Read Bilaspuri 1 कुरिन्थियों 16 Bible Online

1 कुरिन्थियों 16 - Bilaspuri bible

1 कुरिन्थियों 16

¹हुण पवित्र लोकां रिया मददा खातर चन्दे रे बारे च: तेढ़ी आज्ञा जे मैं गलातिया रिया कलीसियां जो दित्ति, तियां इ तुहें बी करा।

²हफ्ते रे पैहले दिन तुहां चते हर इक अपणी-अपणी कमाईया रे मुतावक किछ अप्पूँ ले रखी छड्डा, ताकि मेरे औणे पर चन्दा नीं कठेरने पौ।

³कने ताहली जे मांह औणा, तां तिन्हांजो जे तुहें चाहन्गे तिन्हौं हऊँ चिट्ठियां देईने भेजी देंगा, ताकि तुहांरा दान यरूशलेम पहुँचाई दो।

⁴कने जे मेरा जाणा बी ठीक हुया, तां तिन्हां मेरे सौगी जाणा।

⁵कने मांह मकिदुनिया प्रदेश हुईने तुहांले औणा, काँह्भई मिन्जो मकिदुनिया हुईने जाणा जरूरी आ।

⁶पर हुई सक्कां भई हऊँ किछ वगत तुहांले इ रुकी जाऊँ कने सर्दियां रा ये मौसम तुहांरे येत्थी बिताऊँ, ताकि जिस तरफ मांह जाणा, तिस तरफ जाणे च तुहें मेरी मदद करी सक्को।

⁷काँह्भई हऊँ हुण रस्ते च तुहांजो मिलणा नीं चाहन्दा; पर मिन्जो आशा इ भई जे प्रभु चाओ तां किछ वगत तुहां सौगी बिताई लेंगा।

⁸पर मांह पिन्तेकुस्त त्‍योहारा तक इफिसुस नगरा च रैहणा।

⁹काँह्भई येत्थी प्रभावशाली कम्मा रे खातर मिन्जो सही मौका मिलीरा, पर मेरा बिरोध करने औल़े बौहत लोक ये।

¹⁰जे तिमुथियुस आईजो, तां देख्यां भई सै तुहांरे येत्थी निडर रौ; काँह्भई सै मेरे साई प्रभुये रा काम्म कराँ।

¹¹इस खातर कोई तिस्सो नीच नीं जाणो, पर तिस्सो यात्रा खातर जो किछ जरूरी आ सै सारा किछ देईने भेजी देआं, ताकि सै मेरले आईजो; काँह्भई हऊँ तिसरा इन्तजार करीराँ भई सै साथी विश्वासियां सौगी आओ।

¹²हुण अहांरे साथी विश्वासी अपुल्लोसा रे बारे च: मैं तिसने बौहत विनती कित्ती भई तुहांले साथी विश्वासियां सौगी जाओ; पर तिन्हें इस बगता जाणे री किछ बी इच्छा नीं कित्ती, पर ताहली मौका औणा तां तिस आई जाणा।

¹³जागदे रौआं, विश्वासा च बणीरे रौआ, निडर बणा, विश्वासा च मजबूत रौआ।

¹⁴तुहें जो किछ कराँ ये प्यारा ने करा।

¹⁵साथी विश्वासियो तुहें स्तिफनुस रे घराने जो जाणाँ ये, भई सै अखाया प्रदेशा रे पैहले विश्वासी ये, कने पवित्र लोकां री सेवा रे खातर त्‍यार रैं।

¹⁶इस खातर साथी विश्वासियो हऊँ तुहांजो विनती कराँ भई येढ़यां अगुवेयां रे अधीन रौआ, सै जे मेहणत कराँ ये कने सही भगतिया ने सेवा कराँ ये।

¹⁷हऊँ खुश था ताहली जे स्तिफनुस कने फूरतूनातुस कने अखइकुस आये, काँह्भई तिन्हें तेरिया कमिया जो पूरा कित्तिरा।

¹⁸कने तिन्हें मिन्जो हौंसला दित्या तियां जे तिन्हें तुहांजो बी दित्या, इस खातर तुहौं येढ़यां लोकां रा आदर करना चाहिन्दा।

¹⁹आसिया प्रदेशा री कलीसियां रिया तरफा ते तुहांजो नमस्कार; अक्विला कने तिसरी जनाना प्रिस्का रा कने तिन्हांरे घरा रिया कलीसिया रा बी तुहौं प्रभुये च बौहत-बौहत नमस्कार!

²⁰सब साथी विश्वासियां रा तुहांजो नमस्कार: गले लगीने अप्पूँ चियें नमस्कार करा।

²¹हऊँ पौलुस तुहांजो अपणे हत्था ते ये नमस्कार लिखां। जे कोई प्रभुये ने प्यार नीं रक्खो तां सै स्रापित हो।

²²हे अहांरे प्रभु औ!

²³प्रभु यीशुये रा अनुग्रह तुहां पर हुन्दा रौ।

²⁴मसीह यीशुये च मेरा प्यार तुहां सब्बीं सौगी रौ। आमीन।