Read Bilaspuri रोमियो 5 Bible Online

रोमियो 5 - Bilaspuri bible

रोमियो 5

¹इस खातर अहें विश्वासा ते धर्मी बणे, कांभई सै जे प्रभु यीशु मसीहे अहांरे खातर कित्या, तिसरे जरिए अहें परमेशरा सौगी शान्तिया ने रौ,

²अहांरे विश्वासा रिया वजह ते मसीहे अहांजो इस अनुग्रह च लन्दया तित्थी जे हुण अहें पुज्जीरे, अहें इसा गल्ला ते खुश हुआं ए भई अहांजो परमेशरा रिया महिमा च भागी हुणे री आशा इ।

³इतणा इ नीं, बल्कि ताहली जे अहें परेशानियां च हुआं ए तां बी आनन्दित हुई सक्कां ए, काँह्भई अहें जाणाँ ये भई ताहली जे अहें दुख सैआं ए तां बौहत अच्छे तरीके ने धीरज रखणा बी सिक्खां ए,

⁴कने परमेश्वर अहांजो स्वीकार करां कांभई अहें धीरज रखणा सिक्खीरा, कने कांभई सै अहांजो स्वीकार करां, इस खातर अहांजो आशा इ;

⁵कने ये आशा अहांजो निराश नीं हुणे देन्दी, काँह्भई पवित्र आत्मा सै जे परमेशरे अहांजो दित्तिरा, तिसरे जरिये परमेशरा रा प्यार अहांरे दिलां च भरी तरा।

⁶काँह्भई ताहली जे अहें अप्पूँजो बचाणे खातर असहाय थे, तां मसीह अहां पापी लोकां रे खातर तिस वगत मरया, जिस वगता जो जे परमेशरे चुणीरा था।

⁷किसी धर्मी माहणुये रे खातर कोई अपणी जान देई दो, येत बड़ा मुश्कल आ; पर हुई सक्कां किसी खरे माहणुये रे खातर अपणी जान देणे री कोई बी हिम्मत करी सक्कां।

⁸पर परमेशर अहां पर अपणे महान प्यारा जो इस तरिके ने परगट कराँ भई ताहली जे अहें पापी थे ताहली मसीह अहांरे खातर मरया।

⁹काँह्भई हुण तां जे अहें तिसरे खून्ना रिया वजह ते धर्मी बणिगे, तां हुण तिसरे जरिये न्याय रे दिन परमेशरा रिया सजा ते जरूर बची जांणे।

¹⁰काँह्भई ताहली जे अहें परमेशरा रे दुश्मण थे तिने अपणे पुत्रा रिया मौती रे जरिये अहांरा मेल-मलाप करवाया, तां हुण त तां जे अहांरा मेल-मलाप हुई चुक्कीरा तां मसीह रे जीवना रिया वजह ते अहें जरूर बची जाणे।

¹¹कने सिर्फ येई नीं, पर अहें अपणे प्रभु यीशु मसीह रे जरिये परमेशरा च आनन्द कराँ ये, तिसरिया बजह ने जे हुण अहांरा मेल हुईरा।

¹²इस खातर, तियां जे इक माहणु यनि आदम रे जरिये पाप संसारा च आया, कने आदम रे पापा रिया वजह ने मौत आई, कने इस तरिके ने मौत सारयां लोकां च फैल्लीगी काँह्भई सारयां पाप कित्तिरा था।

¹³परमेशरा री मूसा जो व्यवस्था देणे ते पैहले लोकें संसारा च पाप कित्या, पर तिस वगत व्यवस्था नीं थी इस खातर तिन्हांरा पाप नीं गिणया गया।

¹⁴पर आदम ते लेईने मूसा तक सारयां लोकें पाप कित्या कने सै सारे मरीगे, मौत तिन्हां लोकां जो बी तियां इ आई तिन्हेंजे आदमा साई पाप नीं कित्तिरे थे, आदम औणे औल़े मसीहे साई था।

¹⁵पर परमेशरा रा मुख्त बरदान आदम रे अपराधा साई नींआ। ये सच्च आ भई बौहत लोक इक्की माहणुये यनि आदमा रे पापा रिया वजह ने मरे। पर परमेशरा रे अनुग्रह कने तिसरे मुख्त बरदान बौहत सारयां लोकां रे खातर महान ए सै जे इक्की माहणुये यनि यीशु मसीह रे अनुग्रह ते औआं।

¹⁶सै बरदान जे परमेशरे अहांजो दित्या सै आदमा रे पापा साई नींआ, काँह्भई इक माहणुये रा पाप सजा लेईने आया। पर हलाँकि अहें बौहत सारे पाप कित्तिरे फेरी भीं परमेशरे अहांजो इक येढ़ा बरदान दित्तिरा सै जे अहांजो परमेशरा रिया नज़राँ च धर्मी बणां।

¹⁷काँह्भई ताहली जे इक्की माहणुये रे पापा रिया वजह ने सारे लोक मरे, तां हकीकत च सै लोक जे अनुग्रह कने धार्मिकता रे बरदान यीशु मसीह रे जरिये बौहत जादा पायें, सै लोक जिऊंदा रैहणे कने इक माहणु यीशु मसीह रे जरिये राज करगे।

¹⁸इस खातर तियां जे इक माहणुये रा पाप सारयां लोकां रे खातर सजा लेईने आया, तियां इ मसीह रे धर्मा रा काम्म बी सारयां लोकां रे खातर धर्मी बणने री बजह बणया सै जे जीवन देआं।

¹⁹काँह्भई तियां जे तिस इक्की माहणुये रे हुक्म न मनणे रिया वजह ने बौहत लोक पापी बणे, तियां इ इक्की माहणुये रे हुक्म मनणे रिया वजह ने बौहत लोक धर्मी बणने।

²⁰व्यवस्था इस खातर दित्ति गई ताकि सारे लोकां जो पता चली जो भई सै कितणे पापी थे। पर तियां जे लोकें जादा ते पाप कित्ते तियां इ परमेशरा रा अनुग्रह तिसते बी कई मान जादा हुया,

²¹भई तियां जे सारयां लोकें पाप कित्या कने सै सारे मरीगे, तियां इ परमेशरा रा अनुग्रह अहां पर राज कराँ कने परमेशरे अहांजो अहांरे प्रभु यीशु मसीह रिया वजह ते धर्मी बणाया। इसरा मतलब अहांजो अनन्त जीवन मिलणा।