Read Bilaspuri 1 कुरिन्थियों 4 Bible Online

1 कुरिन्थियों 4 - Bilaspuri bible

1 कुरिन्थियों 4

¹तां माहणु अहौं मसीह रे सेवक कने परमेशरा रे भेतां रे भण्डारी समझो।

²हुण भण्डारियां ते ये आशा कित्ती जाईं भई सै बफादार हुणे चाहिन्दे।

³पर ये मेरे खातर मायना नीं रखदा जे मेरा न्याय तुहांरे जरिये कने माहणुआं रिया किसी अदालता रे जरिये हो, हकीकत च हऊँ खुद अपणा न्याय नीं करदा।

⁴काँह्भई मेरा अन्तरात्मा मिन्जो किसी गल्ला च इल्जाम नीं लगान्दा, पर इसते हऊँ निर्दोष नीं ठैहरदा, काँह्भई प्रभु इ हाया सै जे मेरा न्याय कराँ।

⁵इस खातर तदुआं तकौ जे प्रभु नीं आओ, बगता ते पैहले किसी गल्लां रा न्याय नीं करा, सैई अन्धेरे रियां छिपि रियां गल्लां जो लोई च दसगा, कने माहणुये रे दिला रियां गल्लां जो प्रगट करगा, तां तिस वगत हरेक माहणुये परमेशरा रिया तरफा ते अपणी प्रशंसा पाणी।

⁶अरे साथी विश्वासियो, मैं इन्हां गल्लां च तुहांरिया भलाईया रे खातर अपणी कने अपुल्लोसा री चर्चा इक उदाहरणा साई पेश कित्ती, ताकि तुहें लिखी रियां गल्लां रा मतलब अहांते सिक्खी सक्को, “लिखी रियां गल्लां ते बधीने जादा अग्गे नीं जाओ।” फेरी तुहां इक्की माहणुये पर घमण्ड नीं करना कने दुज्जे जो नीच नीं जाणना।

⁷काँह्भई किसी माहणुये तुहौं दुज्यां ते जादा खास नीं बणाया कने सै किछ जे तेरले आ सै तिज्जो परमेशरे दित्तिरा। कने तंजे तिज्जो मिलीरा, तां अपणे बारे च घमण्ड करना तेरे खातर ठीक नींआ।

⁸तुहांजो लगां भई तुहें लोक तृप्त हुई चुक्कीरे, तुहें अमीर हुईगरे, तुहें अहांते बगैर राजे बणी चुक्कीरे; पर अच्छा हुंदा भई तुहें सच्चीजो राजा बणी जान्दे ताकि अहें बी तुहां सौगी राजा बणी जान्दे।

⁹मिन्जो येढ़ा लगां भई परमेशरे अहां प्रेरितां जो जलूसा च मौती री सजा पाईरे माहणुये साई सब्बीते आखिरी जगह च रखीरा। अहें सारे संसार, स्वर्गदूतां कने माहणुआं रे सामणे इक तमाशा बणीगरे।

¹⁰इस संसारा रे लोक सोच्चां ये भई अहें मसीह रे खातर मूर्ख ये, पर तुहें सोच्चां ये भई तुहें मसीह च बुद्धिमान ये; बौहत लोक सोच्चां ये भई अहें निर्बल ये, पर तुहें सोच्चां ये भई तुहें बलवान ये, तुहौं लोक आदर दें, पर सै अहांरा निरादर कराँ ये।

¹¹अहें अज्जा तकौ भूखे, त्याये, कने फटे पुराणे कपड़े पैहनां ये, कने मार खांये, कने बेघर रैं;

¹²कने अहें अपणे हात्थां ने अप्पूँ मेहणत कराँ ये। ताहली जे लोक अहांजो गाल़ी दें, तां अहें तिन्हांजो आशीष देआंये; ताहली जे लोक अहांजो सतायें, तां अहें सही लैं।

¹³ताहली जे लोक अहांजो बदनाम कराँ ये, तां अहें विनम्रता ने जबाब दें। लोक हुण बी अहांने येढ़ा बर्ताव कराँ ये मन्नो अहें संसारा रा कचरा कने समाजा रा कूड़ा कचरा ये।

¹⁴ये सारा किछ हऊँ तुहांजो शर्मिन्दा करने खातर नीं लिखिराँ, पर अपणे प्यारे बच्चे समझीने तुहांजो चेतावनी देआं।

¹⁵काँह्भई जे मसीह च तुहांरे सखाणे औल़े दस हजार बी हुंदे, तां बी तुहांरे बौहत पिता नींये; काँह्भई मसीह यीशु च खुशखबरिया रे जरिया हऊँ तुहांरा पिता हुया।

¹⁶इस खातर हऊँ तुहांजो विनती कराँ भई मेरे साई चाल चला।

¹⁷इस खातर मैं तिमुथियुसा जो तुहांले भेज्जी राँ, सै जे मेरा प्यारा पुत्र कने प्रभुये च बफादार पुत्र आ। तिस तुहांजो मसीह च मेरा चरित्र याद दिलाणा, तियां जे हऊँ हर जगह हरेक कलीसिया च उपदेश देआं।

¹⁸तुहां चते किछ लोक ये सोच्चीने घमण्ड कराँ ये भई मांह होर तुहांले नीं औणा।

¹⁹पर प्रभुये चाहया तां माह तुहांले बौहत इ छोड़े औणा, तां फेरी नां सिर्फ तिन्हां घमण्डी लोकां रिया शिक्षा, पर तिन्हां रिया सामर्था जो बी जाणी लेन्गा।

²⁰काँह्भई परमेशरा रा राज गल्लां च नीं पर सामर्था चा।

²¹तुहें क्या चांये? क्या हऊँ डन्डा लईने तुहांले आऊं, या प्यार कने नम्रता रिया आत्मा सौगी?