तिया ने रैहणे री कोशिश करा।

¹⁹मेरे मित्रो, किसी ने खुद अप्पूँ बदला नीं लेणा, पर इस्सो परमेशरा रे गुस्से पर छड्डी देआ काँह्भई पवित्रशास्त्रा च लिखिरा : प्रभुये गलाया, “बदला लेणा मेरा काम्म आ, माह इ बदला देणा।”

²⁰पर “जे तेरा दुश्मण भुक्खा ओ तां तिस्सो खाणे जो रोटी दे, जे सै त्याह्या तां तिस्सो पीणे जो पाणी दे; काँह्भई जे तू येढ़ा कराँ तां सै तेरते शर्मिन्दा हूणा।”

²¹बुराईया ते मत हार पर अपणिया नेकिया ते बुराईया जो हरा।