Read Bilaspuri 1 कुरिन्थियों 10 Bible Online

1 कुरिन्थियों 10 - Bilaspuri bible

1 कुरिन्थियों 10

¹अरे साथी विश्वासियो, हऊँ नीं चाहंदा भई तुहें इसा गल्ला ते अंजाण रौ भई अहांरे सब पूर्वज बदल़ां रे थल्ले थे, कने सारे समुद्रा रे बिच्चा ते हुईने पार हुईगे।

²कने सब्बीं जणयां बद्दल़ा च कने समुद्रा च मूसे रा बपतिस्मा लैया।

³कने तिन्हें सब्बीं इक्को इ आत्मिक रोटी खाद्दि;

⁴कने सब्बीं इक्को इ आत्मिक पाणी पित्या, काँह्भई सै तिस आत्मिक चट्टान्ना ते पीआं थे सै जे तिन्हां सौगी-सौगी चलां थी, कने सै चट्टान मसीह था।

⁵पर परमेशर तिन्हां चते बौहतां ते खुश नीं हुया था, इस खातर सै सुनसान जगह च मरीगे।

⁶ये सारियां गल्लां अहां खातर इक उदाहरण आ, भई तियां जे अहांरे पूर्वजें लालच कित्या था, तियां इ अहें बुरियां चीज़ा रा लालच नीं करिये;

⁷कने नां तुहें मूर्ति पूजक बणो, तेढ़े जे तिन्हां चते कितणे इ बणीगरे थे, तियां जे पवित्रशास्त्रा च लिखिरा, “लोक खाणे कने पीणे रे खातर बैट्ठे, कने खेलणे-कूदणे उट्ठे।”

⁸कने नां अहें व्यभिचार करिये, तेढ़ा जे तिन्हां चते कितणेयां कित्या; कने इक्की दिना च तेई हज़ार मरीगे।

⁹कने नां अहें प्रभुये जो परखिये, तियां जे तिन्हां चते कितणेयां कित्या, कने सर्पां रे डसणे ते मरीगे।

¹⁰कने नां तुहें कुड़कुड़ाओ, तियां जे तिन्हां चते कितणे कुड़कुड़ाये कने नाश करने औल़े दूतां रे जरिये नाश कित्ते गये।

¹¹पर ये सब गल्लां, सै जे तिन्हां पर हुईयां, उदाहरणां रे तौरा पर थिआं; कने सै जे अहांरे खातर चेतावनिया रे रुपा च लिखी रियां, काँह्भई अहें तिस जुगा चे सै जे अन्त रे करीव आ।

¹²इस खातर सै जे समझां भई, “हऊँ विश्वासा च मजबूत आ,” सै चौकन्ने रौ भई किति पापा च नीं पई जाओ।

¹³तुहें अज्जा तक किसी येढ़िया परीक्षा च नीं पै, तिसा परीक्षा जो जे लोकें अनुभव नीं कित्या; कने परमेशर बफादार आ। तिस तुहांजो किसी येढ़िया परीक्षा च पौणे देणा सै जे तुहांरे सैहणे ते परे इ, पर परीक्षा ते बाहर निकल़णे खातर तिस तुहांजो ठीक रस्ता दसणा ताकि तिस्सो तुहें सही सक्को।

¹⁴इस खातर, अरे मेरे प्यारे मित्रो, मूर्ति पूजा ते दूर नट्ठा।

¹⁵हऊँ तुहांजो बुद्धिमान जाणीने येढ़ा बोलां: सै जे हऊँ बोलां, तिस्सो तुहें अपणे खातर परखा।

¹⁶सै कटोरा जे अहें प्रभु भोज्जा च इस्तेमाल कराँ ये कने तिस खातर जे अहें प्रभुये रा धन्यवाद कराँ ये: ताहली जे अहें तिस चते पीयें तां अहें मसीह रे खून्ना च सहभागी हुआं ये। कने रोटी सै जे अहें तोड़ां यें: ताहली जे अहें इसाजो खांये तां अहें मसीह रिया देहा च सहभागी हुआं ये।

¹⁷काँह्भई इक रोटी ये दस्सां इ भई अहें सै जे बौहत ये मसीह च इक शरीर ये, काँह्भई अहें सारे तिसा रोटिया च भागी हुआं ये।

¹⁸इस्राएली लोकां रे बारे च सोच्चा: क्या बलिदान्ना रे खाणे औल़े वेदिया रे सहभागी नींये?

¹⁹फेरी हऊँ क्या बोलां? क्या येढ़ा भई मूर्तिया पर चढ़ीरा बलिदान किछ हया या मूर्ति किछ इ?

²⁰नां, पर सै लोक सै जे बलिदान कराँ ये; सै परमेशरा जो नीं पर बुरीआत्मा जो बलिदान कराँ ये कने हऊँ नीं चाहन्दा भई तुहें दुष्टात्मा रे सहभागी हो।

²¹तुहें प्रभुये रे कटोरे कने बुरीआत्मा रे कटोरे दुईं चते नीं पी सकदे। तुहें प्रभुये री मेज बुरीआत्मां री मेज दुईं रे सहभागी नीं हुई सकदे।

²²क्या अहें प्रभुये जो गुस्सा दिलां ये? क्या अहें तिसते ताकतवर ये?

²³“मिन्जो सब किछ करने री अनुमति हाई,” पर सब किछ फायदे रा निआं; “मिन्जो सब किछ करने री अनुमति हाई,” पर सब किछ उपयोगी नींआ।

²⁴हर किसी जो दुज्यां रिया भलाई रे खातर सोचणा चाहिन्दा बल्कि अपणे खातर नीं।

²⁵जो किछ कसाईयां ले बिकां, तिस्सो खाओ कने अन्तरात्मा रिया वजह ते किछ नीं पुछो।

²⁶काँह्भई “धरती कने तिसच जो किछ हया सै सारा प्रभुये राई हाया।”

²⁷कने जे अविश्वासियां चते कोई तुहौं निऊंदा देओ, कने तुहें जाणा चाओ, तां जो किछ तुहांरे सामणे रखया जाओ सैई खायों: कने अन्तरात्मा रिया वजह ते किछ नीं पुच्छयों।

²⁸पर जे कोई तुहांजो बोल्लो, “येत मूर्तिया जो बल़ि कित्तिरी चीज़ इ,” तां तिस दसणे औल़े रिया वजह ते कने अन्तरात्मा रिया वजह ते नीं खावा।

²⁹मेरा मतलब तेरे अन्तरात्मा रिया वजह ने नीं, पर दुज्जे रे रिया अन्तरात्मा रिया वजह नेआ। काँह्भई मेरी अजादी काँह दुज्यां रिया अन्तरात्मा रे जरिये परखी जाओ?

³⁰जे हऊँ धन्यवाद करीने खाणे च शामिल हुई सक्कां, तां तिस पर जे हऊँ धन्यवाद कराँ तिसरिया वजह ते मेरी बदनामी काँह हुआंईं?

³¹इस खातर तुहें चाये खाओ, चाये पीओ, चाये जो किछ करो, सब किछ परमेशरा रिया महिमा रे खातर करा।

³²तुहें नां तां यहूदियां, नां यूनानियां, नां परमेशरा री कलीसिया रे खातर परेशानिया री वजह बणो।

³³तियां जे हऊँ बी सब्बीं गल्लां च सब्बीं जो खुश रखां, कने अपणा नीं पर बौहतां रे फायदे खातर कोशिश कराँ ताकि सै छुटकारा पाई सक्को।