Read Bilaspuri रोमियो 2 Bible Online

रोमियो 2 - Bilaspuri bible

रोमियो 2

¹इस खातर ओ दोष मढ़णे औल़े, तू चाये कोई बी कैं नीं ओ, तेरले कोई बहान्ना निआं; काँह्भई तिसा गल्ला खातर जे तू किसी पर दोष लाँ, तिसा गल्ला खातर तूं अप्पूँ बी दोषी बणाँ, इस खातर भई तू सै जे दोष लाँ, अप्पूँ सैई काम्म कराँ।

²कने हुण अहें जाणाँ ये भई परमेशर ठीक आ ताहली जे सै इस तरिके रे काम्म करने औल़यां जो सजा देआं।

³कने तुहें सै जे येढ़ा सोच्चां ये भई तिन्हां कम्मां खातर जे तुहें दुज्जेयां जो दोषी मन्नां ये कने अप्पूँ खुद सैई काम्म कराँ ये; तां क्या तुहें ये समझां ये भई तुहां परमेशरा रिया सजा ते बची जाणा?

⁴क्या तुहें परमेशरा रिया महान किरपा जो, कने सहनशक्तिया कने धैर्य जो घटिया जाणाँ ये? क्या तुहें ये नीं समझदे भई परमेशरा री किरपा तुहांरी मन फिराव करने च अगुवाई कराँ इ?

⁵पर तुहें पत्थर दिल कने पापी स्वभावा जो छडणा नीं चाहन्दे, येढ़ा करीने तुहें अपणिया सजा जो बधाया राँये कने ताहली जे परमेशरा रा सच्चा न्याय करने रा दिन औणा, तिस दिन परमेशरा तुहांजो बौहत भयानक सजा देणी।

⁶तिस हरेक माहणुये रा तिन्हांरे कर्मां रे मुज़ब न्याय करना।

⁷सै जे लगातार खरे कर्म करदे हुये महिमा, आदर कने अमरता रिया खोज्जा च रैं, तिन्हौं परमेशरा अनन्त जीवन देणा;

⁸पर सै लोक जे अपणे स्वार्था रिया वजह ने सच्चाईया जो छड्डिने झूट्ठा पर विश्वास कराँ यें, परमेशरा तिन्हां पर गुस्से हुईने तिन्हारा न्याय करना।

⁹कने तिस हर इक माहणुये पर दुख कने संकट औणे सै जे बुरा कराँ यें, पैहले यहूदिये पर फेरी अन्यजातियां पर;

¹⁰पर सै जे कोई अच्छाईया पर चलां, तिस्सो परमेशरा महिमा, आदर कने शान्ति देणी, पैहले यहूदिये जो कने फेरी अन्यजातियां जो।

¹¹काँह्भई परमेशर सबनीं लोकां जो इक्को जेआ देक्खां।

¹²इस खातर भई सै जे बिणा व्यवस्था पाये पाप कराँ ये, तिन्हां बगैर तिस तेई मरी बी जाणा; कने सै जे मूसा री व्यवस्था जो जाणदे हुये पाप कराँ ये, तिन्हांजो सजा बी व्यवस्था रे मुतावक ही मिलणी;

¹³काँह्भई सै लोक जे मूसा रिया व्यवस्था जो कथा साई सुणां यें, सै परमेशरा रिया नजरा च धर्मी नींये, पर सै जे व्यवस्था रा पालन कराँ ये सै परमेशरा रिया नज़राँ च धर्मी समझे जाणे।

¹⁴फेरी तां जे अन्यजाति लोक तिन्हांले जे व्यवस्था नीं, पर सै लोक स्वभावा तेई व्यवस्था रे मुतावक चलां यें, तां सै ये दस्सां भई क्या करना चाहिन्दा या क्या नीं करना चाहिन्दा, हलांकि तिन्हांले व्यवस्था नीं।

¹⁵सै व्यवस्था रियां गल्लां जो अपणे-अपणे मनां च लिखी रियां दस्सां ये कने तिन्हांरी अन्तरात्मा (विवेक) बी इसा गल्ला री गवाही देईं, कने तिन्हारा सोच-बचार अप्पूँ बाटियें तिन्हांजो दोष लगां; या तिन्हांजो निर्दोष बणां।

¹⁶ये गल्लां तिस दिन हुणियां ताहली जे परमेशर मेरिया प्रचार कित्ती रिया खुशखबरिया रे मुतावक यीशु मसीह रे जरिये माहणुये रियां गुप्त गल्लां रा न्याय करना।

¹⁷पर जे तू खुद अप्पूँजो यहूदी बोलां, व्यवस्था पर भरोसा रक्खां, कने अप्पूँजो परमेशरा रा खास माहणु समझीने घमण्ड कराँ,

¹⁸कने तू जाणाँ भई परमेशर तेरते क्या चाँह, कने क्या ठीक आ तिस्सो व्यवस्था ते चुणना तैं सिखीरा;

¹⁹कने तू भरोसे ने बोलां भई तू तिन्हां लोकां रा अगुवा सै जे आत्मिक तौर पर अन्धे लोक ये, कने तिन्हांरे खातर जोति ये सै जे अन्धकारा च गवाच्छी रे लोक ये,

²⁰कने नासमझां जो सखाणे औल़ा, कने बालकां रा उपदेशक आ; तू निश्चिंत आ भई तू सारा किछ पूरे तरिके ने जाणाँ कने तू जो किछ बोलां सै सच्च आ काँह्भई तेरले व्यवस्था इ।

²¹फेरी तू सै जे होरीं जो सखाँ, अप्पूँ खुद काँह नीं सिखदा? क्या तू सै जे चोरी नीं करने री सीख देआं, खुद अप्पूँ चोरी कराँ?

²²तू त बोल्लां, “व्यभिचार नीं करना,” क्या तू व्यभिचार कराँ? तू त मूर्तियां ते नफरत कराँ, फेरी क्या अप्पूँ इ मन्दरा जो लुट्टां?

²³तू त व्यवस्था रे बारे च घमण्ड कराँ, क्या व्यवस्था जो तोड़ीने परमेशरा रा नरादर कराँ?

²⁴“काँह्भई तुहांरिया वजह ने अन्यजातियां रे लोकां च परमेशरा रे नौआं री निंध्या हुआं इ,” तियां जे पवित्रशास्त्रा च लिखिरा।

²⁵जे तू व्यवस्था रा पालन कराँ, तां खतने रा फायदा त हाया, पर जे तू व्यवस्था जो तोड़ां, तां तेरा खतना बिणा खतना हुईरे माहणुये साई आ।

²⁶इस खातर जे बिणा खतने ते माहणु व्यवस्था रे नियमां जो मन्नां, तां क्या तिसरी बगैर खतने री ये दशा खतने रे बराबर नीं गिणी जाणी?

²⁷कने सै माहणु तिसरा जे शरीरा ते खतना नीं हुईरा, कने जे सै व्यवस्था रा पालन करो, तां क्या तिस माहणुये तिज्जो दोषी नीं मन्नणा, हलाँकि तेरले लिखिरी व्यवस्था इ कने खतना हुणे ते बाद बी व्यवस्था रा पालन नीं करदा?

²⁸तू हकीकत च सच्चा यहूदी नींआ, काँह्भई तेरा यहूदी परिवारा ते जन्म हुईरा या तेरा खतना हुईरा।

²⁹पर सच्चा यहूदी सैई हाया तिसरा दिल जे परमेशरा रिया नज़राँ च ठीक आ; कने सच्चा खतना पवित्र आत्मा रे जरिये दिला च हुआं, नां भई लिखी रिया व्यवस्था रे जरिये: येढ़े माहणुये री तारीफ माहणु नीं, बल्कि परमेशर कराँ।