Read Bilaspuri रोमियो 6 Bible Online

रोमियो 6 - Bilaspuri bible

रोमियो 6

¹तां फेरी अहांजो क्या बोलणा चाहिन्दा? तां क्या अहें लगातार पाप करदे रौ, ताकि परमेशरा रा अनुग्रह बधो?

²कदी मनी! अहें पापा रे खातर मरी चुक्कीरे इस खातर अहांजो लगातार पाप नीं करना चाहिन्दा।

³तुहें जाणाँ ये भई ताहली जे अहें मसीह यीशुये सौगी इक हुणे रे खातर बपतिस्मा लेआ था, तां अहें तिस सौगी मरीगे थे।

⁴ताहली जे अहें बपतिस्मा लेआ था, तां अहें मसीह ने सौगी मारे गये थे कने गड्डे गये थे ताकि अहें इक नई जिन्दगी जी सक्को, तियां जे मसीह पिता परमेशरा रिया महिमा रे जरिये मूईरयां चते जिऊंदा हुया था।

⁵जे अहें मसीह यीशुये रिया मौती च अपणे बपतिस्मे रे जरिये भागीदार हुये तां अहें बी पक्का तिस साई मूईरयां ते जिऊंदा कित्ते जाणे।

⁶अहें ये जाणाँ ये भई अहांरी पुराणी जिन्दगी यीशुये सौगी क्रूसा पर चढ़ाई तरी ताकि पापा ने भरीरा अहांरा शरीर खत्म हुई जाओ, कने अहें अग्गे जो पापा रे गुलाम नीं बणीरे रौ।

⁷काँह्भई ताहली जे अहें मराँ ये, तां अहें पापा रिया सामर्था ते अजाद हुई जायें।

⁸इस खातर जे अहें मसीह सौगी मरीगे, तां अहांरा ये विश्वास आ भई अहां तिस सौगी जिऊंदा बी हूणा।

⁹काँह्भई अहें जाणाँ ये भई मसीह मूईरयां चते जिऊंदा कित्या था सै फेरी कदी नीं मरना; कने मौती तिस पर कदीं राज नीं करना।

¹⁰ताहली जे मसीह मरया, सै इक इ बार सब्बीं रे पापा रे खातर मरया। पर हुण सै जिऊंदा, कने सिर्फ परमेशरा रे खातर जिऊंदा।

¹¹इयां इ तुहें अपणे बारे च बी सोच्चा भई तुहें पापा रे खातर मरी चुक्कीरे, पर मसीह यीशुये तुहांजो जीवन दित्या कने तुहें परमेशरा रे खातर जिऊंदा ये।

¹²इस खातर तुहांरे नाशवान शरीराँ पर पाप राज नीं करो, ताकि तुहें पापां रियां इच्छां रे मुतावक नीं चलो;

¹³कने अपणे शरीरा रे अंगाँ जो अधर्मा रे कम्मां खातर पापां रे हवाले नीं करा, वल्कि मुड़दयां चते जिऊंदा हुणे साई परमेशरा रे हवाले करा, कने अपणे शरीरा रे अंगाँ जो धार्मिकता रे कम्मां खातर परमेशरा जो सौंपा।

¹⁴फेरी तुहां पर पापां रा राज नीं हूणा, काँह्भई तुहें व्यवस्था रे सहारे नीं जिऊंदे वल्कि परमेशरा रे अनुग्रह रे सहारे जीआं ए।

¹⁵तां अहें क्या करिये? क्या अहें पाप करिये काँह्भई अहें व्यवस्था रे अधीन नींये, वल्कि परमेशरा रे अनुग्रह रे अधीन जीआं ये? कदीं मनी!

¹⁶तुहें जाणाँ ये भई ताहली जे तुहें किसी रा हुक्म मनणे खातर अप्पूँजो सेवका रे रुपा च तिस्सो सौंपी दें, तां तुहें सेबक हुये : फेरी चाये तुहें पापा रे दास बणा, तिसरा जे अन्त मौत इ, कने चाये तुहें हुक्मा रा पालन करा, सै जे तुहांजो धार्मिकता री ओर लेई जान्गा।

¹⁷तुहें पैहले पापा रे दास थे, पर सै उपदेश जे तुहांजो सखाया गईरा था हुण तुहें अपणे पूरे दिला ने तिसरा पालन कित्या, इस खातर हऊँ परमेशरा रा धन्यवाद कराँ।

¹⁸कने हुण परमेशरे तुहांजो पापा रिया सामर्था ते अजाद कित्तिरा कने तुहें परमेशरा रे दास बणी चुक्कीरे, ताकि तुहें सै जे सही आ सै करी सक्को।

¹⁹हऊँ ये उदाहरण इस खातर इस्तेमाल करी रां काँह्भई तुहांरे खातर ये समझणा मुश्किल आ। तियां जे तुहें खुद अप्पूँजो दास्सा साई बुरयां कम्मां रे खातर अपवित्रता कने बुराईया रे खातर सौंपया था, तियां इ हुण तुहें अप्पूँजो परमेशरा रिया सेवा रे खातर सौंपी देआ, ताकि तुहें पूरी तरह तिसरे हुणे।

²⁰काँह्भई ताहली जे तुहें पापां रे दास थे, तिस वगत तुहांजो परमेशरा जो खुश करने री कोई जरूरत नीं थी।

²¹तुहांरिया पुराणिया जिन्दगिया ते तुहांजो क्या फायदा हुया? तुहें सिर्फ इसते शर्मिन्दा ये, काँह्भई तिन्हां कम्मां रा नतीजा मौत इ।

²²पर हुण तुहांजो पापा ते छुटकारा मिली चुक्कीरा कने तुहें परमेशरा रे दास बणी चुक्कीरे। इस खातर इन्हां तुहांजो पवित्र बनाणा कने अनन्त जीवना री तरफ लेई जाणा।

²³काँह्भई पापा री मजदूरी त मौत इ, पर परमेशरा रा बरदान अहांरे प्रभु मसीह यीशुये च अनन्त जीवन आ।