Read Bilaspuri 1 कुरिन्थियों 15 Bible Online

1 कुरिन्थियों 15 - Bilaspuri bible

1 कुरिन्थियों 15

¹अरे साथी विश्वासियो, हुण हऊँ तुहांजो सैई खुशखबरी याद दिलाणा चांह सै जे पैहले हऊँ प्रचार करी चुक्कीरा, तिस्सो जे तुहें ग्रहण बी कित्या था कने तिसच जे तुहें लगातार विश्वास बी कराँ ये।

²तिसरे जरिये तुहांरा छुटकारा बी हुआं, जे तिस खुशखबरिया जो सै जे मैं तुहांजो सुणाई थी याद रखां ये। नैत तुहांरा विश्वास करना बेकार आ।

³इस वजह ते मैं तुहांजो बौहत खास सन्देश दस्या, सै जे मिन्जो मिलया। सै सन्देश येआ: पवित्रशास्त्रा रे मुतावक यीशु मसीह अहांरे पापां रे खातर मरया,

⁴कने गड्डया गया; कने पवित्रशास्त्रा रे मुतावक तिज्जे दिन जी उट्ठया,

⁵कने मसीह कैफा जो कने फेरी बाराँ चेलयां जो दिखाई दित्या।

⁶फेरी सै पांज्ज सौ ते जादा विश्वासियां जो इक साथ दिखाई दित्या, तिन्हां चते बौहत सारे लोक हुण तक ज्यूंदे हलाँकि किछ लोक मरी चुक्कीरे।

⁷फेरी सै याकूब जो दिखाई दित्या फेरी सारयां प्रेरितां जो दिखाई दित्या,

⁸सब्बीं ते बाद मिन्जो बी दिखाई दित्या, पर हऊँ इस तरिके ने प्रेरित बणया सै जे बौहत विचित्र आ।

⁹काँह्भई हऊँ प्रेरितां च सब ते छोट्टा, कने प्रेरित कहलाणे लायक मनीं आ, काँह्भई मैं परमेशरा री कलीसिया जो सताईरा था।

¹⁰पर हऊँ जो किछ बी आ, परमेशरा रे अनुग्रह तेआ। कने तिसरा अनुग्रह सै जे माह पर हुआ, सै बेकार नीं हुया पर मैं तिन्हां सब्बीं प्रेरितां ते बधीने मेहणत बी कित्तिरी; तां बी ये मेरिया तरफा ते नीं हुआ; पर परमेशरा रे अनुग्रह ते सै जे मांह पर था।

¹¹इस खातर चाये हऊँ आ, चाये सै ओ, अहें येई प्रचार कराँ ये, कने इस पर तुहें विश्वास बी कित्या।

¹²हुण जे मसीह रा ये प्रचार कित्या जां, भई मसीह मूईरयां चते ज्यूंदा हुईरा, तां तुहां चते कितणे कियां बोल्ली सक्कां ये, भई मूईरयां रा भीं ते जिऊंदा हूणा इ नींआ?

¹³जे मूईरयां रा भीं ते जिऊंदा हूणा हाया इ निआं, तां मसीह बी नीं जिऊंदा हुआ।

¹⁴कने जे मसीह नीं जिऊंदा हुया, तां अहांरा प्रचार करना बेकार आ; कने तुहांरा विश्वास बी बेकार आ।

¹⁵पर अहें परमेशरा रे झूट्ठे गवाह ठैहरे; काँह्भई अहें परमेशरा रे बारे च ये गवाही दित्तिरी भई तिने मसीह जो ज्यूंदा कित्या। पर जे ये सच्च आ भई मूईरे नीं जिऊंदा हुन्दे, तां परमेशरे मसीह जो मूईरयां चते जिऊंदा नीं कित्या।

¹⁶कने जे मुड़दे नीं जिऊंदा हुये, तां मसीह बी नीं जिऊंदा हुया।

¹⁷कने जे मसीह नीं जिऊंदा हुया, तां तुहांरा विश्वास बेकार आ; कने तुहें हूणा तक अपणयां पापां ची जीया राँये।

¹⁸फेरी सै विश्वासी जे मसीह च मरी चुक्कीरे, सै बी नाश हुये।

¹⁹जे अहें सिर्फ इसा इ जिन्दगिया च मसीह ते आशा रक्खां ये, तां अहें दुज्यां सब माहणुआं ते जादा बदनसीब ये।

²⁰पर हकीकत च मसीह मूईरयां चते जिऊंदा हुईरा, कने सै जे मरी चुक्कीरे, तिन्हां च जिऊंदा हुणे औल़ा सै पैहला हुया।

²¹काँह्भई ताहली जे माहणुये रे जरिये मौत आई; तां माहणुये रे जरिये इ मूईरयां रा जिऊंदा हूणा बी हया।

²²कने तियां जे आदमा रिया वजह ने सारे मराँ ये, तियां इ मसीह च सब जिऊंदा कित्ते जाणे।

²³पर हरेक अपणिया-अपणिया बारिया ते: जिऊंदा हुणे औल़यां च पैहले मसीह; फेरी तिसरे औणे पर तिसरे लोक।

²⁴इसते बाद अन्त हूणा, तिस वगत मसीहे सारी प्रधानता कने सारा अधिकार कने सामर्था रा अन्त करीने राज्जा जो परमेशर पिता रे हत्था च सौंपी देणा।

²⁵काँह्भई तदुआं तक जे सै अपणे सारयां दुश्मणां जो हराई नीं देओ, तदुआं तका राजे साई तिसरा राज करना जरूरी आ।

²⁶सब्बीं ते आखरी दुश्मण तिसरा जे अन्त कित्या जाणा, सै मौत इ।

²⁷काँह्भई “परमेशरे सब किछ मसीह रे अधिकारा च करित्या।” ताहली जे सै बोलां भई “सब किछ” तिसरे अधीन करी दित्या गईरा, तां ये स्पष्ट आ भई इसच परमेशर शामिल नींआ तिने जे सब किछ मसीह रे अधीन करित्या।

²⁸कने ताहली जे सब किछ तिसरे अधीन हुई जाणा, तां पुत्रा बी खुद तिसरे अधीन हुई जाणा तिने जे सब किछ तिसरे अधीन करित्या; ताकि सब्बीं च परमेशर इ सब किछ ओ।

²⁹हुण जे मुड़दयां रा भीं ते जिऊंदा हूणा हाया इ निआं, तां सै लोक जे मूईरयां खातर बपतिस्मा लैं, सै क्या करगे? जे मूईरे लोक जिऊंदा नीं हुये तां फेरी लोक कजो तिन्हांरे खातर बपतिस्मा लैं?

³⁰कने अहें बी कजो हर वगत खतरे च पैईरे रैं?

³¹अरे साथी विश्वासियो, तियां जे ये सच्च आ भई हऊँ तुहांरे बारे च घमण्ड कराँ काँह्भई तुहें अहांरे प्रभु मसीह यीशुये चे, तियां इ ये बी सच्च आ भई हऊँ हर रोज मौती रा सामना कराँ।

³²जे हऊँ सिर्फ माहणुये रिया आशा रिया वजह ने इफिसुस च अपणे बरोधियां ने जंगली जानबराँ साई लड़या, तां मिन्जो क्या फायदा हुया? जे मुड़दे जिऊंदा नीं कित्ते जांगे, तियां जे लोक कई बार बोलां ये “तां औआ, खाईये-पीये, काँह्भई काल्ल त मरी जाणा।”

³³इन्हां गल्लां रे जरिये धोखा नीं खाणा, “बुरी संगती खरे चरित्रा जो बगाड़ी देईं।”

³⁴तुहें अपणे होशा च आई जावा कने पाप करना बन्द करा; काँह्भई कितणे येढ़े लोक ये सै जे परमेशरा जो नीं जाणदे, हऊँ तुहांजो शर्मिन्दा करने खातर ये बोलां।

³⁵हुण कोई ये पुच्छी सक्कां, “मुड़दे कियां जिऊंदा कित्ते जाणे? कने तिन्हांरा शरीर किस तरिके रा हूणा?”

³⁶अरे मूर्ख! जो किछ तू बांह, तदुआं तका जे सै नीं मरो जिऊंदा नीं हुंदा।

³⁷कने सै जे तू बांह, ये सै शरीर निआं सै जे जमणे हुणे औल़ा, पर सिर्फ दाणा, चाये कणका रा, चाये किसी होरी नाजा रा हो।

³⁸पर परमेशर अपणिया मर्जिया मुतावक तिसजो शरीर देआं; कने हरेक ब्यूआ जो तिसरा खास शरीर देआं।

³⁹सब शरीर इक्की साई नीं ये: पर माहणुआं रा शरीर होर आ, जानबराँ रा होर आ; पंछियां रा होर आ, मच्छियां रा शरीर होर जेआ।

⁴⁰स्वर्गीय देह कने पार्थिव देह बी हई। पर स्वर्गीय देहा रा तेज होर आ कने पार्थिव देहा रा होर आ।

⁴¹सूरजा रा तेज होर आ, चन्दा रा तेज होर आ, तारागणां रा तेज होर आ, कने इक्की तारे ते दुज्जे तारे रे तेज्जा च फर्क आ।

⁴²मुड़दयां रा जिऊंदा हूणा बी येढ़ा इ हया। देह नाशवान दशा च दफनाई जाईं, कने अविनाशी रुपा च जिऊंदा हुई जांई।

⁴³ताहली जे शरीरा जो दफनाया जां, तां सै बौहत गन्दा कने कमजोर हुआं, पर ताहली जे सै जिऊंदा हुई जां, तां सै बौहत सुन्दर कने मजबूत हुआं।

⁴⁴ताहली जे सै दफनाया जां, तां सै इक शारीरिक शरीर आ, कने ताहली जे जिऊंदा हुई जां, तां सै इक आत्मिक शरीर आ। जे इक शारीरिक शरीर आ तां इक आत्मिक शरीर बी आ।

⁴⁵पवित्रशास्त्रा च ये लिखिरा, “पैहला माहणु यनि आदम जिऊंदा प्राणी हुया” कने आखरी आदम यनि मसीह जीवन देणे औल़ी आत्मा हुया।

⁴⁶पर पैहले आत्मिक नीं था, पर शारीरिक था, इसते बाद आत्मिक हुया।

⁴⁷पैहला माहणु आदम धरतिया रा यनि मिट्टिया रा था; कने दुज्जा माहणु यनि मसीह स्वर्गा ते आ।

⁴⁸जितने लोक धरतिया रे सै तिस साई ये सै जे धरतिया ते बणाया गया था यनि आदम; कने सै जे स्वर्गा रे सै तिस साई ये सै जे स्वर्गा ते आईरा था यनि मसीह।

⁴⁹कने तियां जे अहें तिसरा रुप धारण कित्या सै जे धरतिया रा था, तियां इ अहां तिसरा रुप धारण करना सै जे स्वर्गा तेआ।

⁵⁰अरे साथी विश्वासियो, हऊँ ये बोलां भई खून कने माँस परमेशरा रे राज्जा रे अधिकारी नीं हुई सकदे, कने नां विनाश अविनाशिये रा अधिकारी हुई सक्कां।

⁵¹देक्खा, हऊँ तुहांजो भेता री गल्ल बोलां, भई अहां सब्बीं नीं मरना, पर ताहली जे आखरी तुरही बजणी अहें सब पला च कने पलक झपकदे इ बदली जाणे। काँह्भई ताहली जे तुरही बजाई जाणी मुड़दे जिऊंदा हुई जाणे कने फेरी कदी नीं मरने कने अहां बदली जाणा।

⁵²

⁵³काँह्भई जरूरी आ, भई सै नाशवान शरीर अविनाशिये जो धारण करी लो, कने ये मरणहार शरीर अमरता जो धारण करी लो।

⁵⁴कने ताहली जे ये नाशवान अविनाश जो धारण करी लेन्गा, कने ये मरणहार अमरता जो धारण करी लेन्गा, फेरी सै वचन सै जे पवित्रशास्त्रा च लिखिरा, पूरा हुई जाणा, “विजय मौती जो निंगल़ी ल्या।

⁵⁵अरे मौत तेरी जीत किति रैई? अरे मौत तेरा डंग किति रैया?”

⁵⁶मौती रा डंग पाप आ; कने पापा री ताकत व्यवस्था इ।

⁵⁷पर परमेशरा रा धन्यवाद ओ, सै जे अहांरे प्रभु यीशु मसीह रे जरिये अहांजो विजय देआं।

⁵⁸इस खातर अरे मेरे प्यारे साथी विश्वासियो, अपणे विश्वासा च मजबूत रौआ कने गल़त शिक्षां ते भरमाये नीं जाओ, कने प्रभुये रे कम्मा च हमेशा बधदे जाओ, काँह्भई तुहें जाणाँ ये भई तुहांरी मेहणत प्रभु च बेकार नीं।