Read Bilaspuri 1 कुरिन्थियों 12 Bible Online

1 कुरिन्थियों 12 - Bilaspuri bible

1 कुरिन्थियों 12

¹अरे साथी विश्वासियो, हऊँ नीं चाहन्दा भई तुहें आत्मिक वरदान्नां रे बारे ते अंजाण रौ।

²तुहें जाणाँ ये भई ताहली जे तुहें अन्यजाति थे, तां तुहें गुंगियां मूर्तियां रे पिच्छे तियां चलां थे तियां जे तुहांजो चलां थे।

³इस खातर हऊँ तुहांजो खबरदार कराँ भई जो कोई परमेशरा रे आत्मा री अगुवाईया ने बोलां, सै नीं बोलदा भई “यीशु स्रापित आ,” कने नां कोई पवित्र आत्मा ते बिणा बोल्ली सक्कां भई “यीशु प्रभु आ।”

⁴वरदान त कईयां किस्मां रे, पर आत्मा इक्को इ हया;

⁵कने सेवा बी कईयां किस्मां री, पर प्रभु इक इ हया;

⁶कने प्रभावा औल़े काम्म कईयां किस्मा रे, पर परमेशर इक इ हाया, सै जे सब्बीं च हर किस्मा रा प्रभाव पैदा कराँ।

⁷पर सब्बीं जो फायदा दिलाणे खातर हरेक माहणुये जो आत्मा रा प्रकाश दित्या जां।

⁸काँह्भई इक्की जो आत्मा ते बुद्धिया रियां गल्लां मिलां इयां, कने किसी दुज्जे जो तिसा इ आत्मा रे मुतावक ज्ञाना रियां गल्लां।

⁹किसी जो तिसा आत्मा ते विश्वास, कने किसी जो तिसा इ इक्की आत्मा ते चंगा करने रा वरदान मिलां।

¹⁰फेरी किसी जो सामर्था रे काम्म करने री ताकत, किसी जो भविष्यवाणी, किसी जो आत्मां री परख, किसी जो कई प्रकारा रियां भाषां बोलणे जो, कने किसी जो भाषां रा मतलब दसणा।

¹¹पर ये सब प्रभावाशाली काम्म सैई इक आत्मा कराँ, कने तिस किसी जो जे सै चांह तिस्सो बन्डी देआं।

¹²काँह्भई तियां जे देह त इक इ कने तिसरे अंग बौहत ये, कने तिसा इक्की देहा रे बौहत अंग हुणे पर बी सब मिलीने इक इ देह इ, तियां इ मसीह बी आ।

¹³काँह्भई अहें सब्बीं क्या यहूदी, क्या यूनानी, क्या दास, क्या अजाद, इक्की आत्मा रे जरिये इक देह हुणे रे खातर बपतिस्मा लैया, कने अहें सब्बीं इक इ आत्मा पाईरा।

¹⁴अहां रिया देहा च इक इ अंग नीं पर बौहत सारे अंग ये।

¹⁵जे पैर बोल्लो, “हऊँ हाथ निआं, इस खातर देहा रा निआं,” तां क्या सै इस वजह ते देहा रा निआं?

¹⁶कने जे कान्न बोल्लो, “हऊँ आक्ख नीं, इस खातर देहा रा निआं,” तां क्या सै इस वजह ते देहा रा निआं?

¹⁷जे सारी देह आक्ख इ हुंदी तां सुणना किता ते हुंदा? जे सारी देह कान्न इ हुंदी, तां सुंघणा किता ते हुंदा?

¹⁸पर सचमुच परमेशरे अंगाँ जो अपणिया इच्छा रे मुतावक इक-इक करीने देहा च रखया।

¹⁹जे सै सारे इक इ अंग हुन्दे, तां देह किति हुन्दी?

²⁰पर हुण अंग त बौहत ये, पर देह इक इ हई।

²¹आक्ख हत्था ने नीं बोल्ली सकदी, “मिन्जो तेरी जरूरत नीं,” कने नां सिर पैराँ ने बोल्ली सक्कां, “मिन्जो तेरी जरूरत नीं।”

²²पर देहा रे सै अंग सै जे दुज्यां ते कमजोर लगां ये, बौहत इ जरूरी ये;

²³कने देह तिन्हां अंगाँ रे तिन्हौं जे अहें आदरा रे लायक नीं समझदे, तिन्हौं इ अहें जादा आदर देआंये; कने अहांरे शोभा नीं देणे औल़े अंग होर बी जादा शोभा देणे औल़े हुई जांये,

²⁴फेरी अहांरे शोभा देणे औल़े अंगाँ जो इसरी जरूरत नीं। पर परमेशरे देहा जो येढ़ा बणाई तरा भई तिस अंगा जो जे आदरा री घटी थी तिस्सो होर बी बौहत आदर मिलो।

²⁵ताकि देहा च फूट नीं पौ, पर अंग इक्की दुज्जे री बराबर चिन्ता करो।

²⁶इस खातर जे इक्की अंगा जो दुख मिलां, तां सब अंग तिसने सौगी दुख पांये; कने जे इक्की अंगा री बडयाई हुआं इ, तां सब अंग तिसने सौगी नन्द मनायें।

²⁷इयां इ तुहें सब मिलीने मसीह री देह ये, कने लग-लग तिसरे अंग ये;

²⁸कने परमेशरे कलीसिया च लग-लग माहणु नियुक्त कित्तिरे : पैहले प्रेरित, दुज्जे भविष्यवक्ता, तिज्जे सखाणे औल़े, फेरी सामर्था रा काम्म करने औल़े, चंगा करने औल़े, मदद करने औल़े, प्रबन्ध करने औल़े, लग-लग किस्मा री भाषायें बोलणे औल़े।

²⁹क्या सब प्रेरित ये? क्या सब भविष्यवक्ता ये? क्या सब सखाणे औल़े? क्या सब सामर्था रे काम्म करने औल़े?

³⁰क्या सब्बीं जो चंगा करने रा वरदान मिलया? क्या सारे कईयां किस्मा री भाषां बोलां यें?

³¹क्या सब अनुवाद कराँ ये? तुहें बड़े-ते-बड़े वरदान्ना रिया धुन्ना च रैं। पर हऊँ तुहांजो होर बी सब्बीं ते खरा रस्ता दसगा?